អ្នកនាំពាក្យគណបក្សប្រឆាំងបាននិយាយកាលពីម្សិលមិញថា លោក ប៉ែន សុវណ្ណ សមាជិកសភាគណបក្សសង្គ្រោះជាតិ និងជាអតីតនាយករដ្ឋមន្ត្រីកំពុងត្រៀមខ្លួនវិលត្រឡប់មកប្រទេសកម្ពុជាវិញហើយ បន្ទាប់ពីទៅព្យាបាលជំងឺដាច់សរសៃឈាមក្នុងខួរក្បាលកាលពីខែមុនក្នុងប្រទេសសិង្ហបុរី ដែលធ្វើឲ្យលោកស្លាប់មួយចំហៀងខ្លួន។
យោងតាមលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានឲ្យដឹងថា លោក ប៉ែន សុវណ្ណ ដែលជានាយករដ្ឋមន្ត្រីលើកដំបូងក្នុងប្រទេសកម្ពុជារយៈពេលខ្លីក្រោយរបបខ្មែរក្រហមក្នុងឆ្នាំ១៩៨១ ត្រូវបានអនុញ្ញាតឲ្យចេញពីមន្ទីរពេទ្យកាលពីថ្ងៃសុក្រ ហើយឥឡូវនេះលោកបានធូរស្រាលពីជំងឺដាច់សរសៃឈាមក្នុងខួរក្បាល ហើយកំពុងស្នាក់នៅសណ្ឋាគារមួយ។
លោកបានមានប្រសាសន៍ថា “លោក ប៉ែន សុវណ្ណ បានចេញមន្ទីរពេទ្យទៅសម្រាកក្នុងសណ្ឋាគារមួយរហូតដល់លោកត្រូវគ្រូពេទ្យអនុញ្ញាតឲ្យធ្វើដំណើរមកប្រទេសកម្ពុជាវិញ។ គាត់មិនដូចពីមុនទេ ចាប់តាំងពីយើងបានសង្គ្រោះជីវិតរបស់គាត់មក។ គាត់ស្លាប់មួយចំហៀងខ្លួន។ ខ្ញុំទទួលបានព័ត៌មានថា ផ្នែកខាងស្ដាំនៃរាងកាយរបស់គាត់កម្រើកមិនរួចឡើយ”។
ប៉ុន្តែលោក យ៉ែម បុញ្ញឫទ្ធិ បានមានប្រសាសន៍ថា គណបក្សប្រឆាំងនឹងមិនដាក់អ្នកជំនួសលោក ប៉ែន សុវណ្ណ អាយុ៧៨ឆ្នាំ ជាសមាជិកសភាមួយរូបក្នុងចំណោមសមាជិកសភា៥៥រូប បើទោះជាឥឡូវនេះលោកស្លាប់មួយចំហៀងខ្លួនក៏ដោយ។
លោកបានមានប្រសាសន៍ថា “យើងនឹងរក្សាតួនាទីនេះសម្រាប់គាត់ រហូតដល់តួនាទីរបស់គាត់អស់សុពលភាព។ ឥឡូវនេះគាត់បានធូរស្រាលច្រើនហើយ ប៉ុន្តែគាត់មិនអាចនិយាយកើតទេឥឡូវនេះ ពីព្រោះគាត់អាចបើកភ្នែក និងស្ដាប់បានតែប៉ុណ្ណោះ”។
លោក បុញ្ញឫទ្ធិ បានបន្ថែមថា ”ចំណាយទឹកប្រាក់សរុបប្រហែល១០០.០០០ដុល្លារ” ដោយលោកពន្យល់ថា ភាគច្រើននៃប្រាក់សម្រាប់ព្យាបាលលោក ប៉ែន សុវណ្ណ បានមកពីការបរិច្ចាគ។ ឥឡូវនេះគណបក្សសង្គ្រោះជាតិកំពុងស្វែងរកមូលនិធិបន្ថែមដើម្បីជួយគាត់។ យើងកំពុងព្យាយាមជួយគាត់ទាក់ទងការចំណាយថ្លៃថ្នាំពេទ្យ”។
លោក ប៉ែន សុវណ្ណ ត្រូវបានជាប់ឆ្នោតជាសមាជិកសភាគណបក្សសង្គ្រោះជាតិមណ្ឌលកំពង់ស្ពឺ ដែលគណបក្សប្រឆាំងទទួលបាន៣អាសនៈក្នុងការបោះឆ្នោតជាតិឆ្នាំ២០១៣។
លោក ប៉ែន សុវណ្ណ បានចំណាយពេលភាគច្រើនរយៈពេលជិត៣ទសវត្សរ៍ក្រោយក្នុងទីក្រុងហាណូយ រហូតដល់លោកបានត្រឡប់មកប្រទេសកម្ពុជាវិញជាមួយក្រុមផ្ដាច់ខ្លួនខ្មែរក្រហមក្នុងឆ្នាំ១៩៧៩ ដើម្បីបង្កើតរបបថ្មីមួយដែលគាំទ្រដោយវៀតណាមជាមួយមេដឹកនាំបច្ចុប្បន្នជាច្រើនរូបរបស់គណបក្សប្រជាជនកម្ពុជា។
លោកត្រូវបានបង្ខំឲ្យចាកចេញភ្លាមៗបន្ទាប់ពីត្រូវបានតែងតាំងជានាយករដ្ឋមន្ត្រីក្នុងឆ្នាំ១៩៨១ ហើយត្រូវបានបញ្ជូនទៅឃុំខ្លួនក្នុងទីក្រុងហាណូយវិញរយៈពេល១ទសវត្សរ៍៕ សារុន