អ្នកភូមិខេត្តកោះកុងដែលមិនត្រូវបានរាប់បញ្ចូលនៅក្នុងកិច្ចព្រមព្រៀងផ្តល់សំណងដែលអ្នកជិតខាងរបស់ខ្លួនមួយចំនួនទទួលបានចំពោះការបាត់បង់ដីធ្លីទៅលើចម្ការអំពៅនោះ បានប្រមូលហត្ថលេខាប្រហែល៣០០លើញត្តិមួយទាមទារឲ្យរាប់បញ្ចូលពួកគាត់ទៅក្នុងការផ្តល់សំណង ហើយសង្ឃឹមថា នឹងប្រមូលឲ្យបានច្រើនជាងនេះទៀតមុនពេលដាក់ទៅសមាជិកសភា។
អ្នកភូមិរាប់រយគ្រួសារក្នុងខេត្តនេះបានចោទប្រកាន់ក្រុមហ៊ុនចម្ការអំពៅពីរកាន់កាប់ដោយជនជាតិថៃ ដែលពីដំបូងជារបស់លោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា ថា បានប្លន់យកដីដែលពួកគាត់បានធ្វើស្រែចម្ការរយៈពេលច្រើនទសវត្សរ៍មកហើយ និងថា បានរុះផ្ទះរបស់ពួកគាត់។
អ្នកភូមិ២០០គ្រួសារក្នុងចំណោមគ្រួសារទាំងនោះបានប្តឹងក្រុមហ៊ុន Tate & Lyle ជាក្រុមហ៊ុនស្ករសអង់គ្លេសក្នុងទីក្រុងឡុងដ៍ថា បានទទួលប្រយោជន៍ពីក្រុមហ៊ុនចម្ការអំពៅនេះ ជាចំណាត់ការដែលពួកគាត់មួួយចំនួនទទួលបានសំណងជាប្រាក់រហូតដល់២.០០០ដុល្លារ អំឡុងការចរចារកដំណោះស្រាយ។
ឥឡូវនេះ គ្រួសារមួយចំនួនដែលលើកឡើងថា ពួកគាត់យល់ព្រមឈប់ធ្វើការតវ៉ានឹងក្រុមហ៊ុនចម្ការកៅស៊ូនេះច្រើនឆ្នាំមកហើយ ជាថ្នូរនឹងការសន្យាផ្តល់សំណងដែលមិនដែលទទួលបាននោះ ជាថ្មីម្តងទៀតបានស្នើសុំចំណែករបស់ខ្លួន។
លោក ង៉ែត សឹុម បាននិយាយកាលពីម្សិលមិញថា ក្រុមគ្រួសាររបស់គាត់ស្ថិតក្នុងចំណោមគ្រួសារដែលបានបាត់បង់ដីរបស់ខ្លួនទៅឲ្យក្រុមហ៊ុនចម្ការអំពៅនេះ ប៉ុន្តែ បានយល់ព្រមបញ្ឈប់ការតវ៉ាកាលពីឆ្នាំ២០០៧នៅពេលលោក ឆាយ វុធ មេឃុំជីខលើ ស្រុកស្រែអំបិលបានសន្យាឲ្យក្រុមហ៊ុនចម្ការអំពៅនេះផ្តល់សំណងដល់ពួកគាត់ជាថ្នូរ។
លោក ង៉ែត សឹុម បានមានប្រសាសន៍ថា ពួកគាត់មិនដែលទទួលបានប្រាក់ឡើយ។ ហើយនៅពេលពួកគាត់ទទួលព័ត៌មានថា គ្រួសារដទៃទៀតមិនបានឈប់ធ្វើយុទ្ធនាការទាមទារសំណង ទទួលបានសំណង លោក និងអ្នកដទៃទៀតបានចូលរួមធ្វើការតវ៉ា។
លោកបាននិយាយថា “មូលហេតុដែលយើងធ្វើការម្តងទៀត ពីព្រោះយើងបានរង់ចាំដំណោះស្រាយជាយូរមកហើយ ហើយយើងត្រូវអាជ្ញាធរបោកប្រាស់។ យើងបានប្រមូលមេដៃប្រហែល៣០០ពីគ្រួសារនានា ហើយយើងនឹងដាក់ជូនទៅគណៈកម្មការសិទ្ធិមនុស្សនៃរដ្ឋសភា។
លោក ងែ៉ត សឹុម បាននិយាយថា ក្រុមអ្នកភូមិចង់ប្រមូលស្នាមមេដៃឲ្យបានច្រើនមុនពេលដាក់ញត្តិ ប៉ុន្តែ លោកសង្ឃឹមថា នឹងធ្វើនៅដំណាច់ខែនេះ។
លោក ឆាយ វុធ បានអះអាងថា គ្រួសារអ្នកភូមិត្រូវបានញុះញង់ឲ្យបន្តការតវ៉ាពីសំណាក់មនុស្សមួយចំនួន ឬក្រុមណាមួយ។ លោកបានបដិសេធមិននិយាយថា តើលោកសង្ស័យលើនរណាឡើយ។ លោកបានមានប្រសាសន៍ថា “នេះជាបញ្ហានយោបាយទេ។ ខ្ញុំមិនដែលសន្យាផ្តល់សំណងដល់អ្នកភូមិទាំងនោះឡើយ ពីព្រោះវាហួសពីសមត្ថកិច្ចរបស់ខ្ញុំ”។ ក្រុមហ៊ុនចម្ការកៅស៊ូបានអះអាងថា គ្រួសារជាច្រើនដែលសមទទួលបានសំណងត្រូវបានទទួលរួចហើយ៕សារុន