មន្ត្រីបាននិយាយថ្ងៃនេះថា ក្រសួងបរិស្ថានមិនទាន់បានកំណត់ពេលវេលា ដើម្បីពិភាក្សាអំពីការសើរើសិទ្ធិផ្តាច់មុខរបស់ក្រុមហ៊ុនស៊ីនទ្រីក្នុងការប្រមូលសំរាមសម្រាប់រយៈពេល២៥ឆ្នាំបន្តទៀតនៅឡើយទេ ក្រោយពីក្រុមហ៊ុនប្រមូលសំរាមមួយនេះមានបញ្ហាជាច្រើននោះ។
លោក សៅ សុភាព អ្នកនាំពាក្យក្រសួងបរិស្ថានបានមានប្រសាសន៍ថា ក្រសួងបរិស្ថានមិនទាន់កំណត់ពេលវេលាដើម្បីជួបប្រជុំជាមួយក្រសួងពាក់ព័ន្ធដើម្បីដោះស្រាយបញ្ហាដែលទាក់ទងនឹងក្រុមហ៊ុនស៊ីនទ្រីនៅឡើយទេ។
កាលពីសប្តាហ៍មុន គណៈរដ្ឋមន្ត្រីបានប្រកាសនៅក្នុងលិខិតមួយថា ខ្លួនពិចារណាឲ្យមានការលុបចោលសិទ្ធិផ្តាច់មុខរបស់ក្រុមហ៊ុនស៊ីនទ្រីក្នុងការប្រមូលសំរាម ដោយសារតែក្រុមហ៊ុននេះ មិនមានលទ្ធភាពគ្រប់គ្រាន់ក្នុងការពង្រឹងនិងពង្រីកប្រតិបត្តិការរបស់ខ្លួនក្នុងការប្រមូលនិងដឹកជញ្ជូនសំរាម និងសំណល់រឹងនៅក្នុងរាជធានីភ្នំពេញ។
លោក ឡុង ឌីម៉ង់ អ្នកនាំពាក្យសាលាក្រុងបានមានប្រសាសន៍ថា សាលាក្រុងក៏មិនទាន់មានគម្រោងពិភាក្សាជាមួយក្រុមហ៊ុនស៊ីនទ្រីនៅឡើយទេ គឺទុកឲ្យក្រសួងពាក់ព័ន្ធដោះស្រាយជាមុនសិន។ លោក ឌីម៉ង់ បានមានប្រសាសន៍ថា “យើងទុកសិទ្ធិឲ្យក្រសួងបរិស្ថាននិងក្រសួងមហាផ្ទៃធ្វើរឿងនេះសិន”។
សាលាក្រុងភ្នំពេញក៏បានគំរាមកំហែងជាច្រើនលើកច្រើនសាចង់សើរើកិច្ចសន្យារបស់ក្រុមហ៊ុនប្រមូលសំរាមនេះផងដែរ ហើយកាលពីខែមិថុនា សាលាក្រុងបានបង្ខំចិត្តប្រើកងសន្តិសុខរបស់ខ្លួនក្នុងការប្រមូលសំរាមដែលនៅគរចោល ក្នុងពេលដែលអ្នកបើកឡានដឹកសំរាមបានធ្វើកូដកម្មនោះ។
ប៉ុន្តែ ក្រុមហ៊ុនប្រមូលសំរាមស៊ីនទ្រីបានអះអាងថា ខ្លួនមានសមត្ថភាពគ្រប់គ្រាន់ក្នុងការប្រមូលសំរាមនៅក្នុងទីក្រុងភ្នំពេញ ប៉ុន្តែជួបបញ្ហយឺតយ៉ាវខ្លះក៏ដោយសារតែបញ្ហាមួយចំនួន រួមមានការកកស្ទះចរាចរណ៍ និងការចតរថយន្តឥតសណ្តាប់ធ្នាប់នៅតាមដងផ្លូវនានាជាដើម។
លោក សេង សាវី អគ្គលេខាធិការក្រុមហ៊ុនស៊ីនទ្រី បានមានប្រសាសន៍ថា “កត្តាដែលធ្វើឲ្យក្រុមហ៊ុនខ្ញុំមានបញ្ហាក្នុងការប្រមូលសំរាម ទី១ការស្ទះចរាចរណ៍ ទី២ការចតឡានពាសពេញផ្លូវ ទី៣មិនមានកន្លែងស្តុកសំរាមនៅតាមមូលដ្ឋាន ទី៤សាលារាជធានីភ្នំពេញជួសជុលផ្លូវច្រើន ដូច្នេះធ្វើឲ្យឡានក្រុមហ៊ុនខ្ញុំពិបាកប្រមូលសំរាម”។ លោក សាវី បានសួរថា “តើមានចំណុចណាខ្លះដែលថាក្រុមហ៊ុនស៊ីនទ្រីមិនប្រមូលសំរាមក្នុងក្រុង?”៕