39.8 C
Phnom Penh

​ការ​​​ទទួល​​​រង​​​ការ​​​វាយ​​​​​​ដំ​​​ច្រំ​​​ធាក់​​​

ដោយ ឌឹ ខេមបូឌា ដេលី

បទវិភាគ

ឆ្នាំ​​​២០១៥៖​​​ ការ​​​វិល​​​ត្រឡប់​​​ទៅ​​​រក​​​​​​នយោ​​​បាយ​​​ដូចធម្ម​​​តា​​​

ប្រសិនបើ​​​ឆ្នាំ​​​២០១៤​​​បាន​​​បញ្ចប់​​​ទៅ​​​ជាឆ្នាំ​​​មួយ​​​សម្រាប់​​​ក្តីសង្ឃឹម​​​នៅក្នុង​​​​​​ឆាក​​​នយោបាយ​​​កម្ពុជា​​​នោះ ឆ្នាំ​​​២០១៥​​​គឺជាឆ្នាំ​​​ដែលអ្វីៗបាន​​​វិល​​​ត្រឡប់​​ទៅ​​​ដូចដើម​​​វិញ​​​។ ស្ទើរ​​​តែ​​​វាហាក់​​​ដូច​​​ជា​​​ប្រផ្នូល​​​​​​សម្រាប់​​​ការវិល​​​ត្រឡប់​​​ជា​​​យថាហេតុ​​​ទៅរក​​​កិច្ច​​​ការ​​​ធម្មតាវិញ​​ គឺ​​​ព័ត៌មាន​​​ស្តីពី​​​ថ្ងៃចូលឆ្នាំ​​​ថ្មី​​​ គឺថា​​​ ព្រះអង្គម្ចាស់​​​ នរោត្តម រណឫទ្ធិ បាន​​​យាង​​​វិលត្រឡប់​​​មក​​​ឆាក​​​នយោបាយ​​​សាជាថ្មី​​។

បណ្តេញចេញ​​​ពី​​​មុខ​​​តំណែង​​​ជាប្រធាន​​​គណបក្ស​​​រាជានិយម  ហ្វុ៊នស៊ិនប៉ិច នៅក្នុង​​​ឆ្នាំ​​​២០០៦​​​ តាម​​​សំណើ​​​លោក​​​នាយក​​​រដ្ឋមន្ត្រី​​​ ហ៊ុន សែន ព្រះអង្គបាន​​​មាន​​​បន្ទូល​​​ថា លោក ហ៊ុន សែន​​​ បាន​​​ដើរ​​​តួនាទី​​​ដ៏​​​ច្បាស់លាស់​​​ក្នុងការ​​​អនុញ្ញាត​​​ឲ្យ​​​ព្រះអង្គ​​​វិល​​​ត្រឡប់​​​មក​​​មាន​​​មុខ​​​មាន​មាត់វិញ​​​។ ប្រាកដ​​​ណាស់​​​ បំណង​​​របស់​​​លោក​​​នាយករដ្ឋមន្ត្រី​​​បាន​​​ផ្លាស់ប្តូរ​​​មួយ​​​ទសវត្សរ៍​​​ក្រោយមក​​​។

​​​ដោយមាន​​​គណបក្ស​​​សង្គ្រោះ​​​​​​ជាតិ​​​ដឹកនាំ​​​ដោយ​​​មេដឹកនាំ​​​គណបក្ស​​​ប្រឆាំង​​​ គឺលោក សម រង្ស៊ី ដែល​​​ចាប់ផ្តើម​​​បង្ហាញ​​​ការកាន់​​​អំណាច​​​ខ្លះៗ​​​នៅលើ​​​ឆាក​​​នយោបាយ​​​ មាន​​​មនុស្ស​​​មួយ​​​ចំនួន​​​មាន​​​មន្ទិល​​​សង្ស័យ​​​អំពី​​​ហេតុផល​​​ទាក់ទងនឹង​​​ការ​​​វិល​​​ត្រឡប់​​​មក​​​កាន់​​​ឆាក​​​នយោបាយ​​​វិញ​​​របស់​​​ព្រះ​​​អង្គ​​​ម្ចាស់​​​ រណឫទ្ធិ​​​ ជា​​​ប្រធាន​​​គណបក្ស​​​ហ្វុ៊នស៊ិនប៉ិច។ ព្រះអង្គ​​​ម្ចាស់ ស៊ីសុវត្ថិ សិរីរ័ត្ន បាន​​​មាន​​​បន្ទូល​​​យ៉ាង​​​សាមញ្ញ​​​ថា “ដំណោះ​​​ស្រាយ​​​បាន​​​ធ្លាក់​​​មកលើ​​​ពួកយើង​​​ហើយ​​​​​​”។

ព្រះអង្គម្ចាស់​​​ រណឫទ្ធិ បាន​​​មាន​​​បន្ទូល​​​ក្នុង​​​កិច្ច​​​សម្ភាស​​​តាម​​​ទូរស័ព្វ​​​ពីរថ្ងៃ​​​ក្រោយមក​​​ក្នុងពេល​​​ពិធី​​​ខួប​​​កំណើត​​​៧១​​​ឆ្នាំ​​​ថា “រឿងមួយ​​​ដែល​​​ខ្ញុំអាច​​​និយាយ​​​គឺថា ក្នុង​​​ភូមិសាស្ត្រ​​​នយោបាយ​​​ឥឡូវយើង​​​មាន​​​គណបក្ស​​​ធំៗបី​​​នៅ​​​កម្ពុជា ​​​គឺ​​​គណបក្ស​​​ប្រជាជន​​​កម្ពុជា គណបក្ស​​​សង្គ្រោះជាតិ​​​ និង​​​គណបក្ស​​​ហ្វុ៊នស៊ិនប៉ិច”។

មេដឹកនាំ​​​គណបក្ស​​​ប្រឆាំង​​​លោក សម រង្ស៊ី (ឆ្វេង) និង លោក កឹម សុខា (ស្តាំ) មកដល់​​​អាកាសយានដ្ឋាន​​​អន្តរជាតិ​​​ភ្នំពេញ​​​ ក្នុងខែវិច្ឆិកា។ រូបថតៈ ស៊ីវ ចាន់ណា/The Cambodia Daily
មេដឹកនាំ​​​គណបក្ស​​​ប្រឆាំង​​​លោក សម រង្ស៊ី (ឆ្វេង) និង លោក កឹម សុខា (ស្តាំ) មកដល់​​​អាកាសយានដ្ឋាន​​​អន្តរជាតិ​​​ភ្នំពេញ​​​ ក្នុងខែវិច្ឆិកា។ រូបថតៈ ស៊ីវ ចាន់ណា/The Cambodia Daily

មិត្តភាព​​​រំលោភបំពាន

នៅថ្ងៃទី១៤ ខែមករា ឆ្នាំ​​​២០១៥ លោក ហ៊ុន សែន​​​ បាន​​​គម្រប់​​​រយៈពេល​​​៣០ឆ្នាំ​​​ ចាប់តាំង​​​ពី​​​ការ​​​តែង​​​តាំង​​​ជា​​​ផ្លូវការ​​​របស់​​​លោក​​​ជានាយករដ្ឋមន្ត្រី​​​នៃប្រទេស​​​កម្ពុជា​​​។ រយៈពេល​​​៣ទស​​​វត្សរ៍​​​​​​មកនេះ លោកនាយករដ្ឋមន្ត្រី​​​បាន​​​បង្ហាញ​​​ថា​​​ជា​​​អ្នកប្រើ​​​កល​​​ល្បិច​​​ដ៏​​​ប៉ិនប្រសប់​​​ ហើយ​​​កលល្បិច​​​គណបក្ស​​​ ហ្វុ៊នស៊ិនប៉ិច គឺគ្រាន់តែ​​​ជា​​​ការ​​​អបអរ​​​បើកឆាក​​​នៅក្នុង​​​រយៈពេល​​​មួយ​​​ឆ្នាំ​​​នៃ​​​យន្តកម្ម​​​​​​នយោបាយ​​​​​​​​​ដែល​​​សំដៅ​​​ធ្វើ​​​ឲ្យ​​​គណបក្ស​​​សង្គ្រោះ​​​ជាតិ​​​ទន់ខ្សោយ​​​ប៉ុណ្ណោះ។

លោក ហ៊ុន សែន បាន​​​កសាង​​​អាជីព​​​​​​​​​ដោយ​​​​​​បបោសអង្អែល​​​​​​អត្តទត្ថភាព​​​របស់​​​​​អ្នក​​​ប្រឆាំង​​​របស់​​​លោកនៅពេល​​​រង​​​​​​ការ​​​គំរាម​​​កំហែង មុន​​​នឹង​​​កម្ទេច​​​ពួកគេ​​​ចោល​​​នៅពេល​​​​​​វេលា​​​ល្អមកដល់​​​។

និយាយ​​​អំពី​​​លោក រង្ស៊ី វិញ លោក ហ៊ុន សែន បាន​​​សន្យា​​​ក្នុង​​​ឆ្នាំ​​​២០១៤​​​ ដើម្បី​​​បង្កើត​​​រួម​​​គ្នា​​​នូវ​​​វប្បធម៌​​​សន្ទនា​​​ថ្មីមួយ​​​នៅក្នុង​​​នយោបាយ​​​កម្ពុជា​​​។

ចំពោះលោក រង្ស៊ី វិញ ទំនង​​​ជា​​​មិនមាន​​​ជម្រើស​​​ណាក្រៅតែពី​​​លើក​​​កម្ពស់​​​កិច្ច​​​ព្រមព្រៀង​​​នោះ​​​នៅដើម​​​ឆ្នាំ​​​នោះទេ។

លោក រង្ស៊ី​​​ បាន​​​ប្រាប់អ្នកគាំទ្រ​​​ហ្វេសប៊ុក​​​ជាង​​​១លាន​​​នាក់​​​របស់​​​លោក​​​កាលពី​​​ខែ​​​មករាថា “វប្បធម៌​​​សង្គ្រាម​​​​​​គឺ​​​ត្រូវជំនួសដោយ​​​វប្បធម៌​​​សន្ទនា គឺ​​​វប្បធម៌​​​សន្តិភាព​​​។ ទោះបី​​​ជាយើង​​​កំពុង​​​ប្រឈម​​​មុខ​​​នឹង​​​បញ្ហា​​​ខ្លះ​​​ៗ​​​នៅក្នុង​​​រយៈ​​​ពេលសម្របសម្រួល​​​ក៏ដោយ ក៏យើង​​​នឹងមិន​​​ងាកចេញ​​​ពី​​​វប្បធម៌​​​សន្ទនាដែរ​​​”។

ក្នុងពេលដែលគណបក្ស​​​សង្គ្រោះជាតិ​​​ប៉ុនប៉ង​​​ផ្សព្វផ្សាយ​​​កិច្ច​​​ព្រមព្រៀង​​​នោះ​​​ជាសាធារណៈ​​​ គឺវា​​​ទំនង​​​ហាក់​​​ដូចជា​​​សមាជិក​​​ជាន់ខ្ពស់​​​នៃ​​​គណបក្ស​​​កាន់​​​អំណាច​​​មាន​​​ការ​​​ប្តេជ្ញាចិត្ត​​​តិច​​​តួច​​​ចំពោះ​​​បុព្វហេតុនេះ។

លោក ទៀ បាញ់ រដ្ឋមន្ត្រី​​​ក្រសួង​​​ការពារ​​​ជាតិ​​​ បាន​​​ប្រាប់​​​មេទ័ព​​​នៅក្នុង​​​សុន្ទរកថា​​​មួយ​​​នៅឯ​​​មូល​​​ដ្ឋាន​​​កងទ័ព​​​ជើង​​​ទឹក​​​នៅក្នុង​​​ក្រុង​​​ភ្នំពេញ​​​កាលពី​​​ថ្ងៃ​​​ទី​​​២៣ ខែមករា​​​ថា “ពី​​​មុន យើង​​​ការ​​​ពារ​​​ [រដ្ឋា​​​ភិបាល​​​] ដោយ​​​ចូល​សមរភូមិ​​​ដើម្បី​​​បញ្ឈប់​​​សង្គ្រាម​​​ តែ​​​ឥឡូវ​​​វាមិន​​​អ៊ីចឹង​​​ទេ​​​។ ទោះ​​​ជាយ៉ាង​​​ណា​ យើង​​​នៅតែត្រូវ​​​ប្រកាន់​​​គោល​​​ជំហរ​​​យើង​​​ឲ្យ​​​ច្បាស់​​​”។

រដ្ឋមន្ត្រី​​​ក្រសួង​​​ការពារ​​​ជាតិ​​​រូបនេះ​​​បាន​​​មាន​​​ប្រសាសន៍ថា ​”គេប្រមូល​មនុស្ស​​​ ហើយ​​​ចាប់​​​ផ្តើម​​​វាយ​​​ប្រហារ​​​ ហើយ​​​ចាប់​​​ផ្តើម​​​ឡើងកម្តៅ​​​ ដូច្នេះ​​​យើង​​​ត្រូវវាយ​​​បក​​​”។

លោក ហ៊ុន សែន ដែល​​​មិនស៊ប់​​​នឹង​​​វប្បធម៌​​​សន្ទនា​​​ដូច​​​លោក រង្ស៊ី បាន​​​មាន​​​ប្រសាសន៍​​​ក្នុង​​​សុន្ទរកថា​​​នៅថ្ងៃ​​​ដដែល​​​នោះ​​​ថា “អូខេ ឥឡូវ​​​ចាប់ផ្តើម​លេង​​​គ្នា ​​​មិន​​​បាច់​​​​​​សន្ទនា​​​​​​ទេ។ ខ្ញុំ​​​ចង់​​​បញ្ជាក់​​​ឲ្យ​​​ច្បាស់​​​និង​​​ផ្ញើសារ​​​ជូន​​​ឯកឧត្តម​​​ សម រង្ស៊ី ថា វប្បធម៌​​​សន្ទនា​​​គ្មាន​​​​​​ប្រសិទ្ធភាព​​​ទេ​​​”។

លោក រង្ស៊ី មិន​​​អល់ឯក។ មេដឹកនាំ​​​គណបក្ស​​​ប្រឆាំង​​​រូបនេះ​​​បាន​​​មាន​​​ប្រសាសន៍​​​ឆ្លើយតប​​​នឹង​​​លោក​​​ ហ៊ុន សែន និង​​​ការ​​​ជំរុញរបស់​​​នាយ​​​ឧត្តមសេនីយ៍​​​ ទៀ បាញ់ ថា “ខ្ញុំ​​​ជឿថា វាជា​​​តួនាទី​​​របស់​​​ខ្ញុំ​​​ដើម្បី​​​បញ្ចៀស​ការ​​​ប្រឈម​​​មុខ​​​ដាក់​​​គ្នា​​​បន្ត​​​ទៀត​​​”។

លោក រង្ស៊ី បាន​​​មាន​​​ប្រសាសន៍ថា “យើង​​​ប្រហែល​​​មាន​​​ការ​​​យល់​​​ច្រឡំ​​​នឹង​​​គ្នា​​​ និង​​​ការ​​​ធាក់​​​ថយ​​​ក្រោយ​​​បណ្តោះ​​​អាសន្ន​​​ពី​​​មួយថ្ងៃ​​​ទៅ​​​មួយ​​​ថ្ងៃ​​​ ប៉ុន្តែ ខ្ញុំ​​​គិត​​​ថា និន្នាការ​​​នេះ​​​គឺស្ថិត​​​នៅលើ​​​ផ្លូវ​​​ត្រឹម​​​ត្រូវ​​​។ គ្មាន​​​វប្បធម៌​សន្ទនា​​​ យើង​​​នឹងមិន​​​អាច​​​សម្រេចបាន​​​លទ្ធិប្រជាធិបតេយ្យ​​​បាន​​​ទេ​​​”។

ទោះបីជា​​​មាន​​​ការ​​​អះអាង​​​សាជាថ្មីពីលោក​​​ រង្ស៊ី ក៏ដោយ​​​ ក៏វាជា​​​សញ្ញា​​​ដំបូង​​​ដែលគណបក្ស​​​ទាំងពីរ​​​មិនបាន​​​ចូលរួម​​​ដោយ​​​ស្មើភាព​​​គ្នាក្នុងការ​​​កសាង​​​វប្បធម៌​​​ដ៏​​​ក្មេងខ្ចី​​​នេះដែរ។

លោកនាយករដ្ឋមន្ត្រី​​​ ហ៊ុន សែន មានប្រសាសន៍​​​ក្នុងក្រុង​​​ភ្នំពេញ ក្នុងខែតុលា។ រូបថតៈ ស៊ីវ ចាន់ណា/The Cambodia Daily 
លោកនាយករដ្ឋមន្ត្រី​​​ ហ៊ុន សែន មានប្រសាសន៍​​​ក្នុងក្រុង​​​ភ្នំពេញ ក្នុងខែតុលា។ រូបថតៈ ស៊ីវ ចាន់ណា/The Cambodia Daily

កិច្ច​​​សន្ទនា​​​ប្រេះឆា

​​​ប្រសិនបើមន្ត្រី​​​ជាន់ខ្ពស់​​​គណបក្ស​​​ប្រជាជន​​​កម្ពុជា​​​មិន​​​ពេញចិត្ត​​​នឹង​​​របត់ថ្មី​​​ដែល​​​នយោបាយ​​​ដើរ​​​ទេនោះ មន្ត្រីជាច្រើន​​​នៅក្នុង​​​ជួរ​​​គណបក្ស​​​ប្រឆាំង​​​ក៏​​​រអ៊ូរទាំ​​​យ៉ាង​​​ស្ងៀមស្ងាត់​​​ដែរ​​​។

​​​នៅក្នុង​​​ការចូលជ្រៅ​​​ដ៏កម្រមួយ​​​ទៅក្នុង​​​នយោបាយ​​​ផ្ទៃក្នុង​​​​​​ក្នុង​​​គណបក្ស​​​សង្គ្រោះ​​​ជាតិ​​​ដែល​​​បាន​​​លើក​​​កម្ពស់​​​ឯកភាព​​​នៅលើ​​​អ្វីគ្រប់យ៉ាង​​​ចាប់​​​តាំង​​​ពី​​​ការ​​​បង្កើត​​​គណបក្ស​​​នេះ​​​ឡើង​​​ក្នុងឆ្នាំ​​​២០១២​​​ លោក កឹម សុខា​ អនុប្រធាន​​​​គណបក្ស​​​ប្រឆាំង​​​បាន​​​លាត​​​ត្រដាង​​​នៅក្នុង​​​សុន្ទរកថា​​​មួយ​​​ថា លោក​​​មិន​​​សប្បាយ​​​ចិត្ត​​​នឹង​​​កិច្ចព្រមព្រៀង​​​ដែល​​​បាន​​​បញ្ចប់​​​ការ​​​ធ្វើ​​​ពហិការ​​​មិន​​​ចូល​​​សភា​​​របស់​​​គណបក្ស​​​សង្គ្រោះ​​​ជាតិ​​​ទេ​​​។

លោក សុខា បាន​​​ប្រាប់​​​អ្នកគ្រាំទ្រ​​​នៅ​​​រដ្ឋកាលីហ្វ័រញ៉ា​​​ កាលពី​​​ពាក់​​​កណ្តាល​​​ខែ​​​មីនា​​​ថា “ការ​​​ចរចា​​​គឺ​​​នៅថ្ងៃ​​​ទី២២ ខែកក្កដា ឆ្នាំ​​​២០១៤​​​ ប៉ុន្តែ ចំពោះខ្ញុំ​​​ការចរចា​​​ ខ្ញុំមិនពេញ​​​ចិត្ត​​​ទេ និយាយ​​​ឲ្យ​​​ត្រង់ទៅ​​​”។

លោក​​​ សុខា​​​ បាន​​​មាន​​​ប្រសាសន៍ថា “ខ្ញុំមិន​​​សប្បាយ​​​ចិត្ត​​​នឹង​​​លទ្ធផល​​​នៃការ​​​ចរចា​​​ទេ  ប៉ុន្តែ ខ្ញុំ​​​គោរព​​​​​​គោលការណ៍​​​និង​​​ជំហរ​​​​​​គណបក្ស​​​សង្គ្រោះ​​​ជាតិ ដែលត្រូវ​​​ទទួល​​​យក​​​ដើម្បី​​​ដោះស្រាយ​​​បញ្ហា​​​”។

លោកអនុប្រធាន​​​គណបក្ស​​​ប្រឆាំង​​​រូបនេះបាន​​​មាន​​​ប្រសាសន៍ថា “យើង​​​ទ្រាំ​​​លេបថ្ម លេបគ្រួស ដើម្បី​​​បន្ត​​​ការ​​​រួបរួម​​​របស់យើង​​​ឲ្យខ្លាំង​​​ ហើយ​​​មិន​​​ត្រូវចាញ់​​​ល្បិច​​​របស់​​​គណបក្ស​​​កាន់​​​អំណាច​​​​​​ផ្តាច់ការ​​​ទេ”។

​​​មាន​​​ដំណើរ​​​ការ​​​ទៅ​​​ដោយ​​​គ្មាន​​​ការ​​​រអាក់រអួល​​​ រដ្ឋាភិបាល​​​គណបក្ស​​​កាន់​អំណាច​​​​​​បាន​​​ផលិត​​​និង​​​ផ្សព្វផ្សាយ​​​តាម​​​ទូរទស្សន៍​​​នូវម៉ោង​​​មាស​​​ទាក់​ទិន​​​នឹង​​​វីដេអូ​​​ឯកសារ​​​ដែល​​​ចោទ​​​លោក កឹម សុខា ថា ដឹក​​​នាំ​​​ការ​​​តវ៉ា​​​ដែល​​​ស្មើនឹង​​​ដឹកនាំ​​​កម្លាំង​​​ធ្វើ​​​រដ្ឋប្រហារ ​​​ដើម្បី​​​ទម្លាក់​​​រដ្ឋាភិបាល​​​ស្រប​​​ច្បាប់​​​។

បីថ្ងៃ​​​ក្រោយមក​​​ លោក សុខា ត្រូវកោះហៅ​​​ឲ្យចូល​​​តុលាការ​​​ក្រុង​​​ភ្នំពេញ​​​ ដោយ​​​ប្រើ​​​ពេល​​​សាកសួរ​​​ប្រាំពីរ​​​ម៉ោង​​​ទាក់ទង​​​នឹង​​​តួនាទី​​​របស់​​​លោក​​​នៅ​ក្នុងការ​​​តវ៉ា​​​របស់​​​គណបក្ស​​​សង្គ្រោះ​​​ជាតិ​​​ បន្ទាប់ពី​​​ការ​​​បោះឆ្នោត​​​ជាតិ​​​ឆ្នាំ​​​២០១៣​​​ ដែលនៅពេល​​​នោះ​​​ គណបក្ស​​​ប្រឆាំង​​​ទាម​​​ទារ​​​ឲ្យ​​​លោក​ ហ៊ុន​ សែន​ ចុះចេញពី​​​តំណែង​​​។

នៅឯ​​​ឧទ្យាន​​​​​​អង្គរ​​​នៅខេត្ត​​​សៀមរាម​​​ លោក សម រង្ស៊ី និង​​​លោក ហ៊ុន​ សែន​ បាន​​​ផ្គាប់ផ្គុន​​​​​​គ្នាទៅ​​​វិញទៅមក ដោយ​​​ប្រធាន​​​គណបក្ស​​​សង្គ្រោះជាតិ​​​​បង្ហាញ​​​ខ្លួន​​​នៅលើ​​​វេទិកាជាមួយ​​​លោក ហ៊ុន សែន ពេល​​​ថ្លែងសុន្ទរកថា​​​អំឡុង​​​ពេល​​​ចូលឆ្នាំ​​​ថ្មី​​​ប្រពៃណីខ្មែរ​​​។

លោក ហ៊ុន សែន បាន​​​មាន​​​ប្រសាសន៍​​​ដោយ​​​ងាក​​​ទៅរក​​​លោក រង្ស៊ី ​ថា​ “ប្រទេស​​​យើង​​​បាន​​​ឈាន​​​ដល់​​​ចំណុច​​​ថ្មីមួយ​​​ ដោយមាន​​​វត្តមាន​​​ឯកឧត្តម​​​ សម រង្ស៊ី …. នៅលើ​​​វេទិកា​​​ថ្ងៃនេះ។ វប្បធម៌​​​សន្ទនា​​​បាន​​​កើត​​​ឡើង​​​នៅ​ប្រទេស​​​កម្ពុជា​​​ ហើយ​​​ជំនួស​​​វប្បធម៌​​​​​​ប្រទូសរ៉ាយ​​​​​​និង​​​សម្លាប់​​​គ្នា​​​”។

​​​​​​លោក រង្ស៊ី បាន​​​អរគុណ​​​ហួសហេតុ​​​ចំពោះ​​​ទំនាក់ទំនង​​​ថ្មី​​​របស់លោក​​​ជាមួយ​​​បុរសខ្លាំង​​​កម្ពុជា​​​ ដោយ​​​ការពារ​​​ខ្លួន​​​លោក​​​តបនឹង​​​ការ​​​អះអាង​​​ដែលថា​​​​​​លោកនាយក​​​រដ្ឋមន្ត្រី​​​នឹងវាយ​​​​​​បក​​​មករក​​​លោក​​​វិញ ទោះបីជា​​​មេដឹកនាំ​​​ទាំងពីរដើរកម្សាន្ត​​​យ៉ាង​​​​​​សប្បាយ​​​រីករាយ​​​នៅក្នុង​​​ការ​​​តាំង​​​ពិព័រណ៍​ចូលឆ្នាំ​​​ថ្មី​​​ប្រពៃណី​​​ខ្មែរ​​​ជុំវិញ​​​អង្គរវត្ត​​​ដូចជា​​​មិត្ត​​​ចាស់​​​ក៏ដោយ​​​។

​​​លោក​​​ រង្ស៊ី បាន​​​មាន​​​ប្រសាសន៍​​​​​​ក្នុង​​​កិច្ច​​​សម្ភាស​​​​​​មួយ​​​​​​ប៉ុន្មាន​​​ថ្ងៃ​​​​​​មុន​​​នឹង​​​​​​បង្ហាញ​​​ខ្លួន​​​​​​ជា​​​មួយ​​​លោក ហ៊ុន សែន​​​ ថា”​​​ខ្ញុំ​​​ធ្លាប់​​​ស្អប់​​​​​​ ហ៊ុន សែន​​​ ​​​ដូច​​​ជា​​​ខ្ញុំ​​​​​​ស្អប់​​​​​​ជន​​​ផ្តាច់​​​ការ​​​ពិភព​​​លោក​​​​​​ដែរ​​​”។

លោក រង្ស៊ី បាន​​​មាន​​​ប្រសាសន៍​​​បន្ត​​​ថា “​​​ប៉ុន្តែ​​​​​​ថ្មីៗ​​​​​​នេះ​​​ខ្ញុំ​​​គិត​​​ថា ​​​ខ្ញុំ​​​មិន​​​គួរ​​​​​​ស្អប់​​​​​​​នរណា​​​ម្នាក់​​​​​​ក្នុង​​​នាម​​​ជា​​​មនុស្ស​​​ជាតិ​​​ ​​​អាក្រក់​​​​​​ដូច​​​​​​ពួក​​​គេ​​​នោះ​​​​​​ទេ ប៉ុន្តែ​​​​​​ខ្ញុំ​​​គ្រាន់​​​តែ​​​ស្អប់ និង​​​​​​ប្រយុទ្ធ​​​ប្រឆាំង​​​នឹង​​​​​​បទ​​​ឧក្រិដ្ឋ​​​​​​ដែល​​​មនុស្ស​​​អាក្រក់​​​ណា​​​ម្នាក់​​​​​​បាន​​​ប្រ​​​ព្រឹត្ត​​​ប៉ុណ្ណោះ​​​។ នៅ​​​ពេល​​​​​​អ្នក​​​​​​រួច​​​ផុត​​​ពី​​​​​​ការ​​​ស្អប់​​​ អ្នក​​​ក៏​​​រួច​​​ផុត​​​ពី​​​​​​សេចក្តី​​​ខ្លាច​​​ ហើយ​​​​​​សេរី​​​ភាព​​​ថ្មី​​​នេះ​​​​​​ធ្វើ​​​ឲ្យ​​​អ្នក​​​​​​ចាប់​​​ផ្តើម​​​​​​ធ្វើ​​​អ្វីៗ​​​​​​​​​​​​ដែល​​​អ្នក​​​ពុំ​​​ដែល​​​គិត​​​ដល់​​​ មាន​​​ដូច​​​ជា​​​​​​ចូល​​​រួម​​​សន្ទនា​​​ជាមួយ​​​​​​អតីត​​​ស​​​ត្រូវ​​​​​​អាក្រក់​​​បំផុត​​​របស់​​​អ្នក”។​​​​​​

របង​​​ល្អ​​​​​​ធ្វើ​​​ជា​​​​​​អ្នក​​​ជិត​​​ខាង​​​ល្អ​​​

ថ្នាក់​​​ខ្ពស់​​​បំផុត​​​នៃ​​​គណបក្ស​​​ប្រឆាំង​​​​​​និយាយ​​​អំពី​​​ការ​​​សម្រប​​​សម្រួល​ ចំណែក​​​​ឯ​​​​​​មន្ត្រី​​​ថ្នាក់​​​ក្រោម​​​នៅ​​​តែ​​​​​​ប្រើ​​​​​​​​​របៀប​​​​​​វារៈ​​​ចាស់​​​របស់​​​ខ្លួន គឺ​​​វៀត​​​ណាម។​​​​​​​​​​​​

នៅ​​​ដើម​​​​​​ខែ​​​កុម្ភៈ គណបក្ស​​​​​​បាន​​​រក​​​ឃើញ​​​ទិស​​​ដៅ​​​ថ្មី​​​មួយ​​​សម្រាប់​​​​​​បញ្ចេញ​​​កំហឹង​​​របស់​​​ខ្លួន​​​ ក្នុង​​​ពេល​​​ដែល​​​​​​មាន​​​របាយការណ៍​​​ជា​​​បន្ត​​​បន្ទាប់​​​​​​ថា ពលរដ្ឋ​​​វៀត​​​ណាម​​​​​​បាន​​​កំពុងធ្វើ​​​សក្ការ​​​បូជា​​​​​​នៅ​​​លើ​​​កំពូល​​​ភ្នំ​​​​​​បូកគោ​​​ក្នុង​​​ខេត្ត​​​កំពត​ ដើម្បី​​​បន់​​​ស្រន់​​​​​​ចំពោះ​​​(គួរ​​​ឲ្យ​​​ភ្ញាក់​​​ផ្អើល គឺ​​​ក្រោម​​​រូប​​​ថត​​​ហូ ជីមិញ)​​​​​​ដូនតា​​​របស់​​​ខ្លួន​​​​​​ដែល​​​​​​បាន​​​ស្លាប់​​​នៅ​​​ទី​​​នោះ។​​​​​​

ដឹក​​​នាំ​​​គណៈ​​​ប្រតិភូ​​​ដែល​​​មាន​​​មន្ត្រី​​​៥០​​​នាក់​​​ លោក យ៉ែម បុញ្ញាឫទ្ធិ អ្នក​​​នាំ​​​ពាក្យ​​​គណ​​​បក្ស ហើយ​​​ក៏​​​ជា​​​ប្រធាន​​​គណៈ​​​កម្មការ​​​​​​វប្ប​​​ធម៌​​​សភា បាន​​​ធ្វើ​​​ដំណើរ​​​ទៅ​​​កាន់​​​កំពូល​​​ភ្នំ​​​​​​ក្នុង​​​បេសកកម្ម​​​​​​ដែល​​​ផ្សព្វផ្សាយ​​​ជា​​​សាធារណៈ។​​​​​​​​​

ដំណើរ​​​របស់​​​លោក បុញ្ញា​​​ឫទ្ធិ​​​រក​​​មិន​​​ឃើញ​​​វៀត​​​ណាម​​​នៅ​​​លើ​​​កំពូល​​​ភ្នំ​​​ទេ ប៉ុន្តែ​​​នៅ​​​ក្នុង​​​ព្រៃ​​​ជ្រៅ​​​បាន​​​ឃើញ​​​ផ្នូរ​​​​​​ថ្ម​​​ធំៗ និង​​​ឆ្អឹង​​​​​​នៃ​​​អ្វី​​​ដែល​​​ទំនង​​​ជា​​​​​​ពិធី​​​អធិកអធម​​​ដែល​​​គេ​​​ប្រារព្ធ​​​ឡើង​​​កាល​​​ពី​​​ប៉ុន្មាន​​​ថ្ងៃ​​​មុន​​​ ដោយ​​​មាន​​​សកម្ម​​​ជន​​​មូល​​​ដ្ឋាន​​​​​​ផ្តល់​​​ជូន​​​រូប​​​ថត​​​នៃ​​​ពិធី​​​នោះ។​​​​​​​​​

ត្រឡប់​​​មក​​​រដ្ឋ​​​សភា​​​ជាតិ​​​ក្នុង​​​ក្រុង​​​ភ្នំពេញ​​​វិញ អ្នក​​​នាំ​​​ពាក្យ​​​គណបក្ស​​​ប្រឆាំង​​​​បាន​​​អំពាវ​​​នាវ​​​​​​ឲ្យ​​​​​​រដ្ឋ​​​មន្ត្រី​​​ក្រសួង​​​ធម្មការ និង​​​សាសនា ដាក់​​​​​​ជំនួស​​​​​​ទីតាំង​​​វៀត​​​ណាម​​​​​​​​​នោះ​​​ដោយ​​​រូប​​​បដិមា​​​ព្រះ​​​ពុទ្ធ​​​វិញ ដើម្បី​​​ទុក​​​ឲ្យ​​​ពល​​​រដ្ឋ​​​ខ្មែរ​​​ចូល​​​ទៅ​​​ទី​​​នោះ​​​ជំនួស​​​វិញ។​​​ រដ្ឋាភិបាល​​​បាន​​​​​​ជំទាស់​​​ ដោយ​​​លើក​​​ឡើង​​​អំពី​​​សេរី​​​ភាព​​​នៃ​​​សាសនា។​​​

ក្នុង​​​ពេល​​​ដែល​​​គណបក្ស​​​កាន់​​​អំណាច​​​អាច​​​រុញ​​​ច្រាន​​​ចំណុច​​​មួយ​​​ចំនួន​​​​​​នៃ​​​ស្នៀត​​​ប្រឆាំង​​​នឹង​​​វៀត​​​ណាម​​​របស់​​​គណបក្ស​​​ប្រឆាំង ចំណុច​​​ផ្សេង​​​ទៀត​​​គឺ​​​ពិបាក​​​នឹង​​​បង្ក្រាប។​​​​​​ ក្នុង​​​ដំណើរ​​​ដែល​​​លេច​​​ធ្លោ​​​​​​កាន់​​​តែ​​​ខ្លាំង​​​ទៅ​​​កាន់​​​ព្រំ​​​ដែន​​​វៀត​​​ណាម​​​អស់​​​រយៈ​​​ពេល​​​ជាង​​​ពីរ​​​ខែ តំណាង​​​រាស្ត្រ​​​គណបក្ស​​​សង្គ្រោះ​​​​ជាតិ​​​បាន​​​រក​​​ឃើញ​​​ការ​​​ទន្ទ្រាន​​​​​​ចូល​​​​​​ទឹក​​​ដី​​​កម្ពុជា​​​​​​ម្តង​​​ហើយ​​​ម្តង​​​ទៀត​​​​​​​​​ពី​​​សំណាក់​​​ជន​​​ស៊ី​​​វិល និង​​​ទាហាន​​​​​​វៀត​​​ណាម។​​​​​​​​​

រដ្ឋា​​​ភិបាល​​​ប្រវេ​​​ប្រវា ដោយ​​​លោក ហោ ណាំហុង រដ្ឋ​​​មន្ត្រី​​​​​​ក្រសួង​​​ការ​​​បរទេស​​​​​​ចេញ​​​កំណត់​​​ទូត​​​ដែល​​​មាន​​​ពាក្យ​​​​​​ធ្ងន់ៗ​​​​​​ជា​​​បន្ត​​​បន្ទាប់​​​​​​ផ្ញើ​​​ទៅ​​​កាន់​​​​​​​​​ក្រុង​​​ហាណូយ ដោយ​​​ទាម​​​ទារ​​​ឲ្យ​​​ពួក​​​គេ​​​ដក​​​ចេញ​​​​​​ពី​​​ការ​​​ចូល​​​ទន្ទ្រាន​​​ ហើយ​​​គោរព​​​​​​ខ្សែ​​​បន្ទាត់​​​ព្រំ​​​ដែន។

នៅ​​​ថ្ងៃ​​​ទី​​​២៨ ខែ​​​មិថុនា លោក រៀល ខេមរិន្ទ តំណាង​​​រាស្ត្រ​​​គណ​​​បក្ស​​​សង្គ្រោះ​​​ជាតិ​​​​​​បាន​​​ចុះ​​​ទៅ​​​ពិនិត្យ​​​មើល​​​​​​តំបន់​​​ព្រំ​​​ដែន​​​មួយ​​​កន្លែង​​​​​​នៅ​​​ក្នុង​​​ខេត្ត​​​ស្វាយ​​​រៀង ដែល​​​នៅ​​​ទី​​​នោះ​​​មាន​​​គេ​​​និយាយ​​​ថា កសិករ​​​ជន​​​ជាតិ​​​វៀត​​​ណាម​​​​ចូល​​​កាន់​​​កាប់​​​ដី​​​ខ្មែរ​​​ដែល​​​គ្មាន​​​ដាំ​​​ដំណាំ ជា​​​ការ​​​រំលោភជាក់​​​ស្តែង​​​នៃ​​​បង្គោល​​​ព្រំ​​​ដែន​​​​​​សំខាន់​​​​​​ដែល​​​បោះ​​​ចំ​​​កណ្តាល​​​វាល​​​ស្រែ។​​​​​​​​​​​​

ការ​​​ប្រវាយ​​​ប្រតប់​​​​​​បាន​​​កើត​​​ឡើង​​​រវាង​​​គណៈ​​​ប្រតិភូ​​​មួយ​​​ក្រុម​​​តូច​​​របស់​​​លោក​​​ ខេមរិន្ទ និង​​​វៀត​​​ណាម​​​​​​នៅ​​​ទី​​​តាំង​​​ក្នុង​​​ស្រុក​​​កំពង់​​​រោទិ៍។​ លោក ​ខេមរិន្ទ​​​ បាន​​​មាន​​​ប្រសាសន៍​​​ថា លោក​​​ត្រូវ​​​គេ​​​វាយ​​​ចំ​​​ខ្នង​​​​​​នឹង​​​​​​​​​ដំបង​​​ឈើ​​​​​​នៅ​​​ក្នុង​​​តំបន់​​​មួយដែល​​​អាច​​​មើល​​​ឃើញ​​​​​​នៅ​​​​​​ខាង​​​វៀត​​​ណាម​​​គឺ​​​​​​បង្គោល​​​ព្រំ​​​ដែន​​​លេខ​​​២០៣។

តំណាង​​​រាស្ត្រ​​​រូបនេះ​​​បាន​​​ប្រកាស​​​គម្រោងវិលត្រឡប់​​​ទៅកាន់​​​ទីតាំងនោះ​​​នៅខែ​​​បន្ទាប់មក​​​ទៀត​​​ ដោយមាន​​​អ្នក​​​គាំទ្រ​​​គណបក្ស​​​សង្គ្រោះជាតិ​​​រាប់​ពាន់​​​នាក់។ រដ្ឋាភិបាល​​​បាន​​​ច្រាន​​​ចោល​​​​​​​​​គម្រោង​​​នោះ​​​ ប៉ុន្តែ ​ជាចុងក្រោយ​​​បាន​​​​និយាយ​​​ថា លោកអាច​​​ទៅតំបន់នោះ​​​ ប្រសិនបើ​​​លោក​​​កំណត់​​​ចំនួន​​​មនុស្ស​​​ត្រឹម​​​១០០​​​នាក់ ក្នុងដំណើរ​​​ចុងក្រោយ​​​ដើម្បី​​​ទៅ​​​មើល​​​បង្គោល​​​ព្រំដែន។

នៅថ្ងៃទី​​​១៩ ខែកក្កដា លោក ខេមរិន្ទ បាន​​​ដឹកនាំ​​​អ្នកគាំទ្រ​​​២.៥០០​​​នាក់​​​ពីក្រុងភ្នំពេញ​​​ទៅ​​​កាន់​​​​​​តំបន់​​​​​​នោះ​​​ដែលចាប់ផ្តើម​​​នៅ​​​ម៉ោង​​​៥ព្រឹក​​​។

លោក សម រង្ស៊ី បាន​​​សរសេរ​​​នៅក្នុង​​​សារ​​​អីុម៉ែល​​​មួយ​​​ក្នុង​​​ខណៈដែល​​​គណៈប្រតិភូ​​​បាន​​​មក​​​ដល់​​​ស្រុកកំពង់រោទិ៍​​​ថា “ជូនចំពោះ​​​ [អ្នកតំណាង​រាស្ត្រ​​​គណបក្ស​​​សង្គ្រោះ​​​ជាតិ​​​] អ៊ុំ សំអាន និង​​​ រៀល ខេមិន្ទ។ ដូចដែល​​​ខ្ញុំបាន​​​ប្រាប់​​​លោក​​​នៅឯ​​​កិច្ច​​​ប្រជុំ​​​កាលពី​​​រសៀល​​​ម្សិលមិញ​​​ និងតាម​​​ទូរស័ព្ទ​​​ប្រហែល​​​១៥​​​នាទី​​​មុន​​​ លោកគួរចៀសវាង​​​ការប្រឈម​​​មុខ​​​ដាក់គ្នា​​​ និង​​​ហិង្សា​​​ណាមួយ​​​”។

នៅឯ​​​ទីតាំង​​​នោះ​​​ ប្រុសៗជនជាតិ​​​ខ្មែរ​​​ឈរ​​​ជាជួរ​​​ ប្រដាប់​​​ដោយ​​​ដំបង​​​បាន​​​យាម​​​ការពារ​​​ព្រំដែន​​​។ ទាហាន​​​ប្រដាប់​​​ដោយ​​​កាំភ្លើង​​​អាកា​​​៤៧​​​ បាន​​​ឈរ​​​ពីក្រោយ​​​ពួកគេ​​​ ហើយ​​​បញ្ជាក់​​​ច្បាស់​​​ថា មាន​​​តែ​​​១០០​​​នាក់​​​ប៉ុណ្ណោះ​​​ដែល​​​ត្រូវ​​​ធ្វើ​​​ដំណើរ​​​ទៅមើល​​​បង្គោល​​​លេខ​​​២០៣​​​ដែល​​​កំណត់​​​ព្រំដែន។

ទាហាន​​​វៀតណាម​​​ប្រដាប់​​​អាវុធ​​​ឈរ​​​ជ្រោងច្រាង​​​នៅកន្លែង​​​ចុងក្រោយ​​​នោះ​​​ ប៉ុន្តែ គ្មាន​​​ហិង្សា​​​ផ្ទុះ​​​ឡើង​​​ទេ។ លោក ខេមរិន្ទ និង​​​អ្នកតំណាង​​​រាស្ត្រ​​​គណបក្ស​​​សង្គ្រោះ​​​ជាតិ​​​បីរូប​​​ផ្សេងទៀត​​​ បាន​​​ឡើង​​​លើ​​​បង្គោល​​​ ហើយ​​​បន្ទាប់មក​​​បាន​​​ហៅ​​​អ្នកគាំទ្រ​​​របស់​​​ខ្លួន​​​វិលមក​​​ក្រុង​​​ភ្នំពេញ​​​វិញ​​​។

យុទ្ធការ​​​របស់​​​គណបក្ស​​​សង្គ្រោះ​​​ជាតិ​​​ទាក់ទិននឹង​​​ការ​​​ទន្ទ្រាន​​​ចូលព្រំដែន​​​ ដែលគួបផ្សំ​​​នឹង​​​ការ​​​អះអាង​​​ថា រដ្ឋាភិបាល​​​កំពុង​​​ប្រើប្រាស់​​​ដោយ​​​ខុស​ច្បាប់​​​នូវ​​​ផែនទី​​​វៀតណាម​​​ជំនួស​​​ឲ្យ​​​ផែនទី​​​បារាំង​​​ក្នុងការ​​​កំណត់​​​ព្រំដែន​​​ ចាប់ផ្តើម​​​ដោយ​​​មិនបាន​​​​​សម្រេច។ ការជំរុញ​​​ចុងក្រោយ​​​ដោយ​​​រដ្ឋាភិបាល​​​គឺថា ខ្លួន​​​នៅស្ងប់ស្ងៀម​​។

មេដឹកនាំ​​​គណបក្ស​​​ប្រឆាំង​​​លោក សម រង្ស៊ី (ឆ្វេង) ថតសែលហ្វីជាមួយ​​​លោកនាយក​​​រដ្ឋមន្ត្រី​​​ ហ៊ុន សែន នៅឯ​​​សណ្ឋាគារ​​​​​​កាំបូឌីយ៉ាណា ក្នុងក្រុងភ្នំពេញ នៅខែកក្កដា។ 
មេដឹកនាំ​​​គណបក្ស​​​ប្រឆាំង​​​លោក សម រង្ស៊ី (ឆ្វេង) ថតសែលហ្វីជាមួយ​​​លោកនាយក​​​រដ្ឋមន្ត្រី​​​ ហ៊ុន សែន នៅឯ​​​សណ្ឋាគារ​​​​​​កាំបូឌីយ៉ាណា ក្នុងក្រុងភ្នំពេញ នៅខែកក្កដា។

ការវិវត្តនៃការ​​​ចាប់ខ្លួន​​​​​​​​​​​​​​​​​​​​​

ការប៉ុនប៉ង​​​ស្ទាក់ស្ទើរក្នុងភាព​​​ជាដៃគូទទួល​​​បរាជ័យ​​​ផងដែរ។

ពីរថ្ងៃ​​​បន្ទាប់ពី​​​ដំណើរ​​​ទៅកាន់ព្រំដែន​​​របស់​​​លោក​​​ ខេមរិន្ទ​​​ តុលាការ​​​ក្រុង​​​ភ្នំពេញ​​​បាន​​​ផ្តន្ទាទោស​​​​​​យ៉ាង​​​តក់ក្រហល់​​​ចំពោះ​​​សកម្មជន​​​គណបក្ស​​​សង្គ្រោះ​​​ជាតិ​​​១១នាក់​​​ ដែលចោទ​​​ពីបទ​​​កុបកម្ម​​​ទាក់ទិន​​​នឹង​​​ការ​​​ប្រវាយ​ប្រតប់​​​គ្នា​​​នៅឯ​​​ការ​​​តវ៉ា​​​នៅទីលាន​​​ប្រជាធិបតេយ្យ​​​ក្នុង​​​ក្រុងភ្នំពេញ​​​ នៅថ្ងៃទី​​​១៥ ខែកក្កដា ឆ្នាំ​​​២០១៤​​​។

ក្នុងរឿងក្តី​​​មួយ​​​ដែល​​​អូសបន្លាយ​​​ជាង​​​មួយ​​​ឆ្នាំ​​​ លោក លឹម​​​ មករន្ទ ចៅក្រម​​​ជំនុំ​​​ជម្រះ​​​ប្រើ​​​ពេល​​​តែ​​​១០​​​នាទី​​​ប៉ុណ្ណោះ​​​ក្នុងការ​​​កាត់​​​សកម្មជន​​​បីនាក់​​​ឲ្យ​​​ជាប់ពន្ធនាគារ​​​២០ឆ្នាំ​​​ ពីបទ​​​ដឹកនាំ​​​កុបកម្ម​​​ និង​​​សកម្មជន​​​ប្រាំបីនាក់​​​ផ្សេង​ទៀត​​​ឲ្យជាប់​​​ពន្ធនាគារ​​​ប្រាំពីរ​​​ឆ្នាំ​​​ពីបទ​​​ចូលរួម​​​កុបកម្ម​​​។

មេដឹកនាំ​​​គណបក្ស​​​ប្រឆាំង​​​បាន​​​ដឹង​​​ច្បាស់​​​អំពី​​​ស្ថានភាព​​​នៃ​​​ការ​​​ផ្តន្ទាទោស​​​ទាំង​​​តក់ក្រហល់​​​និង​​​ធ្ងន់​​​។

លោក សម រង្ស៊ី បាន​​​និយាយ​​​នៅថ្ងៃទី​​​២៦ ខែកក្កដា ពីទីក្រុងលុច​​​ហ្សំបួរ​​​ បន្ទាប់ពី​​​ចាក​​​ចេញ​​​ពី​​​ក្រុង​​​ភ្នំពេញ​​​នៅថ្ងៃ​​​នៃការ​​​ចេញ​​​សាលក្រម​​​ថា “នេះ​​​ជាសញ្ញា​​​ដ៏ខ្លាំង​​​ចំពោះ​​​គណបក្ស​​​ប្រឆាំង​​​គឺ​​​ កុំទៅ​​​ព្រំដែន​​​ ហើយ​​​ដរាប​​​ណា​​​យើង​​​ឈប់​​​ទៅព្រំដែន​​​ ហើយលែង​​​​​​បង្កើត​​​ភាព​​​តាន​​​តឹង​​​ដោយ​​​បង្ហាញ​​​ភ័ស្តុតាង​​​នានា អ៊ីចឹង​​​អត់មាន​​​បញ្ហា​​​អីទេ”។

មេដឹកនាំ​​​គណបក្ស​​​ប្រឆាំង​​​រូបនេះ​​​បាន​​​មាន​​​ប្រសាសន៍​​​ថា “វាគ្រាន់តែ​​​ជា​ការ​​​បង្ហាញ​​​សារ។ វាអាច​​​គួរឲ្យ​​​អាម៉ាស់​​​​​​ក្នុងការ​​​ទទួលស្គាល់ថា បញ្ហា​​​ព្រំដែន​​​​គឺជាបញ្ហា​​​រសើប។​​​ គឺត្រូវ​​​ “ដោះស្រាយ​​​” ដោយ​​​មិនមាន​​​នរណា​​​ម្នាក់​​​ចូលរួម​​​ក្រៅតែ​​​ពី​​​មន្ត្រី​​​រដ្ឋាភិបាល​​​នោះទេ​​​។

សាលក្រម​​​បាន​​​ក្លាយជា​​​ការសាកល្បង​​​ចំពោះអ្វី​​​ដែល​​​ទំនង​​ជា​​​យុទ្ធនាការ​​​វែង​​​របស់​​​លោក​​​ ហ៊ុន សែន ដើម្បី​​​សាកល្បង​​​ភក្តីភាព​​​របស់​​​លោក សម​ រង្ស៊ី ចំពោះ​​​វប្បធម៌សន្ទនា ដែល​​​ពោរពេញ​​​ទៅ​​​ដោយ​​​ការ​​​វាយ​​​ប្រហារ​​​។

នៅថ្ងៃទី១៣ ខែសីហា​​​ លោក ហ៊ុន សែន បាន​​​ត្អូញត្អែរ​​​ពេល​​​ថ្លែង​​​ជា​សាធារណៈ​​​ថា លោក​​​សម្រាន្ត​​​មិនលក់​​​នៅរាត្រី​​​មួយ​​​នោះ​​​ ដោយសារ​​​តែ​​​លោក​​​មើល​​​វីដេអូទាក់ទង​​​នឹង​​​ទំព័រ​​​ហ្វេសប៊ុក​​​លោក រង្ស៊ី ដែលឃើញ​​​​​​លោក ហុង សុខហួរ សមាជិក​​​ព្រឹទ្ធសភា​​​គណបក្ស​​​ប្រឆាំង ធ្វើបទបង្ហាញ​​​សន្ធិសញ្ញា​​​ការទូត​​​ក្លែងក្លាយ​​​ថា ជាការពិត​​​។

សន្ធិសញ្ញានោះ​​​បង្ហាញ​​​ថា របប​​​សាធារណរដ្ឋ​​​ប្រជាមានិត​​​កម្ពុជា​​​នា​ទសវត្សរ៍​​​ឆ្នាំ​​​១៩៨០​​​ ដែល​​​ពេល​​​នោះ​​​លោក ហ៊ុន សែន ជារដ្ឋមន្ត្រី​​​ក្រសួង​​​ការ​​​បរទេស​​​ ហើយ​​​បន្ទាប់មក​​​ជា​​​នាយករដ្ឋមន្ត្រី​​​ យល់​​​ព្រម​​​រំលាយ​​​ចោល​​​ព្រំដែន​​​រវាង​​​វៀតណាម​​​ និង​​​កម្ពុជា។

លោក ហ៊ុន សែន​​​ បាន​​​បញ្ជា​​​ឲ្យ​​​ចាប់ខ្លួន​​​សមាជិក​​​ព្រឹទ្ធសភា​​​គណបក្ស​​​ប្រឆាំង​​​។ ពីរថ្ងៃក្រោយ​​​មក នៅម៉ោង​​​៦ព្រឹក​​​ លោក​​​ សុខហួរ ត្រូវឡោមព័ទ្ធ​​​នៅ​​​ខាង​​​ក្រៅ​​​គេហដ្ឋាន​​​មួយ​​​កន្លែង​​​ក្នុង​​​ក្រុង​​​ភ្នំពេញ​​​ ដោយ​​​កម្លាំង​​​ប៉ូលិស​​​ប្រដាប់​​​អាវុធ​​​ជ្រែកខ្លួន​​​ និង​​​ត្រូវ​​​ចោទ​​​ពីបទ​​​ក្លែង​​​និង​​​ញុះញង់​​​ ទោះបីជា​​​លោក​មាន​​​អភ័យឯកសិទ្ធិ​​​រួច​​​ផុត​​​​​​ពីការ​​​ផ្តន្ទា​​​ទោស​​​ក៏ដោយ​​​។

ព្រឹទ្ធសភា​​​ដែលមាន​​​អាសនៈភាគច្រើន​​​ពីរ​​​ភាគបី​​​ជា​​​គណបក្ស​​​ប្រជាជន​​​កម្ពុជា​​​ ត្រូវ​​​ដក​​​អភ័យ​​​ឯកសិទ្ធិ​​​របស់​​​លោក​​​ ហុង សុខហួរ និង​​​អនុញ្ញាត​​​ឲ្យ​​​ករណីនេះ​​​ដំណើរការ​​​ទៅបាន​​​ បន្ទាប់មក​​​បាន​​​ជួប​​​ប្រជុំគ្នា​​​ហើយ​​​សម្រេច​​​ថា មិនចាំបាច់​​​ធ្វើ​​​ដូច្នោះទេ​​​ គឺទុក​​​ឲ្យ​​​តុលាការ​​​ដាក់​​​ពន្ធនាគារ​​​ចំពោះ​​​សមាជិក​​​ព្រឹទ្ធសភា​​​រូប​​​​​​នេះទៅចុះ​​។

ដោយលើកឡើង​​​អំពី​​​​​​មាត្រា​​​លើកលែង​​​សំខាន់​​​នៅក្នុង​​​រដ្ឋធម្មនុញ្ញ​​​ចំពោះ​ករណី​​​ផ្សេងៗ​​​នៅពេល​​​ដែល​​​តំណាង​​​រាស្ត្រ​​​ត្រូវ​​​ចាប់​​​ខ្លួន​​​ដោយ​​​ប្រព្រឹត្ត​​​​​​បទ​ល្មើស​​​ជាក់ស្តែង ព្រឹទ្ធសភា​​​ដែល​​​គ្រប់គ្រង​​​ដោយ​​​គណបក្ស​​​ប្រជាជន​​​កម្ពុជា​​​​អនុញ្ញាត​​​ឲ្យ​​​ករណី​​​នេះ​​​ដំណើរការ​​​ទៅមុខ​​​ ដោយ​​​ផ្តល់​​​ទឡ្ហីករណ៍​​​ថា វីដេអូ​​​របស់​​​លោក​​​ សុខហួរ ដែល​​​ប្រព្រឹត្ត​​​បទល្មើស​​​ គឺជា​​​បទល្មើស​​​ជាក់ស្តែង​​​ដែល​​​អភ័យឯកសិទ្ធិ​​​របស់​​​លោក​​​មិនអាច​​​ការពារ​​​ខ្លួន​​​លោក​​​បាន​​​ទេ​​​។

លោក គល់ បញ្ញា នាយក​​​អង្គការ​​​ខុមហ្វ្រែល បាន​​​មាន​​​ប្រសាសន៍​ថា​ “នេះ​ជា​​​ទង្វើផ្ទុយ​​​នឹង​​​រដ្ឋធម្មនុញ្ញ​​​ដែល​​​បង្កើត​​​ជាដើម​​​ចម​​​ដែលថា សមាជិក​​​សភាគ្មាន​​​អភ័យឯកសិទ្ធិ​​​អ្វីទាំង​​​អស់​​​ ពីព្រោះ​​​ឥឡូវនេះ គេអាច​​​ចាប់ខ្លួន​​​នរណា​​​ម្នាក់​​​បាន​​​ដោយ​​​មិនចាំបាច់​​​​​​ដក​​​អភ័យឯកសិទ្ធិ​​​របស់​​​គេ”។

នៅថ្ងៃទី១៧ ខែសីហា​​​ លោក សម រង្ស៊ី បានបង្គាប់​​​ឲ្យ​​​តំណាង​​​រាស្ត្រ​​​គណបក្ស​​​ប្រឆាំង​​​ទាំង​​​អស់​​​បញ្ឈប់​​​ការ​​​ធ្វើ​​​យុទ្ធនាការ​​​ព្រំដែន​​​វៀតណាម​​​ ហើយ​​​ធ្វើការ​​​​​​ជា​​​​​​ស្ថាបនា​​​បន្ថែមទៀត​​​ជាមួយ​​​គណបក្ស​​​កាន់​​​អំណាច​​​របស់​​​លោក ហ៊ុន សែន។

មេដឹកនាំ​​​គណបក្ស​​​ប្រឆាំង​​​រូបនេះ​​​បាន​​​មាន​​​ប្រសាសន៍ថា “បើ​​​យើង​​​ដឹង​ថា វា​​​រសើប​​​ យើង​​​មិន​​​ចាក់​​​ចង្កេះទេ យើង​​​នឹង​​​រក​​​វិធី​​​មួយ​​​ថ្មី​​​។ ពេលយើង​​​ដឹង​​​​ថា រសើប​​​ យើងត្រូវ​​​ប្រុងប្រយ័ត្ន​​​”។

បើអ្នកមិនអាច​​​ឈ្នះគេ

កាលពី​​​ដើម​​​ខែ​​​សីហា លោក ហ៊ុន សែន បាន​​​ប្រកាសថា ការ​​​បោះឆ្នោត​​​អាណត្តិ​​​ក្រោយ​​​ដែលប្តូរ​​​កាលបរិច្ឆេទពី​​​ខែកក្កដា​​​ ឆ្នាំ​​​២០១៨​​​ទៅជា​​​ខែ​កុម្ភៈ ​ឆ្នាំ​​​២០១៨​​​វិញ ជាផ្នែកនៃកិច្ច​​​ព្រមព្រៀង​​​នាខែកក្កដា ឆ្នាំ​​​២០១៤​​​ នឹង​​​វិលទៅរក​​​ខែកក្កដា ឆ្នាំ​​​២០១៨វិញ ដោយ​​​ចំអក​​​ដាក់​​​គណបក្ស​​​សង្គ្រោះ​ជាតិ​​​​ថា ជឿលើ​​​ការ​​​សន្យា​​​ដែល​​​មិនមាន​​​សរសេរ​​​ជា​​​លាយលក្ខណ៍​​​អក្សរ​​​។

លោក ហ៊ុន សែន បាន​​​សួរ​​​ការ​​​សម្រេចចិត្ត​​​របស់​​​លោក​​​ថា​​​វិល​​​ត្រឡប់​​​ទៅលើ​​​ការ​​​សន្យាថា “​​​មូលហេតុ​​​អី? មក​​​ពី​​​ពួក​​​លោក​​​ឯង​​​ភ្លើ​​​​​​តើ​​​​​​”។

លោក សម រង្ស៊ី មិន​​​ភ្ញាក់ផ្អើល​​​ ដោយ​​​វាយ​​​ប្រហារ​​​ជាចំហ​​​ទៅលើ​​​លោក​​​ ហ៊ុន សែន ជាលើក​​​ដំបូង​​​ ចាប់តាំង​​​ពី​​​មាន​​​ភាព​​​ល្អូកល្អឺន​​​នឹងគ្នា​​​។

លោក​​​ សម រង្ស៊ី បាន​​​មាន​​​ប្រសាសន៍​​​​​​នៅក្នុង​​​សារ​​​អីុម៉ែល​​​ថា​ “ប្រាកដ​ណាស់​ មាន​​​មនុស្ស​​​ដែល​​​មិន​​​អើពើ​​​នឹង​​​អត្ថ​​​ន័យ​​​នៃពាក្យ​​​ពេចន៍​​​ ‘ពាក្យខ្ញុំ​គឺជា​​​ចំណងខ្ញុំ’ ទោះជានៅពេល​​​ដែល​​​ពាក្យ​​​របស់​​​គេ​​​ត្រូវ​​​គេ​​​ស្តាប់​​​ឮគ្រប់គ្នា​​​ក៏ដោយ​​​។ រឿងនេះ​​​បញ្ជាក់​​​យ៉ាង​​​ច្រើន​​​អំពី​​​ភាព​​​គួ​​​រឲ្យជឿទុក​​​ចិត្ត​​​របស់​​​គេ និង​​​កិត្តិយស​​​របស់​​​គេ”។

ក្នុង​​​ខែ​​​កក្កដា លោក ហ៊ុន សែន​​​ បាន​​​ប្រើ​​​សុន្ទរកថា​​​​​​នៅ​​​ឯ​​​សណ្ឋាគារ​​​សុខា​​​ក្នុង​​​ក្រុង​​​ភ្នំពេញ​​​ ដើម្បី​​​បង្កើន​​​ការ​​​គំរាម​​​​​​របស់​​​លោកថា ជ័យ​​​ជម្នះ​​​ដោយ​​​គណបក្ស​​​សង្គ្រោះ​​​ជាតិ​​​​​​ក្នុង​​​ការ​​​បោះ​​​ឆ្នោត​​​​​​ជាតិ​​​នា​​​ឆ្នាំ​​​២០១៨​​​នឹង​​​នាំ​​​ឲ្យ​​​មាន​​​សង្គ្រាម ដែល​​​ជា​​​សម្តី​​​វោហារ​​​សាស្ត្រ​​​​​​ដ៏​​​ពេញ​​​និយម​​​មួយ។

លោក​​​ ហ៊ុន សែន​​​ បាន​​​ប្រាប់​​​​​ពាណិជ្ជករ​​​ដែល​​​ចូល​​​រួម​​​​​​ពិធី​​​នៅ​​​ថ្ងៃ​​​ទី​​​២២ ខែ​​​កញ្ញា​​​ថា “​​បើ​បោះ​ឆ្នោត​ឲ្យ​គេ​ [គណ​​បក្ស​​​​សង្គ្រោះ​ជាតិ​និយាយ​ថា] បាន​វា​ដោះ​ស្រាយ​​​​​​នេះ​ដោះ​ស្រាយ​​​នោះ ក៏​ប៉ុន្តែ​ខ្ញុំ​ហ៊ាន​និយាយ ​​អស់​លោក​នៅ​ទីនេះ​សុទ្ធ​តែ​សត្រូវ​របស់​​​​ពួកគេ​​”។

លោក​​​ ហ៊ុន សែន បាន​​​មាន​​​ប្រសាសន៍​​​ចាក់​​​ថា “​​​អ៊ីចឹង​​ តើ​អា​ហ្នឹង​សុខ​ទេ​ អា​ហ្នឹង​? នែ អស់​លោក ​​អ្នក​​​​ឧកញ៉ា​ទាំង​ឡាយ​សុទ្ធ​តែ​ជា​សត្រូវ​វណ្ណៈ​ណា​ គេ​នឹង​រឹប​អូស​អូតែល​ ​ហ្នឹង​​​​​​ឲ្យ​ទៅ​អ្នក​ក្រ។ អ៊ីចឹង​​​ ​តើ​វា​សុខ​ទេ”។​​​​​​​​​​​​​​​​​​​​​​​​​​​​​

​លោក​​​នាយក​​​រដ្ឋ​​​មន្ត្រី​​​បាន​​​សន្និ​​​ដ្ឋាន​​​ថា “អ៊ីចឹង ​​​រឿង​អី​វា​មិន​កើត​សង្គ្រាម​។ ចំណុច​នេះ​ជា​ចំណុច​ដែល​ត្រូវ​គិត”។​​​

ការ​​​គំរាម​​​របស់​​​លោក ហ៊ុន សែន គឺ​​​​​​​​​ភ្ជាប់​​​នឹង​​​​​​ការ​​​អះ​​​អាង​​​ថា គោល​​​នយោ​​​បាយ​​​លោក រង្ស៊ី​​​​​​ នឹង​​​មិន​​​ខុស​​​គ្នា​​​នឹង​​​ប៉ុល ពត​​​ឡើយ ហើយ​​​​​​ណែនាំ​​​​​​ដល់​​​ខ្មែរ​​​ឥស្លាម​​​ថា រដ្ឋាភិបាល​​​ដឹក​​​នាំ​​​ដោយ​​​គណ​​​បក្ស​​​សង្គ្រោះ​​​ជាតិ​​​​​​អាច​​​ធ្វើ​​​ឲ្យ​​​ពួក​​​គេ​​​ត្រូវ​​​សម្លាប់​​​រង្គាល​​​ដូច​​​ស្ថិត​​​ក្រោម​​​របប​​​ប៉ុល ពត​​​ដែរ។​​​

លោក រង្ស៊ី ត្រៀម​​​ខ្លួន​​​​​​សហការ។​​​ លោក រង្ស៊ី​​​ បាន​​​ប្តេជ្ញា​​​ថា គណបក្ស​​​សង្គ្រោះ​​​ជាតិ​​​​​​នឹង​​​បង្កើត​​​”តុលាការ​​​ឯករាជ្យ​​​មួយ​​​​​​ដោះ​​​ស្រាយ​​​​​​ដី​​​ធ្លី​​​​​​ដែល​​​រឹប​​​អូស​​​ពី​​​អ្នក​​​ក្រី​​​ក្រ​​​ ហើយ​​​គួរ​​​មាន​​​ការ​​​ស៊ើប​​​អង្កេត​​​​​​ក្នុង​​​ពេល​​​អនាគត​​​​​​ដែល​​​ធ្វើ​​​ឡើង​​​ដោយ​​​​​​តុលាការ​​​ឯករាជ្យ​​​”។​​​

មេដឹក​​​នាំ​​​គណបក្ស​​​ប្រឆាំង​​​រូប​​​នេះ​​​បាន​​​មាន​​​ប្រសាសន៍​​​ថា “​​​ហ៊ុន សែន​​​ មាន​​​គំនិត​​​​​​ជ្រុល​​​និយម​​​ដែល​​​គាត់​​​មិន​​​អាច​​​លះ​​​បង់​​​ចោល​​​បាន”។​​​​​​ ជន​​​ជាតិ​​​ខ្មែរ​​​នៅ​​​ក្រៅ​​​​​​ប្រទេស​​​ជា​​​ច្រើន​​​បាន​​​យល់​​​ស្រប។​​​ ក្នុង​​​ពេល​​​ដែល​​​លោក​ ហ៊ុន សែន​​​ ធ្វើ​​​ដំណើរ​​​ជុំ​​​វិញ​​​សហរដ្ឋ​​​អា​​​មេរិក និង​​​​​​បារាំង​​​ក្នុង​​​រយៈ​​​ពេល​​​​​​ប៉ុន្មាន​​​​ខែ​​​បន្ទាប់​​​មក ជនជាតិ​​​ខ្មែរ​​​​​​នៅ​​​ទីនោះ​​​បាន​​​ធ្វើ​​​ការ​​​តវ៉ា​​​បំបាក់​​​មុខ។​ លោក​​​នាយក​​​រដ្ឋ​​​មន្ត្រី​​​​​​ក៏​​​បាន​​​វាយ​​​បក​​​វិញ។​​​​​​

លោក ហ៊ុន សែន បាន​​​ប្រកាស​​​​​​ពី​​​ក្រុង​​​ប៉ារីស​​​នៅ​​​ថ្ងៃ​​​ទី​​​២០ ខែ​​​តុលា​​​ថា​ “នៅ​ពេល​​​​ដែល​​​ទីនេះ​​​​​​[ក្រុង​​​បា៉រីស] ធ្វើ​​​បាតុកម្ម​​​ ខ្ញុំ​​​ក៏​​​បាន​​​ទទួល​​​នូវ​​​សារ​​​ពី​​​ក្រុង​​​ភ្នំពេញ​​​ ស្អែក​​​នេះ​​​សុំ​​​ធ្វើ​​​បាតុកម្ម​​​ដែរ​​​។ ​​​ឥឡូវ​​​​​​​ឲ្យ​​​ខ្ញុំ​​​​ត្រូវ​​​ដោះ​​​ស្រាយ​​​រឿង​​​នេះ​​​យ៉ាង​​​ម៉េច​​​?”

លោក ហ៊ុន សែន បាន​​​មាន​​​ប្រសាសន៍​​​ថា ​​​”ស្អែក​​​​​​នេះ​​​នឹង​​​​​​មាន​​​បាតុកម្ម​​​នៅ​​​ក្រុង​​​ភ្នំពេញ​​​​​​ ដើម្បី​​​ប្រឆាំង​​​​​​បក្ស​​​ប្រឆាំង​​​​​​ ហើយ​​​និង​​​ទាម​​​ទារ​​​ដក​​​អនុប្រធាន​​​សភា​​​ជាតិដែល​​​ចេញ​​​ពី​​​បក្ស​​​ប្រឆាំង ​​​​​​ព្រោះ​​​គេ​​​ឡើង​​​តាម​​​​​​សន្លឹក​​​ឆ្នោត​​​គណបក្ស​​​ប្រជា​​​ជន​​​ ដូច្នេះ​​​គេ​​​ត្រូវ​​​ធ្លាក់​​​វិញ​​​តាម​​​​​​សន្លឹក​​​ឆ្នោត​​​គណបក្ស​​​​​ប្រជា​​​ជន​​​​​​ដែរ​​​”។

​​​ឥឡូវ​​​នេះ ដោយ​​​មាន​​​វប្ប​​​ធម៌​​​សន្ទនា​​​​​​ជារឿង​​​លេង​​​សើច​​​ ការ​​​តវ៉ា​​​ប្រឆាំង​​​នឹង​​​លោក កឹម សុខា បាន​​​កើត​​​មាន​​​ឡើង​​​​​​នៅ​​​ថ្ងៃ​​​បន្ទាប់​​​ក្នុង​​​ក្រុង​​​ភ្នំពេញ។​​​ តាម​​​ព្រំដែន​​​ថៃ ក៏​​​មាន​​​ទាហាន​​​ខ្មែរ​​​តវ៉ា​​​​​​ទាមទារ​​​ដក​​​លោក សុខា ដែរ។

ការ​​​តវ៉ា​​​ក្នុង​​​ក្រុង​​​ភ្នំពេញ​​​​​​បាន​​​ធ្វើ​​​ឡើង​​​ភាគ​​​ច្រើន​​​​​​ដោយ​​​សន្តិវិធី​​​នៅ​​​ខាង​​​ក្រៅ​​​​​​រដ្ឋ​​​សភាដែល​​​កំពុង​​​ប្រជុំ រហូត​​​ដល់​​​មាន​​​​​​​​​​​​មនុស្ស​​​ហិង្សា​​​មួយ​​​ក្រុម​​​ដែល​​​ស្ថិត​​​ក្នុង​​​ចំណោម​​​អ្នក​​​តវ៉ា​​​បាន​​​​​​ទាញ​​​ទម្លាក់​​​តំណាង​​​រាស្ត្រ​​​គណ​​​បក្ស​​​ប្រឆាំង គឺ​​​លោក ញ៉យ ចំរើន និង​​​លោក​​​ គង់​​​ សភា ចេញ​​​ពី​​​រថយន្ត​​​របស់​​​ពួកគាត់​​​ ក្នុង​​​ពេល​​​ដែល​​​ពួកគាត់​​​កំពុង​​​ចាក​​​ចេញ​​​ពី​​​សភា ហើយ​​​ក៏​​​វាយ​​​ដំ​​​ច្រំ​​​ធាក់​​​ពួក​​​​​​គាត់​​​​​​រហូត​​​មាន​​​ឈាម។​​​​​​​​​​​​​​​​​​​​​

​លោក សម រង្ស៊ី បាន​​​បន្ទោស​​​លោក ហ៊ុន សែន​​​ ថា​​​បាន​​​រៀប​​​ចំ​​​ឲ្យ​​​មាន​​​ការ​​​វាយ​​​តប់​​​នោះ។ ត្រឡប់​​​មក​​​មាតុ​​​ប្រទេស​​​វិញ លោក ហ៊ុន សែន បាន​​​បដិសេធ​​​​​​​ចំពោះ​​​ការ​​​អះអាង​​​នោះ​​​តាម​​​ទូរទស្សន៍​​​ ប៉ុន្តែ​​​បាន​​​អះ​​​អាង​​​ម្តង​​​ហើយ​​​ម្តង​​​ទៀត​​​ថា ការ​​​តវ៉ា​​​នោះ​​​បាន​​​ធ្វើ​​​ឡើង​​​​​​ជា​​​ការ​​​សង​​​សឹក​​​នឹង​​​​​​បាតុកម្ម​​​​​​ប្រឆាំង​​​រូប​​​លោក​​​នៅ​​​ក្នុង​​​ក្រុង​​​ញូវ​​​យ៉ក និង​​​ប៉ារីស។

មាន​​​ទាហាន​​​បី​​​នាក់​​​​​​​​​បាន​​​ចូល​​​ខ្លួន​​​សារភាព ហើយ​​​ត្រូវ​​​ចាប់​​​ខ្លួន​​​​​​ពី​​​បទ​​​វាយ​​​ដំ​​​មួយ​​​សប្តាហ៍​​​ក្រោយ​​​មក។​​​ គ្មាន​​​នរណា​​​ផ្សេង​​​ទៀត​​​នៅ​​​ក្នុង​​​​​​ហ្វូង​​​មនុស្ស​​​ហិង្សា​​​ត្រូវ​​​បាន​​​គេ​​​ចាប់​​​ខ្លួន​​​ទេ ហើយ​​​ក្រុម​​​មន្ត្រី​​​បាន​​​និយាយ​​​ថា ពួកគេ​​​មិន​​​ដឹង​​​ថា ទាហាន​​​ទាំង​​​បី​​​នាក់​​​នោះ​​​​​​ចេញ​​​មក​​​ពី​​​អង្គ​​​ភាព​​​ណាដែរ។

លោក សម រង្ស៊ី ធ្វើ​​​ដំណើរ​​​ទៅ​​​ក្រុង​​​ប៉ារីស

ដោយ​​​មាន​​​ការ​​​វាយ​​​ដំ​​​ច្រំ​​​ធាក់​​​ជា​​​សាធារណៈ​​​ទៅ​​​លើ​​​តំណាង​​​រាស្ត្រ​​​ នយោបាយ​​​គណ​​​បក្ស​​​បាន​​​ប្រែ​​​ក្លាយ​​​​​​យ៉ាងឆាប់​​​រហ័ស​​​ពី​​​ល្អ​​​ទៅ​​​អាក្រក់​​​​​​ដោយ​​​បង្ហាញ​​​ឲ្យ​​​ឃើញ​​​នូវពេល​​​យូរ​​​យារ​​​មក​​​ហើយ។​​​​​​​​​​​​​​​​​​​​​​​​​​​

ប៉ុន្មាន​​​ថ្ងៃ​​​​​​ក្រោយ​​​ពី​​​ការ​​​វាយ​​​ដំ​​​ សភា​​​ដឹក​​​នាំ​​​ដោយ​​​គណបក្ស​​​ប្រ​​​ជាជន​​​កម្ពុជា​​​​បាន​​​បណ្ដេញ​​​លោក កឹម សុខា ចេញ​​​ពី​​​តំណែង​​​​​​អនុប្រធាន​​​សភា​​​​​​នៅ​​​ក្នុង​​​​​​សម័យ​​​ប្រជុំ​​​​​​ដែល​​​ធ្វើ​​​ពហិការ​​​​​​ដោយ​​​តំណាង​​​រាស្ត្រ​​​ផ្សេង​​​ទៀត​​​របស់​​​បក្ស​​​ប្រឆាំង។ អ្នកគាំទ្រ​​​​​​ និង​​​អ្នក​​​វិភាគ​​​​​​ផ្នែក​​​ច្បាប់​​​​​​បាន​​​ចាត់​​​ទុក​​​វិធានការ​​​បែប​​​នោះ​​​ថា​​​ខុស​​​ច្បាប់​​​ ហើយ​​​គណបក្ស​​​ប្រ​​​ជាជន​​​កម្ពុជា​​​កំពុង​​​កាន់​​​អំណាចធ្វើ​​​ព្រងើយ​​​​​​កន្តើយ។​​​​​​​​​​​​

ពីរ​​​សប្តាហ៍​​​ក្រោយ​​​មក គណបក្ស​​​កាន់​​​អំណាច​​​បង្កើន​​​ការ​​​ទាម​​​ទារ។​​​ តុលាការ​​​ក្រុង​​​ភ្នំពេញ​​​​​​បាន​​​ចេញ​​​​​​​​​ដីកា​​​ចាប់​​​​​​ខ្លួន​​​​​​លោក សម រង្ស៊ី ពី​​​បទ​​​បរិហា​​​រកេរិ៍្ត​​​ដែល​​​ឈ្នះ​​​ក្តី​​​ដោយ​​​លោក ហោ ណាំហុង រដ្ឋ​​​មន្ត្រី​​​​​​ក្រសួង​​​ការ​​​បរទេស ក្នុង​​​​​​ដើម​​​ឆ្នាំ​​​២០១១។​​​​​​​​​

ស្ថិត​​​នៅ​​​ក្នុង​​​ប្រទេស​​​កូរ៉េ​​​ខាង​​​ត្បូង​​​នៅ​​​ពេល​​​នោះ មេ​​​ដឹក​​​នាំ​​​គណបក្ស​​​ប្រឆាំង​​​​​​បាន​​​ប្តេជ្ញា​​​ថា លោក​​​​​​នឹង​​​​​​មកប្រឈម​​​​​​មុខ​​​ការ​​​កាត់​​​ឲ្យ​​​ជាប់​​​ពន្ធនាគារ​​​រយៈ​​​ពេល​​​ពីរ​​​ឆ្នាំ។​​​

មេ​​​ដឹក​​​នាំ​​​គណបក្ស​​​ប្រឆាំង​​​រូប​​​នេះ​​​​​​បាន​​​ស្រែក​​​ទៅ​​​កាន់​​​អ្នក​​​គាំទ្រ​​​​​​នៅ​​​ក្រៅ​​​ប្រទេស​​​ថា “ពួក​​​គេ​​​នឹង​​​​​​មក​​​ចាប់​​​ សម រង្ស៊ី។ តើ​​​សម រង្ស៊ី​​​ខ្លាចទេ​​​?​ អត់ទេ។​ កម្ពុជា​​​ជា​ប្រទេស​កំណើត​​ ជា​មាតុភូមិ​​​របស់​ខ្ញុំ ហើយ​ខ្ញុំ​ពិត​ជា​ត្រូវ​វិល​ត្រឡប់​​​ទៅ​វិញ​ដើម្បី​​សង្គ្រោះ​​ប្រទេស​របស់​​​យើង​។ គម្រោង​របស់​ខ្ញុំ​មិន​កែប្រែ​​ទេ​។ ទោះ​បី​ខ្ញុំ​ស្លាប់​ វា​គ្មាន​បញ្ហា​ទេ​។ ខ្ញុំ​នឹង​ស្លាប់​ក្នុង​នាម​ជា​ខ្មែរ​ ហើយ​មិន​ស្លាប់​បម្រើ​ជន​បរទេស​​ទេ​ ”។

រឿង​​​នេះ​​​មិន​​​ដូច្នេះ​​​សោះ។ លោក សម រង្ស៊ី បាន​​​លុប​​​ចោល​​​គម្រោង​​​របស់​​​លោក​​​ប៉ុន្មាន​​​ម៉ោង​​​​​​មុន​​​នឹង​​​​​​ដល់​​​ពេល​​​វិល​​​ត្រឡប់​​​មក​​​វិញ។ មេដឹក​​​នាំ​​​គណបក្ស​​​​ប្រឆាំង​​​រូប​​​នេះ​​​​​​បាន​​​សន្យា​​​ថា​​​នឹង​​​វិល​​​ត្រឡប់​​​​​​មក​​​ប៉ុន្មាន​​​ថ្ងៃ​​​ទៀត​ បន្ទាប់​​​មក​​​ប៉ុន្មាន​​​ខែ​​​ទៀត។​​​ ក្រោយ​​​មក មេដ​​​ឹកនាំ​​​គណ​​​បក្ស​​​ប្រឆាំង​​​រូប​​​នេះ​​​ចាប់​​​ផ្តើម​​​និយាយ​​​ដោយ​​​ទទូច​​​ថា “​​​​​​​​​វា​​​មិន​​​ជួយ​​​ឲ្យ​​​វិល​​​ត្រឡប់​​​មក​​​វិញ​​​គ្រាន់​​​តែ​​​ដើម្បី​​​ផល​​​ប្រយោជន៍​​​​​​​​​​​​នោះ​​​ទេ”។

មេដ​​​ឹកនាំ​​​គណ​​​បក្ស​​​ប្រឆាំង​​​រូប​​​នេះ​​​​​​បាន​​​មាន​​​ប្រសាសន៍​​​ថា “​​​វត្ត​​​មាន​​​ផ្ទាល់​​​របស់​​​ខ្ញុំ​​​​​​មិន​​​សំខាន់​​ទេ។ ក្នុង​​​ពិភពលោក​​​ទំនើប​​​​​​នេះ វត្ត​​​មាន​​​ផ្ទាល់​​​​​​មិន​​​មាន​​​សារ​​​ៈសំខាន់​​​ដូច​​​​​​ការ​​​ប្រាស្រ័យ​​​ទាក់​​​ទង​​​​​​ជាមួយ​​​​​​ប្រជាពល​​​រដ្ឋ​​​ផ្ទាល់ទេ។​​​ ខ្ញុំ​​​នឹង​​​វិល​​​ត្រឡប់​​​មក​​​វិញ​​​ នៅ​​​ពេល​​​ដែល​​​មាន​​​ការ​​​ធានាថា យើង​​​អាច​​​បង្កើត​​​ឲ្យ​​​មាន​​​ការ​​​ផ្លាស់​​​ប្តូរ​​​បែប​​​ប្រជាធិបតេយ្យ”។​​​​​​​​​

លោក សម រង្ស៊ី បាន​​​មាន​​​ប្រសាសន៍​​​ក្នុង​​​កិច្ច​​​សន្ទនា​​​តាម​​​វិទ្យុ​​​កាល​​​ពី​​​ខែ​​​មុន​​​ថា លោក​​​នឹង​​​វិល​​​ត្រឡប់​​​មក​​​វិញ​​​នៅ​​​ប៉ុន្មាន​​​សប្តាហ៍ ឬ​​​ប៉ុន្មាន​​​ខែ​​​មុន​​​នឹង​​​ការ​​​បោះ​​​ឆ្នោត​​​ជាតិ​​​ឆ្នាំ​​​២០១៨។

លោក សម រង្ស៊ី ស្ថិតនៅក្រៅ​​​ប្រទេស​​​ តែ​​​រយៈពេល​​​ជាប់​​​ពន្ធនាគារ​កាន់តែ​​​​កើន​​​ឡើង​​​។ មិនយូរ​​​ប៉ុន្មាន​​​បន្ទាប់ពី​​​ការចេញ​​​ដីកា​​​ចាប់ខ្លួន​​​ដំបូង​ ក្រុម​​​មន្ត្រី​​​បាន​​​ប្រកាស​​​ថា មេដឹកនាំ​​​គណបក្ស​​​ប្រឆាំង​​​រូបនេះ​​​ត្រូវ​​​ចោទ​ប្រកាន់​​​ពី​​​បទ​​​សម​​​គំនិត​​​ ក្លែង និង​​​ញុះញង់​​​ទាក់ទង​​​នឹង​​​សំណុំរឿង​​​លោក​ ហុង សុខហួរ។

មិនដូចគ្នានឹង​​​ឆ្នាំ​​​២០១៣​​​ មន្ត្រី​​​គណបក្ស​​​ប្រជាជនកម្ពុជា​​​បញ្ជាក់យ៉ាង​​​ច្បាស់​ថា នឹង​​​លែងមាន​​​ការ​​​លើកលែងទោស​​​ឲ្យ​​​មេដឹកនាំ​​​គណបក្ស​​​ប្រឆាំង​​​រូប​​​​​​នេះ​​​ទៀតហើយ​​​។

លោក ហ៊ុន សែន បានមាន​​​ប្រសាសន៍​​​ក្នុង​​​សុន្ទរកថាមួយ​​​កាលពី​​​សប្តាហ៍​​​មុនថា “បើ​​​ខ្ញុំ​​​ចុះ​​​ហត្ថ​​​លេ​​​ខា​​​ទី​​​បី​​​ ខ្ញុំ​​​នឹង​​​កាត់​​​ដៃ​​​ស្តាំ​​​ខ្ញុំ​​​ក្រវាត់​​​​​​ចោល ទាល់​​តែ​​ធ្វើ​អ៊ីចឹង [ការ​​​​មិន​ចុះ​ហត្ថលេខា​] ទើប​អ្នក​ឯង​មិន​អាច​​​រត់​ចេញ​​ទៅ​ក្រៅ​ដើម្បី​បោក​គេ​​ទៀត”។

ដោយលោក សម រង្ស៊ី អវត្តមាន​​​ លោក កឹម សុខា បាន​​​វិលត្រឡប់មក​​​ប្រទេស​​​កម្ពុជាវិញ ដោយអម​​​ដំណើរ​​​អ្នកតំណាងរាស្ត្រ​​​គណបក្ស​​​សង្គ្រោះ​ជាតិ​​​ពីររូប​​​ដែលត្រូវគេវាយ​​​ដំ ហើយ​​​កាន់តំណែងជាប្រធាន​​​ស្តីទី​​​នៃ​គណបក្ស​​​សង្គ្រោះជាតិ​​​។

ទន្ទឹម​​​នឹងនោះ​​​ ព្រះអង្គម្ចាស់ នរោត្តម រណឫទ្ធិ បាន​​​រៀបចំពិធី​​​ជួបជុំ​​​យុវជន​​​​​ហ្វុ៊នស៊ិនប៉ិច នៅថ្ងៃទី១១ ខែធ្នូ ដែលនៅពេលនោះ​​​ព្រះអង្គឲ្យ​អ្នកគាំទ្រ​​​ជាយុវជន​​​ចំនួន​​​៤០០នាក់​​​ស្រស់ស្រូប​​​អាហារ​​​ពេល​​​ព្រឹក​​​ ហើយ​​​ច្រៀងចម្រៀង​​​ព្រះអង្គ​​​ និង​​​រាំរែក​​​។

អ្វីៗគ្រប់យ៉ាង​​​វិល​​​ត្រឡប់​​​មក​​​សភាព​​​ធម្មតាវិញ។

មាជ សុវណ្ណារ៉ា ប្រធានព័ត៌មាន​​​គណបក្ស​​​សង្គ្រោះ​​​ជាតិ (ឆ្វេង) និង​​​ អឿ ណារិទ្ធ (ស្តាំ) ជំនួយ​​​ការ​​​របស់​​​អ្នកតំណាង​​​រាស្ត្រ​​​គណបក្ស​​​ប្រឆាំង លោកស្រី មួរ សុខហួរ បក់ដៃពី​​​រថយន្ត​​​នគរបាល​​​នៅឯ​​​តុលាការ​​​ក្រុង​​​ភ្នំពេញ​​​។ រូបថតៈ ស៊ីវ ចាន់ណា/The Cambodia Daily 
មាជ សុវណ្ណារ៉ា ប្រធានព័ត៌មាន​​​គណបក្ស​​​សង្គ្រោះ​​​ជាតិ (ឆ្វេង) និង​​​ អឿ ណារិទ្ធ (ស្តាំ) ជំនួយ​​​ការ​​​របស់​​​អ្នកតំណាង​​​រាស្ត្រ​​​គណបក្ស​​​ប្រឆាំង លោកស្រី មួរ សុខហួរ បក់ដៃពី​​​រថយន្ត​​​នគរបាល​​​នៅឯ​​​តុលាការ​​​ក្រុង​​​ភ្នំពេញ​​​។ រូបថតៈ ស៊ីវ ចាន់ណា/The Cambodia Daily

ឱកាសមួយ​​​ជីវិត

លះបង់ឱកាសរបស់លោក​​​មិនវិលត្រឡប់​​​មក​​​ប្រទេសវិញ ហើយ​​​ប្រឈម​​​នឹង​​​លោក ហ៊ុន សែន និង​​​ការ​​​ផ្តន្ទាទោស​​​ឲ្យ​​​ជាប់ពន្ធនាគារ​​​របស់​​​លោក​នោះ​ លោក សម រង្ស៊ី ចោល​​​ឱកាស​​​ដើម្បី​​​បង្ហាញ​​​ថា អ្វីៗបាន​​​ផ្លាស់ប្តូរ​​​ ហើយ​​​ថា ការបោះឆ្នោត​​​នាឆ្នាំ​​​២០១៨​​​មិនដូចគ្នា​​​នឹងការ​​​បោះឆ្នោត​​​ដទៃទៀតទេ។

ប៉ុន្តែ លោក សម រង្ស៊ី នៅតែមាន​​​ឱកាស​​​គាប់ប្រសើរដែល​​​អនុញ្ញាត​​​ឲ្យ​​​លោក​វិល​​​ត្រឡប់​​​មក​​​កម្ពុជាវិញ​​​ ពេលលោក​​​ចង់មក​​​ ហើយ​​​បង្ខំ​​​​​​ឲ្យ​​​លោក​ ហ៊ុន សែន ចាប់រូបលោក​​​ ឬក៏ដកថយ​​​ ដែល​​​ធ្វើ​​​ឲ្យ​​​រង្គោះរង្គើដល់​​​អាការៈ​ខាង​​​ក្រៅ​​​នៃ​​​ការ​​​គំរាម​​​ពីលោក ហ៊ុន សែន ដែល​​​ពុំដែល​​​បាន​​​សាកល្បង​​​នៅឡើយ។

លោក ហ៊ុន សែន នឹងសង្ឃឹមថា លោក សម រង្ស៊ី នៅដាច់ឆ្ងាយ​​​ ដែល​បណ្តោយ​​​​ឲ្យ​​​រូបលោក​​​គ្រប់គ្រង​​​ប្រទេស​​​​​​ក្នុងរយៈពេល​​​ពីរឆ្នាំ​​​កន្លះបន្តទៀត​​​ដោយ​​​មាន​​​សេរីភាព​​​ ស្រប​​​ពេល​​​ដែល​​​មេដឹកនាំ​​​គណបក្ស​​​ប្រឆាំង​​​ធ្វើ​​​និរទេសខ្លួន។

លោកនាយករដ្ឋមន្ត្រី​​​លះបង់ចោល​​​ច្រើនជាងនេះទៅទៀត​​​ ហើយ​​​ងើបពី​​​ស្ថានការណ៍​​​អាក្រក់​​​ក្នុងរយៈេពល​​​បីទសវត្សរ៍​​​នៃការ​​​កាន់អំណាច​​​របស់​លោក​​​។ លោក សម រង្ស៊ី ដែលជាទម្លាប់​​​ភៀសខ្លួន​​​ពីប្រទេស​​​កម្ពុជា​​​ ក្នុង​ពេលនោះ​​​អាច​​​ខកខាន​​​​​​មិន​​​ប្រើ​​​ឱកាស​​​​​​ដ៏​​​អស្ចារ្យ​​​​​​ត្រឡប់​​​សៀវ​​​ភៅ​​​យុទ្ធសាស្ត្រ​​​​​​​​​​របស់​​​លោក​​​ ហ៊ុន សែន។​​​​​​​​​​

ក្នុង​​​ខណៈ​​​ដែល​​​លោក សម រង្ស៊ី លេង​​​ល្បែង​​​អង្គុយ​​​រង់​​​ចាំ​​​មើល​​​ មេ​​​គណបក្ស​​​​ប្រឆាំង​​​រូប​​​នេះ​​​​​​បន្ត​​​សន្និដ្ឋាន​​​ថា ការ​​​​​​ខឹង​​​អាក​​​់​​​អន់​​​ស្រពន់​​​​​​ចិត្ត​​​នឹង​​​គណបក្ស​​​ប្រ​​​ជា​​​ជន​​​កម្ពុជា ​​​គឺ​​​អាច​​​គ្រប់​​​គ្រាន់​​​ដើម្បី​​​​​​​​​ធ្វើ​​​ឲ្យ​​​គណបក្ស​​​លោក​​​ទទួល​​​បាន​​​ជ័យ​​​ជម្នះ​​​​​​ក្នុង​​​ឆ្នាំ​​​២០១៨​​​​​​ស្ថិត​​​ក្រោម​​​​​​គណៈ​​​កម្មាធិការ​​​ជាតិ​​​រៀប​​​ចំ​​​​​​ការ​​​បោះ​​​ឆ្នោត​​​​​​ទ្វេបក្ស ដែល​​​មាន​​​ការ​​​កែ​​​ទម្រង់​​​។​​​

ប៉ុន្តែ​​​​​​ក្នុង​​​ពេល​​​ដែល​​​លោក សម រង្ស៊ី និង​​​លោក ហ៊ុន សែន លេង​​​នយោ​​​បាយ​​​ដូច​​​ធម្មតា​​​ ពល​​​រដ្ឋ​​​ខ្មែរ​​​ជា​​​ច្រើន​​​ចាប់​​​ផ្តើម​​​មាន​​​អារម្មណ៍​​​ថា នោះ​​​វា​​​មិន​​​ទាន់​​​​​​គ្រប់​​​គ្រាន់​​​ទេ។​​​

ក្នុង​​​ឆ្នាំ​​​២០១៥ គណបក្ស​​​​​​នយោបាយ​​​៧​​​ថ្មី​​​បាន​​​បង្កើត​​​ឡើង។​​​ គណបក្ស​​​ខ្លះ​​​​​​តូច ហើយ​​​ស្ទើរ​​​​​​តែ​​​កាសែត​​​សរសេរ​​​មិន​​​កើត​​​ជា​​​ព័ត៌មាន​​​ គណបក្ស​​​ផ្សេង​​​ទៀត​​​បង្កើត​​​ឡើង​​​ដោយ​​​មាន​​​សមាជិក​​​សង្គម​​​ស៊ីវិល​​​គួរ​​​ជា​​​ទី​​​គោរព និង​​​មាន​​​ប្រ​​​ជា​​​ប្រិយ​​​ភាព។​​​ ថាតើ​​​​​​អារម្មណ៍​​​របស់​​​នរណា​​​ម្នាក់​​​​​​លើក​​​លែង​​​តែ​​​គណបក្ស​​​ប្រជា​​​ជន​​​កម្ពុជា​​​ចេញ​​​នឹង​​​ថា​​​​​​គណបក្ស​​​សង្គ្រោះ​​​ជាតិ​​​​​​ឈ្នះ​​​ឆ្នោត​​​ក្នុង​​​ឆ្នាំ​​​២០១៨ គឺ​​​នៅ​​​មិន​​​ប្រាកដ​​​ប្រជា​​​នៅ​​​ឡើយ៕រើន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស