ប្រធានស្តីទីគណបក្សសង្រ្គោះជាតិបានប្រកាសដាច់ណាត់ថា លោកនឹងយកលោកហ៊ុន សែនទៅកាត់ទោស ចំពោះមុខតុលាការឯករាជ្យមួយដែលជាទោសធ្ងន់ ពីព្រោះតែការប្រព្រឹត្តបទឧក្រិដ្ឋធ្ងន់ធ្ងររបស់លោក។
លោកសម រង្ស៊ីបានសរសេរនៅលើគណនីហ្វេសប៊ុករបស់លោកថា ប្រជារាស្ត្រខ្មែរត្រូវតែប្តូររបបហ៊ុន សែនចេញពីព្រោះបុគ្គលហ៊ុន សែន មិនអាចកែខ្លួនបានទេ។ លោកថា លោកហ៊ុន សែន បានប្រព្រឹត្តអំពើឧក្រិដ្ឋកម្មច្រើនក្នុងរយៈពេល៣៤ឆ្នាំ ដែលគាត់បានកាន់អំណាច។ ដូច្នេះគាត់ត្រូវក្រាញអំណាចតទៅទៀតដើម្បីទទួលបាននិទណ្ឌភាព ឬការរួចទោសពៃរ៍។
អតីតមេបក្សប្រឆាំងរូបនេះបញ្ជាក់ថា ពេលណាលោកហ៊ុន សែនអស់អំណាច ពេលនោះមេដឹកនាំយូរជាងគេនៅក្នុងតំបន់មួយនេះនឹងត្រូវគេយកទៅកាត់ទោសចំពោះមុខតុលាការឯករាជ្យសម្រាប់ទោសទណ្ឌដ៏ធ្ងន់ធ្ងររបស់គាត់។
លោកសម រង្ស៊ី បានរំឭកបទឧក្រិដ្ឋធំៗរបស់លោកហ៊ុន សែន ដូចជា ការកាត់កោះត្រល់ទៅប្រទេសវៀតណាម ការដឹកនាំផែនការ ក៥ គឺការកេណ្ឌពលរដ្ឋឲ្យទៅស្លាប់រាប់ម៉ឺនរាប់សែននាក់ នៅតាមព្រំ ដែនថៃក្នុងទសវត្សរ៍១៩៨០ ការសម្លាប់មនុស្សជាច្រើនក្នុងរដ្ឋប្រហារឆ្នាំ១៩៩៧ ការប្លន់ដីធ្លី និងផ្ទះសម្បែងរបស់ប្រជារាស្ត្រការបង្ក្រាបប្រជារាស្ត្រដោយមានការបង្ហូរឈាមជាច្រើនការកាប់បំផ្លាញព្រៃឈើ និងការបើកដៃឲ្យបរទេសពីគ្រប់ទិសទីមកប្លន់ទ្រព្យសម្បត្តិជាតិ និងការបើកដៃឲ្យជនជាតិចិន និងក្រុមហ៊ុនចិន មកធ្វើអាណានិគមលើប្រទេសកម្ពុជាជាដើម។
ប៉ុន្តែការិយាល័យអ្នកនាំពាក្យរបបក្រុងភ្នំពេញបានចេញថ្លែងការណ៍មួយនៅថ្ងៃនេះបញ្ជាក់ថា សកម្មភាពរបស់លោកសម រង្ស៊ីជាការញុះញង់និងជាអំពើភេរវកម្មនយោបាយប្រឆាំងនឹងផលប្រយោជន៍កម្ពុជា និងប្រជាពលរដ្ឋរបស់ខ្លួន ហើយរដ្ឋាភិបាលក៏កំពុងត្រៀមចាត់វិធានការតាមផ្លូវច្បាប់រួមទាំងកិច្ចសហការអន្តរជាតិ ក្នុងការទប់ស្កាត់សកម្មភាពភេរវកម្មនយោបាយទាំងនេះផងដែរ។ ការិយាល័យអ្នកនាំពាក្យរបបក្រុងភ្នំពេញអះអាងថា រដ្ឋាភិបាលកំពុងតាមដានយ៉ាងយកចិត្តទុកដាក់ចំពោះរាល់សកម្មភាព និងចលនាវិទ្ធង្សនារបស់បុគ្គល ឬក្រុមពាក់ព័ន្ធទៅនឹងសកម្មភាពភេរវកម្មនយោបាយរបស់ លោកសម រង្ស៊ី។ សេចក្តីថ្លែងការណ៍ដដែលអះអាងថា អាជ្ញាធរមានសមត្ថកិច្ច បានប្រមូលភស្តុតាងជាក់ស្តែង និងត្រៀមរួចជាស្រេច ដោយកំណត់អត្តសញ្ញាណលើបុគ្គលពាក់ព័ន្ធដើម្បីឆ្លើយតបនឹងសកម្មភាពភេរវកម្មនយោបាយទាំងនោះ នៅពេលចាំបាច់ណាមួយ៕