28 C
Phnom Penh

ក្រុមសមាជិកចលនា​ស្ត្រី​​បណ្តាញសកលគណបក្សរបស់សង្គ្រោះជាតិ មិនទទួលស្គាល់លិខិតដែលកម្រិតតួនាទីនិងសិទ្ធិប្រធានចលនានេះ

ដោយ ឌឹ ខេមបូឌា ដេលី

បទវិភាគ

សមាជិក​ចលនា​ស្រ្តី​បណ្តាញ​សកល​របស់​គណបក្ស​សង្គ្រោះ​ជាតិ​ ក្នុង​ប្រទេស​កូរ៉េ​ខាងត្បូង​កញ្ញា​រស់ សុផល​ប្រកាស​ថា​ កញ្ញា​មិន​ទទួល​ស្គាល់​លិខិត​ដែល​កម្រិត​តួនាទី​និង​សិទ្ធិ​របស់​អ្នកស្រី ​Janet Seng​ដែល​ជា​ប្រធាន​ចលនា​នេះ​ឡើយ។​

ការ​អះអាង​របស់​កញ្ញា​រស់ សុផល​ ធ្វើ​ឡើយ​ក្រោយ​ពីមាន​លិខិត​មួយ​ច្បាប់​ដែល​បង្ហោះ​ផ្សព្វផ្សាយ​តាម​បណ្តាញ​សង្គម​ហ្វេសប៊ុក​ដែល​ក្នុង​លិខិត​នោះ​មាន​ហត្ថលេខា​របស់​ភរិយា​របស់​លោក​សម រង្ស៊ី ​អ្នកស្រី​ ជូ ឡុងសូមូរ៉ា​កាល​ពី​ថ្ងៃ​ទី​៣ ​ខែ​មិថុនា ​ជំនួស​គណៈ​កម្មាធិការ​អន្ត្រៃយ៍ ​សម្រេច​ឲ្យ​ប្រធាន​ចលនា​ស្រ្តី​បណ្តាញ​សកល​គណបក្ស​សង្គ្រោះ​ជាតិ​ អ្នក​ស្រី​Janet Seng​មក​ដឹកនាំ​សាខា​គណបក្ស​សង្រ្គោះ​ជាតិ​ប្រចាំ​រដ្ឋ​ Pennsylvania​ដែល​ជា​សាខា​នៃ​គណបក្ស​សង្គ្រោះ​ជាតិ​អាមេរិកាំង​ឬ​ដឹក​នាំ​អង្គការ​ដែល​អ្នកស្រី ​Janet Seng ​បាន​បង្កើត​ឡើង​ដដែល​នោះ ​ប៉ុន្តែ​មិន​ត្រូវ​ប្រើ​ឈ្មោះ​គណបក្ស​សង្គ្រោះ​ជាតិនៅ​ក្នុង​អង្គការ​នេះ​ឡើយ។

លិខិត​ដដែល​ទាមទារ​ឲ្យ​អ្នកស្រី ​Janet Seng ​ឆ្លើយ​តប​ត្រឹម​ថ្ងៃ​ទី​១៤​ ខែ​មិថុនា ​ក្នុង​ករណី​គ្មាន​ការ​ឆ្លើយ​តប​​នោះ​មានន័យ​ថា​ លោកស្រី ​Janet Seng ​យល់​ព្រម​ទទួល​យក​ជម្រើស​ទី២​ដោយ​បន្ត​ដឹកនាំ​ចលនា​ស្រ្តី​បណ្តាញ​សកល ​ឬ​Global Women’s Movement Network​ដោយ​មិន​អនុញ្ញាត​ឲ្យ​ប្រើ​ឈ្មោះ​គណបក្ស​សង្គ្រោះ​ជាតិ​ក្នុង​អង្គការ​នេះ​ឡើយ។​

កញ្ញា​រស់ សុផល​អះអាង​ថា​ លិខិត​កម្រិត​តួនាទី ​និង​សិទ្ធិ​របស់​អ្នកស្រី​Janet Seng​គឺ​ជា​ការ​រចនា​ឡើង​ដោយ​ក្រុម​មាន​និន្នាការ​ប្រឆាំង​នឹង​អ្នកស្រី​Janet Seng​មួយ​ចំនួន​តូច​ដែល​ជា​សកម្ម​ជន​របស់​គណបក្ស​សង្គ្រោះ​ជាតិ​ក្នុង​សហ​រដ្ឋ​អាមេរិក​ ដែល​ច្រណែន​ទៅ​នឹង​សកម្ម​ភាព​​របស់​អ្នកស្រី​ក្នុង​ការ​ខ្នះខ្នែង​ជំរុញ​ឲ្យ​ក្រសួង​ការ​បរទេស​អាមេរិក​សមាជិក​រដ្ឋ​សភា​អាមេរិក​និង​សមាជិក​ព្រឹទ្ធ​សភា​អាមេរិក​ធ្វើ​ច្បាប់​ដាក់​ទណ្ឌកម្ម​លោក​ហ៊ុន​ សែន​តែ​ប៉ុណ្ណោះ។​

សារ​ព័ត៌មាន​The Cambodia Daily​បាន​ព្យាយាម​សុំ​បំភ្លឺ​ពី​អ្នកស្រី​ជូ ឡុងសូមូរ៉ា​ ភរិយា​របស់​លោក​សមរង្ស៊ី​ដើម្បី​បញ្ជាក់​ថា​ តើ​លិខិត​នេះ​ជា​លិខិត​ពិត​ឬ​លិខិត​ក្លែងក្លាយ​ ប៉ុន្តែ​មិន​ទាន់​ទទួល​បាន​ចម្លើយ​នៅ​ឡើយ​ទេ​រហូត​មក​ដល់​ម៉ោង​ផ្សាយ​នេះ។ ​សារ​ព័ត៌មាន​The Cambodia Daily​ក៏​បាន​ព្យាយាម​ទាក់​ទង​លោក​អេង ឆៃអ៊ាង​ អនុ​ប្រធាន​គណបក្ស​សង្គ្រោះ​ជាតិ​ដែរ​ ប៉ុន្តែ​លោក​មិន​លើក​ទូរស័ព្ទ។​

ចំណែក​អ្នកស្រី​ Janet Seng ​ដែល​ជា​ប្រធាន​បណ្តាញ​ចលនា​ស្រ្តី​សកល​គណបក្ស​សង្គ្រោះ​ជាតិ​បញ្ជាក់​ប្រាប់​សារ​ព័ត៌មាន​The Cambodia Daily​ថា ​អ្នកស្រី​សង្ឃឹម​ថា​ អ្នក​ដែល​សរសេរ​លិខិត​នេះ​គោរព​សេចក្តី​ថ្លៃថ្នូរ​និង​មាន​សុចរិត​ភាព។​ អ្នកស្រី​បន្ត​ថា ​គោល​ដៅ​របស់​គណបក្ស​សង្គ្រោះ​ជាតិ​សំខាន់​ណាស់​ដែល​ខ្មែរ​ត្រូវ​រួប​រួមគ្នា​ជាធ្លុង​មួយ​ ដើម្បី​នាំ​មក​នូវ​ការ​ផ្លាស់ប្តូរ​នៅ​ក្នុង​ប្រទេស​កម្ពុជា។​

ទោះជាយ៉ាង​ណាក៏​ដោយ​ តួនាទី​ជា​ប្រធាន​ចលនា​ស្ត្រី​បណ្តាញ​សកល​របស់​គណបក្ស​សង្រ្គោះ​ជាតិ​នេះ​ត្រូវ​បាន​លោក​សមរង្ស៊ី​ចេញ​លិខិត​តែងតាំង​កាល​ពី​ដើម​ខែ​កុម្ភៈ​ឆ្នាំ​២០១៩ កន្លង​ទៅ​សម្រាប់​ស្នាដៃ​របស់​អ្នក​ស្រី​ដ៏​ពូកែ​ក្នុង​កិច្ច​ខិតខំ​ប្រឹង​ប្រែង​ទាមទារ​ឲ្យ​មាន​ការ​គោរព​សិទ្ធិ​មនុស្ស​នៅ​កម្ពុជា។ ​ជាង​នេះ​ទៅទៀត​លោក​សមរង្ស៊ី​បាន​ជំរុញ​ឲ្យ​សមាជិក​ និង​សកម្ម​ជន​របស់​គណបក្ស​សង្គ្រោះ​ជាតិ​សហការ​ជាមួយ​អ្នកស្រី​Janet Seng គ្រប់​កាលៈទេសៈ​ទាំង​អស់​ក្នុង​បុព្វហេតុ​នាំ​មក​នូវ​ការ​ទាមទារ​ឲ្យ​លទិ្ធ​ប្រជា​ធិបតេយ្យ​នៅ​កម្ពុជា​ជាពិសេស​ភាព​លើក​តម្កើង​តួនាទី​របស់​អ្នកស្រី​ក្នុង​ជួរ​គណបក្ស​សង្គ្រោះ​ជាតិ​ និង​អ្នក​គាំទ្រ​គណបក្ស​សង្គ្រោះ​ជាតិ៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស