មន្ត្រីជាន់ខ្ពស់ក្រសួងការបរទេសខ្មែរ បានអះអាងថាភាគីថៃ បានផ្ញើកំណត់ទូតមួយមកកម្ពុជា ពាក់ព័ន្ធនឹងករណីបាត់ខ្លួនសកម្មជននយោបាយថៃម្នាក់ ដែលហ៊ានប្រឆាំងរបបដឹកនាំថៃរបស់លោក ប្រាយុទ្ធ ចាន់អូចារ ។
សារព័ត៌មានថ្មីៗបានដកស្រង់សម្តីរបស់អ្នកនាំពាក្យក្រសួងការបរទេសកម្ពុជាលោក កុយ គួង ចុះផ្សាយថា កំណត់ទូតពីស្ថានទូតថៃប្រចាំកម្ពុជា ដែលបានផ្ញើមកក្រសួងការបរទេសនេះ គឺគ្រាន់តែស្នើសុំឱ្យភាគីកម្ពុជា ពិនិត្យ និងផ្ទៀងផ្ទាត់មើលករណីចាប់ជំរិតសកម្មជននយោបាយថៃលោក វ៉ាន់ឆាឡឺម សាត់ស័ក្កសិទ្ធ (Wanchalearm Satsaksit) ដើម្បីចង់ដឹងថា វាពិតជាមានករណីបែបនេះ ដូចជាការចុះផ្សាយដែរទេ។
លោកបន្តថា ក្រសួងការបរទេសក៏បានបញ្ជូនកំណត់ទូតរបស់ភាគីថៃ ទៅ កាន់ក្រសួងមហាផ្ទៃ ដើម្បីពិនិត្យ និងធ្វើការងារស្រាវជ្រាវករណីនេះដែរ។ សារព័ត៌មានដដែលក៏បានដកស្រង់ប្រសាសន៍របស់អ្នកនាំពាក្យក្រសួងមហាផ្ទៃលោកនាយឧត្តមសេនីយ៍ ខៀវ សុភ័គ ថាក្រសួងកំពុងពិនិត្យស្រាវជ្រាវករណីចាប់ខ្លួននេះ តាមរយៈការសាកសួរព័ត៌មានសាក្សីដែលបានឃើញហេតុការណ៍ ដើម្បីប្រមូលជាភស្តុតាង និងតម្រុយ ឈានទៅកំណត់គោលដៅបន្ថែមទៀត។
ជាមួយគ្នានេះ លោក ខៀវ សុភ័គ អះអាងថា អាជ្ញាធរកម្ពុជា មិនបានចាប់ខ្លួនលោក វ៉ាន់ឆាឡឺម បញ្ជូនទៅថៃ ដូចការសង្ស័យទេ។អង្គការឃ្លាំមើលសិទ្ធិមនុស្សអន្តរជាតិ Human Right Watch បានលើកឡើងថា លោក វ៉ាន់ឆាឡឺម សាត់ស័ក្កសិទ្ធ ត្រូវបានជនមួយក្រុមប្រដាប់ដោយអាវុធចាប់បញ្ចូលក្នុងរថយន្តពណ៌ខ្មៅមួយគ្រឿងនៅ កណ្តាលរាជធានីភ្នំពេញ កាលពីថ្ងៃទី៤ មិថុនា ដោយអង្គការនេះសង្ស័យថាជាករណីចាប់ជំរិតសកម្មជននយោបាយថៃលើទឹកដី កម្ពុជា។
ក្រោយចាប់ខ្លួនសកម្មជននយោបាយថៃរូបនោះមួយថ្ងៃ កាលពីថ្ងៃទី៥មិថុនា អង្គការHuman Right Watch បានចេញសេចក្តីថ្លែងការណ៍របស់ខ្លួនដោយស្នើឱ្យកម្ពុជាស៊ើបអង្កេតករណីបាត់ខ្លួន លោកវ៉ាន់ឆាឡឺម។ក្នុងសេចក្តីថ្លែងការណ៍របស់ Human Right Watch បានឱ្យដឹងថា ករណីចាប់ជំរិតនេះ កើតឡើងមួយថ្ងៃក្រោយប៉ុណ្ណោះ បន្ទាប់ពីលោកវ៉ាន់ឆាឡឺម បានចេញវីដេអូឃ្លីបមួយ ដោយនិយាយជាភាសាថៃ រិះគន់មេដឹកនាំប្រទេសថៃបច្ចុប្បន្ន គឺលោកនាយករដ្ឋមន្ត្រី ប្រាយុទ្ធ ចាន់អូចារ ដោយថាជាមេដឹកនាំរបបផ្តាច់ការធ្វើឱ្យប្រទេសជាតិអាប់អោនកិត្តិយស និងទាមទារឱ្យលោកប្រាយុទ្ធ ចុះចេញពីតំណែងថែមទៀតផង។
អង្គការឃ្លាំមើលសិទ្ធិមនុស្សអន្តរជាតិមួយនេះ កំពុងបារម្ភពីសុវត្ថិភាពរបស់សកម្មជននយោបាយថៃ និងជាក្រុមអាវក្រហមថៃរូបនោះ ដោយបានស្នើឱ្យកម្ពុជាស៊ើបអង្កេតនេះជាបន្ទាន់។ក្រោយរដ្ឋប្រហារឆ្នាំ២០១៤ មក យ៉ាងយោចណាស់មានសកម្មជននយោបាយថៃចំនួន ៨នាក់ បានរត់ភៀសខ្លួនទៅកាន់ប្រទេសឡាវ កម្ពុជា និងវៀតណាម ហើយបានបាត់ខ្លួន និងមួយចំនួនទៀត ត្រូវបានរកឃើញថាស្លាប់។
លោក វ៉ាន់ឆាឡឺម គឺឋិតក្នុងចំណោមសកម្មជននិរទេសខ្លួន ២៩នាក់ ដែលរងការចោទថា បានប្រមាថព្រះមហាក្សត្រថៃ ហើយសកម្មជននយោបាយថៃរូបនេះបានមករស់នៅសម្ងំលាក់ខ្លួននៅកម្ពុជាតាំងពីឆ្នាំ២០១៤ គេចចេញពីការតាមចាប់របស់ក្រុមយោធាថៃ៕