ក្រោយពីបណ្ដោយ អោយនាវា ដឹងប្រេងរបស់អ៊ីរ៉ង់យ៉ាងតិច ចំនួន៤គ្រឿង ឆ្លងចូលដែនសមុទ្រនៃប្រទេសវេណេហ្សូអេឡា កាលពីចុងខែឧសភា នោះ នៅពីថ្ងៃទី១៤ ខែមិថុនា សហរដ្ឋអាមេរិក ប្រកាសថា រាល់នាវាទាំងឡាយណាដែល ចូលដែនទឹកវេណេហ្សូអេឡា គឺជាការបំពានការដាក់ទណ្ឌកម្មរបស់សហរដ្ឋអាមេរិក និងសហគមន៍អន្តរជាតិ លើរបប នៃលោកប្រធានាធិបតីនីកូឡាស់ម៉ាឌូរ៉ូ។
សហរដ្ឋបានប្រកាសថាខ្លួននឹងកត់ត្រា នាវារបស់ប្រទេសអ៊ីរ៉ង់យ៉ាងតិចចំនួន ៥០គ្រឿង នៅក្នុងបញ្ជីនៃការជាប់ក្នុងការដាក់ទណ្ឌកម្ម មិនអោយបើកចូលដែនទឹកនៃប្រទេស វេណេហ្សូអេឡាទៀតឡើយ។
សារព័ត៌មានរបស់ អ៊ីរ៉ង Tehran times បានចុះផ្សាយថា រដ្ឋការរបស់លោកប្រធានាធិបតីដូណាល់ត្រាំ កំពុងរកវិធានការពង្រីកការដាក់ទណ្ឌកម្មលើប្រទេស អ៊ីរ៉ង់បន្ថែមទៀត ជាពិសេសលើការដឹកជញ្ជូនតាមផ្លូវទឹក និងទៅលើនាវាដឹកប្រេងចំនួន៥០គ្រឿង របស់អ៊ីរ៉ង់ ដែលកំពុងប្រតិបត្តិការ លើពិភពលោក ដោយហាមនាវាទាំងនោះបើកចូលដែនសមុទ្រនៃប្រទេសវេណេ្សអេឡា និងច្រកសមុទ្រប្រេស៊ីលការ៉ាបៀន។
កាលចុងខែឧសភា ប្រទេសអ៊ីរ៉ង់បានបញ្ជូនប្រេងចំនួន៥នាវា ឬស្មើនឹង ១លាន ៥សែន បារ៉ែល ទៅអោយរបបផ្ដាច់ការនៃប្រទេសវេណេហ្សូអេឡា ក្រោមការដឹកនាំរបស់លោកនីកូឡាស់ម៉ាឌូរ៉ូ ដែលសហរដ្ឋអាមេរិកចោទពីបទឧក្រិដ្ឋកម្មគ្រឿងញៀន។ប៉ុន្តែ នាវាចំនួន៤គ្រឿង នេះ ត្រូវបានកងទ័ពអាមេរិកបណ្ដោយអោយបើកឆ្លងកាត់ច្រកសមុទ្រការ៉ាបៀន មកដល់ដែនសមុទ្រនៃប្រទេសវេណេហ្សូអេឡា ហើយចំណែកមួយគ្រឿងទៀត ត្រូវកងទ័ពអាមេរិក រាំងខ្ទប់ដោយអោយបើកត្រឡប់ទៅក្រោយវិញដែលធ្វើអោយនាវានោះ ខកខានដឹកប្រេងទៅអោយរបបនៃមេដឹកនាំផ្ដាច់ការម៉ាឌូរ៉ូ។
កាលថ្ងៃចន្ទទី១៥មិថុនានេះ មន្ត្រីអាមេរិកម្នាក់ បានប្រាប់ សារព័ត៌មាន Bloomberg ថា ការដាក់ទណ្ឌលើនាវាដឹកប្រេងរបស់ប្រទេសអ៊ីរ៉ង់ គឺអាមេរិក ចង់បញ្ជៀស ការប្រឈមដាក់គ្នាផ្នែកកងទ័ព ទាំងជាមួយប្រទេសអ៊ីរ៉ង់ និងប្រទេសវេណេហ្សូអេឡា។តែបែបនេះក្ដី អ្នកសង្កេតការណ៍ បានប្រមើ មើលថា រដ្ឋការរបស់ប្រធានាធិបតីត្រាំ ពិតជាមានផែនការហំព័ន្ធនាវាទាំងនោះ ដោយទុកអោយរបបរបស់លោកម៉ាឌូរ៉ូកាន់តែធា្លក់ក្នុងស្ថានភាព ធ្ងន់ធ្ងរ ហើយ សេដ្ឋកិច្ចនៃប្រទេសវេណេហ្សូអេឡាវិញ ក៏កាន់តែគ្រោះថ្នាក់ដែរ។
ទីភ្នាក់ងារសារព័ត៌មាន Reuters បានចុះផ្សាយថា ប្រតិបត្តិការដឹកប្រេងសម្រាប់ទីផ្សារពិភពលោក កំពុងធ្លាក់ក្នុងស្ថានភាពធ្ងន់ធ្ងរ ដោយមានការព្រួយ ពីការពង្រីកទណ្ឌកម្មរបស់សហរដ្ឋអាមេរិក។ អ្នកវិភាគព្រមានថា កុំថាឡើយ ប្រទេសវេណេហ្សូអេឡា ជួបវិបត្តិសេដ្ឋកិច្ចកាន់តែធ្ងន់ គឺសេដ្ឋកិច្ចប្រទេសអ៊ីរ៉ង ក៏នឹងកាន់យ៉ាប់យឺនថែមទៀត។ចំណែកប្រទេស វេណេហ្សូអេឡា ដែលជាប្រទេសផលិតប្រេងដ៏ធំមួយដែរនៃ ពិភពលោកបានក្លាយជាប្រទេសគ្មានប្រេងប្រើប្រាស់ ដោយសារតែការដាក់ទណ្ឌកម្មរបស់សហរដ្ឋអាមេរិក។
ករណីនេះ បាននាំអោយ ក្រុមហ៊ុនប្រេងធំៗរបស់ រុស្ស៊ី ចិន និងសហរដ្ឋអាមេរិក ខ្លួនគេផ្ទាល់ បានផ្អាកប្រតិបត្តិការចំរាញ់ប្រេង ដោយសារគ្មានការបញ្ជាទិញ ហើយការដឹកប្រេងចេញពីប្រទេសវេណេហ្សូអេឡា ក៏មិនអាចដំណើរបានដែរ។
ដោយឡែកប្រទេស ជិតខាងវេណេហ្សូអេឡា លើកលែងតែប្រទេសគុយបា មួយប៉ុណ្ណោះ ដូចជាប្រទេសប្រេស៊ីល កូឡំប៊ី ប៉េរ៉ូ អាហ្សង់ទិន ឈីលី ជាដើមក៏បានចូលរួម បិទសមុទ្ររបស់ពួកគេ មិនអោយនាវាដឹកប្រេងចេញពីវេណេហ្សូអេឡា ទៅកាន់ប្រទេសដទៃឡើយ។ប្រទេសអ៊ីរ៉ង់នឹងវេណេហ្សូអេឡា ធ្លាប់បានប្ដឹងអាមេរិកទៅកាន់ក្រុមប្រឹក្សាសន្តិសុខអង្គការសហប្រជាជាតិ ដោយស្នើសុំអោយក្រុងវ៉ាស៊ីនតោន ដកទណ្ឌកម្ម លើប្រទេសទាំងពីរនេះ ប៉ុន្តែរកសំឡេង មិនបានគ្រប់គ្រាន់នោះទេ ដោយប្រទេសសម្ព័ន្ធភាពរបស់អាមេរិកមានដូចជា បារាំង អង់គ្លេស មិនគាំទ្រ។
ក្រសួងការបរទេស អ៊ីរ៉ង់បានចេញសេចក្ដីថ្លែងការណ៍ ដោយអំពាវនាវសុំអោយ អាមេរិកពិចារណា ឡើងវិញ ប៉ុន្តែបានព្រមានថា អ៊ីរ៉ង់អាចជ្រើសរើស វិធានការសងសឹក បើសហរដ្ឋអាមេរិកមិនដកថយវិញទេនោះ។អ៊ីរ៉ង និងវេណហ្សូអេឡា បានសន្យានឹងគ្នាថា នឹងរួមគ្នា អោយកាន់តែសិ្អតរមួតថែមទៀតប្រឆាំងសហរដ្ឋអាមេរិកនៅគ្រប់វេទិកាទាំងអស់ទោះជា ក្ដៅឬត្រជាក់ក៏ដោយ។មកដល់ពេលនេះ មិនទាន់ឃើញប្រទេសមហាអំណាចធំ២ គឺចិន និងរុស្ស៊ី ដែលជាមហាមិត្តអ៊ីរ៉ង់និងវេណេហ្សូអេឡា ប្រតិកម្មនឹងសហរដ្ឋអាមេរិកនោះនៅឡើយទេ។ ប៉ុន្តែប្រទេសទាំង២នេះ គឺជាម្ចាស់បំណុលពាន់លានដុល្លារ នៃរបបលោកម៉ាឌូរ៉ូ។ របបលោកម៉ាឌូរ៉ូ កំពុងធ្លាក់ក្នុងបំណុលចិន ៧០ពាន់លានដុល្លារ ។
រីឯប្រទេស រុស្ស៊ី ៣០ពាន់លានដុល្លារ។ ប្រទេស២នេះ ធ្លាប់បានជំរុញអោយ របប លោកម៉ាឌូរ៉ូ និង មេបក្សប្រឆាំង វ័ន្តកៃដូ ដែលសហរដ្ឋអាមេរិកគាំទ្រ បើកការចរចា ដើម្បីបញ្ចប់វិបត្តិសេដ្ឋកិច្ច ប៉ុន្តែក្រុមប្រឆាំងមិនចូលរួមចរចា ដោយទាមទារអោយ លោកម៉ាឌូរ៉ូចុះចេញពីតំណែងជាមុនសិនទើបខ្លួនយល់ព្រម។
តែយ៉ាងណា ទាំងរបប វេណេហ្សូអេឡា និងរដ្ឋាភិបាល អ៊ីរ៉ង់ កំពុងបន្តសុំឲ្យប្រទេសចិន និងរុស្ស៊ី ជួយបញ្ចុះបញ្ជូលអោយ មូលនិធិរប៉ីយ វត្ថុអន្តរជាតិ IMF ជួយផ្ដល់ប្រាក់កម្ចី ម្នាក់ៗ ៥ពាន់លានដុល្លារដើម្បីយកមកស្រោយស្រង់សេដ្ឋកិច្ចឡើងវិញ ។ ប៉ុន្តែ IMF មិនហ៊ានអោយខ្ចីដោយសារសហរដ្ឋអាមេរិកជំទាស់៕