29 C
Phnom Penh

លោក​នាយករដ្ឋមន្ត្រី ហ៊ុន សែន លើក​ទឹកចិត្ត​យុវជន​ម្នាក់​មាន​ជំនាញ​មួយ​យ៉ាងតិច​ប្រចាំ​ជីវិត

បទវិភាគ

លោក​នាយករដ្ឋមន្ត្រី ហ៊ុន សែន អះអាង​ថា គោលនយោបាយ​របស់​រដ្ឋាភិបាល គឺ​ផ្ដល់​អាទិភាព​ខ្ពស់​លើ​ការ​បណ្ដុះបណ្ដាល​ធនធាន​មនុស្ស​តាមរយៈ​ការ​បណ្ដុះបណ្ដាល​បច្ចេកទេស និង​វិជ្ជាជីវៈ ដើម្បី​មាន​ជំនាញ​ច្បាស់លាស់ គឺ «យុវជន​ម្នាក់​មាន​ជំនាញ​មួយ​យ៉ាងតិច​ប្រចាំ​ជីវិត»

លោក​នាយករដ្ឋមន្ត្រី​បាន​លើកឡើង​ក្នុង​លិខិត​របស់​លោក ក្នុង​ឱកាស​ទិវា​ជាតិ​អប់រំ​បណ្ដុះបណ្ដាល​បច្ចេកទេស និង​វិជ្ជាជីវៈ​លើក​ទី​៤ នៅ​ថ្ងៃ​ទី​១៥ ខែ​មិថុនា ឆ្នាំ​២០២១ ថា លោក​បាន​ចាត់ទុក​ការ​អភិវឌ្ឍ​ប្រព័ន្ធ​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ ជា​អាទិភាព​ខ្ពស់​ក្នុង​ក្របខ័ណ្ឌ​គោលនយោបាយ​ជាតិ ដើម្បី​ឲ្យ​ពលរដ្ឋ​ឆ្លើយតប​ទីផ្សារ​ការងារ និង​មាន​ជីវភាព​កាន់តែ​ល្អ​ប្រសើរ​ក្នុង​សម័យ​បច្ចេកវិទ្យា។

ការ​ប្រារព្ធ​ទិវា​ជាតិ​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ គឺ​ដើម្បី​លើក​កម្ពស់​សមត្ថភាព និង​ជំនាញ​ឲ្យ​កាន់តែ​មាន​ប្រសិទ្ធភាព គុណភាព ក្នុង​ការ​ចាប់​យក​ឱកាស​ការងារ​កាន់តែ​ល្អ ដើម្បី​លើកស្ទួយ​កម្រិត​ជីវភាព​ឲ្យ​កាន់តែ​ល្អ​ប្រសើរ។

លោក ហ៊ុន សែន បាន​លើកឡើង​ទៀត​ថា ដើម្បី​សម្រេច​នូវ​ផែនការ​អប់រំ និង​ការងារ រដ្ឋាភិបាល​បាន​អនុវត្ត​គោលនយោបាយ​ជាតិ​ស្ដីពី​មុខរបរ និង​ការងារ​ឆ្នាំ​២០១៥-២០២៥ និង​គោលនយោបាយ​ជាតិ​ស្ដីពី​ការអប់រំ​បណ្តុះបណ្តាល​បច្ចេកទេស និង​វិជ្ជាជីវៈ​ឆ្នាំ​២០១៧-២០២៥ ព្រមទាំង​គោលនយោបាយ​អភិវឌ្ឍន៍​វិស័យ​ឧស្សាហកម្ម​កម្ពុជា ឆ្នាំ​២០១៥-២០២៥។

លោក​ថា រដ្ឋាភិបាល​កម្ពុជា បាន​អនុវត្ត​យុទ្ធសាស្ត្រ​ចតុកោណ​ដំណាក់កាល​ទី​៤ សម្រាប់​អភិវឌ្ឍ​ធនធាន​មនុស្ស​តាមរយៈ​ការអប់រំ​បណ្តុះបណ្តាល​បច្ចេកទេស និង​វិជ្ជាជីវៈ ការ​ពង្រឹង​គុណភាព​វិស័យ​អប់រំ វិទ្យាសាស្ត្រ និង​បច្ចេកវិទ្យា ដើម្បី​ធានា​បាន​នូវ «យុវជន​ម្នាក់​មាន​ជំនាញ​មួយ​យ៉ាងតិច​ប្រចាំ​ជីវិត»។ ការពង្រីក​ការ​វិនិយោគ​លើ​ការ​កសាង​អគារ​សិក្សា រោងជាង បន្ទប់ពិសោធន៍ មជ្ឈមណ្ឌល​ស្រាវជ្រាវ អភិវឌ្ឍន៍ និង​នវានុវត្តន៍ រួម​ទាំង​ប្រព័ន្ធ​ធានា​គុណភាព និង​អភិបាលកិច្ច។ ក្នុង​រយៈពេល ៥​ឆ្នាំ​កន្លង​ទៅ​មាន​សិស្ស សិក្ខាកាម និស្សិត និង​កម្មករ​និយោជិត​ចំនួន ២០​ម៉ឺន​នាក់ ដែល​ទទួល​បាន​ការ​បណ្តុះបណ្តាល និង​បញ្ចប់​ការសិក្សា​ដោយ​ជោគជ័យ​ក្នុង​មុខជំនាញ​ថ្មី ហើយ​បាន​យក​ជំនាញ​ទាំងនោះ​ទៅ​បង្កើត​ជា​មុខរបរ និង​បាន​បង្កើន​ប្រាក់ចំណូល​ក្នុង​គ្រួសារ និង​លើកស្ទួយ​សេដ្ឋកិច្ច​ជាតិ។

ទោះជាយ៉ាងណា អង្គការ​សង្គម​ស៊ីវិល​ដែល​ធ្វើការ​ផ្នែក​ការពារ​សិទ្ធិ​ពលករ​ចំណាកស្រុក ធ្លាប់​បាន​អះអាង​ថា ពលករ​ខ្មែរ​ពេញ​កម្លាំង​ពលកម្ម​បំពេញ​ការងារ​ដែល​ជា​ធនធាន​ជួយ​លើកស្ទួយ​ប្រយោជន៍​សេដ្ឋកិច្ច​ជាតិ​ជាង ២​លាន​នាក់ កំពុង​ធ្វើ​ការងារ​នៅ​ក្រៅ​ប្រទេស។ ក្នុង​ចំណោម​ពលករ​ទាំង​ជាង ២​លាន​នាក់​នោះ គឺ​ភាគច្រើន​ពួកគេ​មិន​មាន​ជំនាញ​ច្បាស់លាស់៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

សេចក្ដីរាយការណ៍ពិសេស