ក្រុមអ្នកឃ្លាំមើលសង្គម លើកឡើងថា ការបង្កើតគណបក្សនយោបាយដែលល្អត្រឹមត្រូវ គឺត្រូវធ្វើឡើងក្នុងវត្ថុបំណងដោះស្រាយបញ្ហាប្រទេសជាតិ ដើម្បីរៀបចំសង្គម និងការដឹកនាំប្រទេសតាមឆន្ទៈរបស់ពលរដ្ឋ ដោយមិនរំពឹងយកនយោបាយជាមុខរបរអាជីពសម្រាប់បក្ខពួក ឬក្រុមគ្រួសាររបស់ខ្លួននោះទេ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានសរសេរលើគណនី Facebook របស់លោកនៅថ្ងៃទី១៦ ខែមិថុនា ថា អ្នកនយោបាយត្រូវតែជាមនុស្សដែលមានសមត្ថភាពពន្យល់ឲ្យប្រជាពលរដ្ឋគាំទ្រគណបក្ស និងបេក្ខជនរបស់ខ្លួន ដើម្បីឈានដល់ការអនុវត្តគោលនយោបាយដោះស្រាយបញ្ហាសង្គមដែលកើតមានទៅតាមឆន្ទៈរបស់ពលរដ្ឋដែលបានបោះឆ្នោតឲ្យ។
លោកអះអាងថា ដើម្បីដឹកនាំកម្ពុជាឆ្ពោះទៅរកភាពរីកចម្រើន ទាល់តែអ្នកដឹកនាំនយោបាយជាមនុស្សដែលមិនពេញចិត្តចំពោះមេដឹកនាំប្រទេសផ្ដាច់ការ ដែលតែងបង្កើតបញ្ហាដល់ពលរដ្ឋរបស់ខ្លួន។
លោកបន្តថា ជាងនេះទៀតក៏ជាមនុស្សដែលតែងគិតគូរដល់ឆន្ទៈរបស់ពលរដ្ឋដែលចង់ឲ្យគណបក្សនយោបាយខ្លួនដោះស្រាយបញ្ហា និងរៀបចំសង្គមជាតិឲ្យបានល្អប្រសើរជាងរដ្ឋាភិបាលចាស់ មិនមែនគ្រាន់តែធ្វើនយោបាយដើម្បីរង់ចាំទទួលលាភសក្ការៈ ឬមុខតំណែងពីមេដឹកនាំកាន់អំណាចផ្ដាច់ការនោះទេ។
បណ្ឌិត ឡៅ ម៉ុងហៃ បញ្ជាក់ថា គំនិតអវិជ្ជមានចំពោះពលរដ្ឋខ្មែរសព្វថ្ងៃនេះតែងមានការសង្ស័យលើអ្នកនយោបាយមួយចំនួនថា ប្រហែលជាពួកគេបើកបក្សនយោបាយគ្រាន់តែជាស្ពានមួយឈានទៅរកការកេងប្រវ័ញ្ចនូវផលប្រយោជន៍ជាតិមកធ្វើជាទ្រព្យសម្បត្តិផ្ទាល់ខ្លួន សម្រាប់គ្រួសារ និងបក្ខពួករបស់ពួកគេ ដូចតែមេដឹកនាំបច្ចុប្បន្ននេះតែប៉ុណ្ណោះ។
ការលើកឡើងរបស់បណ្ឌិត ឡៅ ម៉ុងហៃ គឺធ្វើឡើងដើម្បីរិះគន់គណបក្សនយោបាយមួយចំនួនដែលបង្កើតឡើងគ្រាន់តែបង្គ្រប់កិច្ច ឬធ្វើជាសួនលម្អឲ្យគណបក្សកាន់អំណាចផ្ដាច់ការក្នុងពេលបច្ចុប្បន្ននេះតែប៉ុណ្ណោះ។
មាត្រា១ នៃរដ្ឋធម្មនុញ្ញកម្ពុជា បានចែងថា ប្រទេសកម្ពុជា គឺជាប្រទេសដែលប្រកាន់យករបបប្រជាធិបតេយ្យសេរីពហុបក្ស។
ជុំវិញបញ្ហានេះ លោក ហ៊ុន សែន កាលពីថ្ងៃទី២០ ខែឧសភា ឆ្នាំ២០២១ បានអះអាងថា មន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញ ពួកគេនឹងទៅបង្កើតបក្សដោយខ្លួនដើម្បីចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ក្នុងឆ្នាំ២០២២ ខាងមុខ។ ខណៈគណបក្សដែលបានចូលរួមការបោះឆ្នោតជាតិកាលពីឆ្នាំ២០១៨ មានចំនួនដល់ទៅ ២០គណបក្សទៅហើយនោះ។
ក្រុមអ្នកឃ្លាំមើលសង្គមរិះគន់ថា គណបក្សនយោបាយមួយចំនួនមិនបានបំពេញតួនាទីជូនពលរដ្ឋក្នុងការមើលការដឹកនាំមិនត្រឹមត្រូវរបស់រដ្ឋាភិបាលនោះទេ ដូចជាការជួយជំរុញរដ្ឋាភិបាលឲ្យអនុវត្តច្បាប់អន្តោប្រវេសន៍លើជនជាតិវៀតណាមខុសច្បាប់ ដែលកំពុងរស់នៅយ៉ាងអណាធិបតេយ្យលើទឹកដីកម្ពុជាសព្វថ្ងៃនេះជាដើម។
ប៉ុន្តែពួកគេបានត្រឹមតែនាំគ្នាចែកអំណោយ ឬនាំយកបញ្ហាដីធ្លីបន្តិចបន្តួចដាក់ជូនលោក ហ៊ុន សែន បង្កើតការពិភាក្សាក្នុងឧត្តមក្រុមប្រឹក្សា និងពិគ្រោះយោបល់តែប៉ុណ្ណោះ ប៉ុន្តែបញ្ហាជាតិធំៗដូចជាការទាមទារឲ្យរដ្ឋាភិបាលធ្វើមោឃភាពកិច្ចព្រមព្រៀងខុសច្បាប់ជាមួយវៀតណាម ដើម្បីរក្សាអធិបតេយ្យភាពរបស់កម្ពុជា ពួកគេមិនដែលបានលើកឡើងទាល់តែសោះ។
យ៉ាងណាក៏ដោយ អតីតក្រុមមន្ត្រីបក្សប្រឆាំងដែលបាននាំគ្នាទៅបង្កើតគណបក្សនយោបាយថ្មី តែងអះអាងថា ការបើកគណបក្សនេះ គឺក្នុងគោលបំណងដោះស្រាយវិបត្តិនយោបាយ និងបង្កើតវប្បធម៌ប្រកួតប្រជែងដោយត្រឹមត្រូវស្របតាមរដ្ឋធម្មនុញ្ញរបស់កម្ពុជាប៉ុណ្ណោះ។
ពួកគេបញ្ជាក់ថា ការបង្កើតគណបក្សនយោបាយថ្មីនេះ គឺដើម្បីបន្តស្មារតីបក្សប្រឆាំងដែលត្រូវបានគេរំលាយ និងបង្កើតចរន្តថ្មីក្នុងការតវ៉ាទាមទារឲ្យមានការគោរពសិទ្ធិមនុស្ស និងស្ដារលទ្ធិប្រជាធិបតេយ្យឡើងវិញជាមួយរដ្ឋាភិបាលបច្ចុប្បន្ននេះ។
កាលពីចុងឆ្នាំ២០២០ កន្លងទៅ ក្រសួងមហាផ្ទៃ បានបង្ហាញរបាយការណ៍របស់ខ្លួនថា កម្ពុជាមានគណបក្សនយោបាយជាង ៤០គណបក្សនយោបាយហើយ ដែលបានចុះបញ្ជីជាផ្លូវការ ខណៈមន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញមួយចំនួន កំពុងតែស្វះស្វែងដាក់ពាក្យស្នើសុំបង្កើតបក្សនយោបាយដោយខ្លួនឯងបន្ថែមទៀត៕