ស្ថានទូតសហរដ្ឋអាមេរិកប្រចាំនៅកម្ពុជា អះអាងថា ខ្លួនបានសម្រេចបញ្ចប់ជំនួយចំពោះរដ្ឋាភិបាលកម្ពុជា លើគម្រោងព្រៃឡង់បៃតងហើយ ប៉ុន្តែជំនួយនេះនឹងត្រូវបង្វែរទៅជួយវិស័យឯកជន សង្គមស៊ីវិល និងការងាររបស់សហគមន៍មូលដ្ឋាន ដើម្បីកែលំអមុខរបរប្រកបជីវភាពរស់នៅ និងពង្រីកកសិកម្មដែលមិនប៉ះពាល់ដល់បរិស្ថានជំនួសវិញ។
ស្ថានទូតសហរដ្ឋអាមេរិកប្រចាំនៅកម្ពុជា បានចេញសេចក្តីថ្លែងការណ៍របស់ខ្លួននៅថ្ងៃទី១៧ ខែមិថុនា ឆ្នាំ២០២១ ថា អាមេរិកបានធ្វើការចំណាយថវិកាចំនួនជាង ១០០លានដុល្លារលើកម្មវិធីមួយចំនួនសម្រាប់ប្រយុទ្ធប្រឆាំងនឹងការកាប់បំផ្លាញព្រៃឈើខុសច្បាប់នៅកម្ពុជា ប៉ុន្តែវាជារឿងគួរឲ្យស្តាយដែលស្ថានភាពកាន់តែអាក្រក់ទៅៗ ដែលពុំមានការថមថយនៃបទល្មើសព្រៃឈើខ្មែរទាល់តែសោះ។
ប្រភពដដែលរិះគន់ថា ការកាប់ឈើខុសច្បាប់នៅកម្ពុជា នៅតែបន្តកើតមាននៅក្នុងតំបន់ និងជុំវិញដែនជម្រកសត្វព្រៃព្រៃឡង់ ប៉ុន្តែអាជ្ញាធរកម្ពុជាមិនបានធ្វើការកាត់ទោស ឬចាត់វិធានការច្បាប់ចំពោះឈ្មួញទុច្ចរិតដែលបានប្រព្រឹត្តបទល្មើសលើសត្វព្រៃ ឬបញ្ឈប់សកម្មភាពខុសច្បាប់ក្នុងតំបន់អភិរក្សព្រៃឡង់នោះឡើយ។
ស្ថានទូតសហរដ្ឋអាមេរិក អះអាងទៀតថា អាជ្ញាធរមិនមានវិធានការណាមួយជាក់លាក់លើបទល្មើសកាប់បំផ្លាញព្រៃឈើនោះទេ តែពួកគេបែរជាព្យាយាមបំបិទសំឡេងសកម្មជនបរិស្ថាន ហើយធ្វើទុក្ខបុកម្នេញសហគមន៍មូលដ្ឋាន និងសង្គមស៊ីវិលដែលជាដៃគូរបស់ខ្លួន ស្របពេលពួកគេបានបង្ហាញពីកង្វល់ដ៏សមហេតុផលលើការបាត់បង់ធនធានធម្មជាតិរបស់កម្ពុជាទៅវិញ។
សហរដ្ឋអាមេរិក បានចំណាយថវិកាអស់រាប់សិបលានដុល្លារលើកម្មវិធីមួយចំនួនសម្រាប់ប្រយុទ្ធប្រឆាំងនឹងបទល្មើសព្រៃឈើនៅកម្ពុជា តាមរយៈទីភ្នាក់ងារជំនួយអាមេរិក USAID អស់រយៈពេលជាច្រើនឆ្នាំកន្លងមកនេះ តែមិនមានប្រសិទ្ធភាពណាមួយនៃវិធានការអាជ្ញាធរកម្ពុជា លើបទល្មើសព្រៃឈើទាំងនោះនៅឡើយទេ។ សហរដ្ឋអាមេរិកបានប្រកាសសម្រេចបញ្ចប់ជំនួយចំពោះរដ្ឋាភិបាលកម្ពុជា លើគម្រោងព្រៃឡង់បៃតង បន្ទាប់ពីបទល្មើសព្រៃឈើទាំងនោះនៅតែបន្តកើតមានឥតឈប់ឈរ ខណៈអាជ្ញាធរកម្ពុជាក៏មិនមានផែនការជាក់លាក់ក្នុងការបង្ក្រាបបទល្មើសទាំងនោះដែរ។
របាយការណ៍ទីភ្នាក់ងារសហរដ្ឋអាមេរិក បង្ហាញថា តាំងពីឆ្នាំ២០១៦ មក ទោះបីជាមានការគាំទ្ររបស់ទីភ្នាក់ងារជំនួយអាមេរិក USAID ដើម្បីឲ្យមានការដើរល្បាត ការបណ្តុះបណ្តាលផ្នែកអនុវត្តច្បាប់ និងការរៀបចំបង្កើតប្រព័ន្ធគ្រប់គ្រងតំបន់ការពារថ្នាក់ជាតិក៏ដោយ ក៏តំបន់ដែនជម្រកសត្វព្រៃព្រៃឡង់ នៅតែបាត់បង់ដដែលលើព្រៃឈើប្រមាណ ៣ម៉ឺន ៨ពាន់ហិកតារ ដែលជាគម្របព្រៃឈើនៅទីនោះ។
តំបន់ព្រៃឡង់ស្ថិតក្នុងភូមិសាស្ត្រខេត្តចំនួន ៤ គឺកំពង់ធំ ស្ទឹងត្រែង ព្រះវិហារ និងខេត្តក្រចេះ មានផ្ទៃដីសរុបជាង ៤សែនហិកតារ ត្រូវបានរដ្ឋាភិបាលកម្ពុជា ចេញអនុក្រឹត្យបង្កើតជាដែនជម្រកសត្វព្រៃព្រៃឡង់ កាលពីខែឧសភា ឆ្នាំ២០១៦ កន្លងទៅ។
កាលពីដើមខែមិថុនា ឆ្នាំ២០២១ នេះ សហគមន៍ជនជាតិដើមភាគតិចកួយ ប្រចាំខេត្តព្រះវិហារ បានចេញសេចក្តីប្រកាសព័ត៌មានរបស់ខ្លួនស្ដីពីបទល្មើសព្រៃឈើ ដែលបានកើតឡើងចំនួន ៩០ករណីបន្ថែមទៀត ដែលត្រូវបានរកឃើញក្នុងដែនជម្រកសត្វព្រៃដែលជាដែនសមត្ថកិច្ចរបស់ក្រសួងបរិស្ថាន។
ទិន្នន័យសង្គមស៊ីវិល បង្ហាញថា រយៈពេល ២០ឆ្នាំចុងក្រោយនេះ ទំហំព្រៃឡង់ជាង ១សែនហិកតារត្រូវបានបាត់បង់ និងក្លាយជាវាលរហោឋាន ខណៈផ្ទៃដីតែជាង ១ពាន់ហិកតារប៉ុណ្ណោះដែលត្រូវបានដាំកូនឈើឡើងវិញ។
ក្រុមសកម្មជនបរិស្ថានអះអាងកាលពីចុងខែឧសភា ឆ្នាំ២០២១ ថា ពួកគេបានរកឃើញបទល្មើសកាប់បំផ្លាញព្រៃឈើយ៉ាងធ្ងន់ធ្ងរ ក្នុងនោះថាប្រភេទឈើងាយរងគ្រោះដែលត្រូវទទួលរងការកាប់បំផ្លាញភាគច្រើនមានដូចជា ដើមឈើទាល កកោះ គគីរ ស្ទៀង ផ្ដៀក ពពេល ផ្ចឹក ត្រាច ត្រសេក សុក្រំ និងដើមខ្វាវ ជាដើម។
ជុំវិញបញ្ហានេះ កាលពីថ្ងៃទី១៦ ខែមិថុនា ឆ្នាំ២០២១ នេះ សកម្មជនបរិស្ថានចំនួន ៤រូប ត្រូវបានសមត្ថកិច្ចឃាត់ខ្លួនដោយមិនបញ្ជាក់ពីមូលហេតុ ក្នុងនោះរួមមានលោក យីម លាងហ៊ី លោក លី ចន្ទ្រតារ៉ាវុធ លោក សិដ្ឋ ឈីវលីម៉េង និងកញ្ញា ស៊ុន រដ្ឋា៕