មន្ត្រីឃ្លាំមើលសិទ្ធិមនុស្សអន្តរជាតិ Human Rights Watch ទាមទារឲ្យរដ្ឋមន្ត្រីការបរទេសអង់គ្លេស ដាក់សម្ពាធលើរដ្ឋាភិបាលកម្ពុជា ឲ្យដោះលែងជាបន្ទាន់ និងដោយឥតលក្ខខណ្ឌចំពោះសកម្មជនបរិស្ថានដែលរដ្ឋាភិបាលកម្ពុជា បានចាប់ឃុំខ្លួនកាលពីពេលថ្មីៗនេះ ព្រោះថាពួកគេមិនបានប្រព្រឹត្តបទឧក្រិដ្ឋដូចការចោទប្រកាន់របស់តុលាការក្រុងភ្នំពេញនោះទេ។
នាយករងប្រចាំតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិ Human Rights Watch លោក ហ្វ៊ីល រ៉ូប៊ើតសុន នៅថ្ងៃទី២៣ ខែមិថុនា ឆ្នាំ២០២១ នេះ បានជំរុញឲ្យរដ្ឋមន្ត្រីការបរទេសអង់គ្លេស លោក ដូមីនិក រ៉ាអាប់ ស្នើទៅរដ្ឋាភិបាលកម្ពុជា ឲ្យដោះលែងសកម្មជនបរិស្ថានដែលអាជ្ញាធរបានចាប់ខ្លួនកាលពីពេលថ្មីៗនេះ ព្រមទាំងសកម្មជននយោបាយ និងសង្គមដែលរដ្ឋាភិបាលកម្ពុជា ឃុំខ្លួនប្រមាណជា ៧០នាក់ផ្សេងទៀតជាបន្ទាន់ និងដោយឥតលក្ខខណ្ឌ។
លោកស្នើឲ្យរដ្ឋមន្ត្រីការបរទេសអង់គ្លេសរូបនេះ យកគោលការណ៍សិទ្ធិមនុស្សជាអាទិភាពក្នុងកិច្ចពិភាក្សានោះ ដោយជំរុញឲ្យរដ្ឋាភិបាលកម្ពុជា គោរពគោលការណ៍សិទ្ធិមនុស្ស និងស្ដារលទ្ធិប្រជាធិបតេយ្យឡើងវិញ និងសិទ្ធិការងារស្របតាមច្បាប់ស្តង់ដារអន្តរជាតិ ILO មុននឹងអង់គ្លេសផ្តល់ការអនុគ្រោះពាណិជ្ជកម្មដល់កម្ពុជា នៅពេលអនាគត។
បន្ថែមពីនេះ លោក ហ្វ៊ីល រ៉ូប៊ើតសុន ស្នើឲ្យលោក ដូមីនិក រ៉ាអាប់ គួរឆ្លៀតពេលតាមកាលវិភាគរបស់ខ្លួនជួបមន្ត្រីជាន់ខ្ពស់បក្សប្រឆាំង ដូចជាប្រធានគណបក្សសង្គ្រោះជាតិ លោក កឹម សុខា ជាដើម ដែលរងការចោទប្រកាន់ដោយគ្មានមូលដ្ឋានពិតប្រាកដពីសំណាក់រដ្ឋាភិបាលកម្ពុជា និងជួបតំណាងប្រព័ន្ធផ្សព្វផ្សាយឯករាជ្យនានា និងអ្នកកាសែតដែលអាជ្ញាធរកំពុងធ្វើទុក្ខបុកម្នេញសព្វថ្ងៃនេះ។
កាលពីថ្ងៃទី២១ ខែមិថុនា ឆ្នាំ២០២១ នេះ តុលាការក្រុងភ្នំពេញ បានសម្រេចឃុំខ្លួនសកម្មជនចលនាមាតាធម្មជាតិ ៣រូប ក្នុងនោះរួមមានលោក លី ចាន់ដារ៉ាវុទ្ធ កញ្ញា ស៊ុន រដ្ឋា និងលោក យឹម លាងហ៊ី នៅពន្ធនាគារព្រៃសជាបណ្ដោះអាសន្ន ក្រោមការចោទប្រកាន់ពីបទប្រមាថចំពោះអង្គព្រះមហាក្សត្រ និងបទរួមគំនិតក្បត់។
ដោយសំអាងថា ពួកគេមានភស្តុតាងជាវីដេអូអំពីការប្រជុំរបស់សកម្មជនអង្គការមាតាធម្មជាតិទាំងនោះថា ពួកគេបានប្រមាថអង្គព្រះមហាក្សត្រ និងប្រើប្រាស់ហិរញ្ញប្បទានភេរវកម្មដើម្បីធ្វើសកម្មភាពផ្តួលរំលំរដ្ឋាភិបាលបច្ចុប្បន្ន។
មាត្រា៤៥៣ នៃក្រមព្រហ្មទណ្ឌ ចែងថា បទរួមគំនិតក្បត់ គឺជាអំពើរួមគំនិតដែលបង្កើតឡើងដើម្បីប្រព្រឹត្តឧបឃាត ដែលនឹងត្រូវផ្ដន្ទាទោសដាក់ពន្ធនាគារពី ៥ឆ្នាំដល់ ១០ឆ្នាំ និងត្រូវពិន័យជាទឹកប្រាក់រហូតដល់ ១០លានរៀលឯណោះ។
កាលពីថ្ងៃទី២២ ខែមិថុនា ឆ្នាំ២០២១ នេះ អង្គការសមាគមជិត ៨០ស្ថាប័ន បានចេញសេចក្តីថ្លែងការណ៍រួមគ្នាឲ្យរដ្ឋាភិបាលកម្ពុជា ទម្លាក់ចោលរាល់បទចោទទាំងអស់ចំពោះសកម្មជនមាតាធម្មជាតិ និងដោះលែងអ្នកការពារសិទ្ធិមនុស្សដែលកំពុងជាប់ឃុំក្នុងពន្ធនាគារក្នុងពេលបច្ចុប្បន្ននេះផងដែរ។
អង្គការសមាគមទាំងនោះរិះគន់ថា ការចាប់ឃុំខ្លួនសកម្មជនបរិស្ថានទាំងនោះ ធ្វើឡើងដោយមិនសមហេតុផល និងគ្មានមូលដ្ឋានច្បាស់លាស់ ប៉ុន្តែបែរជាបង្ហាញយ៉ាងច្បាស់ថា អាជ្ញាធរកម្ពុជា បានប្រើបទចោទមិនត្រឹមត្រូវដើម្បីចាប់អ្នកការពារសិទ្ធិមនុស្ស និងអ្នកការពារបរិស្ថានវ័យក្មេងដាក់ពន្ធនាគារក្នុងចេតនាបំបិទសំឡេងរិះគន់លើរដ្ឋាភិបាលតែប៉ុណ្ណោះ។
ទាក់ទិននឹងបញ្ហានេះ ក្មេងស្រីការពារបរិស្ថានដែលល្បីល្បាញលើពិភពលោកឈ្មោះ Greta Thunberg បានសរសេរលើបណ្ដាញ Tweeter របស់ខ្លួនកាលពីថ្ងៃទី២២ ខែមិថុនា ឆ្នាំ២០២១ នេះ ជុំវិញការចាប់ខ្លួនសកម្មជនបរិស្ថាន កញ្ញា ស៊ុន រដ្ឋា និងសកម្មជនផ្សេងទៀតថា អ្នកការពារបរិស្ថានទូទាំងពិភពលោកកំពុងរងការគំរាមកំហែងចាប់ខ្លួន និងសម្លាប់។ យើងមានសិទ្ធិត្រូវតែបញ្ចេញសំឡេងដើម្បីនិយាយប្រឆាំងនឹងការរំលោភសិទ្ធិមនុស្សទាំងនេះ ព្រោះថាការរំលោភសិទ្ធិទាំងនេះជាទង្វើគួរឱ្យស្អប់ខ្ពើមជាទីបំផុត៕