អតីតអគ្គលេខាធិការគណបក្សសង្គ្រោះជាតិក្រៅប្រទេស (CNRP-O) រិះគន់ថា អ្នកនយោបាយអាជីពរបស់បក្សប្រឆាំងមួយចំនួនបែរជានាំគ្នាទៅបង្កើតគណបក្សថ្មីផ្សេងពីគណបក្សសង្គ្រោះជាតិ ហើយមួយចំនួនទៀតកំពុងតែដើរកេណ្ឌពលរដ្ឋខ្មែរទាំងក្នុង និងក្រៅប្រទេសឲ្យបោះបង់ចោលគណបក្សសង្គ្រោះជាតិ ដើម្បីទៅចូលរួមជាមួយពួកគេ។
ការរិះគន់ ធ្វើឡើងគឺសំដៅដល់អតីតមន្ត្រីបក្សប្រឆាំងមួយចំនួនដែលនាំគ្នាចេញទៅបង្កើតបក្សនយោបាយថ្មី ជាពិសេសក៏ទំនងជាសំដៅដល់អតីតមេបក្សឆាំងលោក សម រង្ស៊ី ផងដែរ ដែលគេអះអាងថាលោកគឺជាអ្នកនៅពីក្រោយគណបក្សបេះដូងជាតិ ដែលក្រសួងមហាផ្ទៃ បានអនុញ្ញាតកាលពីពេលថ្មីៗនេះ។
អតីតអគ្គលេខាធិការគណបក្សសង្គ្រោះជាតិក្រៅប្រទេស (CNRP-O) និងជាអគ្គនាយកអង្គការមជ្ឈមណ្ឌលប្រជាធិបតេយ្យកម្ពុជា (CDC) លោក ប៉ុន សៅរី បានសរសេរលើគណនី Facebook របស់លោកកាលពីថ្ងៃទី២២ ខែមិថុនា ឆ្នាំ២០២១ នេះថា សព្វថ្ងៃនេះអ្នកនយោបាយដែលមានផែនការបើកបក្សថ្មីទាំងនោះកំពុងដើរលួងលោម បង្ខិតបង្ខំ និងគំរាមកំហែងសកម្មជនសង្គ្រោះជាតិនៅមូលដ្ឋាន និងពលរដ្ឋខ្មែរ ឲ្យទៅចូលរួមជាមួយគណបក្សដែលទើបនឹងបង្កើតថ្មីរបស់ពួកគេ។
លោកអះអាងថា សកម្មជននៅមូលដ្ឋានដែលបានតស៊ូលះបង់ដើម្បីស្ដារលទ្ធិប្រជាធិបតេយ្យកន្លងមក បានផ្តល់ក្តីសង្ឃឹមទៅលើគណបក្សសង្គ្រោះជាតិតែមួយប៉ុណ្ណោះ ប៉ុន្តែមន្ត្រីបក្សប្រឆាំងដែលចេញទៅបង្កើតបក្សថ្មីទាំងនោះមិនដឹងខ្លួនទេ ថាទង្វើរបស់ពួកគេក្នុងពេលនេះ គឺជាការចូលរួមជាមួយលោក ហ៊ុន សែន ក្នុងការបំផ្លាញ និងរំលាយគណបក្សសង្គ្រោះជាតិ យ៉ាងពេញទំហឹង។
អតីតអគ្គលេខាធិការគណបក្សសង្គ្រោះជាតិ រូបនេះ អំពាវនាវដល់សកម្មជនគណបក្សសង្គ្រោះជាតិ ទាំងអស់ ទាំងក្នុងនិងក្រៅប្រទេស សូមមានជំហរស្មារតីរឹងមាំដើម្បីបុព្វហេតុលទ្ធិប្រជាធិបតេយ្យ សេរីភាព យុត្តិធម៌សង្គម និងការផ្លាស់ប្ដូរជាវិជ្ជមាននៅកម្ពុជា តាមរយៈនៃការបន្តចូលរួមគាំទ្រគណបក្សសង្គ្រោះជាតិ ឲ្យរស់ឡើងវិញរហូតទទួលបានជ័យជម្នះនាពេលខាងមុខ។
គណបក្សសង្គ្រោះជាតិ ត្រូវបានតុលាការកំពូលប្រកាសរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧ និងហាមឃាត់សិទ្ធិនយោបាយមន្ត្រីជាន់ខ្ពស់បក្សនេះចំនួន ១១៨រូប តាមប្រសាសន៍របស់លោកនាយករដ្ឋមន្ត្រី ហ៊ុន សែន។
លើសពីនេះ ក្រសួងមហាផ្ទៃ ក៏បានសម្រេចលុបឈ្មោះគណបក្សសង្គ្រោះជាតិ ចេញពីបញ្ជីគណបក្សនយោបាយនៅថ្ងៃទី១៧ ខែវិច្ឆិកា ឆ្នាំ២០១៧ ភ្លាមៗផងដែរ។
ក្រោយតុលាការកំពូល ប្រកាសរំលាយគណបក្សសង្គ្រោះជាតិ មន្ត្រីជាន់ខ្ពស់បក្សប្រឆាំង ១១៨រូបដែលត្រូវហាមឃាត់សិទ្ធិនយោបាយ បាននាំគ្នាស្នើសុំសិទ្ធិធ្វើនយោបាយពីព្រះមហាក្សត្រឡើងវិញជាបន្តបន្ទាប់ តាមរយៈក្រសួងមហាផ្ទៃ។ ក្នុងចំណោមនោះ មានមន្ត្រីខ្លះបានដាក់ពាក្យទៅក្រសួងមហាផ្ទៃ ដើម្បីបើកគណបក្សនយោបាយដោយខ្លួនឯងថែមទៀតផង ចាប់តាំងពីឆ្នាំ២០១៨ មក។
ក្នុងនោះ រួមមាន៖
- គណបក្សឆន្ទៈខ្មែរ របស់លោក គង់ គាំ និងលោក គង់ មុនីកា ដែលបានបង្កើតឡើងក្នុងឆ្នាំ២០១៨
- គណបក្សខ្មែរស្រឡាញ់ជាតិ របស់លោក ជីវ កត្តា និងលោក កង គឹមហាក់ បានបង្កើតឡើងក្នុងឆ្នាំ២០១៩
- គណបក្សខ្មែរអភិរក្សនិយម របស់លោក រៀល ខេមរិន្ទ បានបង្កើតឡើងក្នុងឆ្នាំ២០១៩
- គណបក្សកែទម្រង់កម្ពុជា របស់លោក អ៊ូ ចន្ទរ័ត្ន បង្កើតឡើងកាលពីអំឡុងខែមីនា ឆ្នាំ២០២១
- និងចុងក្រោយនេះ គណបក្សបេះដូងជាតិ បានបង្កើតឡើងកាលពីចុងខែមីនា ឆ្នាំ២០២១ នេះផងដែរ។
មន្ត្រីជាន់ខ្ពស់គណបក្សសង្គ្រោះជាតិ ដែលបានសុំសិទ្ធិធ្វើនយោបាយឡើងវិញ លោក មុត ចន្ថា បានសរសេរលើគណនី Facebook របស់លោកកាលពីថ្ងៃទី២២ ខែមិថុនា នេះថា ក្នុងនាមជាអ្នកប្រជាធិបតេយ្យដូចគ្នា តែគ្មានស្មារតីរួម ដោយនាំគ្នាចេញទៅបើកបក្សនយោបាយរៀងៗខ្លួន តើធ្វើដូចម្តេចនឹងមានសំឡេងឆ្នោតឈ្នះគណបក្សកាន់អំណាច។
លោកធ្លាប់បានអះអាងថា លោកទទួលបានព័ត៌មានគួរឲ្យទុកចិត្តបានពីប្រទេសបារាំង ថាអតីតប្រធានបក្សសង្គ្រោះជាតិ លោក សម រង្ស៉ី ក៏បានចេញទៅបង្កើតបក្សថ្មីនឹងគេដែរនោះ គឺគណបក្សបេះដូងជាតិ ដែលមានលោក សៀម ភ្លុក ជាអ្នកដើរតួជំនួស។
យ៉ាងណាក៏ដោយ អតីតប្រធានគណបក្សសង្គ្រោះជាតិ លោក សម រង្ស៊ី ធ្លាប់បានប្រាប់អ្នកសារព័ត៌មានកាលពីអំឡុងឆ្នាំ២០២០ ថា មន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញទាំងនោះ បើមិនចាញ់បោក ក៏លក់ខ្លួនឲ្យលោក ហ៊ុន សែន ដែរ។ ដូច្នេះ ដើម្បីយកឈ្នះគណបក្សកាន់អំណាច ត្រូវតែនាំគ្នារង់ចាំគណបក្សសង្គ្រោះជាតិ រស់ឡើងវិញទាំងអស់គ្នា៕