ស្ថានទូតសហរដ្ឋអាមេរិក ប្រចាំនៅកម្ពុជា លើកឡើងថា ទិវាឯករាជ្យរបស់អាមេរិក គឺជាការជំរុញទឹកចិត្តរបស់ប្រជាជននៅទូទាំងពិភពលោកឲ្យស្វែងរកសេរីភាព និងសិទ្ធិជាសាកលរបស់ខ្លួន ជាពិសេសគឺសិទ្ធិជ្រើសរើសរដ្ឋាភិបាលមួយដែលជារដ្ឋាភិបាលកើតឡើងដោយប្រជាជនរបស់ប្រជាជន និងដើម្បីប្រជាជន។
ស្ថានទូតអាមេរិក បានលើកឡើងបែបនេះក្នុងពិធីអបអរសាទរខួបលើកទី២៤៥ឆ្នាំនៃទិវាឯករាជ្យសហរដ្ឋអាមេរិក ដែលបានរៀបចំនៅស្ថានទូតសហរដ្ឋអាមេរិក ប្រចាំនៅកម្ពុជា នៅថ្ងៃទី៥ ខែកក្កដា។
លោក W. Patrick Murphy ឯកអគ្គរដ្ឋទូតសហរដ្ឋអាមេរិក បានចេញសេចក្តីប្រកាសព័ត៌មាននៅថ្ងៃទី៥ ខែកក្កដា ឆ្នាំ២០២១ ថា ចាប់តាំងពីឆ្នាំ១៧៧៦ មក សហរដ្ឋអាមេរិកបានខិតខំធ្វើឲ្យប្រទេសដែលត្រូវបានបង្កើតថ្មីមួយនេះមានលក្ខណៈល្អប្រសើរឡើងជាលំដាប់ក្នុងការលើកស្ទួយសិទ្ធិសេរីភាពរបស់ពលរដ្ឋឲ្យបានកាន់តែទូលំទូលាយ។
លោកអះអាងថា ពលរដ្ឋអាមេរិកាំងមានមោទកភាពដែលសហរដ្ឋអាមេរិកបានគាំទ្រ និងការពារសិទ្ធិដែលមនុស្សទាំងអស់គួរតែមាន ដូចជាសិទ្ធិរស់រានមានជីវិត សិទ្ធិសេរីភាពក្នុងការបញ្ចេញមតិ សិទ្ធិក្នុងការប្រមូលផ្តុំគ្នា សិទ្ធិក្នុងជំនឿសាសនា និងសិទ្ធិទទួលបានដំណើរការជំនុំជម្រះក្តីត្រឹមត្រូវក្នុងផ្លូវតុលាការ ជាដើម។
លោកបញ្ជាក់ថា មនុស្សទាំងអស់មានភាពស្មើៗគ្នា ហើយនៅទីបំផុត គំនិតនេះបានបំផុសទឹកចិត្តមនុស្សនៅជុំវិញពិភពលោកឲ្យស្វែងរកសេរីភាព សមភាពរបស់ពួកគេគ្រប់ៗគ្នា ដើម្បីទទួលបានសិទ្ធិពេញលេញ និងជាពិសេសសិទ្ធិជាមូលដ្ឋានរបស់ខ្លួន។
បន្ថែមពីនេះ ស្ថានទូតអាមេរិកក៏បានបង្ហោះវីដេអូលើទំព័រ Facebook ផ្លូវការរបស់ខ្លួនស្ដីពីថ្ងៃបុណ្យឯករាជ្យ ការដើរក្បួនកាន់ទង់ជាតិដោយកងទាហានម៉ារីនអាមេរិក ការច្រៀងបទភ្លេងជាតិសហរដ្ឋអាមេរិក និងចម្រៀងជាតិកម្ពុជា ដែលសម្ដែងដោយអ្នកចម្រៀងកម្ពុជា និងការថ្លែងសាររបស់លោក W. Patrick Murphy ទាក់ទិននឹងទិវានេះផងដែរ។
សហរដ្ឋអាមេរិក ឬ United States of America ត្រូវបានបង្កើតឡើងដោយរដ្ឋដំបូងបង្អស់ចំនួន១៣ ដូចជា រដ្ឋ Delaware រដ្ឋ Pennsylvania និងរដ្ឋ Massachusetts ជាដើម កាលពីថ្ងៃទី៤ ខែកក្កដា ឆ្នាំ១៧៧៦ ដែលជាថ្ងៃប្រកាសឯករាជ្យរបស់ខ្លួន បន្ទាប់ពីពួកគេប្រកាសទាមទារឯករាជ្យពីអាណានិគមអង់គ្លេស រួចមក។
ក្រោយពីទទួលបានឯករាជ្យពេញលេញ សភាអាមេរិកបានកោះប្រជុំតំណាងរដ្ឋទាំង១៣ ដើម្បីតាក់តែងរដ្ឋធម្មនុញ្ញ កំណត់របបនយោបាយប្រទេសរបស់ពួកគេ ដែលជាជំហានមួយឆ្ពោះទៅរកការរៀបចំរដ្ឋបាលកណ្តាលដ៏រឹងមាំមួយ ដែលអាចរក្សាស្ថិរភាពសហរដ្ឋមួយនេះឲ្យមានភាពរឹងមាំ និងខ្លាំងក្លាយូរអង្វែងតទៅអនាគត។
ក្រោយការចូលជាធរមាននៃរដ្ឋធម្មនុញ្ញ សហរដ្ឋអាមេរិកបានស្គាល់នូវការផ្លាស់ប្ដូរជាច្រើនរាប់មិនអស់ ចាប់តាំងពីប្រទេសដែលមានទឹកដីមួយចម្រៀកតូច ទៅជាប្រទេសដែលមានទឹកដីលាតសន្ធឹងល្វឹងល្វើយរហូតដល់ឆ្នេរសមុទ្រប៉ាស៊ីហ្វិក ដែលមានចំនួន ១៣រដ្ឋប៉ុណ្ណោះនៅគ្រាដំបូង ប៉ុន្តែបានកើនឡើងរហូតដល់ ៥០រដ្ឋក្នុងពេលបច្ចុប្បន្ននេះ។
ទោះជាមានការផ្លាស់ប្ដូរទៅរកការរីកចម្រើនយ៉ាងណាក្តី រដ្ឋធម្មនុញ្ញ និងរបបនយោបាយ គឺនៅស្ថិតស្ថេរជានិច្ច បើទោះបីជាអាមេរិកបានធ្វើវិសោធនកម្មបន្ថែមជំពូក និងមាត្រាថ្មីៗលើធម្មនុញ្ញរបស់ខ្លួនដល់ទៅចំនួន ២៧លើកក៏ដោយ ប៉ុន្តែគោលគំនិតនៃរដ្ឋធម្មនុញ្ញដើមនៅតែស្ថិតជាធរមានរហូតមកទល់នឹងពេលបច្ចុប្បន្ននេះ៕