ប្រធានាធិបតីសហរដ្ឋអាមេរិក លោក ចូ បៃដិន បានសន្យាថា អាមេរិកពិតណាស់ត្រូវតែជួយប្រទេសដែលត្រូវការវ៉ាក់សាំងការពារជំងឺកូវីដ-១៩ ហើយថាជំនួយរបស់អាមេរិកមិនមែនជាថ្នូរដើម្បីផលប្រយោជន៍អ្វីឡើយ។
ការដែលប្រធានាធិបតីអាមេរិកពោលដូចនេះ គឺចំពេលមានការរិះគន់អាមេរិកថាមិនបានជួយដល់ប្រទេសក្រីក្រដែលកំពុងធ្លាក់ក្នុងការរាតត្បាតធ្ងន់ធ្ងរនៃជំងឺកូវីដ-១៩ ហើយក៏ចំពេលចិន សម្រុកផ្ដល់វ៉ាក់សាំងដល់ប្រទេសក្រីក្រ ទោះជាដឹងថាវ៉ាក់សាំងរបស់ចិន ពុំសូវមានប្រសិទ្ធភាព និងសុវត្ថិភាពក៏ដោយ ក៏បណ្ដាប្រទេសក្រីក្រនៅតែទទួលយកដើម្បីចាក់ឲ្យពលរដ្ឋរបស់ពួកគេ។ ប៉ុន្តែវ៉ាក់សាំងរបស់ប្រទេសចិន ត្រូវបានមើលឃើញថា ច្រើនតែជាជំនួយមានថ្នូរនឹងអ្វីមួយ។
វ៉ាក់សាំងរបស់ចិន មានពីរប្រភេទដែលកំពុងប្រើប្រាស់នៅក្នុងប្រទេសមួយចំនួន និងក្នុងប្រទេសចិន គឺ Sinopharm និង Sinovac។
សម្រាប់ប្រទេសក្នុងសមាគមអាស៊ាន គឺប្រទេសខ្លះដែលរងឥទ្ធិពលចិន គឺដូចជាកាតព្វកិច្ចទៅហើយក្នុងការទទួលយកជំនួយវ៉ាក់សាំងពីប្រទេសចិន គឺថែមទាំងបញ្ចេញថវិកាទិញទៀតផង ទោះជាដឹងថាវ៉ាក់សាំងនោះពុំមានប្រសិទ្ធភាពខ្លាំងក៏ដោយ។
ចំពោះវៀតណាម ជាប្រទេសដែលមិនបានខ្នះខ្នែងច្រើនទេក្នុងការទិញ ឬសុំជំនួយវ៉ាក់សាំងពីប្រទេសចិន ទោះបីប្រទេសនេះមានព្រំដែនជាប់នឹងប្រទេសចិន ក៏ដោយ។ ប្រទេសសង្គមនិយមមួយនេះ បែរជាសុំទិញ និងសុំជំនួយវ៉ាក់សាំងពីសហរដ្ឋអាមេរិកទៅវិញ។
ឥឡូវនេះឃើញថា ប្រទេសចំនួន៣ នៅអាស៊ីអាគ្នេយ៍ចាប់ផ្ដើមទទួលវ៉ាក់សាំងរបស់សហរដ្ឋអាមេរិក គឺវ៉ាក់សាំង Moderna។ ប្រទេស៣ នេះ មានវៀតណាម ម៉ាឡេស៊ី និងឥណ្ឌូនេស៊ី។
ចំណែកបណ្តាប្រទេសផ្សេងទៀតដែលនឹងទទួលបានវ៉ាក់សាំងពីអាមេរិកចំនួន ៨០លានដូសដំបូងនេះ រួមមានប្រទេសកម្ពុជា ថៃ ឡាវ ហ្វីលីពីន តំបន់អាស៊ីខាងត្បូង និងប៉ាស៊ីហ្វិក។
វ៉ាក់សាំង Moderna ដែលជាផ្នែកមួយនៃកម្មវិធីផ្តល់ថ្នាំវ៉ាក់សាំង ៨០លានដូសដំបូងដែលលោកប្រធានាធិបតី ចូ បៃដិន បានសន្យាថានឹងផ្ដល់ឱ្យទូទាំងពិភពលោក នឹងដឹកទៅដល់ប្រទេសវៀតណាម នៅក្នុងសប្តាហ៍នេះ បន្ទាប់ពីវ៉ាក់សាំងមួយលានដូសទើបត្រូវបានអាមេរិកបញ្ជូនទៅដល់ប្រទេសម៉ាឡេស៊ី កាលពីថ្ងៃចន្ទ ទី៥ ខែកក្កដា ហើយជាមួយគ្នានេះ សហរដ្ឋអាមេរិកបានប្រកាសចែកចាយវ៉ាក់សាំងចំនួន ៤លានដូសជាបន្ទាន់ទៅដល់ឥណ្ឌូនេស៊ី ដែលជាប្រទេសកំពុងរងគ្រោះធ្ងន់ធ្ងរជាងគេបំផុតនៅអាស៊ីអាគ្នេយ៍។
មន្ត្រីរដ្ឋាភិបាលអាមេរិកនិយាយថា ការបញ្ជូនវ៉ាក់សាំងទៅឲ្យវៀតណាម ម៉ាឡេស៊ី និងឥណ្ឌូនេស៊ី ធ្វើឡើងតាមរយៈកម្មវិធីកូវ៉ាក់របស់អង្គការសុខភាពពិភពលោក គឺជាផ្នែកមួយនៃយុទ្ធសាស្ត្រដែលមានគោលបំណងបញ្ចប់ការរាតត្បាតកូវីដនៅទូទាំងពិភពលោក។
ប៉ុន្តែវៀតណាម ទោះជាប្រទេសកុម្មុយនីស្តដែលមានព្រំប្រទល់ជាប់នឹងចិន ត្រូវបានអាមេរិក ចាត់ទុកជាប្រទេសអាទិភាពមួយដែរ ហើយជាប្រទេសគំរូក្នុងការចាត់វិធានការទប់ស្កាត់កូវីដ តាមរយៈការពិនិត្យ តាមដាន និងការចាត់ឲ្យធ្វើចត្តាឡីស័កយ៉ាងម៉ត់ចត់។
រដ្ឋាភិបាលក្រុងហាណូយ បានរាយការណ៍ថា មានអ្នកស្លាប់តែ ៩០នាក់ប៉ុណ្ណោះក្នុងចំណោមអ្នកឆ្លងកូវីដសរុបចំនួន ២ម៉ឺន ១ពាន់ករណី បើធៀបនឹងប្រទេសក្នុងតំបន់ដែលមានអ្នកឆ្លង និងស្លាប់ដ៏ច្រើន រួមទាំងកម្ពុជាផងដែរ។
ប្រទេសវៀតណាម ដែលមានប្រជាជនសរុបប្រមាណ ៩៧លាននាក់ គឺប៉ុន្មានសប្តាហ៍ចុងក្រោយនេះ គេសង្កេតឃើញថាមានការឆ្លងកូវីដកើនឡើងយ៉ាងខ្លាំង។
ក្រសួងសុខាភិបាលវៀតណាម បានប្រកាសថា គិតត្រឹមថ្ងៃចន្ទ ទី៥ កក្កដា ឆ្នាំ២០២១ នេះ វ៉ាក់សាំងប្រមាណ ៣លាន ៩សែនដូស ត្រូវបានអាជ្ញាធរចែកចាយដើម្បីចាក់ជូនប្រជាជននៅទូទាំងប្រទេស ដែលក្នុងនោះមានមនុស្សចំនួន ២២ម៉ឺន ៦ពាន់នាក់បានទទួលថ្នាំបង្ការកូវីដចំនួនពីរដូស។
សហរដ្ឋអាមេរិក ជាប្រទេសដែលធ្ងន់ធ្ងរជាងគេនៅក្នុងរលកទីមួយនៃការរាតត្បាតជំងឺផ្លូវដង្ហើម ដែលគេហៅថាមេរោគកូរ៉ូណា ចេញដំបូងពីទីក្រុងវ៉ូហាន ប្រទេសចិន ដោយវាបានឆ្លងរាតត្បាតពេញពិភពលោក។
សម្រាប់សហរដ្ឋអាមេរិក ចំនួនករណីឆ្លង COVID-19 នៅទូទាំងសហរដ្ឋអាមេរិកកើនឡើងដល់ជាង ៣៤លានករណី ក្នុងនោះមានអ្នកស្លាប់ចំនួនជាង ៦សែន ២ម៉ឺននាក់ និងជាសះស្បើយជាង ២៩លាននាក់។ ចំនួនប្រជាជនដែលកំពុងរស់នៅលើទឹកដីសហរដ្ឋអាមេរិក គឺជាង ៣៣២លាននាក់។
គិតត្រឹមថ្ងៃទី០៦ ខែកក្កដា ឆ្នាំ២០២១ សហរដ្ឋអាមេរិកបានចាក់វ៉ាក់សាំងបង្ការជំងឺ COVID-19 ជាង ៣៣១លានដូសហើយជូនដល់ប្រជាជនទូទាំងប្រទេស។ តាមតួលេខនេះ សហរដ្ឋអាមេរិក បានចាក់វ៉ាក់សាំងឱ្យប្រជាជនរបស់អាមេរិក និងពលរដ្ឋប្រទេសផ្សេងៗដែលកំពុងរស់នៅលើទឹកដីអាមេរិក បានជិតសព្វគ្រប់អស់ហើយ គឺនៅសល់តែការបិទបញ្ចប់ប៉ុណ្ណោះ។ សហរដ្ឋអាមេរិកកំពុងប្រើប្រាស់វ៉ាក់សាំង ៣ប្រភេទ គឺ Pfizer, Moderna និង Johnson & Johnson។
វ៉ាក់សាំងរបស់សហរដ្ឋអាមេរិកទាំង៣ប្រភេទនេះ មានប្រសិទ្ធភាពជិត ១០០%។ វ៉ាក់សាំងនេះ ត្រូវបានអង្គការសុខភាពពិភពលោក ទទួលស្គាល់មុនគេជាមួយនឹងវ៉ាក់សាំង AstraZeneca របស់ប្រទេសអង់គ្លេស។
ចំណែកវ៉ាក់សាំងចិន Sinopharm និង Sinovac នៅមិនទាន់ច្បាស់ថាមានប្រសិទ្ធភាពប៉ុន្មានភាគរយនោះទេ។
ចំពោះដែនកោះតៃវ៉ាន់ ដែលចិនដាក់ផែនការនឹងយកមកគ្រប់គ្រងនៅក្រោមគោលនយោបាយប្រទេសមួយប្រព័ន្ធពីរ ឬក៏លើកកងទ័ពចូលកាន់កាប់ គឺដែនកោះនេះបានប្រកាសដាច់ខាតមិនទទួលយកវ៉ាក់សាំងរបស់ប្រទេសចិននោះទេ។
សម្រាប់ដែនកោះមួយនេះ សហរដ្ឋអាមេរិកបានបញ្ជូនវ៉ាក់សាំង ២លាន ៥សែនដូសហើយកាលពីមួយខែមកនេះ។
ចំណែកដែនដីហុងកុង វិញ គឺមានប្រជាជនតិចតួចប៉ុណ្ណោះបានចាក់វ៉ាក់សាំងចិន ខណៈពួកគេត្រូវការវ៉ាក់សាំងរបស់ប្រទេសនៅអឺរ៉ុប និងសហរដ្ឋអាមេរិក៕