 ឬហៅកាត់ថា H.R.» ដើម្បីដាក់ទណ្ឌកម្មលើរដ្ឋាភិបាលលោក ហ៊ុន សែន ដែលកំពុងបំផ្លាញលទ្ធិប្រជាធិបតេយ្យនៅកម្ពុជាក្នុងពេលបច្ចុប្បន្ននេះ។){kind=link}
គណៈកម្មាធិការកិច្ចការបរទេសនៃសភាសហរដ្ឋអាមេរិក បានអនុម័តសេចក្តីព្រាងច្បាប់ដែលមានចំណងជើងថា «លទ្ធិប្រជាធិបតេយ្យសម្រាប់ប្រទេសកម្ពុជា (Cambodia Democracy Act) ឬហៅកាត់ថា H.R.» ដើម្បីដាក់ទណ្ឌកម្មលើរដ្ឋាភិបាលលោក ហ៊ុន សែន ដែលកំពុងបំផ្លាញលទ្ធិប្រជាធិបតេយ្យនៅកម្ពុជាក្នុងពេលបច្ចុប្បន្ននេះ។
ការអនុម័តសេចក្តីព្រាងច្បាប់នេះ ធ្វើឡើងស្របពេលដែលរដ្ឋាភិបាលឯកបក្សដែលដឹកនាំដោយគណបក្សកាន់អំណាចរបស់លោក ហ៊ុន សែន កំពុងរំលោភលើសិទ្ធិជាមូលដ្ឋានរបស់ពលរដ្ឋ និងជាន់ឈ្លីប្រជាធិបតេយ្យនៅកម្ពុជាយ៉ាងធ្ងន់ធ្ងរ។
សមាជិករដ្ឋសភាមកពីគណបក្សសាធារណរដ្ឋ លោក Steve Chabot និងលោក Alan Lowenthal ខាងគណបក្សប្រជាធិបតេយ្យ កាលពីថ្ងៃទី២៨ ខែកក្កដា ឆ្នាំ២០២១ បានអនុម័តដោយសំឡេងឯកច្ឆន្ទលើសេចក្តីព្រាងច្បាប់ថ្មីដែលមានចំណងជើងថា «លទ្ធិប្រជាធិបតេយ្យសម្រាប់ប្រទេសកម្ពុជា» ឬហៅកាត់ថា H.R. ដើម្បីដាក់ជូនសភាពេញអង្គអនុម័តយល់ព្រម និងបញ្ជូនទៅព្រឹទ្ធសភាអនុម័តបន្ត មុននឹងបញ្ជូនទៅប្រធានាធិបតីសហរដ្ឋអាមេរិក លោក ចូ បៃដិន ចុះហត្ថលេខាដើម្បីប្រើប្រាស់ជាផ្លូវការ។
មន្ត្រីជាន់ខ្ពស់របស់សហរដ្ឋអាមេរិក លោក Steve Chabot អះអាងថា លោកនាយករដ្ឋមន្ត្រី ហ៊ុន សែន និងមន្ត្រីក្នុងរដ្ឋាភិបាលរបស់លោក បានជាប់ឈ្មោះជាអ្នកគាស់រំលើងលទ្ធិប្រជាធិបតេយ្យនៅកម្ពុជា ដែលនឹងត្រូវទទួលរងនូវការដាក់ទណ្ឌកម្មចំពោះទង្វើរបស់ពួកគេដែលបានឃុបឃិតគ្នាកន្លងមក។
លោកអះអាងថា លោក ហ៊ុន សែន បានគ្រប់គ្រងប្រទេសដោយឃ្លាតពីគន្លងលទ្ធិប្រជាធិបតេយ្យតាំងពីឆ្នាំ១៩៨៥ មក ហើយបានបន្តដឹកនាំប្រទេសតាមវិធីបង្ក្រាបក្រុមអ្នករិះគន់ និងអ្នកជំទាស់រហូតដល់សព្វថ្ងៃនេះ ខណៈសហរដ្ឋអាមេរិកប្រកាន់ជំហរនៅតែជាមួយពលរដ្ឋខ្មែរប៉ុណ្ណោះ។
ចំណែកសមាជិកសភាមកពីគណបក្សប្រជាធិបតេយ្យ លោក Alan Lowenthal ថ្លែងថា មេដឹកនាំខ្មែរលោក ហ៊ុន សែន បានធ្វើគ្រប់យ៉ាងតាមអំណាចរបស់ខ្លួន ដើម្បីបំផ្លាញលទ្ធិប្រជាធិបតេយ្យនៅកម្ពុជា ដូចជា៖
- ការបិទសិទ្ធិសេរីភាពសារព័ត៌មាន
- ការបង្ខំក្រុមជំទាស់ឲ្យនិរទេសខ្លួន
- ការរំលាយគណបក្សប្រឆាំង
- និងការចាប់ខ្លួនប្រធានគណបក្សសង្គ្រោះជាតិ លោក កឹម សុខា ជាដើម។
សមាជិកសភាអាមេរិករូបនេះរិះគន់ថា របៀបដឹកនាំបែបផ្ដាច់ការរបស់លោក ហ៊ុន សែន មកទល់ពេលនេះ គឺបញ្ច្រាសទៅនឹងកិច្ចសន្យាក្នុងកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ទាំងស្រុង ដូច្នេះការដាក់ទណ្ឌកម្មលើរដ្ឋាភិបាលមួយនេះ គឺជារឿងស័ក្តិសមបំផុត ព្រោះថាក្រុមគាត់បានប្រឹងប្រែងវាយប្រហារកម្ទេចសិទ្ធិសេរីភាពរបស់ពលរដ្ឋខ្មែរឥតឈប់ឈររហូតមក។
Cambodia Democracy Act ឬហៅកាត់ថា H.R. ៤៦៨៦ គឺជាច្បាប់លទ្ធិប្រជាធិបតេយ្យសម្រាប់ប្រទេសកម្ពុជា ដែលបានបន្តមកពីរដ្ឋសភាអាណត្តិមុនៗ ដែលបានអនុម័តក្នុងអាណត្តិទី១១៥ និងទី១១៦។ ដោយឡែកក្នុងអាណត្តិរដ្ឋសភាថ្មីទី១១៧ របស់រដ្ឋការលោក ចូ បៃដិន នេះ ត្រូវបានសមាជិកសភាអាមេរិកលើកយកមកពិភាក្សាបន្ត និងទទួលបានការគាំទ្រពីប្រធានគណៈកម្មាធិការកិច្ចការបរទេសនៃរដ្ឋសភាអាមេរិក លោក Gregory Meek ពីគណបក្សប្រជាធិបតេយ្យនៃរដ្ឋញីវយ៉ក ផងដែរ។
ជុំវិញការអនុម័តច្បាប់នេះ ប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ លោក ទូច វិបុល បានប្រាប់សារព័ត៌មាន The Cambodia Daily នៅថ្ងៃទី២៩ ខែកក្កដា ថា លោកត្រេកអរ និងថ្លែងអំណរគុណចំពោះគណៈកម្មាធិការកិច្ចការបរទេសនៃសភាសហរដ្ឋអាមេរិក ដែលបានអនុម័តសេចក្តីព្រាងច្បាប់នេះដើម្បីលើកកម្ពស់ខាងផ្នែកនយោបាយ និងសិទ្ធិមនុស្សនៅកម្ពុជាឲ្យមានការបោះឆ្នោតដោយសេរី ត្រឹមត្រូវ និងយុត្តិធម៌។
ប្រធានក្រុមអ្នកតស៊ូមតិនៅក្រៅស្រុករូបនេះអះអាងថា ក្នុងនាមលោកជាពលរដ្ឋខ្មែរ-អាមេរិកាំង និងជាអ្នកតស៊ូមតិលើកកម្ពស់សេរីភាព សិទ្ធិមនុស្ស និងប្រជាធិបតេយ្យនៅកម្ពុជា នឹងធ្វើយុទ្ធនាការអំពាវនាវឲ្យពលរដ្ឋខ្មែរ-អាមេរិកាំងដទៃទៀតចូលរួមស្នើសុំឲ្យសភាតំណាងរាស្ត្រនៅតាមមណ្ឌលរបស់ខ្លួនចូលរួមគាំទ្រលើច្បាប់នេះ ដើម្បីផ្តល់អំណាចដល់ក្រសួងពាក់ព័ន្ធរបស់សហរដ្ឋអាមេរិកក្នុងការចាត់វិធានការទៅលើមន្ត្រីកម្ពុជា ដែលពាក់ព័ន្ធនឹងការរំលោភសិទ្ធិមនុស្ស និងប្រជាធិបតេយ្យកន្លងមក។
ពាក់ព័ន្ធនឹងការដាក់ទណ្ឌកម្មនេះដែរ អ្នកវិភាគខាងផ្នែកគោលនយោបាយរបស់អង្គការ Heritage Foundation ក្នុងរដ្ឋធានីវ៉ាស៊ីនតោន អ្នកស្រី Olivia Enos បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី២៨ ខែកក្កដា ថា ការដាក់ទណ្ឌកម្មរបស់សហរដ្ឋអាមេរិកលើរដ្ឋាភិបាលកម្ពុជា គឺមិនមានឥទ្ធិពលលើពលរដ្ឋខ្មែរនោះទេ ប៉ុន្តែទណ្ឌកម្មនេះនឹងប៉ះពាល់ខ្លាំងតែទៅលើអ្នកមានអំណាចដែលរំលោភច្បាប់ និងបំបិទសិទ្ធិសេរីភាពពលរដ្ឋខ្មែរតែប៉ុណ្ណោះ។
អ្នកស្រី Olivia Enos លើកឡើងទៀតថា ការដាក់ទណ្ឌកម្មនេះត្រូវធ្វើឡើងមានច្រើនសណ្ឋាន ច្រើន របៀប ដូចជាការដាក់ទណ្ឌកម្មលើរដ្ឋាភិបាលកម្ពុជាអំពីការចរាចរលុយកខ្វក់ ការប្រព្រឹត្តអំពើពុករលួយរបស់មន្ត្រីរដ្ឋាភិបាល និងឈ្មួញទុច្ចរិតធំៗរបស់កម្ពុជា ជាដើម ដូច្នេះគ្មានទណ្ឌកម្មណាមួយរបស់អាមេរិក នឹងត្រូវអនុវត្តលើពលរដ្ឋខ្មែរស្លូតត្រង់នោះឡើយ៕