លោក ហ៊ុន សែន សម្រេចបន្តពង្រឹងយុទ្ធនាការទប់ស្កាត់ការឆ្លងរាលដាលនៃជំងឺ Covid-19 ទាំង ២៥រាជធានី-ខេត្តរយៈពេល ៧ថ្ងៃបន្ថែមទៀត ក្រោយការអនុវត្តយុទ្ធនាការនេះអស់រយៈពេល ២សប្តាហ៍កន្លងមក។
ការបន្តដាក់ចេញវិធានការទប់ស្កាត់ការឆ្លងរាលដាលនៃជំងឺ Covid-19 នេះ ធ្វើឡើងស្របពេលដែលសេចក្តីណែនាំចាស់ត្រូវផុតកំណត់នៅថ្ងៃទី១២ ខែសីហា នេះ ខណៈការឆ្លងវីរុស Covid-19 នៅតែមិនទាន់ថមថយនៅឡើយ។
ប្រមុខរដ្ឋាភិបាលកម្ពុជាបានចេញសេចក្ដីណែនាំថ្មីស្ដីពីការបន្តពង្រឹងយុទ្ធនាការទប់ស្កាត់ការឆ្លងរាលដាលនៃជំងឺ Covid-19 កាលពីថ្ងៃទី១១ ខែសីហា ឆ្នាំ២០២១ ក្នុងគោលបំណងបង្កើនប្រសិទ្ធភាពក្នុងការគ្រប់គ្រងហានិភ័យចំពោះការឆ្លងរាលដាលទ្រង់ទ្រាយធំក្នុងសហគមន៍នៃជំងឺ Covid-19 បំប្លែងថ្មីប្រភេទ DELTA ដែលបានរកឃើញក្នុងខេត្តចំនួន១៧ កន្លងមក។
លោក ហ៊ុន សែន បញ្ជាក់ថា យុទ្ធនាការបន្តពង្រឹងវិធានការទប់ស្កាត់ការឆ្លងរាលដាលនៃជំងឺ Covid-19 ទាំង ២៥រាជធានី-ខេត្តនេះ នឹងត្រូវចាប់ផ្តើមអនុវត្តពីថ្ងៃទី១៣ រហូតដល់ថ្ងៃទី១៩ ខែសីហា ឆ្នាំ២០២១ ខណៈខេត្តទាំង៨ ដែលបានបិទខ្ទប់កន្លងមក នឹងត្រូវបញ្ចប់នៅថ្ងៃទី១២ ខែសីហា ក៏នឹងត្រូវចាត់ចូលទៅក្នុងយុទ្ធនាការបន្តពង្រឹងវិធានការទប់ស្កាត់ការឆ្លងរាលដាលនៃជំងឺ Covid-19 នេះផងដែរ។
លោក ហ៊ុន សែន បានបញ្ជាឲ្យមន្ត្រីអាជ្ញាធរខេត្តទូទាំងប្រទេស ត្រូវប្រកាន់ខ្ជាប់នូវការទទួលខុសត្រូវខ្ពស់ក្នុងអំឡុងពេលបន្តយុទ្ធនាការពង្រឹងការទប់ស្កាត់ការឆ្លងរាលដាលនៃជំងឺ Covid-19 រយៈពេល ៧ថ្ងៃបន្ថែមទៀតនេះ ដើម្បីឲ្យយុទ្ធនាការនេះកាន់តែមានប្រសិទ្ធភាពព្រមៗគ្នាទូទាំងប្រទេសក្នុងការធានានូវសុខភាព និងអាយុជីវិតរបស់ប្រជាពលរដ្ឋ។
កាលពីថ្ងៃទី២៨ ខែកក្កដា ឆ្នាំ២០២១ ប្រមុខរដ្ឋាភិបាលកម្ពុជា បានចេញសារាចរដើម្បីពង្រឹងការទប់ស្កាត់ការឆ្លងរាលដាលនៃជំងឺ Covid-19 ទាំង ២៥រាជធានី-ខេត្តរយៈពេល ១៤ថ្ងៃ ដែលនឹងត្រូវផុតកំណត់នៅថ្ងៃទី១២ វេលាម៉ោង ២៣:៥៩នាទីឈានចូលថ្ងៃទី១៣ ខែសីហា។
ទាក់ទិននឹងការឆ្លងវីរុស Covid-19 ប្រភេទថ្មីនេះ ក្រសួងសុខាភិបាល បានចេញសេចក្តីប្រកាសព័ត៌មានកាលពីថ្ងៃទី១១ ខែសីហា ថា ចាប់ពីថ្ងៃទី៣១ ខែមីនា រហូតដល់ថ្ងៃទី១០ ខែសីហា ឆ្នាំ២០២១ នេះ ក្រសួងបានរកឃើញអ្នកវិជ្ជមានវីរុស Covid-19 បំប្លែងថ្មីប្រភេទ DELTA ចំនួន ៤២៩នាក់ហើយ។
ប្រភពដដែលបញ្ជាក់ថា វីរុសប្រភេទនេះត្រូវបានរកឃើញលើពលករខ្មែរដែលត្រឡប់មកពីប្រទេសថៃ ប្រទេសវៀតណាម អ្នកដំណើរតាមជើងយន្តហោះ បុគ្គលិកសុខាភិបាល មន្ត្រីរាជការ និងអ្នកភូមិនៅក្នុងសហគមន៍ដែលបានបង្ហាញថា វីរុសនេះបានវាយលុកចូលក្នុងសហគមន៍ប្រទេសកម្ពុជា យ៉ាងធ្ងន់ធ្ងរ ជាពិសេសខេត្តឧត្តរមានជ័យ រាជធានីភ្នំពេញ ខេត្តសៀមរាប និងបណ្តាខេត្តមួយចំនួនទៀត។
ក្រសួងសុខាភិបាល បានអំពាវនាវឲ្យពលរដ្ឋខ្មែរត្រូវអនុវត្តវិធានការសុខាភិបាលឲ្យបានត្រឹមត្រូវ ជាពិសេសយុវវ័យ ព្រោះថាក្រសួងបានសង្កេតឃើញថា ការចម្លងក្នុងពេលបច្ចុប្បន្ននេះមានសន្ទុះកើនឡើងយ៉ាងខ្លាំងលើយុវវ័យ ដោយសារតែពួកគេឧស្សាហ៍ដើរចេញក្រៅផ្ទះ និងមានការជួបជុំមិត្តភ័ក្ដិជាញឹកញាប់។
បន្ថែមពីនេះ ក្រសួងសុខាភិបាល ក៏បានបង្ហាញរបាយការណ៍អំពីអ្នកឆ្លងវីរុស Covid-19 នៅថ្ងៃទី១២ ខែសីហា ផងដែរថា ក្រសួងបានរកឃើញអ្នកឆ្លងវីរុស Covid-19 ថ្មីចំនួន ៤៥៥នាក់ និងអ្នកជាសះស្បើយថ្មីចំនួន ៦៧៧នាក់ ខណៈអ្នកស្លាប់ថ្មីមានចំនួន ២០នាក់។
ក្រសួងបញ្ជាក់ថា មកទល់នឹងពេលនេះ អ្នកឆ្លងវីរុស Covid-19 សរុបបានកើនឡើងដល់ជាង ៨ម៉ឺន ៣ពាន់នាក់ហើយ និងអ្នកដែលជាសះស្បើយសរុបមានចំនួនជាង ៧ម៉ឺន ៨ពាន់នាក់ ដោយឡែកអ្នកស្លាប់សរុបបានកើនឡើងជាង ១៦០០នាក់ហើយគិតត្រឹមថ្ងៃព្រហស្បតិ៍ សប្តាហ៍នេះ៕