36 C
Phnom Penh

តាលីបង់​ព្រមាន​អាមេរិក​ថា​នឹង​ជួប​ផលវិបាក​បើ​បន្ត​វត្តមាន​ទ័ព​នៅ​អាហ្វហ្គានីស្ថាន​ហួស​ថ្ងៃ​ទី​៣១ សីហា

ដោយ ឌឹ ខេមបូឌា ដេលី

បទវិភាគ

កងកម្លាំង​យោធា​អាមេរិក នៅ​ថ្ងៃ​អង្គារ ទី​២៤ សីហា កំពុង​បង្កើន​ការ​ខិតខំ​ប្រឹងប្រែង​ជម្លៀស​ពលរដ្ឋ​ចេញពី​ទីក្រុង​កាប៊ុល នៃ​ប្រទេស​អាហ្វហ្គានីស្ថាន ខណៈ​ក្រុម​តាលីបង់ ព្រមាន​ថា អាមេរិក​និង​សម្ពន្ធមិត្ត​បើ​នៅតែ​បន្ត​ប្រតិបត្តិការ​ជម្លៀស​ពលរដ្ឋ​ហួស​ថ្ងៃ​ទី​៣១ ខែ​សីហា គឺ​នឹង​ជួប​ផលវិបាក​ធ្ងន់ធ្ងរ។

សារព័ត៌មាន​បារាំង AFP បាន​ធ្វើ​សេចក្ដី​រាយការណ៍​ថា មកទល់​ពេលនេះ ពលរដ្ឋ​អាហ្វហ្គានីស្ថាន​រាប់​ពាន់​នាក់​នៅតែ​កំពុង​បន្ត​ប្រមូល​ផ្តុំ​គ្នា​នៅ​ខាងក្រៅ​ព្រលាន​យន្តហោះ​ក្រុង​កាប៊ុល ខណៈ​ពួកគេ​ភ័យខ្លាច​អំពី​ជីវិត​រស់នៅ​ក្រោម​ការ​ដឹកនាំ​របស់​ក្រុម​តាលីបង់ ដែល​ធ្លាប់​កាប់​សម្លាប់​មនុស្ស​យ៉ាង​សាហាវ។

ក្នុង​ស្ថានភាព​នេះ ប្រធានាធិបតី​អាមេរិក លោក ចូ បៃដិន កំពុង​ស្ថិត​ក្រោម​ការ​ដាក់​សម្ពាធ​កាន់តែ​ខ្លាំង​ឡើង ដើម្បី​ឲ្យ​លោក​ពន្យារ​កាលបរិច្ឆេទ​កំណត់​នៃ​ការ​ដក​កងទ័ព​ចេញពី​អាហ្វហ្គានីស្ថាន ដែល​តាម​ផែនការ​គឺ​ឲ្យ​អស់​នៅ​ត្រឹម​ថ្ងៃ​ទី​៣១ ខែ​សីហា ឆ្នាំ​២០២១។

ចាប់តាំង​ពី​ចូល​កាន់កាប់​រដ្ឋធានី​កាប៊ុល កាលពី​ថ្ងៃ​ទី​១៥ ខែ​សីហា ឆ្នាំ​២០២១ ក្រុម​តាលីបង់ បាន​ផ្តល់​ការ​យោគយល់​ចំពោះ​ការ​ខិតខំ​ប្រឹងប្រែង​ជម្លៀស​ពលរដ្ឋ​បរទេស ដោយ​មិន​បាន​បង្ក​បញ្ហា​អ្វី​ឡើយ។ ប៉ុន្តែ​កាលពី​ថ្ងៃ​ចន្ទ សប្តាហ៍​នេះ ពួក​តាលីបង់​បាន​ព្រមាន​ថា ប្រសិនបើ​អន្តរជាតិ ជាពិសេស​សហរដ្ឋ​អាមេរិក ឬ​ចក្រភព​អង់គ្លេស នៅ​បន្ត​ពន្យារពេល​ការ​ជម្លៀស​នេះ​ទៀត នឹង​ត្រូវ​ប្រឈម​ផលវិបាក​ធ្ងន់ធ្ងរ​មិនខាន​ឡើយ។

ស្ថានភាព​នៅ​ព្រលាន​យន្តហោះ​ទីក្រុង​កាប៊ុល ប្រទេស​អាហ្វហ្គានីស្ថាន នៅតែ​ស្ថិត​នៅ​ក្នុង​ភាព​ចលាចល​នៅឡើយ។

ពលរដ្ឋ​រាប់​ម៉ឺន​នាក់​កំពុង​រង់ចាំ​ការ​ជម្លៀស​តាម​យន្តហោះ​ចាកចេញ​ពី​អាហ្វហ្គានីស្ថាន។ ដោយ​ប្រឈម​នឹង​បញ្ហា​នេះ លោក​ប្រធានាធិបតី ចូ បៃដិន បាន​លើកឡើង​កាលពី​ថ្ងៃ​អាទិត្យ ថា អាមេរិក​អាច​នឹង​បន្ត​ទុក​ពេល​ឱ្យ​កងទ័ព​អាមេរិក​ដាក់​ពង្រាយ​នៅ​ព្រលាន​យន្តហោះ​ក្រុង​កាប៊ុល ដើម្បី​ការពារ​សន្តិសុខ។ លោក ចូ បៃដិន បាន​បង្ហើប​ឲ្យ​ដឹង​កាលពី​រសៀល​ថ្ងៃ​អាទិត្យ ទី​២២ សីហា ថា លោក​អាច​នឹង​សម្រេច​អនុញ្ញាត​ឲ្យ​កងទ័ព​អាមេរិក​បន្ត​នៅ​ការពារ​សន្តិសុខ​នៅ​ព្រលាន​យន្តហោះ​ក្រុង​កាប៊ុល លើស​ពី​ថ្ងៃ​ទី​៣១ សីហា ដើម្បី​ការពារ​ប្រតិបត្តិការ​ជម្លៀស​ពលរដ្ឋ​ចេញពី​ក្រុង​កាប៊ុល។

ភ្លាមៗ​ក្រោយ​ដំណឹង​នេះ អ្នក​នាំពាក្យ​ក្រុម​តាលីបង់ Suhail Shaheen បាន​ចេញ​សារ​ព្រមាន​អាមេរិក។ អ្នក​នាំពាក្យ​រូប​នេះ​ថា តាលីបង់​មិន​យល់ព្រម​ឲ្យ​អាមេរិក​បន្ត​ទុក​កងទ័ព​នៅ​ព្រលាន​យន្តហោះ​លើស​ពី​ថ្ងៃ​ទី​៣១ សីហា ជាដាច់ខាត ដោយ​ព្រមាន​ថា​នឹង​ជួប​ផលវិបាក​បើ​អាមេរិក​នៅតែ​បន្ត​នោះ។

កាល​ពី​ព្រឹក​ថ្ងៃ​ចន្ទ ទី​២៣ សីហា ភាព​ចលាចល​នៅ​ព្រលាន​យន្តហោះ​ក្រុង​កាប៊ុល បាន​បង្ក​ឲ្យ​មាន​ការ​ផ្ទុះ​អាវុធ​ពី​សំណាក់​កងទ័ព​អាមេរិក និង​កងទ័ព​អាល្លឺម៉ង់ ដោយ​ពួកគេ​បាន​បាញ់​ទៅលើ​ក្រុម​ជន​មិន​ស្គាល់​មុខ​បណ្តាល​ឲ្យ​ស្លាប់​មនុស្ស​ម្នាក់។ មន្ត្រី​តាលីបង់ បាន​រិះគន់​កងទ័ព​អាមេរិក​ថា​គ្មាន​សមត្ថភាព ដោយ​មិន​អាច​រក្សា​សណ្ដាប់ធ្នាប់​នៅ​ក្នុង​ព្រលាន​យន្តហោះ​ក្រុង​កាប៊ុល ធ្វើ​ឲ្យ​មាន​ចលាចល​កើតឡើង។

គិត​ចាប់តាំង​ពី​ក្រុម​តាលីបង់ បាន​គ្រប់គ្រង​ប្រទេស​អាហ្វហ្គានីស្ថាន កាលពី ១០​ថ្ងៃ​មកនេះ គឺ​ជនបរទេស និង​ប្រជាជន​អាហ្វហ្គានីស្ថាន​ប្រហែល​ជាង ៥​ម៉ឺន​នាក់ ត្រូវ​បាន​ជម្លៀស​ចេញពី​ប្រទេស​នេះ​តាមរយៈ​អាកាសយានដ្ឋាន​ទីក្រុង​កាប៊ុល។

សហរដ្ឋ​អាមេរិក​មាន​ផែនការ​ជម្លៀស​ជនជាតិ​អាមេរិក​ឲ្យ​បាន ១​ម៉ឺន ៥​ពាន់​នាក់ និង​ប្រជាជន​អាហ្វហ្គានីស្ថាន ពី ៥ ទៅ ៦​ម៉ឺន​នាក់។ ចំណែក​អាល្លឺម៉ង់​និយាយ​ថា រដ្ឋាភិបាល​ក្រុង​ប៊ែរឡាំង បាន​ជម្លៀស​ពលរដ្ឋ​ចេញពី​ក្រុង​កាប៊ុល ប្រមាណ ២៥០០​នាក់ ហើយ​រីឯ​អង់គ្លេស​បាន​ជួយ​ជម្លៀស​ពលរដ្ឋ​ប្រហែល ៥៧០០​នាក់​ហើយ។

ចាប់តាំង​ពី​ផ្ដួល​រំលំ​របប​តាលីបង់​នៅ​ឆ្នាំ​២០០១ ក្រោម​ហេតុផល​នៃ​ការ​តាម​ប្រមាញ់​មេ​ភេរវកម្ម​អាល់កៃដា អូសាម៉ា ប៊ិនឡាឌែន (Osama bin Laden) រហូត​ថ្ងៃ​ទី​១៥ សីហា ជា​ថ្ងៃ​បិទ​បញ្ចប់ រដ្ឋាភិបាល​ក្រុង​កាប៊ុល​ដែល​លោក​ខាងលិច​លើក​បន្តុប គឺ​សហរដ្ឋ​អាមេរិក​បាន​ចំណាយ​ប្រាក់​ច្រើន​ជាង ២​ទ្រី​លាន​ដុល្លារ​ក្នុង​ការ​ធ្វើ​សង្គ្រាម​ផង និង​ជួយ​ស្ដារ​ប្រទេស​នេះ​ឡើងវិញ​ផង។ នេះ​បើ​យោង​តាម​កាសែត The Washington Post។ តាម​ប្រភព​ដដែល​នេះ ប្រាក់ ៨០០​ពាន់​លាន​ដុល្លារ​សម្រាប់​ការ​ចំណាយ​ក្នុង​សង្គ្រាម​ផ្ទាល់ និង ៨៥​ពាន់​លាន​ដុល្លារ​ដើម្បី​បណ្តុះបណ្តាល​កងទ័ព​អាហ្វហ្គានីស្ថាន។ ក្នុង​រយៈពេល​នោះ កងទ័ព​អាមេរិក​ស្លាប់ ២៥០០​នាក់។ ចំណែក​កងទ័ព​អាហ្វហ្គានីស្ថាន​ស្លាប់ ៦​ម៉ឺន ៩​ពាន់​នាក់ និង​ប្រជាជន​របស់​ប្រទេស​នេះ ៤​ម៉ឺន ៧​ពាន់​នាក់។

ការ​លើក​ទ័ព​ផ្ដួល​រំលំ​របប​តាលីបង់ គឺ​ក្រោម​ការ​បញ្ជា​របស់​ប្រធានាធិបតី​អាមេរិក លោក George W. Bush បន្ទាប់ពី​មាន​ការ​វាយប្រហារ​ភេរវកម្ម​ថ្ងៃ​ទី​១១ ខែ​កញ្ញា ឆ្នាំ​២០០១។ ការពិត អាមេរិក​នៅ​ពេល​នោះ គឺ​មាន​ផែនការ​ត្រឹមតែ​តាម​កម្ចាត់ និង​បោស​ក្រុម​តាលីបង់ ដែល​មាន​មេដឹកនាំ គឺ​លោក Osama bin Laden។

ប៉ុន្តែ​ការ​ចាប់ខ្លួន និង​សម្លាប់​មេ​ភេរវករ​នេះ គឺ​នៅ​ក្រោម​ការ​បញ្ជា​ពី​លោក​ប្រធានាធិបតី បារ៉ាក់ អូបាម៉ា។ លោក ចូ បៃដិន ដែល​ធ្លាប់​ជា​អនុ​ប្រធានាធិបតី​របស់​លោក អូបាម៉ា គឺជា​អ្នក​ប្រកាស​ដក​ទ័ព​អាមេរិក​ឲ្យ​អស់​ពី​អាហ្វហ្គានីស្ថាន​ត្រឹម​ថ្ងៃ​ទី​៣១ ខែ​សីហា។ មេដឹកនាំ​អាមេរិក​វ័យ ៧៨​ឆ្នាំ​រូប​នេះ បាន​ប្រកាស​ថា អាមេរិក​ឈ្នះ​សង្គ្រាម​តាលីបង់​ផង ហើយ​ក៏​ឈ្នះ​សង្គ្រាម​លើ​ក្រុម​ភេរវកម្ម​អាល់កៃដា​ផង​ដែរ ខណៈ​លោក​បដិសេធ​ចំពោះ​ការរិះគន់​ថា អាមេរិក​មាន​កំហុស​ចំពោះ​ការ​ធ្វើ​ឱ្យ​ពួក​តាលីបង់​ឡើង​កាន់​អំណាច​វិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស