សកម្មជនបក្សប្រឆាំង អះអាងថា សព្វថ្ងៃនេះមានចលនានយោបាយថ្មីនៅក្រៅប្រទេស និងបក្សនយោបាយដែលទើបនឹងបើកថ្មីៗនៅក្នុងស្រុកមួយចំនួន បានប្រើប្រាស់ឈ្មោះលោក កឹម សុខា ដើម្បីប្រយោជន៍បក្ស និងក្រុមរបស់ពួកគេដែលប្រាសចាកពីស្មារតីរួមនៃគណបក្សសង្គ្រោះជាតិទាំងស្រុង។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី៧ ខែកញ្ញា ឆ្នាំ២០២១ ថា ក្រោយមន្ត្រីបក្សប្រឆាំងសម្រេចចិត្តចាកចេញពីស្មារតីគណបក្សសង្គ្រោះជាតិ ទៅបើកបក្សថ្មី ពួកគេមិនមានសមត្ថភាពទៅប្រមូលអ្នកគាំទ្របក្សផ្សេងឱ្យគាំទ្រគណបក្សថ្មីរបស់ពួកគេនោះទេ គឺមានតែប្រមូលអ្នកគាំទ្រគណបក្សសង្គ្រោះជាតិ នៅថ្នាក់មូលដ្ឋានប៉ុណ្ណោះ។
លោកអះអាងថា ការចេញទៅប្រមូលអ្នកគាំទ្ររបស់អតីតមន្ត្រីបក្សប្រឆាំងទាំងនោះ ពួកគេតែងប្រើវិធីផ្សេងៗគ្នា មានអ្នកខ្លះវាយប្រហារអតីតមេបក្សរបស់ខ្លួន និងខ្លះទៀតឆ្លៀតឱកាសប្រើឈ្មោះលោក កឹម សុខា ដើម្បីប្រមូលអ្នកគាំទ្របក្សប្រឆាំងនៅមូលដ្ឋាន។
សកម្មជនបក្សប្រឆាំងរូបនេះបញ្ជាក់ថា ការតស៊ូលះបង់របស់លោក កឹម សុខា ដើម្បីសេរីភាពរបស់ពលរដ្ឋ គឺជាគុណតម្លៃដ៏ធំធេងរបស់លោក។ លោកបន្តថា បើទោះបីជាមេដឹកនាំបក្សប្រឆាំងរូបនេះត្រូវរងការរឹតត្បិតសេរីភាពផ្ទាល់ខ្លួនពីអាជ្ញាធរកម្ពុជាទាំងអយុត្តិធម៌ក្តី ក៏ពលរដ្ឋខ្មែរអ្នកស្រឡាញ់យុត្តិធម៌ គោរពសិទ្ធិមនុស្ស និងស្រឡាញ់ប្រជាធិបតេយ្យ នៅតែគោរពគុណតម្លៃរបស់លោកជានិច្ច។
ប្រធានគណបក្សសង្គ្រោះជាតិ លោក កឹម សុខា បានសរសេរលើគណនី Facebook របស់លោក កាលពីថ្ងៃទី៥ ខែកញ្ញា ឆ្នាំ២០២១ ថា លោកសង្កេតឃើញថា មកទល់នឹងពេលនេះនៅតែមានបុគ្គល ក្រុម គណបក្ស ឬចលនានយោបាយខ្លះនៅតែយកឈ្មោះ និងរូបភាពរបស់លោកទៅភ្ជាប់ពាក់ព័ន្ធជាមួយនឹងសកម្មភាពនយោបាយរបស់ពួកគេ ដើម្បីតែកេងចំណេញនយោបាយផ្ទាល់ខ្លួន។
លោកអះអាងថា ការយករូបលោកទៅពាក់ព័ន្ធនឹងសកម្មភាពរបស់ពួកគេនេះ គឺដើម្បីតែបម្រើផលប្រយោជន៍ និងមហិច្ឆតារបស់អ្នកទាំងនោះតែប៉ុណ្ណោះ ដូច្នេះលោកសូមបញ្ជាក់ជូនសាធារណជនឲ្យបានជ្រាបថា មានតែសហមេធាវីដែលជាតំណាងស្របច្បាប់របស់លោកប៉ុណ្ណោះ ដែលអាចធ្វើសេចក្តីថ្លែងការណ៍ ឬសេចក្តីប្រកាសព័ត៌មានដែលធ្វើឡើងក្នុងនាមរូបលោក និងជាឆន្ទៈរបស់លោកដោយពិតប្រាកដ។
នេះមិនមែនជាលើកទីមួយទេដែលមេដឹកនាំបក្សប្រឆាំង លោក កឹម សុខា ចេញមកច្រានចោលចំពោះអ្នកនយោបាយដែលបានប្រើឈ្មោះរបស់លោក ដើម្បីទាក់ទាញអ្នកគាំទ្របក្សប្រឆាំងនៅមូលដ្ឋាន ស្របពេលដែលលោកកំពុងស្ថិតនៅក្នុងបម្រាមធ្វើនយោបាយនៅឡើយ។
កាលពីខែកុម្ភៈ ឆ្នាំ២០២១ ក្រុមមេធាវីការពារក្តីប្រធានគណបក្សសង្គ្រោះជាតិ បានចេញសេចក្តីថ្លែងការណ៍ជាសាធារណៈម្តងរួចមកហើយ ដោយហាមអ្នកនយោបាយដែលបង្កើតបក្សថ្មី ដើម្បីចូលរួមការបោះឆ្នោតក្នុងឆ្នាំ២០២២ នាពេលខាងមុខ កុំយកឈ្មោះលោក កឹម សុខា ទៅភ្ជាប់ ឬពាក់ព័ន្ធនឹងគណបក្សនយោបាយរបស់ពួកគេ។
ជុំវិញបញ្ហានេះ កាលពីចុងខែមីនា ឆ្នាំ២០២១ លោក ផែង ហេង សហមេធាវីការពារក្តីលោក កឹម សុខា បានអះអាងថា ការយកឈ្មោះរបស់លោក កឹម សុខា ទៅប្រើប្រាស់ដោយអ្នកនយោបាយណាមួយនោះ វានឹងធ្វើឱ្យប៉ះពាល់សិទ្ធិឯកជនរបស់លោក និងធ្វើឱ្យប៉ះពាល់ដល់បញ្ហាផ្លូវច្បាប់ក្នុងដំណើរការតុលាការផងដែរ៕