31 C
Phnom Penh

លោក ហ៊ុន សែន បញ្ជា​ឲ្យ​ក្រសួង​យុត្តិធម៌​ដោះស្រាយ​ជូន​លោក យឹម ស៊ីណន ដែល​សុំ​ការ​លើកលែង​ការ​ចោទប្រកាន់

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន សម្រេច​ទទួល​យក​លិខិត​របស់​អតីត​ប្រធាន​ចលនា​គណបក្ស​សង្គ្រោះ​ជាតិ ប្រទេស​កូរ៉េ​ខាងត្បូង លោក យឹម ស៊ីណន រួម​ជាមួយ​សមាជិក ៩​រូប​ផ្សេង​ទៀត​ដែល​បាន​ស្នើសុំ​លោក​នាយករដ្ឋមន្ត្រី​អន្តរាគមន៍​លើកលែង​ការ​ចោទប្រកាន់​លើ​រូបលោក និង​សហការី​របស់​លោក​ជាច្រើន​រូប​ផ្សេង​ទៀត​ពី​តុលាការ​កម្ពុជា នៅ​ថ្ងៃ​នេះ។

លោក ហ៊ុន សែន បាន​ប្រាប់​សារព័ត៌មាន​ដែល​ស្និទ្ធ​នឹង​លោក​ឈ្មោះ Fresh News ថា លោក​បាន​ទទួល​រួច​ហើយ​ចំពោះ​លិខិត​របស់​អតីត​ប្រធាន​ចលនា​គណបក្ស​សង្គ្រោះ​ជាតិ ប្រទេស​កូរ៉េ​ខាងត្បូង លោក យឹម ស៊ីណន នៅ​រសៀល​ថ្ងៃ​ទី​២៩ ខែ​កញ្ញា ឆ្នាំ​២០២១ នេះ ហើយ​លិខិត​នេះ លោក​ក៏​បាន​ប្រគល់​ឱ្យ​ទៅ​រដ្ឋមន្ត្រី​ក្រសួង​យុត្តិធម៌ លោក កើត រិទ្ធ ដើម្បី​ពិនិត្យ​មើល និង​រក​ដំណោះស្រាយ​លើ​ករណី​នេះ​ដែរ។

នៅ​ថ្ងៃ​ទី​២៩ ខែ​កញ្ញា ឆ្នាំ​២០២១ នេះ អតីត​ប្រធាន​ចលនា​គណបក្ស​សង្គ្រោះ​ជាតិ ប្រទេស​កូរ៉េ​ខាងត្បូង លោក យឹម ស៊ីណន រួម​ជាមួយ​សហការី ៩​រូប​ផ្សេង​ទៀត ដូចជា​លោក ថុង ហួច និង​កញ្ញា រស់ សុផល ជាដើម បាន​ដាក់​លិខិត​ស្នើសុំ​ទៅ​លោក​នាយករដ្ឋមន្ត្រី ហ៊ុន សែន ដើម្បី​សុំ​អន្តរាគមន៍​លើ​ករណី​ចោទប្រកាន់​ពាក់ព័ន្ធ​នឹង​ព្រឹត្តិការណ៍ ៩ វិច្ឆិកា កាលពី​ឆ្នាំ​២០១៩ កន្លងទៅ។

លិខិត​ដដែល​អះអាង​ថា លោក យឹម ស៊ីណន និង​សហការី​ទាំងនេះ មិន​ត្រឹមតែ​មិន​គាំទ្រ​ចលនា​ធ្វើ​មាតុភូមិ​និវត្តន៍ ៩ វិច្ឆិកា ២០១៩ ដែល​បាន​បង្ក​ឱ្យ​មាន​ការ​ជេរប្រមាថ​ព្រះមហាក្សត្រ និង​បំផុស​ឱ្យ​មាន​ការ​បះបោរ​ពី​សំណាក់​មហាជន និង​កងកម្លាំង​ប្រដាប់​អាវុធ​ឱ្យ​ប្រឆាំង​នឹង​រដ្ឋាភិបាល​នោះ​ទេ ថែម​ទាំង​ប្រកាស​ប្រឆាំង​យ៉ាង​ដាច់​អហង្ការ​ទៀត​ផង។

ប្រភព​ដដែល​បញ្ជាក់​ថា ជា​រឿង​អកុសល​សម្រាប់​លោក យឹម ស៊ីណន និង​សហការី​របស់​លោក​ដែល​មាន​ការ​យល់​ច្រឡំ​ពី​សំណាក់​អាជ្ញាធរ​កម្ពុជា រហូត​ដល់​មាន​ការ​ចោទប្រកាន់​បាន​ចូលរួម​ជាមួយ​សកម្មភាព​មាតុភូមិ​និវត្តន៍ ៩ វិច្ឆិកា ឆ្នាំ​២០១៩ នោះ​ទៅវិញ ហើយ​ថែមទាំង​មាន​ដីកា​ចាប់​ខ្លួន​ពី​ស្ថាប័ន​តុលាការ​ទៀត​ផង។

ជុំវិញ​បញ្ហា​នេះ លោក យឹម ស៊ីណន បាន​ប្រាប់​សារព័ត៌មាន The Cambodia Daily នៅ​មុន​ការ​ផ្សាយ​នេះ​ថា ការ​ដាក់​លិខិត​ទៅកាន់​លោក​នាយករដ្ឋមន្ត្រី ហ៊ុន សែន នេះ គឺ​ក្នុង​គោលបំណង​ដើម្បី​សុំ​ឱ្យ​ប្រមុខ​រដ្ឋាភិបាល​កម្ពុជា​ជួយ​រក​យុត្តិធម៌​ដែល​មាន​ការ​យល់​ច្រឡំ និង​ចោទប្រកាន់​ពី​សំណាក់​អាជ្ញាធរ​មក​លើ​ក្រុម​លោក​ដោយ​មិន​មាន​មូលដ្ឋាន​ច្បាស់លាស់។

លោក យឹម ស៊ីណន បញ្ជាក់​ថា រូបលោក​ផ្ទាល់ និង​សហការី​ទាំងអស់​គ្រាន់តែ​ចង់​បាន​ភាព​ត្រឹមត្រូវ និង​ចង់​រស់នៅ​ដោយ​សេរីភាព​ដូចជា​ពលរដ្ឋ​ខ្មែរ​ដទៃ​ទៀត​ប៉ុណ្ណោះ។

អតីត​ប្រធាន​ចលនា​គណបក្ស​សង្គ្រោះ​ជាតិ ប្រចាំ​ប្រទេស​កូរ៉េ​ខាងត្បូង លោក យឹម ស៊ីណន រួម​ជាមួយ​សហការី ៩​រូប​ផ្សេង​ទៀត ដូចជា​លោក ថុង ហួច ហៅ មយូរាទឹកកក និង​កញ្ញា រស់ សុផល ហៅ សុផល​កូនខ្មែរ ជាដើម ត្រូវ​បាន​តុលាការ​ក្រុង​ភ្នំពេញ​ចោទប្រកាន់​ពី​បទ​រួម​គំនិត​ក្បត់ និង​ញុះញង់​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​ពាក់ព័ន្ធ​នឹង​ព្រឹត្តិការណ៍​មាតុភូមិ​និវត្តន៍ ៩ វិច្ឆិកា របស់​អតីត​មេដឹកនាំ​បក្ស​ប្រឆាំង លោក សម រង្ស៊ី កាលពី​ឆ្នាំ​២០១៩ កន្លងទៅ។

កាលពី​ថ្ងៃ​ទី​២ ខែ​មិថុនា ឆ្នាំ​២០២១ លោក យឹម ស៊ីណន បាន​ដាក់​លិខិត​លាលែង​ពី​ប្រធាន​ចលនា​គណបក្ស​សង្គ្រោះ​ជាតិ ប្រទេស​កូរ៉េ​ខាងត្បូង បន្ទាប់ពី​លោក​បាន​ចូលរួម​ជាមួយ​គណបក្ស​សង្គ្រោះ​ជាតិ​អស់​រយៈពេល ១០​ឆ្នាំ ដោយ​គិត​ចាប់តាំង​ពី​ឆ្នាំ​២០១១ រហូត​ដល់​ឆ្នាំ​២០២១ នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស