មន្ត្រីជាន់ខ្ពស់រដ្ឋាភិបាល បានឱ្យដឹងថា គណៈរដ្ឋមន្ត្រីនឹងបើកកិច្ចប្រជុំពេញអង្គនៅថ្ងៃទី៨ តុលា នេះ ដើម្បីកែរដ្ឋធម្មនុញ្ញនៃព្រះរាជាណាចក្រកម្ពុជា ក្រោយពីមានបញ្ជាពីលោក ហ៊ុន សែន។
ការបើកកិច្ចប្រជុំភ្លាមៗនេះ ធ្វើឡើងបន្ទាប់ពីលោក ហ៊ុន សែន បានបញ្ជាទៅរដ្ឋមន្ត្រីក្រសួងយុត្តិធម៌ លោក កើត រិទ្ធ កាលពីថ្ងៃទី៦ ខែតុលា ឆ្នាំ២០២១ ដោយឱ្យធ្វើការសិក្សារៀបចំធ្វើសេចក្តីព្រាងច្បាប់វិសោធនកម្មរដ្ឋធម្មនុញ្ញ ឬសេចក្តីព្រាងច្បាប់អង្គការដែលចេញពីរដ្ឋាភិបាល ឬជាសេចក្តីស្នើច្បាប់ដែលចេញពីព្រឹទ្ធសភា និងរដ្ឋសភា ដោយកំណត់ថា ថ្នាក់ដឹកនាំជាតិដែលកាន់តួនាទីជាប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញត្រូវមានសញ្ជាតិខ្មែរតែមួយ។
ប្រធានអ្នកនាំពាក្យរដ្ឋាភិបាល លោក ផៃ ស៊ីផាន បានសរសេរលើបណ្ដាញសង្គម Facebook របស់លោកនៅថ្ងៃទី៧ ខែតុលា ឆ្នាំ២០២១ ថា នៅថ្ងៃទី០៨ ខែតុលា ឆ្នាំ២០២១ គណៈរដ្ឋមន្ត្រីនៅវិមានសន្តិភាព នឹងបើកកិច្ចប្រជុំពេញអង្គដែលមានរបៀបវារៈត្រូវបានកែសម្រួល។
លោកបញ្ជាក់ថា របៀបវារៈដែលត្រូវកែតម្រូវមានសេចក្តីព្រាងច្បាប់ធម្មនុញ្ញ ស្ដីពីវិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី (មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ។
យ៉ាងណាក៏ដោយ ក្រោយពីលោក ហ៊ុន សែន បានបញ្ជាឱ្យកែរដ្ឋធម្មនុញ្ញដើម្បីកំណត់ឱ្យថ្នាក់ដឹកនាំមានសញ្ជាតិខ្មែរមួយនោះ ស្ថាប័នរដ្ឋធំៗរួមទាំងឯកជនផង បាននាំគ្នាចេញសេចក្តីប្រកាសព័ត៌មានដោយគាំទ្រជាបន្តបន្ទាប់។
ការបញ្ជាឱ្យកែរដ្ឋធម្មនុញ្ញនេះ ធ្វើឡើងបន្ទាប់ពីលោក សម រង្ស៊ី បានបង្ហោះសារនៅលើគណនី Facebook របស់លោក ចោទប្រកាន់លោកនាយករដ្ឋមន្ត្រី ហ៊ុន សែន បានទិញសញ្ជាតិ និងលិខិតឆ្លងដែនពីប្រទេស Cyprus ដើម្បីរត់ចោលប្រជាពលរដ្ឋ។
ក្រៅពីថាលោក ហ៊ុន សែន ទិញសញ្ជាតិហើយ លោក សម រង្ស៊ី ក៏បានអំពាវនាវជាថ្មីទៀតឱ្យកងកម្លាំង និងប្រជាពលរដ្ឋ ប្រឆាំងនឹងលោក ហ៊ុន សែន ដើម្បីឱ្យរបបដឹកនាំបច្ចុប្បន្នដួលរលំក្រោមហេតុផលថា ទប់ស្កាត់អំពើពុករលួយ អយុត្តិធម៌សង្គម និងរៀបចំប្រទេសឡើងវិញ៕