អ្នកវិភាគនយោបាយ និងសង្គម លើកឡើងថា របៀបនៃការទាក់ទាញសន្លឹកឆ្នោតរបស់រដ្ឋាភិបាលកម្ពុជា ផ្ទុយគ្នាដាច់ស្រឡះពីប្រទេសប្រជាធិបតេយ្យជឿនលឿន ស្របពេលដែលស្ថាប័នជាតិធំៗ ដូចជាស្ថាប័នអាជ្ញាកណ្ដាលរបស់កម្ពុជា ដែលហៅកាត់ថា គ.ជ.ប. ត្រូវគេមើលឃើញថាស្ថិតក្រោមឥទ្ធិពលនយោបាយរបស់បក្សកាន់អំណាចទាំងស្រុងសព្វថ្ងៃនេះ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានសរសេរលើគណនី Facebook របស់លោកនៅថ្ងៃទី២៤ ខែវិច្ឆិកា នេះថា វិធីសាស្ត្រក្នុងការរកសំឡេងឆ្នោតរបស់បក្សកាន់អំណាចនៅកម្ពុជាមុនរដូវកាលបោះឆ្នោតបានមកដល់ ពួកគេតែងប្រើវិធានការគាបសង្កត់ និងបង្កការលំបាកដល់សកម្មភាពបក្សប្រឆាំងគ្រប់បែបយ៉ាង ដោយលើកឡើងពីបញ្ហានេះ ឬបញ្ហានោះ ក្នុងបំណងទម្លាក់កំហុសលើគូប្រជែងនយោបាយរបស់ខ្លួន ជាពិសេសបក្សប្រឆាំងដូចដែលធ្លាប់កើតមានកន្លងមក។
បណ្ឌិត ឡៅ ម៉ុងហៃ បញ្ជាក់ថា នៅប្រទេសប្រជាធិបតេយ្យជឿនលឿន យុទ្ធសាស្ត្រក្នុងការទាក់ទាញសន្លឹកឆ្នោតពីពលរដ្ឋមុនយុទ្ធនាការបោះឆ្នោតមកដល់ គឺបក្សកាន់អំណាចតែងប្រើវិធីសាស្ត្រជាច្រើន តែមិនមែនប្រើឧបាយកលដូចនៅកម្ពុជានោះទេ។ វិធីរបស់ពួកគេ គឺរកវិធីកាត់បន្ថយពន្ធ ដំឡើងប្រាក់ចូលនិវត្តន៍ឲ្យមន្ត្រីចាស់ៗ និងបញ្ចុះតម្លៃទំនិញលើទីផ្សារ ជាដើម ដែលមិនមែនជាការបង្កើតឧបសគ្គណាមួយដល់បក្សប្រឆាំងដែលជាគូប្រជែងនយោបាយរបស់គេឡើយ។
យុទ្ធនាការបោះឆ្នោតក្រុមប្រឹក្សាឃុំ-សង្កាត់ឆ្នាំ២០២២ កំពុងតែខិតជិតចូលមកដល់ ខណៈមេដឹកនាំបក្សកាន់អំណាចនៅតែបន្តគំរាមកំហែង និងចាប់ខ្លួនមន្ត្រីបក្សប្រឆាំងឥតឈប់ឈរនាពេលបច្ចុប្បន្ននេះ។
លោក ហ៊ុន សែន កាលពីថ្ងៃអង្គារ ទី២៣ វិច្ឆិកា គំរាមថា លោកនឹងយកឈ្នះក្រុមអ្នកប្រឆាំងឱ្យបាន ហើយនឹងធ្វើឱ្យអ្នកទាំងនោះរលាយរលត់ពីផែនដី។ លើសពីនេះ លោកបញ្ជាក់ថា ដើម្បីបន្តតំណែងជានាយករដ្ឋមន្ត្រីរបស់លោកទៅថ្ងៃមុខទៀត លោកនឹងមិនឱនក្បាលចំពោះការគាបសង្កត់ណាមួយនោះឡើយ ព្រោះថាលោកនឹងនៅតែកាន់កាប់អំណាចគ្មានថ្ងៃកំណត់នោះទេ ឱ្យតែប្រជាពលរដ្ឋបោះឆ្នោតឱ្យ។
អង្គការឃ្លាំមើលសិទ្ធិមនុស្សអន្តរជាតិ Human Rights Watch ធ្លាប់បានបង្ហាញរបាយការណ៍របស់ខ្លួនកាលពីពេលកន្លងទៅថា គណបក្សកាន់អំណាចរបស់លោក ហ៊ុន សែន បានរៀបចំប្រព័ន្ធគ្រប់គ្រងតាមក្រសួងស្ថាប័ន និងអង្គភាពទាំងអស់ក្នុងជួរមន្ត្រីរាជការរបស់រដ្ឋ ដើម្បីគាបសង្កត់មន្ត្រីរាជការណាដែលមិនបោះឆ្នោតឱ្យគណបក្សខ្លួន។ ជាងនេះទៀត ពួកគេតែងដំឡើងឋានៈតួនាទីដល់មន្ត្រីណាដែលព្យាយាមបម្រើបក្សកាន់អំណាចរបស់ខ្លួនដោយស្មោះស្ម័គ្រផងដែរ។
ក្រុមអ្នកសង្កេតការណ៍លើកឡើងថា រាល់អាណត្តិនៃការបោះឆ្នោតនៅកម្ពុជា គណបក្សកាន់អំណាចតែងប្រើល្បិចបង្កើតព្រឹត្តិការណ៍គ្រប់បែបយ៉ាង ដើម្បីធ្វើប្រជាភិថុតិ ដូចជាការដំឡើងតម្លៃទំនិញលើទីផ្សារឱ្យថ្លៃកប់ពពក ប៉ុន្តែនៅពេលរដូវកាលឃោសនាបោះឆ្នោតមកដល់ លោក ហ៊ុន សែន នឹងប្រើល្បិចប្រកាសឱ្យបញ្ចុះតម្លៃទំនិញទាំងនោះ ដើម្បីទាញយកប្រជាប្រិយភាព និងសន្លឹកឆ្នោតរបស់ពលរដ្ឋ៕