33 C
Phnom Penh

ស្មារតី សម រង្ស៊ី និង កឹម សុខា ជា​មនុស្ស​តែ​មួយ​បាន​ដើរ​ដល់​ផ្លូវបំបែក ក្រោយពី​លោក សម រង្ស៊ី ចេញ​មុខ​គាំទ្រ​គណបក្ស​ភ្លើង​ទៀន

ដោយ ឌឹ ខេមបូឌា ដេលី

បទវិភាគ

ស្មារតី សម រង្ស៊ី និង កឹម សុខា ជា​មនុស្ស​តែ​មួយ គឺ​បាន​ដើរ​ដល់​ផ្លូវបំបែក​ហើយ បន្ទាប់ពី​អតីត​មេដឹកនាំ​បក្ស​ប្រឆាំង លោក សម រង្ស៊ី ចេញ​មុខ​គាំទ្រ​គណបក្ស​ភ្លើង​ទៀន។

ប្រធាន​គណបក្ស​សង្គ្រោះ​ជាតិ លោក កឹម សុខា ចោទ​ថា សកម្មភាព​របស់​លោក សម រង្ស៊ី ដែល​គាំទ្រ​គណបក្ស​ភ្លើង​ទៀន និង​សកម្មភាព​មួយ​ចំនួន​ផ្សេង​ទៀត​កន្លងមក គឺជា​ការ​បំពាន​លើ​រូបលោក និង​ដើម្បី​សម្រេច​មហិច្ឆតា​នយោបាយ​របស់​ខ្លួន​ប៉ុណ្ណោះ។

លោក កឹម សុខា បាន​សរសេរ​លើ​ទំព័រ Facebook របស់​លោក​កាលពី​ថ្ងៃ​ទី​២៨ ខែ​វិច្ឆិកា ថា សកម្មភាព​នយោបាយ​របស់​អតីត​មេដឹកនាំ​ប្រឆាំង លោក សម រង្ស៊ី មិន​ដែល​ចាត់ទុក​ស្មារតី សម រង្ស៊ី និង កឹម សុខា ជា​មនុស្ស​តែ​មួយ​នោះ​ទេ ព្រោះ​សកម្មភាព​ទាំងនេះ​មិន​មាន​ការ​គាំទ្រ​ពី​រូបលោក ហើយ​ក៏​មិន​បាន​គាំទ្រ​នូវ​ជំហរ​របស់​លោក​ក្នុង​នាម​ជា​ប្រធាន​គណបក្ស​សង្គ្រោះ​ជាតិ​នោះ​ដែរ។

លោក កឹម សុខា បញ្ជាក់​ថា លោក សម រង្ស៊ី បាន​ដើរ​ចេញពី​គោលការណ៍ និង​ស្មារតី​ដើម​របស់​គណបក្ស​សង្គ្រោះ​ជាតិ បន្ទាប់ពី​អតីត​មេដឹកនាំ​បក្ស​ប្រឆាំង​រូប​នេះ​បាន​បង្ហាញ​ជំហរ​គាំទ្រ​គណបក្ស​ភ្លើង​ទៀន ដែល​ជា​គណបក្ស​ចាស់​របស់​ខ្លួន​កាលពី​ពេល​ថ្មីៗ​នេះ។

លោក កឹម សុខា បាន​ទាមទារ និង​អំពាវនាវ​ឱ្យ​លោក សម រង្ស៊ី និង​សហការី​បញ្ឈប់​ការ​យក​រូបលោក​ទៅ​ប្រើប្រាស់​ដើម្បី​កេង​ចំណេញ​នយោបាយ​ផ្ទាល់ខ្លួន និង​ធ្វើ​ឲ្យ​សាធារណមតិ​ជាតិ និង​អន្តរជាតិ​មាន​ការ​ភ័ន្ត​ច្រឡំ​បន្ត​ទៀត។

ប៉ុន្តែ​អតីត​ប្រធាន​គណបក្ស​ប្រឆាំង លោក សម រង្ស៊ី បាន​សរសេរ​លើ​ទំព័រ Facebook របស់​ខ្លួន​នៅ​ថ្ងៃ​ទី​២៩ វិច្ឆិកា នេះ​ថា សេចក្តី​ថ្លែងការណ៍​របស់​ប្រធាន​គណបក្ស​សង្គ្រោះ​ជាតិ លោក កឹម សុខា គឺជា​លទ្ធផល​នៃ​ការ​គំរាមកំហែង​ពី​លោក ហ៊ុន សែន ដែល​ភ័យខ្លាច​ចំពោះ​ការ​ឯកភាព​នៃ​អ្នក​ប្រជាធិបតេយ្យ​ខ្មែរ ហើយ​ចាប់​យក​លោក កឹម សុខា ធ្វើជា​ចំណាប់ខ្មាំង​ប៉ុណ្ណោះ។

ជុំវិញ​ការ​ប្រកាស​ចែក​ផ្លូវ​គ្នា​រវាង​មេដឹកនាំ​កំពូល​របស់​គណបក្ស​សង្គ្រោះ​ជាតិ លោក សម រង្ស៊ី និង​លោក កឹម សុខា នេះ ត្រូវ​បាន​មន្ត្រី​ជាន់ខ្ពស់​បក្ស​នេះ និង​ក្រុម​អ្នក​ឃ្លាំមើល​សង្គម​នាំគ្នា​បញ្ចេញ​ប្រតិកម្ម និង​ទស្សនៈ​របស់​ពួកគេ​រៀងៗ​ខ្លួន​ព្រោងព្រាត​លើ​បណ្ដាញ​សង្គម Facebook។

បណ្ឌិត សេង សារី

អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត សេង សារី បាន​សរសេរ​លើ​គណនី Facebook របស់​លោក​នៅ​ថ្ងៃ​ទី​២៩ វិច្ឆិកា នេះ​ថា លោក កឹម សុខា ជា​មេ​បក្ស​ចម្លែក ព្រោះ​ថា​បើ​គាត់​មិន​ចង់​ឲ្យ​សហការី សកម្មជន និង​អ្នកគាំទ្រ​ប្រើ​រូប​និង​ឈ្មោះ​របស់​គាត់​ក្នុង​បុព្វហេតុ​នៃ​ការ​តស៊ូ​នយោបាយ​របស់​គណបក្ស​សង្គ្រោះ​ជាតិ ចុះ​ហេតុ​អ្វី​បាន​ជា​គាត់​មិន​លាលែង​តំណែង​ពី​ប្រធាន​គណបក្ស?

ប៉ុន្តែ​សហ​មេធាវី​ការពារ​ក្តី​ឱ្យ​ប្រធាន​គណបក្ស​សង្គ្រោះ​ជាតិ អ្នកស្រី ម៉េង សុភារី បាន​សរសេរ​លើ​គណនី Facebook របស់​អ្នកស្រី​នៅ​ថ្ងៃ​ទី​២៩ វិច្ឆិកា នេះ​ដែរ​ថា លោក កឹម សុខា មិន​មាន​កំហុស​នោះ​ទេ​ក្នុង​ការ​ប្រើ​សិទ្ធិ​ការពារ​ខ្លួន​របស់​គាត់ ដើម្បី​កុំ​ឱ្យ​ពាក់ព័ន្ធ និង​ទទួល​ខុសត្រូវ​ចំពោះ​សកម្មភាព​ដែល​លោក សម រង្ស៊ី តែង​ប្រព្រឹត្ត​ដោយ​គ្មាន​ការ​ឯកភាព​ពី​រូបលោក ដូច​ដែល​អតីត​មេដឹកនាំ​បក្ស​ប្រឆាំង​រូប​នោះ​ធ្លាប់​បាន​ធ្វើ​កន្លងមក។

មេធាវី​ការពារ​ក្តី​នៅ​កម្ពុជា អ្នកស្រី ម៉េង សុភារី

អ្នកស្រី ម៉េង សុភារី បញ្ជាក់​ថា ខ្លឹមសារ​អត្ថបទ​របស់​មេដឹកនាំ​បក្ស​ប្រឆាំង លោក កឹម សុខា មិន​មែន​ជា​ការ​ប្រកាស​បំបែក​ព្រលឹង​គណបក្ស​សង្គ្រោះ​ជាតិ​នោះ​ទេ គ្រាន់តែ​លើកឡើង​ពី​ការពិត​តែប៉ុណ្ណោះ។ មេធាវី​រូប​នេះ​អះអាង​ថា នៅ​ពេល​ដែល​គណបក្ស​ភ្លើង​ទៀន ចាប់ផ្តើម​ដំណើរការ​ជា​ផ្លូវការ​ឡើងវិញ​ជា​ឯកតោភាគី​ដោយ​មាន​ការ​ជ្រោមជ្រែង​ពី​លោក សម រង្ស៊ី និង​គ្មាន​ការ​ឯកភាព​ពី​លោក កឹម សុខា បែប​នេះ គឺ​បាន​បង្ហាញ​ឲ្យ​ឃើញ​កាន់តែ​ច្បាស់​ថា លោក សម រង្ស៊ី បាន​សម្រេច​ចិត្ត​បែក​ចេញពី​ស្មារតី​រួបរួម​ជាមួយ​នឹង​លោក កឹម សុខា ហើយ។

មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ លោក មុត ចន្ថា ក៏​បាន​សរសេរ​នៅ​លើ​គណនី​ហ្វេសប៊ុក​របស់​លោក​ថា ការ​ប្រកាស​ឱ្យ​លោក សម រង្ស៊ី បញ្ឈប់​យក​រូប​ប្រធាន​គណបក្ស​សង្គ្រោះ​ជាតិ ទៅ​ប្រើ​ក្នុង​ចេតនា​កេង​ចំណេញ​នយោបាយ​បុគ្គល​ពី​សំណាក់​លោក កឹម សុខា គឺជា​រឿង​ត្រឹមត្រូវ ព្រោះ​ថា​កិច្ចព្រមព្រៀង​បង្កើត​សម្ពន្ធភាព​រវាង សម រង្ស៊ី និង កឹម សុខា នឹង​ត្រូវ​បញ្ចប់​ទៅវិញ​នៅ​ពេល​ដែល​លោក សម រង្ស៊ី បាន​ងាក​ចេញ​ទៅ​ចង​សម្ពន្ធភាព​ជាមួយ​គណបក្ស​នយោបាយ​ផ្សេង ឬ​ធ្វើ​សកម្មភាព​នយោបាយ​ផ្ទុយពី​ស្មារតី​ដើម​ដូច​ដែល​លោក សម រង្ស៊ី សម្រេច​ចិត្ត​គាំទ្រ​គណបក្ស​ភ្លើង​ទៀន​នៅ​ពេលនេះ។

ដោយឡែក​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា បាន​បញ្ចេញ​ទស្សនៈ​លើ​បញ្ហា​នេះ ដោយ​ចោទ​ជា​សំណួរ​ថា តើ​លោក ហ៊ុន សែន និង​លោក សម រង្ស៊ី ជា​មនុស្ស​តែ​មួយ ឬ​ក៏​លោក សម រង្ស៊ី និង​លោក កឹម សុខា ជា​មនុស្ស​តែ​មួយ? ព្រោះ​ថា​លោក កឹម សុខា នៅតែ​ចង់​រក្សា​ស្មារតី​ដើម​របស់​សង្គ្រោះ​ជាតិ ចំណែក​ឯ​មេដឹកនាំ​បក្ស​កាន់​អំណាច លោក ហ៊ុន សែន ចង់​ឱ្យ​ជំហរ​គណបក្ស​ប្រឆាំង​រលាយ​សាបសូន្យ ខណៈ​លោក សម រង្ស៊ី ប្រកាស​ជំហរ​គាំទ្រ​បើក​ផ្លូវ​នយោបាយ​ឱ្យ​គណបក្ស​ភ្លើង​ទៀន​នៅ​ពេលនេះ ដែល​ជា​ការ​បំបែក​ព្រលឹង និង​រំលាយ​ស្មារតី​រួម​របស់​គណបក្ស​សង្គ្រោះ​ជាតិ​ទាំងស្រុង។

លោក មាជ សុវណ្ណារ៉ា

សកម្មភាព​អតីត​មេដឹកនាំ​បក្ស​ប្រឆាំង លោក សម រង្ស៊ី ដែល​ដឹកនាំ​ចលនា​ខុស​ពី​ជំហរ​របស់​មេដឹកនាំ​គណបក្ស​សង្គ្រោះ​ជាតិ លោក កឹម សុខា មិន​មែន​ជា​លើក​ទី​មួយ​នោះ​ទេ។

កាលពី​ដើម​ខែ​ធ្នូ ឆ្នាំ​២០១៨ កន្លងទៅ អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី បាន​រៀបចំ​សមាជ​លើក​ទី​២ នៅ​សហរដ្ឋ​អាមេរិក ទីក្រុង​អាតាឡង់តា និង​ប្រកាស​តែងតាំង​ខ្លួនឯង​ជា​ប្រធាន​ស្តីទី​របស់​គណបក្ស​សង្គ្រោះ​ជាតិ និង​បង្កើត​ឱ្យ​មាន​គណបក្ស​សង្គ្រោះ​ជាតិ ប្រចាំ​សហរដ្ឋ​អាមេរិក (CNRP-A) និង​គណបក្ស​សង្គ្រោះ​ជាតិ​ក្រៅ​ប្រទេស (CNRP-O) ដែល​មិនមែន​ជា​ជំហរ​របស់​មេដឹកនាំ​បក្ស​ប្រឆាំង លោក កឹម សុខា នោះ​ឡើយ។

ប្រធាន​គណបក្ស​សង្គ្រោះ​ជាតិ លោក កឹម សុខា ធ្លាប់​បាន​បដិសេធ​ទៅ​នឹង​សកម្មភាព​បំពាន​ច្បាប់ និង​រំលោភ​លក្ខន្តិកៈ​របស់​លោក សម រង្ស៊ី ម្តង​ហើយ​ម្តង​ទៀត​តាមរយៈ​អតីត​នាយក​ខុទ្ទកាល័យ​របស់​លោក កាលពី​ពេល​កន្លង​ទៅ​ថា ផ្អែក​លើ​ស្មារតី​រួម​របស់​គណបក្ស​សង្គ្រោះ​ជាតិ កាលពី​ឆ្នាំ​២០១២ គឺ​រាល់​សកម្មភាព​នយោបាយ​ទាំងអស់​របស់​បក្ស​ប្រឆាំង ត្រូវតែ​មាន​ការ​ឯកភាព​ពី​មេដឹកនាំ​កំពូល​ទាំង​ពីរ​ជា​ផ្លូវការ ទើប​ចាត់ទុក​ជា​សកម្មភាព​នយោបាយ​ដែល​ស្រប​ច្បាប់​របស់​គណបក្ស​សង្គ្រោះ​ជាតិ។

ទោះ​ជា​បែប​នេះ​ក្តី ចាប់តាំង​ពី​គណបក្ស​សង្គ្រោះ​ជាតិ ត្រូវ​បាន​រំលាយ​កាលពី​ចុង​ឆ្នាំ​២០១៧ មក គេ​សង្កេត​ឃើញ​ថា អតីត​មេដឹកនាំ​បក្ស​ប្រឆាំង លោក សម រង្ស៊ី បាន​ព្យាយាម​បង្កើត​អង្គការ​ចាត់តាំង និង​ព្រឹត្តិការណ៍​នយោបាយ​ធំៗ​ដែល​រំលោភ​លើ​លក្ខន្តិកៈ​គណបក្ស រំលោភ​លើ​រដ្ឋធម្មនុញ្ញ និង​បំពាន​លើ​កិច្ចព្រមព្រៀង​សន្តិភាព​ទីក្រុង​ប៉ារីស ឆ្នាំ​១៩៩១ ជាច្រើន​លើក​ច្រើនសា ដោយ​ប្រើ​គណបក្ស​សង្គ្រោះ​ជាតិ​ជា​ឧបករណ៍​រហូត​មក ដូចជា​ការ​ប្រកាស​ធ្វើ​មាតុភូមិ​និវត្តន៍​ផ្ដួល​រំលំ​រដ្ឋាភិបាល​លោក ហ៊ុន សែន ក្នុង​ព្រឹត្តិការណ៍ ៩ វិច្ឆិកា ឆ្នាំ​២០១៩ និង​ការ​ប្រកាស​បង្កើត​រដ្ឋាភិបាល​ក្រៅ​ប្រទេស​កាលពី​ពេល​ថ្មីៗ​នេះ ជាដើម។

ជុំវិញ​បញ្ហា​នេះ កាលពី​ថ្ងៃ​ទី​២៦ ខែ​វិច្ឆិកា ឆ្នាំ​២០២១ កន្លងទៅ​នេះ គណបក្ស​សង្គ្រោះ​ជាតិ​ប្រចាំ​សហរដ្ឋ​អាមេរិក ឬ CNRP USA បាន​ចេញ​សេចក្តី​ថ្លែងការណ៍​របស់​ខ្លួន​ថា លោក សម រង្ស៊ី និង​សហការី​របស់​គាត់ នៅតែ​បន្ត​កុហក​អ្នកគាំទ្រ​របស់​ខ្លួន​ថា សម រង្ស៊ី និង កឹម សុខា ជា​មនុស្ស​តែ​មួយ ដើម្បី​បំភ័ន្ត និង​បិទបាំង​ទង្វើ​ទុច្ចរិត​របស់​ខ្លួន​ក្នុង​ការ​កេង​ចំណេញ​ផល​ប្រយោជន៍​ផ្ទាល់ខ្លួន និង​បក្ខពួក​កាន់តែ​ខ្លាំង​ឡើងៗ​ក្នុង​ពេល​បច្ចុប្បន្ន​នេះ។

ប្រភព​ដដែល​រិះគន់​ថា លោក សម រង្ស៊ី និង​សហការី​របស់​គាត់ បាន​នាំគ្នា​ចាកចេញ​ទៅ​បង្កើត​ចលនា​ខុស​ច្បាប់​ជាច្រើន​លើក​ច្រើនសា។ បន្ថែម​ពី​នេះ ក៏​បាន​ប្រកាស​គាំទ្រ​គណបក្ស​នយោបាយ​ផ្សេង​ដែល​បញ្ជាក់​ឲ្យ​ឃើញ​កាន់តែ​ច្បាស់​នូវ​ទង្វើ​ប្រាសចាក និង​ដើរ​ផ្ទុយពី​ស្មារតី​ដើម​នៃ​ការ​រួបរួម​ជាមួយ​ប្រធាន​គណបក្ស​សង្គ្រោះ​ជាតិ លោក កឹម សុខា ទាំងស្រុង។

ដោយសារតែ​មើលឃើញ​ការ​ដឹកនាំ​របស់​អតីត​មេដឹកនាំ​បក្ស​ប្រឆាំង លោក សម រង្ស៊ី ងាក​ចេញពី​ស្មារតី​ដើម​របស់​គណបក្ស​សង្គ្រោះ​ជាតិ​បែប​នេះ អនុប្រធាន​គណបក្ស​សង្គ្រោះ​ជាតិ លោក យ៉ង់ ប្រេឌី ណុយ អគ្គ​ជំនួយការ​ជាន់ខ្ពស់​ទី​១ របស់​គណបក្ស​សង្គ្រោះ​ជាតិ អ្នកស្រី Nalen Smith ដែល​សុទ្ធសឹងតែ​ជា​មន្ត្រី​ជាន់ខ្ពស់​ភាគី​លោក សម រង្ស៊ី ប្រចាំ​សហរដ្ឋ​អាមេរិក (CNRP-A) និង​អនុប្រធាន​បក្ស​ប្រឆាំង​ប្រចាំ​សហគមន៍​អឺរ៉ុប (CNRP-O) លោក ឡោ ឡៃសូ ជាដើម បាន​នាំគ្នា​ដាក់​ពាក្យ​លាលែង​ពី​តំណែង​ជាបន្តបន្ទាប់​កាលពី​អំឡុង​ខែ​សីហា ឆ្នាំ​២០២១ កន្លងទៅ។

ចំណែក​អតីត​អគ្គលេខាធិការ​នៃ CNRP-O លោក ប៉ុន សៅរី កាលពី​ចុង​ខែ​មិថុនា ឆ្នាំ​២០២១ ធ្លាប់​បាន​រិះគន់​យ៉ាង​ចាស់ដៃ​ដែរ​ថា សកម្មជន​នៅ​មូលដ្ឋាន​ដែល​បាន​តស៊ូ​លះបង់​ដើម្បី​ស្ដារ​លទ្ធិប្រជាធិបតេយ្យ​កន្លងមក បាន​ផ្តល់​ក្តី​សង្ឃឹម​ទៅលើ​គណបក្ស​សង្គ្រោះ​ជាតិ​តែ​មួយ​ប៉ុណ្ណោះ ប៉ុន្តែ​មន្ត្រី​បក្ស​ប្រឆាំង​ដែល​ចេញ​ទៅ​បង្កើត​បក្ស​ថ្មី​មិន​ដឹង​ខ្លួន​ទេ​ថា ទង្វើ​របស់​ពួកគេ​ក្នុង​ពេលនេះ គឺជា​ការ​ចូលរួម​ជាមួយ​លោក ហ៊ុន សែន ក្នុង​ការ​បំផ្លាញ និង​រំលាយ​គណបក្ស​សង្គ្រោះ​ជាតិ​យ៉ាង​ពេញ​ទំហឹង។

ការ​លាលែង​ពី​តួនាទី និង​ប្រកាស​ឈប់​គាំទ្រ​លោក សម រង្ស៊ី ពី​សំណាក់​មន្ត្រី​ជាន់ខ្ពស់​នៅ​ក្រៅ​ស្រុក​ទាំងនោះ គឺ​ដោយសារតែ​ពួកគេ​មិន​ស្រប​ទៅ​នឹង​សកម្មភាព​នយោបាយ​របស់​លោក សម រង្ស៊ី ដែល​ងាក​ចេញពី​ស្មារតី​គណបក្ស​សង្គ្រោះ​ជាតិ ទៅ​គាំទ្រ​គណបក្ស​ចាស់​របស់​ខ្លួន គឺ​គណបក្ស​ភ្លើង​ទៀន ដែល​ទើប​នឹង​ធ្វើ​សមាជ​ជា​ផ្លូវការ​កាលពី​ថ្ងៃ​ទី​២៧ ខែ​វិច្ឆិកា ឆ្នាំ​២០២១ កន្លងទៅ​នេះ។

គណបក្ស​សង្គ្រោះ​ជាតិ ត្រូវ​បាន​បង្កើត​ឡើង​កាលពី​ថ្ងៃ​ទី​១៧ ខែ​កក្កដា ឆ្នាំ​២០១២ នៅ​ក្នុង​ទីក្រុង​ម៉ានីល ប្រទេស​ហ្វីលីពីន ដោយ​ការ​ច្របាច់​បញ្ចូល​គ្នា​រវាង​គណបក្ស​សិទ្ធិមនុស្ស របស់​លោក កឹម សុខា និង​គណបក្ស សម រង្ស៊ី របស់​លោក សម រង្ស៊ី ដែល​បាន​ប្តូរ​ទៅជា​គណបក្ស​ភ្លើង​ទៀន​ក្នុង​ពេល​បច្ចុប្បន្ន​នេះ។

មេដឹកនាំ​គណបក្ស​សង្គ្រោះ​ជាតិ លោក កឹម សុខា និង​លោក សម រង្ស៊ី

គិត​ចាប់ពី​ថ្ងៃ​ទី​១៧ ខែ​កក្កដា ឆ្នាំ​២០១២ ដល់​ថ្ងៃ​ទី​១៦ ខែ​វិច្ឆិកា ឆ្នាំ​២០១៧ គណបក្ស​សង្គ្រោះ​ជាតិ គឺ​មាន​អាយុ​ជិត ៥​ឆ្នាំ​កន្លះ​ហើយ ប៉ុន្តែ​ត្រូវ​តុលាការ​កំពូល​ប្រកាស​រំលាយ​ទាំង​អយុត្តិធម៌​ពី​បទ​ក្បត់​ជាតិ និង​បាន​បំបិទ​សិទ្ធិ​នយោបាយ​ប្រធាន​បក្ស​ប្រឆាំង លោក កឹម សុខា រហូត​មក​ទល់នឹង​ពេលនេះ។ កាលពី​ចុង​ឆ្នាំ​២០២០ លោក សម រង្ស៊ី ធ្លាប់​បាន​អះអាង​ដែរ​ថា មន្ត្រី​បក្ស​ប្រឆាំង​ដែល​បាន​សុំ​សិទ្ធិ​ធ្វើ​នយោបាយ​ឡើងវិញ ហើយ​នាំគ្នា​ទៅ​បង្កើត​បក្ស​ថ្មី គឺជា​ការ​ចាញ់បោក និង​លក់​ខ្លួន​ឲ្យ​លោក ហ៊ុន សែន តែប៉ុណ្ណោះ។

យ៉ាងណាក៏ដោយ ក្នុង​រយៈពេល​ចុងក្រោយ​នេះ អតីត​មេដឹកនាំ​បក្ស​ប្រឆាំង លោក សម រង្ស៊ី ត្រូវ​គេ​មើល​ឃើញ​ថា ហាក់​លែង​មាន​ភាព​អត់ធ្មត់ និង​ទាមទារ​ការ​រស់​ឡើងវិញ​នៃ​គណបក្ស​សង្គ្រោះ​ជាតិ​ទៀត​ហើយ ស្រប​ពេល​ដែល​គណបក្ស​ចាស់​របស់​លោក​កំពុង​រៀបចំ​កំណែ​ទម្រង់​ថ្មី ដែល​គេ​សង្ស័យ​ថា​ជា​ការ​រៀបចំ​របស់​លោក សម រង្ស៊ី ដើម្បី​ចូលរួម​ការ​បោះឆ្នោត​ឃុំ-សង្កាត់​ឆ្នាំ​២០២២ នៅ​ពេល​ខាងមុខ​នេះ។

អតីត​ប្រធាន​ចលនា​គណបក្ស​សង្គ្រោះ​ជាតិ ប្រទេស​កូរ៉េ​ខាងត្បូង លោក យឹម ស៊ីណន (ឆ្វេង)

អតីត​ប្រធាន​ចលនា​យុវជន​សង្គ្រោះ​ជាតិ​ក្នុង​ប្រទេស​កូរ៉េ​ខាងត្បូង លោក យឹម ស៊ីណន បាន​សរសេរ​នៅ​លើ​គណនី​ហ្វេសប៊ុក​របស់​លោក​រិះគន់​លោក សម រង្ស៊ី ដែល​យក​រូបថត​សម្តេច​ក្រុមព្រះ នរោត្តម រណឫទ្ធិ និង​លោក កឹម សុខា ផុស​ប្រៀប​ផ្ទឹម​គ្នា គឺ​កំពុង​រំឭក​នូវ​ប្រវត្តិសាស្ត្រ​ចាស់​ដ៏​សែន​ឈឺចាប់​បំផុត​ឲ្យ​មហាជន​បាន​ដឹង។

លោក យឹម ស៊ីណន ចោទ​ជា​សំណួរ​ថា តើ​លោក សម រង្ស៊ី បាន​ធ្វើ​យ៉ាង​ណា​ចំពោះ​លោក​ទាំង​ពីរ?

  • សម្រាប់​គណបក្ស​ហ៊្វុនស៊ិនប៉ិច សម្តេច​ក្រុមព្រះ​លើក​តម្កើង​លោក សម រង្ស៊ី រហូត​ដល់​ជា​សមាជិក​ឧត្ដមក្រុមប្រឹក្សា​ជាតិ និង​ផ្តល់​តំណែង​ដល់​ទេសរដ្ឋមន្ត្រី និង​ជា​រដ្ឋមន្ត្រី​ក្រសួង​ហិរញ្ញវត្ថុ។ ទោះ​ខុសត្រូវ​យ៉ាង​ណា លោក សម រង្ស៊ី គួរ​ខិតខំ​ផ្សះផ្សា​ពង្រឹង​សាមគ្គី​ផ្ទៃក្នុង​គណបក្ស​ដឹកនាំ​ប្រទេស​ជាតិ បម្រើ​ម្ចាស់​ឆ្នោត​នៅ​ទូទាំង​ប្រទេស។ ប៉ុន្តែ​លោក សម រង្ស៊ី បែរជា​ដោយសារ​គំនុំ​បុគ្គល​ជា​ធំ ក្បត់​មេ ទៅ​បង្កើត​គណបក្ស​ជាតិ​ខ្មែរ បំបែក​ហ៊្វុនស៊ិនប៉ិច ក្បត់​រាស្រ្ត​ម្ចាស់​ឆ្នោត​ឆ្នាំ​១៩៩៣។
  • សម្រាប់​គណបក្ស​សង្គ្រោះ​ជាតិ​វិញ ខណៈ​លោក កឹម សុខា កំពុង​ជាប់​ឃុំឃាំង ហើយ​គណបក្ស​ប្រឈម​នឹង​ការ​រំលាយ លោក សម រង្ស៊ី បែរជា​នាំគ្នា​រត់​ចោល​ស្រុក បោះបង់​ចោល​សមរភូមិ។ លុះ​មាន​ការ​រំលាយ​គណបក្ស​ហើយ ក៏​នាំគ្នា​ប្រើ​យុទ្ធសាស្ត្រ ដេក​ផ្ទះ ឈ្នះ​ឯង​ទៀត ដែល​ជួយ​ឱ្យ​បោះឆ្នោត​ដែល​គ្មាន​គណបក្ស​សង្គ្រោះ​ជាតិ ឆ្នាំ​២០១៨ ប្រព្រឹត្តិ​ទៅ​យ៉ាង​រលូន។
  • ចំណែក​ឯ​មាតុភូមិ​និវត្តន៍ ៩ វិច្ឆិកា ប្រមាថ​ព្រះមហាក្សត្រ បំបះបំបោរ​យោធា គឺជា​ការ​បង្កើត​សោកនាដកម្ម​ដល់​បណ្តា​អ្នក​ប្រជាធិបតេយ្យ​ទាំងមូល។ នៅ​ទីបំផុត លោក សម រង្ស៊ី នាំ​គ្នីគ្នា​ត្រឡប់​ទៅ​ផ្ទះ​ចាស់ (គណបក្ស​ភ្លើង​ទៀន) ក្បត់​សង្គ្រោះ​ជាតិ ក្បត់​ប្រធាន​បក្ស (លោក កឹម សុខា) ក្បត់​សមាជិក​សមាជិកា និង​ក្បត់​ឆន្ទៈ​រាស្រ្ត​ម្ចាស់​ឆ្នោត​ឆ្នាំ​២០១៣ ដែល​គាំទ្រ​ភ្លូក​ទឹក​ភ្លូក​ដី​មាន​អ្នកគាំទ្រ​ខ្លះ​លក់​ទាំង​មាន់​ទា​ជ្រូក ខ្លះ​រហូត​លក់​ដល់​ឆ្កែ​ទៀត​ផង។

លោក យឹម ស៊ីណន បន្ត​ថា សូម​កុំ​និយាយ​ថា លោក សម រង្ស៊ី ជា​អ្នក​បង្រួបបង្រួម​អ្នក​ប្រជាធិបតេយ្យ​ឱ្យ​សោះ ធាតុ​ពិត សម រង្ស៊ី នេះ​ឯង​ដែល​ជា​អ្នក​បំផ្លាញ​បក្ស​អ្នក​ប្រជាធិបតេយ្យ​ធំ​បំផុត​ទាំង​នៅ​គណបក្ស​ហ៊្វុនស៊ិនប៉ិច ហើយ​ថ្មីៗ​ចុងក្រោយ​នេះ គឺ​នៅ​គណបក្ស​សង្គ្រោះ​ជាតិ​តែម្តង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស