29 C
Phnom Penh

កូនស្រី​ច្បង​លោក កឹម សុខា៖ លោក សម រង្ស៊ី មិន​ស័ក្ដិសម​ជា​មេដឹកនាំ​ចលនា​ប្រឆាំង​នោះ​ទេ

ដោយ ឌឹ ខេមបូឌា ដេលី

បទវិភាគ

កូនស្រី​ច្បង​របស់​លោក កឹម សុខា គឺ​កញ្ញា កឹម មនោវិទ្យា ចាត់ទុក​ថា សកម្មភាព​របស់​អតីត​ប្រធាន​បក្ស​ប្រឆាំង លោក សម រង្ស៊ី កន្លងមក​គ្រាន់តែ​ជា​ទង្វើ​របស់​ពលរដ្ឋ​សាមញ្ញ​ម្នាក់​ប៉ុណ្ណោះ មិន​ស័ក្ដិសម​ជា​មេដឹកនាំ​ចលនា​ប្រឆាំង​នោះ​ទេ។ បន្ថែម​ពី​នេះ លោក សម រង្ស៊ី គ្រាន់តែ​ធ្វើ​សកម្មភាព​ក្នុង​រូបភាព​នយោបាយ ដើម្បី​ប្រមូល​ស្រោមសំបុត្រ​ពី​អ្នកគាំទ្រ​ប៉ុណ្ណោះ។

កូនស្រី​ច្បង​ប្រធាន​គណបក្ស​សង្គ្រោះ​ជាតិ កញ្ញា កឹម មនោវិទ្យា បាន​សរសេរ​លើ​ទំព័រ Facebook របស់​ខ្លួន​កាលពី​ថ្ងៃ​ទី​៦ ខែ​ធ្នូ ឆ្នាំ​២០២១ នេះ​ថា នៅ​ពេល​ដែល​គណបក្ស​សង្គ្រោះ​ជាតិ​ជួប​គ្រោះថ្នាក់ លោក សម រង្ស៊ី គ្មាន​សមត្ថភាព​ក្នុង​ការ​ដឹកនាំ​តស៊ូ​មតិ​ដើម្បី​ទាមទារ​យុត្តិធម៌​ជូន​គណបក្ស និង​មន្ត្រី​ជាន់ខ្ពស់​របស់​ខ្លួន​ទាល់តែសោះ ប៉ុន្តែ​គាត់​បែរជា​និយាយ​ដោយ​គ្មាន​ភាព​ខ្មាសអៀន​ថា ខ្លួន​ជា​អ្នក​ដឹកនាំ​ការ​តស៊ូ​មតិ​ដើម្បី​គណបក្ស​ទៅវិញ។

មេដឹកនាំ​គណបក្ស​សង្គ្រោះ​ជាតិ លោក កឹម សុខា និង​លោក សម រង្ស៊ី

នៅ​ថ្ងៃ​ទី​៧ ខែ​ធ្នូ ឆ្នាំ​២០២១ មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មុត ចន្ថា បាន​សរសេរ​លើ​គណនី Facebook របស់​លោក​ថា លោក សម រង្ស៉ី មិន​បាន​ធ្វើ​នយោបាយ​ការទូត​ដូច​ដែល​គាត់​បាន​អួត​នោះ​ទេ ប៉ុន្តែ​គាត់​ពូកែ​ខាង​ដើរ​ប្រជុំ​ប្រមូល​ស្រោមសំបុត្រ និង​បង្កើត​ព្រឹត្តិការណ៍ និង​កម្មវិធី​ប្រមូល​លុយ​ប៉ុណ្ណោះ។

លោក មុត ចន្ថា អះអាង​ថា ផែនការ​ប្រមូល​លុយ​លើក​ទី​មួយ​របស់​លោក សម រង្ស៊ី គឺ​ផែនការ​មាតុភូមិ​និវត្តន៍ ៩ វិច្ឆិកា ឆ្នាំ​២០១៩ ដែល​ទទួល​បាន​លុយ​ដល់​ទៅ ៣០​ម៉ឺន​ដុល្លារ​អាមេរិក ចំណែក​ផែនការ​មាតុភូមិ​និវត្តន៍​លើ​ទី​ពីរ​នៅ​ដើម​ខែ​ឧសភា ឆ្នាំ​២០២១ រៃអង្គាស​លុយ​បាន​ជាង ២០​ម៉ឺន​ដុល្លារ​អាមេរិក និង​ផែនការ​ចុងក្រោយ គឺ​ការ​លក់​ប័ណ្ណ​នាឡិកា​ដៃ​ម៉ាក​កាស្យូ (Casio) ទទួល​លុយ​បាន​ជាង ២៥​ម៉ឺន​ដុល្លារ​ផង​ដែរ។

មន្ត្រី​ជាន់ខ្ពស់​គណបក្ស​ប្រឆាំង​រូប​នេះ​បញ្ជាក់​ថា ការ​ធ្វើ​ដំណើរ​ទៅកាន់​សហរដ្ឋ​អាមេរិក​របស់​លោក សម រង្ស៉ី គឺ​បាន​ជួប​ត្រឹមតែ​តំណាងរាស្ត្រ​អាមេរិក ២​រូប គឺ​លោក Alan LOWENTHAL និង​លោក Steve CHABOT ក្រៅពី​នោះ លោក សម រង្ស៊ី ស្កាត់​ជួប​អ្នកគាំទ្រ​របស់​ខ្លួន​ដើម្បី​ប្រមូល​ស្រោមសំបុត្រ​ប៉ុណ្ណោះ។

លោក មុត ចន្ថា គូសបញ្ជាក់​ថា មន្ត្រី​របស់​សហភាព​អឺរ៉ុប និង​រដ្ឋាភិបាល​អឺរ៉ុប មិន​អនុញ្ញាត​ឱ្យ​លោក សម រង្ស៉ី ជួប​ទេ ដោយសារ​អំពើ​ខុសច្បាប់​ជាច្រើន​របស់​គាត់ ដូចជា​ការ​ប្រកាស​ធ្វើ​មាតុភូមិ​និវត្តន៍​ដើម្បី​ផ្ដួល​រំលំ​រដ្ឋាភិបាល​កម្ពុជា កាលពី​ឆ្នាំ​២០១៩ និង​ការ​ប្រកាស​បង្កើត​រដ្ឋាភិបាល​ក្រៅ​ប្រទេស​កាលពី​ពេល​ថ្មីៗ​នេះ ជាដើម។

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មុត ចន្ថា និង​អតីត​មេដឹកនាំ​គណបក្ស​សង្គ្រោះ​ជាតិ លោក សម រង្ស៊ី

ទាក់ទិន​នឹង​បញ្ហា​នេះ កាលពី​ថ្ងៃ​ទី​២៨ ខែ​វិច្ឆិកា ឆ្នាំ​២០២១ ប្រធាន​គណបក្ស​សង្គ្រោះ​ជាតិ លោក កឹម សុខា បាន​សរសេរ​លើ​ទំព័រ Facebook របស់​លោក​ថា សកម្មភាព​នយោបាយ​របស់​អតីត​មេដឹកនាំ​ប្រឆាំង លោក សម រង្ស៊ី មិន​ដែល​ចាត់ទុក​ស្មារតី «សម រង្ស៊ី និង កឹម សុខា ជា​មនុស្ស​តែ​មួយ» នោះ​ទេ ព្រោះ​សកម្មភាព​ទាំងនោះ​មិន​មាន​ការ​គាំទ្រ​ពី​រូបលោក ហើយ​ក៏​មិន​បាន​គាំទ្រ​នូវ​ជំហរ​របស់​លោក​ក្នុង​នាម​ជា​ប្រធាន​គណបក្ស​សង្គ្រោះ​ជាតិ​នោះ​ដែរ។

ជុំវិញ​បញ្ហា​នេះ ត្រូវ​គេ​មើលឃើញ​ថា ស្មារតី​រួបរួម «សម រង្ស៊ី និង កឹម សុខា ជា​មនុស្ស​តែ​មួយ» បាន​ដើរ​ដល់​ផ្លូវបំបែក បន្ទាប់ពី​អតីត​មេដឹកនាំ​បក្ស​ប្រឆាំង លោក សម រង្ស៊ី ចេញ​មុខ​គាំទ្រ​គណបក្ស​ភ្លើង​ទៀន ដើម្បី​បន្ត​ជីវិត​នយោបាយ​របស់​លោក​បន្ត​ទៀត ប៉ុន្តែ​មន្ត្រី​ជាន់ខ្ពស់​បក្ស​ប្រឆាំង​ភាគី​លោក សម រង្ស៊ី បាន​នាំគ្នា​ចោទប្រកាន់​លើ​ប្រធាន​គណបក្ស​សង្គ្រោះ​ជាតិ លោក កឹម សុខា ថា​ជា​អ្នក​ធ្វើ​ឱ្យ​បែកបាក់​ស្មារតី​រួបរួម​នេះ​ទៅវិញ និង​ទាមទារ​ឱ្យ​លោក កឹម សុខា លាលែង​ចេញពី​តំណែង​ប្រធាន​បក្ស​ប្រឆាំង​ផង​ដែរ។

ក្រុម​អ្នក​សង្កេតការណ៍​លើកឡើង​ថា ចរិត​នយោបាយ​របស់​អតីត​មេដឹកនាំ​បក្ស​ប្រឆាំង​លោក សម រង្ស៊ី មិន​ដែល​រក្សា​ភាព​ស្មោះត្រង់​ជាមួយ​ដៃគូ​នយោបាយ​របស់​ខ្លួន​នោះ​ឡើយ គឺ​មេដឹកនាំ​រូប​នេះ​គិត​តែ​ពី​ផលប្រយោជន៍​នយោបាយ​ផ្ទាល់ខ្លួន​ប៉ុណ្ណោះ។ ជាក់ស្តែង សម្តេច​ក្រុមព្រះ នរោត្តម រណឫទ្ធិ ក៏​ត្រូវ​លោក សម រង្ស៊ី ប្រើ​ល្បិចកល​សហការ​ជាមួយ​លោក ហ៊ុន សែន កម្ចាត់​ទ្រង់​ចេញពី​ឆាក​នយោបាយ។ ដោយឡែក​ប្រធាន​គណបក្ស​សង្គ្រោះ​ជាតិ លោក កឹម សុខា ក៏​អាច​ត្រឹមតែ​ជា​កូនអុក​នយោបាយ​របស់​លោក សម រង្ស៊ី ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស