តំណាងស្ថាបនិកគណបក្សបេះដូងជាតិ ត្រូវបានតុលាការកំពូលចេញលិខិតអញ្ជើញឱ្យចូលរួមសវនាការជាមួយមេធាវីតំណាងដោយអាណត្តិ គឺលោក ជួង ជូងី និងលោក សំ សុគង់ នៅថ្ងៃទី២៤ ខែធ្នូ ឆ្នាំ២០២១ ខាងមុខនេះជាកំហិត។
តំណាងស្ថាបនិកគណបក្សបេះដូងជាតិ លោក សៀម ភ្លុក បានប្រាប់សារព័ត៌មាន The Cambodia Daily នៅថ្ងៃទី៩ ធ្នូ នេះថា ក្រសួងមហាផ្ទៃមិនមានអង្គហេតុស្របតាមច្បាប់គ្រប់គ្រាន់ និងមានភាពចាំបាច់ដើម្បីចោទប្រកាន់គណបក្សបេះដូងជាតិនោះទេ ព្រោះថារហូតមកទល់ពេលនេះ គណបក្សបេះដូងជាតិ មិនទាន់មានការចោទប្តឹងពីបទណាមួយពីក្រសួងមហាផ្ទៃនោះដែរ។
លោក សៀម ភ្លុក អះអាងថា លោកមានហេតុផល និងអំណះអំណាងដោះបន្ទុកគ្រប់គ្រាន់តាមអង្គហេតុ និងច្បាប់រួចហើយសម្រាប់ចូលបំភ្លឺនៅតុលាការ ព្រោះថាគណបក្សរបស់លោកធ្វើសកម្មភាពនានាកន្លងមក គឺស្របទៅតាមច្បាប់ទាំងអស់ មិនបានបំពានលើមាត្រាណាមួយនៃច្បាប់ស្ដីពីគណបក្សនយោបាយឡើយ។
ប្រធានតុលាការកំពូល លោក ឌិត មុន្ទី បានចេញលិខិតអញ្ជើញតំណាងស្ថាបនិកគណបក្សបេះដូងជាតិ លោក សៀម ភ្លុក ព្រមទាំងមេធាវីតំណាងដោយអាណត្តិ គឺលោក ជួង ជូងី និងលោក សំ សុគង់ កាលពីថ្ងៃទី៣ ខែធ្នូ ឆ្នាំ២០២១ ឱ្យចូលរួមសវនាការស្ដីពីបណ្តឹងសុំតុលាការកំពូលចេញដីកាបង្គាប់ក្រសួងមហាផ្ទៃ ចុះបញ្ជីគណបក្សនយោបាយជូនគណបក្សបេះដូងជាតិ នៅថ្ងៃទី២៤ ខែធ្នូ ឆ្នាំ២០២១ ខាងមុខនេះ វេលាម៉ោង ៨ព្រឹកជាកំហិត។
កាលពីថ្ងៃទី២១ ខែមិថុនា ឆ្នាំ២០២១ កន្លងទៅ លោក សៀម ភ្លុក បានដាក់ពាក្យទៅក្រសួងមហាផ្ទៃ ដើម្បីស្នើសុំបង្កើតគណបក្សបេះដូងជាតិ ប៉ុន្តែនៅថ្ងៃទី៨ ខែវិច្ឆិកា ឆ្នាំ២០២១ អគ្គស្នងការនគរបាលជាតិនៃក្រសួងមហាផ្ទៃ បានអះអាងថា ខ្លួនបានពិនិត្យ និងធ្វើកោសល្យវិច័យលើស្នាមមេដៃរបស់សមាជិកគណបក្សនោះចំនួនជាង ៤៧០០នាក់ បានរកឃើញថាសុទ្ធសឹងតែជាស្នាមមេដៃមិនប្រក្រតី។
ក្រសួងមហាផ្ទៃ បានអះអាងកាលពីថ្ងៃទី១២ ខែវិច្ឆិកា ឆ្នាំ២០២១ ថា ស្នាមមេដៃសមាជិកជាង ៤ពាន់នាក់របស់គណបក្សបេះដូងជាតិ ចំនួន ២០រូប គឺខុសពីស្នាមមេដៃក្នុងអត្តសញ្ញាណប័ណ្ណ និង ២០រូបផ្សេងទៀតបានផ្ដិតជំនួសឈ្មោះមនុស្សក្នុងបញ្ជីដល់ទៅជាង ៥០នាក់ ខណៈស្នាមមេដៃ ៧៤នាក់ទៀតជាស្នាមមេដៃក្លែងបន្លំទាំងអស់។
គណបក្សបេះដូងជាតិ ត្រូវគេចោទថាជាគណបក្សដែលមានការជ្រោមជ្រែងពីអតីតមេដឹកនាំបក្សប្រឆាំង លោក សម រង្ស៊ី ជាអ្នករៀបចំនៅខាងក្រោយឆាក ប៉ុន្តែរហូតមកទល់នឹងពេលនេះ លោក សម រង្ស៊ី នៅមិនទាន់ចេញលិខិតបដិសេធផ្លូវការណាមួយលើការចោទប្រកាន់នេះនៅឡើយទេ៕