អ្នកឃ្លាំមើលសង្គមម្នាក់បានប្រៀបធៀប និងឌឺដងទៅកាន់មេដឹកនាំបក្សប្រឆាំង លោក កឹម សុខា ថាជាប្រពន្ធគ្រប់លក្ខណ៍ដ៏ស្លូតបូតម្នាក់ដែលប្រកាសលែងលះប្តីដ៏ឆ្លាតវៃ និងចេះតស៊ូដើម្បីខ្លួន ប៉ុន្តែនាងជាប្រពន្ធប្រឹងអង្គុយសមាធិដោយក្តីសង្ឃឹមថា ខ្លួននឹងក្លាយជាមេម៉ាយស្តុកក្នុងឆាកនយោបាយនៅកម្ពុជាទៅថ្ងៃក្រោយ។
អ្នកស្រាវជ្រាវការអភិវឌ្ឍសង្គម បណ្ឌិត សេង សារី បានសរសេរលើគណនី Facebook របស់ខ្លួននៅថ្ងៃទី១៣ ធ្នូ ទំនងសំដៅរិះគន់មេដឹកនាំបក្សប្រឆាំង លោក កឹម សុខា ថាដោយសារតែលោក កឹម សុខា ជឿលើអ្នកជិតខាង និងកូនៗទាំងក្នុង និងក្រៅខោដែលគ្មានវិន័យ និងមាននិស្ស័យជាត្រីកំភ្លាញ ត្រីក្រឹម ត្រីងៀត និងត្រីបក ជាដើម ទើបលោក កឹម សុខា ហ៊ានផ្តាច់ទំនាក់ទំនងជាមួយអតីតមេដឹកនាំបក្សប្រឆាំង លោក សម រង្ស៊ី ក្នុងចេតនាដើម្បីកេងចំណេញនយោបាយផ្ទាល់ខ្លួន។
បណ្ឌិត សេង សារី អះអាងថា ដោយសារខាងប្តីដឹងពីគម្រោងរបស់ប្រពន្ធជាមុន ប៉ុន្តែដើម្បីការពារប្រពន្ធដ៏កម្សត់របស់ខ្លួន ប្តីបាននិយាយថា តើអូនភ្លេចគោលដៅរួមហើយឬដែលធ្លាប់បានសន្យានឹងគ្នាថា នឹងតស៊ូឱ្យដល់ទីបញ្ចប់ ហើយទោះបីប្រពន្ធខំប្រកាសផ្តាច់ទំនាក់ទំនង ក៏ប្តីមិនព្រមផ្តាច់ទំនាក់ទំនងនេះដែរ។
អ្នកស្រាវជ្រាវការអភិវឌ្ឍសង្គមរូបនេះ លើកឡើងថា បើខាងប្រពន្ធចង់លែងលះពិតមែននោះ នៅតែអាចទៅរួច ប៉ុន្តែទាល់តែប្រពន្ធសុំចុះចេញពីផ្ទះ មានន័យថា «សុំលាលែងតំណែងពីប្រធានគណបក្សសង្គ្រោះជាតិជាមុនសិន» ហើយកុំភ្លេចនាំកូនៗដែលពូកែជេរប្រមាថទៅជាមួយផង បើមិនដូច្នោះទេ លោក កឹម សុខា និងលោក សម រង្ស៊ី លែងគ្នាមិនដាច់នោះឡើយ។
ការអះអាងរបស់បណ្ឌិត សេង សារី គឺចង់បង្ហាញថា ករណីដែលមេដឹកនាំបក្សប្រឆាំង លោក កឹម សុខា ផ្តើមធ្វើឱ្យបែកបាក់ការរួបរួម «សម រង្ស៊ី និង កឹម សុខា» គឺដោយសារតែលោក កឹម សុខា គ្រាន់តែចង់កេងចំណេញនយោបាយខ្លួនឯង ជាជាងការជួយដៃគូនយោបាយរបស់ខ្លួនប៉ុណ្ណោះ។
ប៉ុន្តែកូនស្រីច្បងរបស់ប្រធានគណបក្សសង្គ្រោះជាតិ កញ្ញា កឹម មនោវិទ្យា បានសរសេរលើគណនី Facebook របស់កញ្ញាកាលពីថ្ងៃទី១១ ខែធ្នូ ថា អតីតមេដឹកនាំសង្គ្រោះជាតិ លោក សម រង្ស៊ី បានបោះបង់គោលដៅរួមរបស់គណបក្សសង្គ្រោះជាតិជាផ្លូវការអស់ហើយ នៅពេលដែលពួកគេប្រកាសជំហរគាំទ្រឱ្យមានសមាជរបស់គណបក្សភ្លើងទៀន កាលពីចុងខែវិច្ឆិកា ឆ្នាំ២០២១ កន្លងទៅនោះ។
ចំណែកប្រធានគណបក្សសង្គ្រោះជាតិ លោក កឹម សុខា ធ្លាប់អះអាងថា សកម្មភាពនយោបាយរបស់អតីតមេដឹកនាំប្រឆាំង លោក សម រង្ស៊ី កន្លងមក មិនដែលចាត់ទុកស្មារតី សម រង្ស៊ី និង កឹម សុខា ជាមនុស្សតែមួយនោះទេ ព្រោះសកម្មភាពទាំងនោះមិនមានការគាំទ្រពីលោក ហើយក៏មិនបានគាំទ្រនូវជំហររបស់លោកក្នុងនាមជាប្រធានគណបក្សសង្គ្រោះជាតិនោះដែរ។
សកម្មជនបក្សប្រឆាំង លោក ហ៊ុន កុសល បានសរសេរលើគណនី Facebook កាលពីថ្ងៃទី១២ ធ្នូ ដែរថា អតីតមេបក្សប្រឆាំង លោក សម រង្សី បានដើរចេញពីទិសដៅរួមនៃសម្ពន្ធភាពរវាង កឹម សុខា ទៅបង្កើតចលនា និងយន្តការផ្សេងក្រៅពីស្មារតីដើមនៃការរួបរួមជាច្រើនលើកច្រើនសាដោយខ្លួនឯង ហើយលោក កឹម សុខា មិនមែនជាអ្នកធ្វើឱ្យមានការបែកបាក់នោះទេ។
លោក ហ៊ុន កុសល រៀបរាប់ថា កាលពីដើមឆ្នាំ២០១៩ លោក សម រង្ស៊ី ធ្លាប់ប្រមាថថា ការជាប់គុករបស់លោក កឹម សុខា ជារឿងឥតប្រយោជន៍ ប៉ុន្តែអតីតមេបក្សប្រឆាំងរូបនេះបែរជាធ្វើយុទ្ធនាការផ្ដួលរំលំរដ្ឋាភិបាលលោក ហ៊ុន សែន និងការរៀបចំផែនការបង្កើតរដ្ឋាភិបាលក្រៅប្រទេស ព្រមទាំងគាំទ្រគណបក្សភ្លើងទៀនរបស់គាត់ឡើងវិញ ដោយកុហកអ្នកគាំទ្រថា ជាផែនការក្រោមស្មារតីរួបរួម សម រង្ស៊ី និង កឹម សុខា ជាមនុស្សតែមួយ។
សកម្មជនបក្សប្រឆាំងរូបនេះបញ្ជាក់ថា ប្រសិនបើផែនការខុសច្បាប់ខាងលើនេះមានការចូលរួមឯកភាពពីលោក កឹម សុខា មែននោះ ល្មមគ្រប់គ្រាន់ឱ្យរដ្ឋាភិបាលរបស់លោក ហ៊ុន សែន កាត់ទោសព្យួរកលោក កឹម សុខា បានហើយ ប៉ុន្តែការអះអាងនោះគ្រាន់តែជាការកុហករបស់លោក សម រង្ស៊ី ដើម្បីទម្លាក់កំហុស និងរុញច្រានឱ្យលោក កឹម សុខា ជាប់គុកជំនួសគាត់តែប៉ុណ្ណោះ ហើយករណីនេះក៏ជាចេតនាមួយដើម្បីបញ្ចប់ជីវិតនយោបាយរបស់លោក កឹម សុខា ផងដែរ។
កាលពីចុងឆ្នាំ២០២០ លោក សម រង្ស៊ី ធ្លាប់បានអះអាងដែរថា មន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញ ហើយនាំគ្នាទៅបង្កើតបក្សថ្មី គឺជាការចាញ់បោក និងលក់ខ្លួនឲ្យលោក ហ៊ុន សែន តែប៉ុណ្ណោះ។
យ៉ាងណាក៏ដោយ ពេលនេះ អតីតមេដឹកនាំបក្សប្រឆាំង លោក សម រង្ស៊ី បានប្រកាសជំហរគាំទ្រគណបក្សភ្លើងទៀន ដើម្បីចូលរួមការបោះឆ្នោតឃុំ-សង្កាត់ឆ្នាំ២០២២ ខាងមុខនេះ ប៉ុន្តែលោក សម រង្ស៊ី នៅតែអះអាងថា ស្មារតីរួបរួម សម រង្ស៊ី និង កឹម សុខា ជាមនុស្សតែមួយដដែល។
អ្នកឃ្លាំមើលខ្លះនិយាយថា យុទ្ធសាស្ត្ររបស់លោក សម រង្ស៊ី គ្មានអ្វីក្រៅពីចង់ឃើញលោក កឹម សុខា ជាប់គុកអស់មួយជីវិត និងអស់ទុននយោបាយនោះឡើយ៕