លោក ហ៊ុន សែន អះអាងថា ជំនួបរវាងលោក និងប្រធានរដ្ឋនៃសាធារណរដ្ឋសង្គមនិយមវៀតណាម លោក ង្វៀន ស៊ួនហ្វុក (Nguyen Xuan Phuc) បានសម្ដែងសាទរចំពោះទំនាក់ទំនងគ្រប់ជ្រុងជ្រោយរវាងប្រទេសទាំងពីរដែលជិតស្និទ្ធបំផុតក្នុងកិច្ចសហប្រតិបត្តិការកម្ពុជា-វៀតណាមក្នុងរយៈពេល ៥៥ឆ្នាំកន្លងមកនេះ។
លោក ហ៊ុន សែន បានសរសេរលើទំព័រ Facebook របស់លោកនៅថ្ងៃអង្គារ ទី២១ ធ្នូ នេះថា ប្រធានាធិបតីថ្មីនៃប្រទេសវៀតណាម លោក ង្វៀន ស៊ួនហ្វុក (Nguyen Xuan Phuc) បានកោតសរសើរចំពោះសមិទ្ធផលជាប្រវត្តិសាស្ត្រ និងសំខាន់ៗដែលកម្ពុជា និងវៀតណាម សម្រេចបាន ជាពិសេសការអភិវឌ្ឍជាតិ ស្ថិរភាពនយោបាយ លើកកម្ពស់តួនាទី និងមុខមាត់ប្រទេសកម្ពុជាក្នុងតំបន់ និងលើឆាកអន្តរជាតិ។
លោកបញ្ជាក់ថា ក្នុងជំនួបនេះ ប្រធានរដ្ឋវៀតណាម បានឯកភាពគ្នាជាមួយកម្ពុជា ចុះហត្ថលេខាលើឯកសារសំខាន់មួយចំនួន ក្នុងនោះរួមមាន៖
- ផែនការសហប្រតិបត្តិការឆ្នាំ២០២២ រវាងក្រសួងមហាផ្ទៃ និងក្រសួងនគរបាលវៀតណាម
- ការកំណត់ផែនការសហប្រតិបត្តិការប្រចាំឆ្នាំ២០២២ រវាងក្រសួងការពារជាតិកម្ពុជា និងក្រសួងការពារជាតិវៀតណាម
- កំណត់ហេតុនៃកិច្ចប្រជុំរវាងប្រធានគណៈកម្មការព្រំដែនចម្រុះកម្ពុជា-វៀតណាម
- ការបញ្ចប់ការចរចាបង្កើតកិច្ចព្រមព្រៀងពាណិជ្ជកម្មតាមព្រំដែនរវាងកម្ពុជា-វៀតណាម
- និងកិច្ចព្រមព្រៀងមួយចំនួនទៀតផងដែរ។
ការលើកឡើងរបស់លោក ហ៊ុន សែន គឺបន្ទាប់ពីលោកបានជួបជាមួយមេដឹកនាំវៀតណាម ដែលបានធ្វើដំណើរទស្សនកិច្ចផ្លូវរដ្ឋនៅកម្ពុជា ដែលទើបតែបានបញ្ចប់នៅថ្ងៃពុធ សប្តាហ៍នេះ។
អ្នកវិភាគនយោបាយឯករាជ្យ និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក គឹម សុខ បានសរសេរលើគណនី Facebook របស់លោកនៅថ្ងៃទី២១ ធ្នូ នេះថា បើមេដឹកនាំបក្សកាន់អំណាច លោក ហ៊ុន សែន តាំងខ្លួនជានាយករដ្ឋមន្ត្រីតំណាងផលប្រយោជន៍ជាតិខ្មែរក្នុងជំនួបជាមួយប្រធានាធិបតីវៀតណាម លោក Nguyen Xuan Phuc ត្រូវតែលើកសំណើឱ្យវៀតណាម បញ្ឈប់ការរំលោភដែនអធិបតេយ្យរបស់កម្ពុជាបន្តទៀត។
អ្នកវិភាគរូបនេះអះអាងថា មេដឹកនាំកម្ពុជាត្រូវតែទាមទារឱ្យមេដឹកនាំវៀតណាម គោរពច្បាប់សមុទ្រឆ្នាំ១៩៨២ ឬហៅកាត់ថា UNCLOS ១៩៨២ ដោយប្រគល់មកឲ្យប្រទេសកម្ពុជាវិញនូវកោះត្រល់ ចង្កោមកោះក្រចកសេះ និងទំហំផ្ទៃទឹកសមុទ្រទាំងអស់របស់កម្ពុជា ដែលវៀតណាមកំពុងគ្រប់គ្រងទាំងខុសច្បាប់សព្វថ្ងៃនេះ។
លោក គឹម សុខ បញ្ជាក់ថា លោក ហ៊ុន សែន ត្រូវតែហ៊ានប្រកាសចំពោះមេដឹកនាំវៀតណាម នៅក្នុងជំនួបនេះដែរថា ក្នុងស្ថានភាពកម្ពុជាពុំទាន់មានឯកភាពជាតិនៅពេលនេះ កម្ពុជាត្រូវការផ្អាកការបោះបង្គោលព្រំដែនគោកដែលនៅសល់ជាមួយប្រទេសវៀតណាម ជាបណ្ដោះអាសន្នសិន និងរក្សាសិទ្ធិសើរើឡើងវិញផងដែរលើបង្គោលព្រំដែនដែលបានបោះរួចជាលក្ខណៈទ្វេភាគីពីមុនមក។
ទោះយ៉ាងណា ក្រោមកិច្ចព្រមព្រៀង សន្ធិសញ្ញា និងឯកសារខុសច្បាប់នានាដែលលោក ហ៊ុន សែន បានចុះហត្ថលេខាយល់ព្រមជាមួយវៀតណាម កន្លងមក ត្រូវគេរិះគន់ថា អ្វីដែលលោក ហ៊ុន សែន បានធ្វើ គឺជាការបើកផ្លូវឱ្យប្រទេសវៀតណាម កាត់ឆ្វៀលយកទឹកដីខ្មែរយ៉ាងច្រើន ដូចជាចង្កោមកោះក្រចកសេះ គ្រប់គ្រងដែនអាកាស ព្រមទាំងដាក់ផ្ទៃសមុទ្រទំហំ ១ម៉ឺនគីឡូម៉ែត្រក្រឡាដែលជាកម្មសិទ្ធិរបស់កម្ពុជា ឲ្យទៅជាដែនទឹករួមគ្នាជាមួយវៀតណាម៕