33 C
Phnom Penh

អតីត​ប្រធានាធិបតី​កូរ៉េ​ខាងត្បូង​ម្នាក់​ទទួល​បាន​ការ​លើកលែង​ទោស​និង​ម្នាក់​ទៀត​ស្ថិត​ក្នុង​ការ​រង់ចាំ

ដោយ ឌឹ ខេមបូឌា ដេលី

បទវិភាគ

នៅ​ប្រទេស​កូរ៉េ​ខាងត្បូង មាន​ព្រឹត្តិការណ៍​នយោបាយ​ធំ​មួយ​បាន​កើតឡើង​នៅ​ថ្ងៃ​ទី​២៤ ខែ​ធ្នូ នេះ គឺ​លោក មូន ចេអ៊ីន បាន​ចុះ​ក្រឹត្យ​មួយ​ក្នុង​ឋានៈ​ជា​ប្រធានាធិបតី​សាធារណរដ្ឋ​មួយ​នេះ ដោយ​ធ្វើ​ការ​លើកលែង​ទោស​ដ៏​ភ្ញាក់ផ្អើល​ជូន​ដល់​អតីត​ប្រធានាធិបតី​កូរ៉េ​ខាងត្បូង គឺ​អ្នកស្រី ប៉ាក ហ្គឺនហេ ដែល​ត្រូវ​បាន​កាត់ទោស​ឱ្យ​ជាប់​ពន្ធនាគារ ២០​ឆ្នាំ។

បើ​តាម​បណ្ដាញ​ផ្សាយ​ព័ត៌មាន NK News គឺ​មាន​អ្នក​តំណាងរាស្ត្រ​ម្នាក់​ទៀត​ដែល​ស្និទ្ធ​របប​កុម្មុយនីស្ត​កូរ៉េ​ខាងជើង ក៏​ទទួល​បាន​ការ​លើកលែង​ទោស​ផង​ដែរ គឺ​លោក Lee Seok-ki។

អតីត​អ្នក​តំណាងរាស្ត្រ​រូប​នេះ​ត្រូវ​បាន​កាត់ទោស​កាលពី​ឆ្នាំ​២០១៤ ឱ្យ​មាន​ទោស​ជិត ១០​ឆ្នាំ​ក្រោម​បទ​ចោទ ថា​មាន​ផែនការ​បង្កើត​កម្លាំង​ឧទ្ទាម​ផ្ដួល​រំលំ​រដ្ឋាភិបាល។ យ៉ាងណា គេ​នៅ​រង់ចាំ​ការ​សម្រេច​មួយ​ទៀត​របស់​ប្រធានាធិបតី ដែល​រំពឹង​ថា​នឹង​បាន​ទទួល​សំណើ​សុំ​ឱ្យ​មាន​ការ​លើកលែង​ទោស​ផង​ដែរ​ដល់​អតីត​ប្រធានាធិបតី​កូរ៉េ​ខាងត្បូង​ម្នាក់​ទៀត គឺ​លោក លី ម្យុងបាក់។

លោក លី ម្យុងបាក់ ដែល​ត្រូវ​បាន​កាត់ទោស​ឱ្យ​ជាប់​ពន្ធនាគារ ១៧​ឆ្នាំ ក្នុង​ករណី​ពុករលួយ។ ក្នុង​សន្និសីទ​សារព័ត៌មាន​មួយ រដ្ឋមន្ត្រី​យុត្តិធម៌​កូរ៉េ​ខាងត្បូង លោក Park Beom-kye បាន​ថ្លែង​ថា ស្ថានភាព​ក្នុង​ការ​លើកឡើង​ទោស​រវាង​អ្នកស្រី ប៉ាក និង​លោក លី គឺ​ខុស​គ្នា ប៉ុន្តែ​រដ្ឋាភិបាល​នឹង​ពិនិត្យ​បន្ថែម​ទៀត​លើ​ការ​លើកលែង​ទោស​អតីត​មេដឹកនាំ​កូរ៉េ​ខាងត្បូង​ម្នាក់​ទៀត​នេះ។

តែ​យ៉ាងណា គឺជា​ករណី​ពិសេស​បំផុត​ចំពោះ​ការ​លើកលែង​ទោស​សម្រាប់​អ្នកស្រី ប៉ាក ហ្គឺនហេ ដែល​ត្រូវ​បាន​តុលាការ​កូរ៉េ​ខាងត្បូង​កាត់ទោស​ឱ្យ​ជាប់​ពន្ធនាគារ​រយៈពេល ២០​ឆ្នាំ​ចាប់តាំង​ពី​ឆ្នាំ​២០១៧ មក បន្ទាប់ពី​លោកស្រី​ត្រូវ​បាន​ដក​ចេញ​ពី​តំណែង​ពី​បទ​អំពើពុករលួយ និង​ទទួល​ប្រាក់​ជាច្រើន​លាន​ដុល្លារ។

កំហុស​ដែល​រដ្ឋអាជ្ញា​រក​ឃើញ គឺ​ស្ត្រី​ឆ្នើម​រូប​នេះ​បណ្ដោយ​ឱ្យ​ជំនួយការ​របស់​អ្នកស្រី ប្រើ​ឥទ្ធិពល​របស់​អ្នកស្រី​ជា​ប្រធានាធិបតី គាបសង្កត់ និង​បញ្ចុះបញ្ចូល​អ្នកជំនួញ​ឱ្យ​មាន​ការ​សូក​ប្រាក់​រាប់​លាន​ដុល្លារ​ក្នុង​ដំណើរការ​បើក​ភាគហ៊ុន និង​ពង្រីក​មុខ​ជំនួញ។ ចំណែក​លោក លី ម្យុងបាក់ ក៏​មាន​រឿង​ប្រហាក់ប្រហែល​នេះ​ដែរ។

យ៉ាងណា ករណី​លោក លី ម្យុងបាក់ ត្រូវ​បាន​កាត់ទោស​ចោទប្រកាន់​ក្រោយ​ពី​លោក​អស់​អាណត្តិ​ជា​ប្រធានាធិបតី។ ចំណែក​អ្នកស្រី ប៉ាក គឺ​ការ​កាត់ទោស​ក្រោយ​ពី​តុលាការ​រដ្ឋធម្មនុញ្ញ​ដកហូត​អំណាច​របស់​អ្នកស្រី ពោល​គឺ​អ្នកស្រី​មាន​រឿង​អាស្រូវ​អំឡុង​ពេល​កាន់អំណាច។

លោក លី ម្យុងបាក់ (Lee Myung-bak) អតីត​ប្រធានាធិបតី​កូរ៉េ​ខាងត្បូង

តាម​បញ្ជី​ឈ្មោះ​នៃ​អ្នក​ដែល​ត្រូវ​បាន​លើកលែង​ទោស​ឱ្យ​មាន​សេរីភាព​ក្នុង​ឱកាស​អបអរ​សាទរ​ឆ្នាំ​ថ្មី​ឆ្នាំ​២០២២ គឺ​មាន​ចំនួន ៣០៩៤​នាក់ ក្នុង​នោះ​ក៏​មាន​ឈ្មោះ​អ្នកស្រី ប៉ាក ហ្គឺនហេ ផង​ដែរ។ ការ​លើកលែង​ទោស​អតីត​ប្រធានាធិបតី​ស្ត្រី​រូប​នេះ ធ្វើឡើង​ដោយ​ផ្អែក​លើ​ហេតុផល​សុខភាព​ជា​ចម្បង។ នេះ​បើ​តាម​សេចក្ដី​ប្រកាស​ព័ត៌មាន​របស់​ក្រសួង​យុត្តិធម៌​ប្រទេស​កូរ៉េ​ខាងត្បូង។

តាម​បណ្ដាញ​ផ្សាយ​ព័ត៌មាន NK News គឺ​នៅ​ក្នុង​ឆ្នាំ​២០២១ នេះ អ្នកស្រី ប៉ាក ត្រូវ​បាន​បញ្ជូន​ទៅ​មន្ទីរពេទ្យ​ចំនួន ៣​លើក ដើម្បី​សង្គ្រោះ​បន្ទាន់។ យ៉ាងណា អ្នក​សង្កេតការណ៍​កំពុង​ចោទ​សួរ​ថា មាន​ហេតុផល​អ្វី​នៅ​ពីក្រោយ​ក្រៅ​អំពី​បញ្ហា​សុខភាព​ចំពោះ​ការ​លើកលែង​ទោស​អ្នកស្រី ប៉ាក ហ្គឺនហេ។ អ្នក​នាំពាក្យ​សម្រាប់​ប្រធានាធិបតី​បាន​និយាយ​ថា បញ្ហា​សុខភាព​របស់​អ្នកស្រី ប៉ាក ជា​បញ្ហា​ចម្បង តែ​កត្តា​ឯកភាព​ជាតិ​ក៏​ចាំបាច់​ផង​ដែរ។

យ៉ាងណា អ្នក​សង្កេតការណ៍​គិត​ថា ការ​ដោះលែង​អ្នកស្រី ប៉ាក អាច​នឹង​ជះ​ឥទ្ធិពល​ដល់​ការ​បោះឆ្នោត​នៅ​ឆ្នាំ​ក្រោយ ព្រោះ​អ្នកគាំទ្រ​គណបក្ស​អំណាច​ប្រជាជន PPP បាន​អំពាវនាវ​ឱ្យ​ដោះលែង​អ្នកស្រី ប៉ាក មុន​ការ​បោះឆ្នោត​ប្រធានាធិបតី ដែល​មើល​ទៅ​បក្ស​នេះ​អាច​ត្រូវការ​សំឡេង​របស់​អ្នកគាំទ្រ​អ្នកស្រី ប៉ាក។

ការ​បោះឆ្នោត​ប្រធានាធិបតី​កូរ៉េ​ខាងត្បូង នឹង​ប្រព្រឹត្ត​ទៅ​នៅ​ថ្ងៃ​ទី​៩ ខែ​មីនា ឆ្នាំ​២០២២ ដែល​ជា​ការ​បោះឆ្នោត​ប្រធានាធិបតី​លើក​ទី​២០។ នៅ​ប្រទេស​កូរ៉េ​ខាងត្បូង អាណត្តិ​ប្រធានាធិបតី​មាន​តែ​មួយ​អាណត្តិ​រយៈពេល ៥​ឆ្នាំ​ប៉ុណ្ណោះ។

បែប​នេះ​ក្ដី មាន​ការ​បញ្ចេញមតិ​ច្រើន​នៅ​លើ​បណ្ដាញ​សង្គម អំពី​ការ​លើកលែង​ទោស​អតីត​ប្រធានាធិបតី ប៉ាក ហ្គឺនហេ និង​សមាជិក​សភា Lee Seok-ki។ សម្រាប់​អ្នកស្រី ប៉ាក មាន​ការ​គាំទ្រ និង​អបអរ​សាទរ​ច្រើន តែ​សម្រាប់​អតីត​សមាជិក​សភា Lee Seok-ki មាន​ការ​ខកចិត្ត​ច្រើន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស