ប្រធានាធិបតីកូរ៉េខាងត្បូង ដែលត្រូវបានព្យួរតំណែងដោយសភា លោក Yoon Suk Yeol ត្រូវបានតុលាការធម្មនុញ្ញសម្រេចដកតំណែងជាផ្លូវការហើយនៅថ្ងៃសុក្រ ទី៤ ខែមេសា ដែលជាការត្រួសត្រាយផ្លូវឱ្យមានការរៀបចំការបោះឆ្នោតជ្រើសរើសប្រធានាធិបតីថ្មីក្នុងរយៈពេល ៦០ថ្ងៃ។
តាមទីភ្នាក់ងារសារព័ត៌មាន AFP ចៅក្រមទាំង ៨រូបនៃតុលាការធម្មនុញ្ញ បានសម្រេចជាឯកច្ឆន្ទដោយការតម្កល់ទុកជាបានការនូវសេចក្ដីសម្រេចប្ដឹងដកតំណែងលោក Yoon ដោយសភាជាតិ។ តែនៅពេលនេះ នាយករដ្ឋមន្ត្រី Han Duck-soo នឹងត្រូវបន្តកាន់តំណែងជាប្រធានាធិបតីស្ដីទីរហូតដល់ប្រធានាធិបតីថ្មីត្រូវបានជ្រើសរើសនៅក្នុងការបោះឆ្នោតក្នុងរយៈពេល ៦០ថ្ងៃ ឬអាចធ្វើឡើងនៅសប្ដាហ៍ដំបូងនៃខែមិថុនា ខាងមុខនេះ។
តុលាការធម្មនុញ្ញកូរ៉េខាងត្បូង ដែលបានវិនិច្ឆ័យសម្រេចលើការប្ដឹងរបស់សភាដែលបានបោះឆ្នោតដកតំណែងប្រធានាធិបតីពីលោក Yoon បានធ្វើឱ្យលោក Yoon ក្លាយជាប្រធានាធិបតីទី២ នៃសាធារណរដ្ឋកូរ៉េខាងត្បូង ត្រូវបានទម្លាក់ចេញពីតំណែង បន្ទាប់ពីអ្នកស្រី Park Geun-hye ដែលត្រូវបានតុលាការធម្មនុញ្ញទម្លាក់ចេញពីតំណែងនៅខែមីនា ឆ្នាំ២០១៧។
នៅក្នុងប្រទេសកូរ៉េខាងត្បូង នាពេលនេះ ត្រូវគេមើលឃើញថាមេដឹកនាំគណបក្សប្រជាធិបតេយ្យដែលជាបក្សប្រឆាំងដ៏សំខាន់មួយ គឺលោក Lee Jae-myung កំពុងមានប្រជាប្រិយភាពនាំមុខគេក្នុងការស្ទង់មតិ។
យ៉ាងណា លោក Lee ដែលមានសំឡេងគាំទ្រច្រើនជាងបក្សរបស់លោក Yoon នៅក្នុងការស្ទង់មតិនេះ គេមិនទាន់ប្រាកដថាលោកនឹងឈ្នះឆ្នោតប្រធានាធិបតីនោះទេ ព្រោះមានគម្លាតនៃការគាំទ្រត្រឹម ៦ពិន្ទុប៉ុណ្ណោះរវាងគណបក្សរបស់លោក និងគណបក្សអំណាចប្រជាជនរបស់លោក Yoon។
លោក Yoon ត្រូវបានសភាគ្រប់គ្រងដោយក្រុមគណបក្សប្រឆាំង ព្យួរតំណែងកាលពីថ្ងៃទី១៤ ខែធ្នូ ជុំវិញការប្រកាសប្រើច្បាប់អាជ្ញាសឹកកាលពីថ្ងៃទី៣ ខែធ្នូ ឆ្នាំ២០២៤ ក៏កំពុងប្រឈមមុខនឹងការស៊ើបអង្កេតព្រហ្មទណ្ឌក្រោមបទចោទប្រកាន់បះបោរផងដែរ។
ក្នុងសំណុំរឿងនេះ ប្រសិនបើតុលាការរកឃើញទោសកំហុស លោក Yoon ពិតជាមានពិរុទ្ធលើបទចោទបះបោរ ដែលនាំលោកអាចប្រឈមមុខនឹងទោសជាប់ពន្ធនាគារអស់មួយជីវិត ឬប្រហារជីវិត។
បន្ទាប់ពីតុលាការធម្មនុញ្ញសម្រេចបញ្ចប់មុខតំណែងប្រធានាធិបតី Yoon នៅថ្ងៃទី៤ ខែមេសា ឆ្នាំ២០២៥ ប្រធានាធិបតីស្តីទី លោក Han Duck-soo បានប្រកាសថា រដ្ឋាភិបាលនឹងគោរពសេចក្តីសម្រេចរបស់តុលាការធម្មនុញ្ញ ដោយសន្យារក្សាស្ថិរភាពនយោបាយ និងជម្នះលើការបែកបាក់ផ្នែកនយោបាយដោយរៀបចំការបោះឆ្នោតស្របតាមរដ្ឋធម្មនុញ្ញ។
លោកប្រធានាធិបតីស្តីទីរូបនេះ បាននិយាយនៅក្នុងសុន្ទរកថាតាមទូរទស្សន៍ថា លោកនឹងធ្វើការដើម្បីគ្រប់គ្រងការបោះឆ្នោតប្រធានាធិបតីឈានទៅដល់ការបង្កើតរដ្ឋបាលថ្មីជំនួសរដ្ឋាភិបាលអន្តរកាលរបស់លោក។
តាមច្បាប់កូរ៉េខាងត្បូង ត្រូវតែរៀបចំការបោះឆ្នោតប្រធានាធិបតីក្នុងរយៈពេល ៦០ថ្ងៃ ប្រសិនបើប្រធានាធិបតីត្រូវបានដកចេញដោយតុលាការធម្មនុញ្ញ ឬក្នុងករណីមរណភាព។
ប្រធានាធិបតីស្តីទី លោក Han Duck-soo បាននិយាយថា តុលាការធម្មនុញ្ញបានបញ្ជាក់ពីសាលក្រមរបស់ខ្លួនលើករណីចោទប្រកាន់លោក Yoon ដែលជាការសោកស្ដាយយ៉ាងខ្លាំងចំពោះប្រមុខរដ្ឋកំពុងកាន់អំណាចត្រូវបានចោទប្រកាន់ជាលើកទីពីរក្នុងប្រវត្តិសាស្ត្រនៃប្រទេសកូរ៉េខាងត្បូង។
លោក Han ក៏បានសន្យាថានឹងធានាការត្រៀមខ្លួនក្នុងសន្តិសុខជាតិ និងសុវត្ថិភាពសាធារណៈ មុនពេលប្រធានាធិបតីជាប់ឆ្នោតថ្មីចូលកាន់តួនាទីរបស់ខ្លួនតាមរយៈការបោះឆ្នោត។ ក្នុងអន្តរកាល ៦០ថ្ងៃចាប់ពីពេលនេះ លោកប្រធានាធិបតីស្ដីទី Han ក៏បានជំរុញឱ្យក្រសួង និងស្ថាប័ននានារក្សាអព្យាក្រឹតនយោបាយ និងសហការជាមួយអាជ្ញាធរ ដើម្បីរៀបចំការបោះឆ្នោតប្រកបដោយភាពសេរី និងត្រឹមត្រូវគ្មានហិង្សា។
ចាប់តាំងពីឡើងកាន់អំណាចប្រធានាធិបតីក្នុងខែឧសភា ឆ្នាំ២០២២ លោក Yoon Suk Yeol បានគូសវាសផែនទីកំណែទម្រង់ជាតិ ដើម្បីដោះស្រាយបញ្ហាកង្វះបុគ្គលិកពេទ្យ និងការធ្លាក់ចុះប្រាក់សោធននិវត្តន៍ វិបត្តិទីផ្សារការងារ និងវិស័យការពារជាតិ ដោយចាប់យកវិធានឆ្លើយតបជាបន្ទាន់ប្រឆាំងនឹងការគំរាមកំហែងពីសំណាក់ប្រទេសកូរ៉េខាងជើង។
ការដាក់ប្រទេសស្ថិតក្រោមច្បាប់អាជ្ញាសឹក ត្រូវគេមើលឃើញក្រោយពីលោក Yoon ចោទប្រកាន់បក្សប្រឆាំងថាជាក្រុមប្រឆាំងរដ្ឋដែលលួចគាំទ្រកូរ៉េខាងជើង។ ក្នុងសំណុំរឿងនេះហើយដែលនាំឱ្យសមាជិកសភាបក្សប្រឆាំងរកកម្លាំងរួមគ្នាអនុម័តព្យួរតំណែងប្រធានាធិបតីពីលោក Yoon ហើយប្ដឹងទៅតុលាការធម្មនុញ្ញឱ្យចាប់កំហុសដាក់ទោសលោក Yoon ពីបទបង្កអសន្តិសុខ ធ្វើឱ្យចលាចលសង្គម និងពីបទបះបោរ។
នៅពេលតុលាការធម្មនុញ្ញសម្រេចវិនិច្ឆ័យដកហូតតំណែងប្រធានាធិបតីពីលោក Yoon ជាផ្លូវការនៅថ្ងៃទី៤ មេសា នេះ គេសង្កេតឃើញសង្គមកូរ៉េខាងត្បូង បែកគ្នាជាពីរក្រុម គឺក្រុមគាំទ្រសាលក្រមតុលាការធម្មនុញ្ញ ជាក្រុមប្រឆាំងលោក Yoon និងក្រុមមិនគាំទ្រ។ ក្រុមគាំទ្រសម្ដែងការសាទររីករាយដែលលោក Yoon អស់សិទិ្ធជាប្រធានាធិបតី និងមួយក្រុមទៀតជាក្រុមគាំទ្រលោក Yoon។ ក្រុមនេះសម្ដែងការខកចិត្តសម្រក់ទឹកភ្នែកស្ដាយស្រណោះលោក Yoon ដែលលែងបានដឹកនាំប្រទេសកូរ៉េខាងត្បូង ចេញមុខខ្លាំងប្រឆាំងរដ្ឋកុម្មុយនីស្តផ្ដាច់ការកូរ៉េខាងជើង ដែលដឹកនាំដោយត្រកូលសន្តតិវង្ស គីម អ៊ីលស៊ុង៕
© 2025, ឌឹ ខេមបូឌា ដេលី. All rights reserved.