បញ្ញវន្តខ្មែរនៅក្រៅស្រុកលើកឡើងថា នៅពេលដែលកម្ពុជាមានប្រជាធិបតេយ្យសេរីពហុបក្សពិតប្រាកដ ពេលនោះទាំងរដ្ឋាភិបាល និងពលរដ្ឋខ្មែរ នឹងទទួលបាននូវផលប្រយោជន៍គ្មានដែនកំណត់ពីការចងសម្ពន្ធភាពជាមួយប្រទេសប្រកាន់របបប្រជាធិបតេយ្យសេរីជឿនលឿនលើពិភពលោក ហើយកម្ពុជាក៏នឹងមានភាពថ្កុំថ្កើងរុងរឿងស្មើមុខលើឆាកអន្តរជាតិទៅថ្ងៃអនាគតផងដែរ។
ប្រធានប្រតិបត្តិនៃចលនាពលរដ្ឋដើម្បីប្រជាធិបតេយ្យ (PMD) លោក ទូច វិបុល បានសរសេរលើគណនី Facebook របស់លោកនៅថ្ងៃអង្គារ ទី២៨ ធ្នូ នេះថា ប្រសិនបើមេដឹកនាំបក្សកាន់អំណាច លោក ហ៊ុន សែន អាចស្ដារសិទ្ធិមនុស្ស និងលទ្ធិប្រជាធិបតេយ្យឲ្យបានត្រឹមត្រូវដូចដែលមានចែងក្នុងរដ្ឋធម្មនុញ្ញ នោះកម្ពុជានឹងមាននីតិរដ្ឋរឹងមាំដែលអាចធ្វើកិច្ចសហប្រតិបត្តិការល្អគ្រប់ជ្រុងជ្រោយជាមួយបណ្តាប្រទេសលើសកលលោក ទាំងវិស័យសេដ្ឋកិច្ច ពាណិជ្ជកម្ម និងវិស័យសំខាន់ៗដទៃទៀត។
លោក ទូច វិបុល អះអាងថា នៅពេលកម្ពុជាអាចសហការជាមួយបណ្តាប្រទេសលោកសេរីកាន់តែច្រើន នោះកម្ពុជានឹងអាចបង្កើតការងារ និងការប្រកួតប្រជែងរកភាពរីកចម្រើនឲ្យប្រទេសរបស់ខ្លួនគ្រប់ផ្នែក គ្រប់វិស័យទាំងអស់។ បន្ថែមពីនេះ ក៏អាចស្រូបយកការវិនិយោគកាន់តែច្រើនពីបរទេស ដែលអាចជួយជំរុញកត្តាជីវភាពរបស់ពលរដ្ឋកាន់តែធូរធារ និងថ្លៃថ្នូរ។
ប្រធានប្រតិបត្តិនៃចលនាពលរដ្ឋដើម្បីប្រជាធិបតេយ្យរូបនេះ សម្ដែងការសោកស្តាយចំពោះរដ្ឋាភិបាលកម្ពុជាបច្ចុប្បន្នដែលបានប្រើចំណាត់ការរឹតបន្តឹងនានាលើសកម្មជននយោបាយ សកម្មជនសង្គម មេដឹកនាំបក្សប្រឆាំង និងការរំលោភច្បាប់ប្រទេសពីសំណាក់អ្នកមានអំណាចដូចសព្វថ្ងៃនេះ។ លោកថា សកម្មភាពរំលោភច្បាប់ទាំងនោះកាន់តែធ្វើឲ្យកម្ពុជាធ្លាក់ក្នុងវិបត្តិគ្រប់បែបយ៉ាង ហើយបានរុញច្រានឲ្យពលរដ្ឋខ្មែររាប់លាននាក់ធ្វើចំណាកស្រុកដូចសព្វថ្ងៃនេះប៉ុណ្ណោះ។
ចំណែកឯអ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានបញ្ចេញទស្សនៈលើបណ្ដាញសង្គមនៅថ្ងៃទី២៨ ខែធ្នូ នេះថា កម្ពុជាគឺជាប្រទេសមួយដែលគេចាត់ទុកថាមានសន្តិភាពខាងក្រៅ ប៉ុន្តែគ្មានយុត្តិធម៌សង្គម បង្កើតរូបភាពអភិវឌ្ឍន៍ ប៉ុន្តែខ្លឹមសារគឺរំលោភសិទ្ធិមនុស្ស ដែលធ្វើឲ្យពលរដ្ឋបាត់បង់ដីស្រែចម្ការ រហូតនាំគ្នាធ្វើចំណាកស្រុកស្ទើរតែ ១ភាគ៤ ទៅហើយនៃយុវជនកម្ពុជាពេញវ័យទាំងអស់។
បណ្ឌិត ឡៅ ម៉ុងហៃ អះអាងថា កម្ពុជានៅពេលនេះកំពុងអនុវត្តគោលនយោបាយបាត់បង់អព្យាក្រឹតដូចដែលបានចែងក្នុងរដ្ឋធម្មនុញ្ញរបស់ខ្លួន ដោយការប្រកាន់យកទំនាក់ទំនងលម្អៀងទៅរកមហាអំណាចកុម្មុយនីស្តចិន ដែលកំពុងតែទាញកម្ពុជាឲ្យធ្លាក់ចូលក្នុងជម្លោះរវាងមហាអំណាចកុម្មុយនីស្ត និងមហាអំណាចលោកសេរី ដែលនឹងបំផ្លាញផលប្រយោជន៍កម្ពុជាខ្លួនឯងយ៉ាងធ្ងន់ធ្ងរ។
មាត្រា១ នៃរដ្ឋធម្មនុញ្ញចែងថា កម្ពុជាជារដ្ឋឯករាជ្យ អធិបតេយ្យ សន្តិភាព អព្យាក្រឹត្យ ដោយឡែកមាត្រា៥១ថ្មីនៃរដ្ឋធម្មនុញ្ញកម្ពុជា បានចែងដែរថា កម្ពុជាអនុវត្តរបបនយោបាយប្រជាធិបតេយ្យសេរីពហុបក្ស។
ទាក់ទិននឹងបញ្ហានេះ មេដឹកនាំខ្មែរដែលប្ដេជ្ញាកាន់អំណាចមួយជីវិត លោក ហ៊ុន សែន ធ្លាប់បានអះអាងក្នុងវេទិកាអនាគតអាស៊ីដែលសំដៅទៅបណ្តាប្រទេសលោកសេរី ជាពិសេសសហរដ្ឋអាមេរិកកាលពីពេលថ្មីៗនេះថា កម្ពុជានឹងមិនយកអធិបតេយ្យរបស់ខ្លួនទៅដោះដូរនឹងជំនួយរបស់រដ្ឋបរទេសជាដាច់ខាត ប៉ុន្តែទន្ទឹមនោះ លោក ហ៊ុន សែន ក៏បានអួតពីមហាអំណាចកុម្មុយនីស្តចិនដែរថា គឺជាប្រទេសដែលបានផ្តល់ជំនួយដែលអាចធ្វើឲ្យកម្ពុជាឯករាជ្យទាំងវិស័យនយោបាយ និងសេដ្ឋកិច្ច ដូច្នេះកម្ពុជាមានតែពឹងចិនប៉ុណ្ណោះ មិនអាចពឹងបរទេសណាផ្សេងទេ។
ជុំវិញការអះអាងនេះ ក្រុមអ្នកឃ្លាំមើលសង្គមលើកឡើងថា កម្ពុជាក្រោមការដឹកនាំរបស់លោក ហ៊ុន សែន ជាង ៤០ឆ្នាំមកនេះ បានយកវាសនាប្រទេសជាតិរបស់ខ្លួនទៅផ្ញើនឹងរដ្ឋបរទេសជាបន្តបន្ទាប់ ក្នុងនោះ កាលពីទសវត្សឆ្នាំ៨០ មេដឹកនាំខ្មែររូបនេះដាក់កម្ពុជាឲ្យទៅជាចំណុះរបស់វៀតណាម ហើយរហូតដល់ពេលនេះ ក៏ចាប់ផ្តើមយកវាសនាជាតិទៅផ្ញើនឹងមិត្តដែកថែបចិនវិញម្តង ខណៈប្រទេសលោកសេរីទាមទារឲ្យស្ដារសិទ្ធិមនុស្ស និងលទ្ធិប្រជាធិបតេយ្យ ត្រូវបុរសខ្លាំងរបស់កម្ពុជាច្រានចោលជាច្រើនលើកច្រើនសា៕