កូនប្រុសច្បងលោក ហ៊ុន សែន គឺលោក ហ៊ុន ម៉ាណែត ទាមទារឱ្យអតីតមេដឹកនាំបក្សប្រឆាំង លោក សម រង្ស៊ី ជ្រើសរើសបេក្ខជនបន្តវេនរបស់ក្រុមប្រឆាំងចេញមកតទល់ជាមួយនឹងខ្លួន ប្រសិនបើលោក សម រង្ស៊ី មិនមានភាពក្លាហានចេញមកភ្នាល់ជាមួយរូបលោកដោយផ្ទាល់ទេនោះ។
បេក្ខភាពនាយករដ្ឋមន្ត្រីអនាគត លោក ហ៊ុន ម៉ាណែត បានសរសេរលើទំព័រ Facebook របស់លោកនៅថ្ងៃព្រហស្បតិ៍ ទី៣០ ធ្នូ នេះថា បន្ទាប់ពីលោកបបួលលោក សម រង្ស៊ី ភ្នាល់គ្នាលើការចោទប្រកាន់សញ្ញាបត្ររបស់លោកថាជាសញ្ញាបត្រក្រោមស្តង់ដារនោះ អតីតមេបក្សប្រឆាំងបានរក្សាភាពស្ងៀមស្ងាត់រហូត ប៉ុន្តែការមិនឆ្លើយឆ្លងបែបនេះ គឺជាចម្លើយមួយយ៉ាងច្បាស់ថា លោក សម រង្ស៊ី មិនមានភាពក្លាហានចេញមកភ្នាល់ដើម្បីការពារអំណះអំណាងរបស់គាត់ដែលគ្មានមូលដ្ឋានច្បាស់លាស់នោះទេ។
លោក ហ៊ុន ម៉ាណែត និយាយថា លោក សម រង្ស៊ី មានអាយុច្រើនហើយ ល្មមដល់ពេលសម្រាក និងលះបង់មហិច្ឆតាចង់ធ្វើជានាយករដ្ឋមន្ត្រីរបស់គាត់ហើយ ដើម្បីទុកឱកាសឱ្យយុវជនជំនាន់ក្រោយជាអ្នកតស៊ូជំនួសខ្លួនទៅចុះ បើជ្រុលតែលោក សម រង្ស៊ី ខ្លួនឯងមិនមានភាពក្លាហានចេញមកប្រកួតជាមួយនឹងលោកទៅហើយនោះ។
ការលើកឡើងរបស់លោក ហ៊ុន ម៉ាណែត នៅពេលនេះ បន្ទាប់ពីអតីតមេដឹកនាំបក្សប្រឆាំងរិះគន់កម្រិតវប្បធម៌របស់លោកថាទទួលបានសញ្ញាបត្រយោគយល់ពីសាលាដែលលោកបានរៀននៅក្រៅប្រទេស កាលពីពេលថ្មីៗនេះ។
កាលពីចុងខែកញ្ញា ឆ្នាំ២០១៩ អតីតមេដឹកនាំប្រឆាំង លោក សម រង្ស៊ី ធ្លាប់បានចោទថា សញ្ញាបត្ររបស់លោក ហ៊ុន ម៉ាណែត ពីសាលាបណ្ឌិតសភាយោធាអាមេរិក (United States Military Academy ឬហៅកាត់ថា West Point) ជាសញ្ញាបត្រកម្រិត២ ដែលផ្ដល់ឱ្យជាកិត្តិយសសម្រាប់និស្សិតនាយទាហានបរទេសដែលរៀនក្រោមស្តង់ដារប៉ុណ្ណោះ។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី៣០ ធ្នូ នេះថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០២២ កាន់តែខិតជិតមកដល់ហើយ ប៉ុន្តែអ្នកនយោបាយខ្មែរនៅមិនទាន់មានគោលនយោបាយប្រកួតគ្នា ដើម្បីកសាងជាតិជូនពលរដ្ឋនៅឡើយ តែបែរជានាំគ្នាប្រកួតរឿងបុគ្គលផ្ទាល់ខ្លួនទៅវិញ ខណៈខ្លួនឯងគឺជាបេក្ខភាពនាយករដ្ឋមន្ត្រីអនាគតទៅហើយនោះ។
បណ្ឌិត យ៉ង សាំងកុមារ លើកឡើងថា ការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់នៅឆ្នាំ២០២២ ខាងមុខនេះ ពលរដ្ឋគ្រប់និន្នាការទាំងអស់គួររួបរួមគ្នាជំរុញឱ្យអ្នកដឹកនាំនយោបាយប្រកួតប្រជែងគ្នា ឬភ្នាល់គ្នាលើគោលនយោបាយ ដើម្បីភាពរីកចម្រើនរបស់កម្ពុជា ជាជាងការប្រកួត ឬភ្នាល់ល្បែងដែលគ្រាន់ជាការចាញ់ឈ្នះ ឬបង្កជម្លោះដូចដែលកំពុងកើតមាននៅពេលនេះ។
មន្ត្រីបក្សក្រៅរដ្ឋាភិបាលរូបនេះអះអាងថា គោលនយោបាយដែលអ្នកដឹកនាំគណបក្សនីមួយៗគួរតែរៀបចំសម្រាប់ប្រកួតប្រជែង ដូចជាគោលនយោបាយអាចឱ្យកូនខ្មែរគ្រប់រូបមានឱកាសទទួលបានការអប់រំខ្ពស់ និងមានការងារធ្វើគ្រប់គ្នា កសិករមានជីវភាពធូរធារ ចាស់ជរាមានការឧបត្ថម្ភពីរដ្ឋាភិបាល មានសេវាសុខាភិបាលសម្រាប់ពលរដ្ឋគ្រប់ទីកន្លែង និងគោលនយោបាយអភិរក្សធនធានធម្មជាតិរបស់កម្ពុជាឱ្យបានគងវង់ ជាដើម។
ជុំវិញបញ្ហានេះ ក្រុមឃ្លាំមើលសង្គមលើកឡើងថា សង្គ្រាមប្រដាប់អាវុធនៅកម្ពុជាទំនងជាត្រូវបញ្ចប់ក៏ពិតមែន ប៉ុន្តែសង្គ្រាមថ្មីកំពុងតែកើតឡើងលើពលរដ្ឋខ្មែរយ៉ាងពិតប្រាកដ ដែលបណ្តាលមកពីឥស្សរជននយោបាយជាន់ខ្ពស់ដែលពួកគេព្យាយាមយកឈ្នះចាញ់គ្នាគ្រប់រូបភាព ដោយមិនបានគិតគូរពីសុខទុក្ខរបស់ប្រទេសជាតិ និងពលរដ្ឋខ្លួនឯងទាល់តែសោះ។
ក្រុមអ្នករិះគន់និយាយថា ល្បែងភ្នាល់របស់អ្នកនយោបាយដើម្បីយកឈ្នះគ្នានោះ មិនបានជួយអ្វីបន្តិចសោះដល់ជាតិ និងប្រជាជនខ្មែរ ជាពិសេសការគោរពសិទ្ធិមនុស្សកាន់តែធ្លាក់ដុនដាបទៅៗ ប្រព័ន្ធប្រជាធិបតេយ្យក៏ប្រឈមនឹងការរំលោភពីអ្នកមានអំណាចឥតឈប់ឈរ។ ចំណែកពលរដ្ឋត្រូវរស់នៅក្នុងភាពភ័យខ្លាច ដែលប្រឈមនឹងការចាប់ខ្លួនជាប្រចាំផងដែរ៕