លោកនាយករដ្ឋមន្ត្រី ហ៊ុន សែន ស្នើឱ្យប្រេសិតពិសេសថ្មីរបស់អគ្គលេខាធិការអង្គការសហប្រជាជាតិ ទទួលបន្ទុកកិច្ចការភូមា អ្នកស្រី ណូលីន ហេយហ្សឺ (Noeleen Hayzer) ធ្វើកិច្ចការដោយផ្ទាល់ជាមួយប្រេសិតពិសេសរបស់ប្រធានអាស៊ាន លោក ប្រាក់ សុខុន ដើម្បីដោះស្រាយវិបត្តិនៅភូមា។
លោក ហ៊ុន សែន បានសរសេរលើទំព័រ Facebook របស់លោកនៅថ្ងៃទី១៣ ខែមករា ឆ្នាំ២០២២ នេះថា ទស្សនកិច្ចរបស់លោកទៅកាន់ប្រទេសភូមា កាលពីពេលថ្មីៗនេះ គឺមិនចេញឆ្ងាយពីធម្មនុញ្ញអាស៊ានឡើយ ហើយក៏មិនឃ្លាតឆ្ងាយពីគោលការណ៍ដែលអាស៊ានទាំង ១០ប្រទេសបានឯកភាពគ្នាទាំង ៥ចំណុចកាលពីពេលកន្លងទៅនោះដែរ។
លោកអះអាងថា គោលដៅសំខាន់ក្នុងដំណើរទស្សនកិច្ចរបស់លោកនោះ គឺចង់រកមធ្យោបាយដើម្បីបញ្ចប់អំពើហិង្សា និងបញ្ចប់បទឈប់បាញ់ដែលជាកត្តាសំខាន់ ស្ថិតនៅក្នុងចំណុចកុងសង់ស៊ីសទាំង៥ របស់អាស៊ាន ហើយជាងនេះទៀត ក៏ដើម្បីរកវិធីផ្ដល់ជំនួយមនុស្សធម៌ដល់ប្រទេសភូមាដែលកំពុងតែត្រូវការយ៉ាងចាំបាច់នៅពេលនេះផងដែរ។
បុរសខ្លាំងនៅកម្ពុជា លោក ហ៊ុន សែន បញ្ជាក់ថា វិបត្តិរបស់អាស៊ានមិនអាចបន្តជាប់គាំងដូចសព្វថ្ងៃនេះទៀតទេ ដូច្នេះអាស៊ានត្រូវតែរកមធ្យោបាយដោះស្រាយបញ្ហាជាប់គាំងនេះ ដើម្បីចាប់យកឱកាសក្នុងការចរចា។ លើសពីនេះ កិច្ចការផ្ទៃក្នុងរបស់អាស៊ានត្រូវតែមានការឯកភាពគ្នា ដើម្បីធ្វើការជាមួយគ្នាបន្តទៀត ក្នុងនោះដំណោះស្រាយជាអាទិភាពដែលត្រូវធ្វើនោះ គឺការធានានូវបទឈប់បាញ់ និងបញ្ចប់អំពើហិង្សា ព្រមទាំងការផ្ដល់ជំនួយមនុស្សធម៌សម្រាប់ភូមា ថែមទៀត។
នៅថ្ងៃទី១៣ ខែមករា ឆ្នាំ២០២២ នេះ លោក ហ៊ុន សែន បានបើកកិច្ចប្រជុំតាមប្រព័ន្ធវីដេអូជាមួយប្រេសិតពិសេសថ្មីរបស់អគ្គលេខាធិការអង្គការសហប្រជាជាតិ ទទួលបន្ទុកកិច្ចការមីយ៉ាន់ម៉ា អ្នកស្រី ណូលីន ហេយហ្សឺ (Noeleen Hayzer) ក្នុងនោះលោក ហ៊ុន សែន ស្នើឱ្យអ្នកស្រី ណូលីន ហេយហ្សឺ ធ្វើកិច្ចការដោយផ្ទាល់ជាមួយប្រេសិតពិសេសរបស់ប្រធានអាស៊ាន លោក ប្រាក់ សុខុន ដើម្បីរកដំណោះស្រាយវិបត្តិនៅភូមាផងដែរ។
នាយកប្រតិបត្តិអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៣ មករា នេះថា ការស្នើឱ្យមានការចូលរួមពីអគ្គលេខាធិការអង្គការសហប្រជាជាតិ គឺជារឿងវិជ្ជមានសម្រាប់ការរកដំណោះស្រាយវិបត្តិនៅភូមា។ លោកថាជាងនេះទៀត វិធានការដែលចាំបាច់នោះ កម្ពុជាត្រូវតែជំរុញឱ្យរបបសឹកភូមា អនុវត្តគោលការណ៍ ៥ចំណុចឱ្យបាន។
លោកបន្តថា ការធ្វើបែបនេះ ទើបអាចធានាបាននូវការដោះស្រាយវិបត្តិរបស់ភូមាផង និងមិនធ្វើឱ្យជះឥទ្ធិពលអាក្រក់ទៅលើសមាគមអាស៊ានផង ហើយមិនត្រឹមតែប៉ុណ្ណោះ ក៏អាចរក្សាកិត្តិយសកម្ពុជាក្នុងនាមជាប្រធានអាស៊ានប្តូរវេននេះដែរ។
បណ្ឌិត សេក សុជាតិ អះអាងថា ប្រសិនបើកម្ពុជាចេញមុខដោះស្រាយវិបត្តិភូមាតែឯកឯងដោយគ្មានការចូលរួមពីភាគីពាក់ព័ន្ធទេ នោះគឺជាការលំបាក និងមានភាពផុយស្រួលយ៉ាងខ្លាំងដែលនឹងធ្វើឱ្យសមាគមអាស៊ានជួបនូវវិបត្តិបន្ថែមទៀត ដូច្នេះការជួយជ្រោមជ្រែងពីបណ្តាប្រទេសជាសមាជិកអាស៊ាន គឺជាកត្តាសំខាន់ណាស់ ដើម្បីការពារមុខមាត់កម្ពុជាផង និងការពារនូវការប្រេះឆាសមាគមអាស៊ានផងដែរ។
ក្រុមអ្នកសង្កេតការណ៍លើកឡើងថា លោក ហ៊ុន សែន គ្មានជម្រើសណាល្អដើម្បីជួយស្ដារមុខមាត់មេដឹកនាំយោធាផ្ដាច់ការភូមាតាមគ្រប់វិធីនោះទេ ព្រោះថាការដួលរលំរបបសឹកភូមា នឹងធ្វើឱ្យមហាអំណាចកុម្មុយនីស្តចិនខាតបង់សេដ្ឋកិច្ចធ្ងន់ធ្ងរ ដូច្នេះក្នុងនាមលោក ហ៊ុន សែន ជាកូនបំណុលរបស់ចិន មានតែទៅជួយដោះស្រាយវិបត្តិនៅភូមា ដើម្បីការពារផលប្រយោជន៍ឱ្យចិន ស្របពេលដែលខ្លួនជាប្រធានអាស៊ានប្តូរវេននៅពេលនេះ៕