អ្នកឃ្លាំមើលបានផ្តល់អនុសាសន៍ ៦យ៉ាងដល់រដ្ឋាភិបាលលោក ហ៊ុន សែន ឲ្យប្រញាប់ទម្លាក់ចោលការចោទប្រកាន់មេដឹកនាំគណបក្សសង្គ្រោះជាតិ លោក កឹម សុខា ពីបទក្បត់ជាតិ។
អតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី បណ្ឌិត សូ ណារ៉ូ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី២៤ ខែមករា នេះថា បើពិនិត្យលើផ្លូវច្បាប់ គេនឹងមើលឃើញថា ការបន្តបិទសិទ្ធិសេរីភាពលោក កឹម សុខា គឺខុសនីតិវិធីច្បាប់ទាំងស្រុង ហើយការធ្វើបែបនេះគឺជាកំហុសយ៉ាងធ្ងន់ធ្ងរដែលបង្កឡើងដោយតុលាការកម្ពុជា។
ជាងនេះទៅទៀត បើមើលលើទិដ្ឋភាពនយោបាយ បក្សកាន់អំណាចរបស់លោក ហ៊ុន សែន នឹងទទួលរងនូវការរិះគន់កាន់តែខ្លាំងពីមជ្ឈដ្ឋានជាតិ និងអន្តរជាតិ ព្រោះថាពួកគេដឹងយ៉ាងច្បាស់ថា ការចាប់ខ្លួនលោក កឹម សុខា គឺជារឿងនយោបាយដើម្បីបំបិទសំឡេងប្រឆាំងជិតកន្លះនគរប៉ុណ្ណោះ មិនមែនមេដឹកនាំប្រឆាំងប្រព្រឹត្តខុសច្បាប់របស់កម្ពុជានោះទេ។
បណ្ឌិត សូ ណារ៉ូ អះអាងថា ប្រសិនបើសំណុំរឿងរបស់លោក កឹម សុខា នៅតែអូសបន្លាយស្របពេលកម្ពុជាធ្វើជាប្រធានអាស៊ានប្តូរវេននេះ គឺបង្ហាញយ៉ាងច្បាស់នូវភាពអយុត្តិធម៌សង្គមកាន់តែខ្លាំងនៅកម្ពុជាទៅកាន់ឆាកអន្តរជាតិ ដែលនឹងរុញច្រានកម្ពុជាឱ្យទៅក្នុងអស្ថិរភាពនយោបាយដែលបង្កនូវវិបត្តិរាប់មិនអស់ដល់ពលរដ្ឋខ្មែរ។
ជាងនេះទៀត នៅពេលដែលការបោះឆ្នោតអសកល និងការបោះឆ្នោតជាតិមកដល់ ហើយមេដឹកនាំបក្សប្រឆាំងនៅតែមិនអាចទទួលបានសិទ្ធិសេរីភាពពេញលេញឡើងវិញដើម្បីចូលរួមការបោះឆ្នោតនៅកម្ពុជាទេ នោះការបោះឆ្នោតនោះនឹងមិនទទួលបានការស្វាគមន៍ពីពលរដ្ឋឡើយ ដោយសារតែខ្លួនបានយកមេបក្សប្រឆាំងធ្វើជាចំណាប់ខ្មាំង។
បណ្ឌិត សូ ណារ៉ូ បន្តថា ការរិះគន់របស់អន្តរជាតិក៏ជាទិដ្ឋភាពមួយដែលរដ្ឋាភិបាលរបស់លោក ហ៊ុន សែន ត្រូវតែពិចារណាកាន់តែខ្លាំងផងដែរ ព្រោះថាសព្វថ្ងៃនេះ ទាំងសហភាពអឺរ៉ុប និងសហរដ្ឋអាមេរិក ចង់ឃើញរដ្ឋាភិបាលកម្ពុជាបើកលំហលទ្ធិប្រជាធិបតេយ្យឡើងវិញ ជាពិសេសគឺការដោះលែងមេដឹកនាំបក្សប្រឆាំងនេះតែម្តង ដើម្បីឱ្យកម្ពុជាអាចទម្លាយភាពទាល់ច្រករបស់ខ្លួនដែលជាប់គាំង។
ការអះអាងនេះ ធ្វើដើម្បីជំរុញឱ្យបក្សកាន់អំណាចលើកលែងការចោទប្រកាន់លើមេដឹកនាំបក្សប្រឆាំងដែលកំពុងរងនូវការរឹតត្បិតសេរីភាពក្រោមបទចោទទាំងអយុត្តិធម៌ ថាឃុបឃិតជាមួយរដ្ឋបរទេសពីសំណាក់តុលាការកម្ពុជាសព្វថ្ងៃនេះ។
ចំណែកអតីតប្រធានចលនានិស្សិតដើម្បីលទ្ធិប្រជាធិបតេយ្យ (SMD) លោក សារ៉ូ សុវិជ័យ បានលើកឡើងនៅក្នុងកិច្ចពិភាក្សានេះដែរថា មេដឹកនាំបក្សកាន់អំណាច លោក ហ៊ុន សែន មិនគួរបន្តធ្វើទុក្ខបុកម្នេញលើមេដឹកនាំបក្សប្រឆាំងនោះទេ ព្រោះថាលោក កឹម សុខា គឺជាមេដឹកនាំនយោបាយអហិង្សា និងស្លូតត្រង់មួយរូបដែលមិនបង្កគ្រោះថ្នាក់សម្រាប់ប្រទេសជាតិនោះឡើយ។
ដោយឡែកអ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក គឹម សុខ បានសរសេរលើគណនី Facebook របស់លោកនៅថ្ងៃទី២៥ មករា នេះថា ប្រធានគណបក្សសង្គ្រោះជាតិ លោក កឹម សុខា មិនផ្លាស់ប្ដូរឧត្តមគតិជាតិរបស់គាត់នោះទេនៅពេលនេះ ប៉ុន្តែគាត់គួរតែបញ្ចេញសកម្មភាពនយោបាយរបស់ខ្លួនឱ្យសកម្មជាងនេះបន្ថែមទៀត។
ទោះជាយ៉ាងណាក៏ដោយ លោក គឹម សុខ មិនបានបញ្ជាក់ឲ្យបានច្បាស់នៅឡើយទេថា តើសកម្មភាពបន្ថែមនោះជាសកម្មភាពអ្វីឲ្យប្រាកដ។
មេដឹកនាំបក្សប្រឆាំង លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីចុងឆ្នាំ២០១៧ ពីបទឃុបឃិតជាមួយរដ្ឋបរទេស ប៉ុន្តែរហូតមកទល់នឹងពេលនេះ ប្រធានបក្សប្រឆាំងរូបនេះនៅតែមានភាពស្អាតស្អំនៅឡើយ ព្រោះថាលោកមិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ ខណៈតុលាការកម្ពុជាកំពុងដំណើរការសវនាការរបស់លោកឡើងវិញនៅពេលនេះ៕