កិច្ចព្រមព្រៀងសម្ងាត់មានទំហំទឹកប្រាក់ជាង ៧០ម៉ឺនដុល្លារអាមេរិក ដែលរដ្ឋាភិបាលរបស់លោក ហ៊ុន សែន ចំណាយសម្រាប់ឆ្នាំ២០២២ ក្នុងការជួលក្រុមហ៊ុន អាឃីន ហ្គាំ ឲ្យជួយបញ្ចុះបញ្ចូលរដ្ឋាភិបាលអាមេរិកដើម្បីស្ដារទំនាក់ទំនងទ្វេភាគីកម្ពុជា និងអាមេរិកឡើងវិញ ត្រូវបានក្រសួងយុត្តិធម៌អាមេរិក លាតត្រដាងកាលពីពេលថ្មីៗនេះ។
កិច្ចព្រមព្រៀងជួលក្រុមមេធាវីអាមេរិកាំងមួយដែលចុះហត្ថលេខាដោយតំណាងឯកអគ្គរាជទូតកម្ពុជាប្រចាំសហរដ្ឋអាមេរិក លោក ខឹម រុយស៊ុន (Khem Ruyzun) កាលពីថ្ងៃទី៥ ខែមករា ឆ្នាំ២០២២ ដែលត្រូវបានបែកធ្លាយកាលពីថ្ងៃទី២១ ខែមករា នេះ បានបញ្ជាក់យ៉ាងច្បាស់ថា រដ្ឋាភិបាលកម្ពុជារបស់លោក ហ៊ុន សែន បានចំណាយប្រាក់ ៦ម៉ឺនដុល្លារអាមេរិកក្នុងមួយខែៗលើក្រុមហ៊ុន អាឃីន ហ្គាំ (AKIN GUMP STRAUSS HAUER & FELD LLP) ឲ្យជួយបញ្ចុះបញ្ចូលរដ្ឋាភិបាលអាមេរិក ដើម្បីស្ដារទំនាក់ទំនងទ្វេភាគីកម្ពុជា និងអាមេរិកឡើងវិញ។
កិច្ចព្រមព្រៀងខាងលើបង្ហាញថា ចាប់ពីថ្ងៃទី១ ខែមករា ឆ្នាំ២០២២ រហូតដល់ថ្ងៃទី១ ខែមករា ឆ្នាំ២០២៣ រដ្ឋាភិបាលកម្ពុជាត្រូវបង់លុយសរុប ៧២ម៉ឺនដុល្លារអាមេរិក ជាថ្នូរនឹងការផ្តល់សេវាកម្មប្រឹក្សាដើម្បីកសាងនូវការយល់ដឹងអំពីគ្នាកាន់តែប្រសើរឡើង ដែលនឹងជួយធ្វើឱ្យជឿនលឿនទៅមុខនៃទំនាក់ទំនងទ្វេភាគីរវាងកម្ពុជា និងសហរដ្ឋអាមេរិក។
ការជួលក្រុមហ៊ុនបរទេសឲ្យជួយបញ្ចុះបញ្ចូលរដ្ឋាភិបាលអាមេរិក កុំឱ្យដាក់ទណ្ឌកម្មលើរដ្ឋាភិបាលកម្ពុជានេះ មិនមែនជាលើកទី១ទេ បើទោះបីជាមេដឹកនាំបក្សកាន់អំណាចធ្លាប់ផ្គើនសហរដ្ឋអាមេរិកឱ្យអនុម័តច្បាប់ដាក់ទណ្ឌកម្មលើរដ្ឋាភិបាលរបស់ខ្លួននាពេលកន្លងមកក៏ដោយ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី២៧ មករា នេះថា រដ្ឋាភិបាលដែលដឹកនាំដោយមេដឹកនាំបក្សកាន់អំណាច លោក ហ៊ុន សែន ធ្វើឲ្យប្រជាពលរដ្ឋខ្មែរហូរឈាម និងទឹកភ្នែកច្រើនណាស់ដោយសារអំពើពុករលួយ បក្ខពួកនិយម និងការរំលោភអំណាចពីសំណាក់ក្រុមគ្រួសារអ្នកដឹកនាំទាំងនោះ។
លោក គឹម សុខ អះអាងថា សហរដ្ឋអាមេរិកប្រយ័ត្នប្រយែងណាស់ចំពោះការចងមិត្តជាមួយលោក ហ៊ុន សែន ពីព្រោះប្រវត្តិនៃការដឹកនាំរបស់គាត់ប្រឡាក់ប្រឡូកដោយអំពើឧក្រិដ្ឋច្រើនហួសដល់កម្រិតអន្តរជាតិទៀតផង ដូចជាឧក្រិដ្ឋសង្គ្រាមកាលពីឆ្នាំ១៩៩៧ ជាដើម។ ជាងនេះទៀត លោក ហ៊ុន សែន បានសម្លាប់ប្រជាធិបតេយ្យ រំលោភសិទ្ធិមនុស្សយ៉ាងធ្ងន់ធ្ងរ ជាពិសេសតំណែងនាយករដ្ឋមន្ត្រីរបស់គាត់សព្វថ្ងៃនេះ បានក្លាយជាសត្រូវនៃឆន្ទៈរបស់ប្រជាពលរដ្ឋខ្មែរភាគច្រើនលើសលប់ទៅហើយ។
អ្នកវិភាគរូបនេះបញ្ជាក់ថា ក្រោមការដឹកនាំដែលគ្មានសមត្ថភាពធ្វើជាមេដឹកនាំល្អស្របតាមគោលការណ៍លទ្ធិប្រជាធិបតេយ្យ លោក ហ៊ុន សែន គ្មានជម្រើសផ្សេងក្រៅពីបំផ្លាញជាតិប្រមូលលុយតាមវិធីពុករលួយ ទៅជួលក្រុមហ៊ុនឯកជនដើម្បីបញ្ចុះបញ្ចូលទៅក្រុមប្រទេសសេរីប្រជាធិបតេយ្យ ឲ្យជួយកាត់បន្ថយទណ្ឌកម្មលើរដ្ឋាភិបាលឯកបក្សរបស់គាត់ទេ។
ទាក់ទិននឹងបញ្ហានេះ កាលពីឆ្នាំ២០១៨ លោក ហ៊ុន សែន បានចំណាយលុយប្រមាណជាង ១លាន ២សែនដុល្លារ និងឆ្នាំ២០២១ បានចំណាយទឹកប្រាក់ប្រមាណជា ៧ម៉ឺនដុល្លារអាមេរិកក្នុងមួយខែៗដោយគ្មានកាលកំណត់លើក្រុមហ៊ុន ខ័រវីស (Qorvis LLC) ក្រុមហ៊ុន ប៉ាករីម ប្រ៊ីជីស (PacRim Bridges) និងក្រុមហ៊ុន ប្រោនស្តាញ ហៃយ៉ាត់ ហ្វាប៊័រ ស្រិក (Brownstein Hyatt Farber Schreck) ឱ្យជួយបញ្ចុះបញ្ចូលរដ្ឋាភិបាលអាមេរិកកុំឱ្យធ្វើច្បាប់ដាក់ទណ្ឌកម្មមកលើរដ្ឋាភិបាលរបស់លោកបន្តទៀត៕