មេដឹកនាំបក្សប្រឆាំងដែលកំពុងរងការចោទប្រកាន់ទាំងអយុត្តិធម៌ លោក កឹម សុខា បានផ្ញើសារថ្លែងអំណរគុណទៅកាន់ប្រជាពលរដ្ឋខ្មែរទាំងក្នុង និងក្រៅប្រទេស អង្គការសង្គមស៊ីវិល អ្នកសារព័ត៌មានជាតិ និងអន្តរជាតិ និងតំណាងអង្គទូតដែលបានតាមដាននូវដំណើរការសវនាការរបស់លោក។
ប្រធានគណបក្សសង្គ្រោះជាតិ ដែលកំពុងរងការរឹតត្បិតសេរីភាព លោក កឹម សុខា បានសរសេរលើទំព័រ Facebook របស់លោកនៅថ្ងៃទី២៧ ខែមករា ឆ្នាំ២០២២ នេះថា ទោះបីរូបលោកមិនទាន់បានទទួលយុត្តិធម៌ក៏ដោយ ក៏លោកនៅតែសម្ដែងការដឹងគុណយ៉ាងជ្រាលជ្រៅចំពោះសហមេធាវីការពារក្តីទាំង ៤រូប សហការី អង្គការសង្គមស៊ីវិល អ្នកសារព័ត៌មានជាតិ និងអន្តរជាតិ និងអ្នកការទូតតំណាងប្រទេសជាមិត្តរបស់កម្ពុជាទាំងអស់ ដែលបានតាមដានដំណើរការសវនាការរបស់លោកដោយយកចិត្តទុកដាក់រហូតមក។
លោក កឹម សុខា អះអាងថា បណ្តាអង្គទូតនៃប្រទេសជាមិត្តរបស់កម្ពុជាតែងយកចិត្តទុកដាក់នឹងសំណុំរឿងរបស់លោកជានិច្ច ជាក់ស្តែងបន្ទាប់ពីសវនាការកាលពីថ្ងៃទី១៩ ខែមករា បានមួយថ្ងៃ ឯកអគ្គរាជទូតប្រទេសថៃ និងឯកអគ្គរាជទូតប្រទេសន័រវែស បានទៅជួបលោកដោយផ្ទាល់ដល់គេហដ្ឋាន ដើម្បីសាកសួរអំពីដំណើរការនៃសវនាការនោះ។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី២៧ ខែមករា នេះថា សង្វៀននយោបាយកម្ពុជាបច្ចុប្បន្ន គឺជាសង្វៀនរបស់បក្សកាន់អំណាចផ្ដាច់មុខប៉ុណ្ណោះ មិនមែនជាសង្វៀននយោបាយស្របនឹងរដ្ឋធម្មនុញ្ញសម្រាប់អ្នកនយោបាយខ្មែរអាចចូលរួមសកម្មភាពដោយសេរី និងស្របច្បាប់ដែលពួកគេចង់បាននោះឡើយ។
លោក ហ៊ុន កុសល រិះគន់ថា ការបន្តបិទសិទ្ធិនយោបាយរបស់មេដឹកនាំបក្សប្រឆាំង លោក កឹម សុខា សព្វថ្ងៃនេះ គឺអាចបញ្ជាក់យ៉ាងច្បាស់ថា សង្វៀននយោបាយនៅកម្ពុជាគឺស្ថិតក្នុងដៃគូសវាសរបស់បក្សកាន់អំណាចទាំងស្រុង ដូច្នេះលំហប្រជាធិបតេយ្យក៏មិនអាចកើតមានបានដែរ។
ចំណែកមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសរសេរលើគណនី Facebook របស់លោកនៅថ្ងៃទី២៧ មករា នេះដែរថា នៅពេលដែលពលរដ្ឋមានការយល់ដឹងខ្ពស់ នោះនឹងធ្វើឲ្យអ្នកនយោបាយប្រជាភិថុតិមិនអាចឈរជើងឲ្យប្រជាពលរដ្ឋគាំទ្រពួកគេលើសង្វៀននយោបាយ ដែលមានការប្រកួតប្រជែងដោយត្រឹមត្រូវបានទៀតឡើយ។
នៅថ្ងៃទី២៧ ខែមករា ឆ្នាំ២០២២ នេះ អគ្គនាយកទទួលបន្ទុកតំបន់អាស៊ីនៃការិយាល័យការបរទេសរដ្ឋាភិបាលសហព័ន្ធអាល្លឺម៉ង់ អ្នកស្រី ផេត្រា ស៊ីកម៉ុនដ៏ (Petra Sigmund) បានសរសេរលើបណ្ដាញសង្គមទ្វីធ័រផ្លូវការរបស់ខ្លួនថា ពិតជាល្អណាស់ដែលអ្នកស្រីបានជួបមេដឹកនាំបក្សប្រឆាំង លោក កឹម សុខា ដោយការផ្លាស់ប្ដូរយោបល់គ្នាអំពីកិច្ចការបច្ចុប្បន្ន ស្ថានភាពនៃការជំនុំជម្រះក្តីរបស់លោក និងក្តីសង្ឃឹមសម្រាប់ការសន្និដ្ឋានបញ្ចប់ដោយយុត្តិធម៌ និងឆាប់រហ័សនៃសវនាការនេះ។ អ្នកស្រីបញ្ជាក់ថា សហព័ន្ធអាល្លឺម៉ង់ គាំទ្រកម្ពុជាឱ្យមានពហុបក្ស វិបុលភាព និងសន្តិវិធី។
មេដឹកនាំបក្សប្រឆាំង លោក កឹម សុខា ត្រូវអាជ្ញាធរក្រុងភ្នំពេញចាប់ខ្លួន និងបន្តឃារឃាំងសិទ្ធិសេរីភាពនយោបាយរបស់លោកអស់រយៈពេលជាង ៤ឆ្នាំមកហើយ ប៉ុន្តែរហូតមកទល់នឹងពេលនេះ តុលាការនៅតែមិនទាន់កាត់ទោសលោកពីបទល្មើសណាមួយនៅឡើយទេ ខណៈសវនាការរបស់លោកចេះតែអូសបន្លាយដោយគ្មានពេលកំណត់។
ជុំវិញសវនាការមេដឹកនាំបក្សប្រឆាំងនេះ សមាជិកសភាសហរដ្ឋអាមេរិក លោក ស្ទីវ ឆាបុត (Steve Chabot) កាលពីថ្ងៃទី១៧ ខែមករា ឆ្នាំ២០២២ អះអាងថា ការចោទប្រកាន់ពីបទក្បត់ជាតិលើលោក កឹម សុខា គឺជារឿងនយោបាយសុទ្ធសាធ៕