29 C
Phnom Penh

លោក ហ៊ុន សែន ទទួល​បាន​ពានរង្វាន់​សន្តិភាព​ស៊ុនហាក់​ឆ្នាំ​២០២២​ដោយសារ​មាន​ស្នាដៃ​កសាង​សន្តិភាព

ដោយ ឌឹ ខេមបូឌា ដេលី

បទវិភាគ

មេដឹកនាំ​ខ្មែរ​ដែល​ឧស្សាហ៍​គំរាម​សម្លាប់​គូប្រជែង​នយោបាយ​របស់​ខ្លួន លោក ហ៊ុន សែន ទទួល​បាន​ពានរង្វាន់​សន្តិភាព​ស៊ុនហាក់ សម្រាប់​ឆ្នាំ​២០២២ ពី​មូលនិធិ​ពានរង្វាន់​សន្តិភាព​ស៊ុនហាក់​របស់​ប្រទេស​កូរ៉េ​ខាងត្បូង ដោយសារ​មាន​ស្នាដៃ​ក្នុង​ការ​កសាង​សន្តិភាព និង​ការ​អភិវឌ្ឍ​ដ៏​ធំធេង​សម្រាប់​មនុស្ស​ជាតិ។

លោក ហ៊ុន សែន បាន​ទម្លាយ​លិខិត​មួយ​ដែល​ទទួល​បាន​ពី​មូលនិធិ​ពានរង្វាន់​ស៊ុនហាក់​តាមរយៈ​អង្គភាព​សារព័ត៌មាន​ដែល​ស្និទ្ធ​នឹង​ខ្លួន Fresh News កាលពី​ថ្ងៃ​ទី​២៩ ខែ​មករា ឆ្នាំ​២០២២ ដែល​មាន​ខ្លឹមសារ​ថា ការ​ផ្តល់​ពានរង្វាន់​នេះ​ដោយសារតែ​លោក ហ៊ុន សែន បាន​រួមចំណែក​ក្នុង​ការ​អភិវឌ្ឍ​សេដ្ឋកិច្ច និង​កសាង​សន្តិភាព​នៅ​ក្នុង​ប្រទេស​កម្ពុជា និង​នៅ​ក្នុង​តំបន់​អាស៊ី​អាគ្នេយ៍​ទាំងមូល។

ប្រភព​ដដែល​អះអាង​ថា គណៈកម្មាធិការ​មូលនិធិ​ពានរង្វាន់​សន្តិភាព​ស៊ុនហាក់​បាន​ទទួលស្គាល់​លើ​កិច្ច​ខិតខំ​ប្រឹងប្រែង​របស់​មេដឹកនាំ​ខ្មែរ​ដែល​គំរាម​កាន់​អំណាច​ត​ត្រកូល លោក ហ៊ុន សែន ក្នុង​ការ​លើក​កម្ពស់​សន្តិភាព​នៅ​ក្នុង​តំបន់​អាស៊ី​ប៉ាស៊ីហ្វិក​ដ៏​ទូលំទូលាយ រួម​ទាំង​ការ​អំពាវនាវ​ឱ្យ​បង្កើត​សហភាព​អាស៊ី​ប៉ាស៊ីហ្វិក​ផង​ដែរ។

ការ​ទម្លាយ​លិខិត​មូលនិធិ​ពានរង្វាន់​សន្តិភាព​ស៊ុនហាក់​នេះ ធ្វើឡើង​ស្រប​ពេល​ដែល​កម្ពុជា​កំពុង​រង​ការ​រិះគន់​យ៉ាង​ខ្លាំង​លើ​មេដឹកនាំ​បក្ស​កាន់​អំណាច ទាំង​ការ​ដឹកនាំ​ប្រទេស​កម្ពុជា និង​ការ​ដឹកនាំ​អាស៊ាន​ដែល​ខ្លួន​កំពុង​ធ្វើជា​ប្រធាន​ប្តូរ​វេន​នៅ​ឆ្នាំ​២០២២ នេះ។

ជុំវិញ​ការ​ផ្តល់​ជូន​មេដឹកនាំ​កម្ពុជា​នូវ​ពានរង្វាន់​ស៊ុនហាក់​នេះ កូនប្រុស​លោក ហ៊ុន សែន គឺ​លោក ហ៊ុន ម៉ានី បាន​អះអាង​ថា ពានរង្វាន់​នេះ​មិន​ត្រឹមតែ​ជា​ការ​ទទួលស្គាល់​នូវ​គុណូបការៈ​របស់​ឪពុក​លោក​ចំពោះ​សន្តិភាព​ប៉ុណ្ណោះ​ទេ តែ​ក៏​ជា​ការ​បង្ហាញ​ពី​សមិទ្ធផល​សន្តិភាព​កម្ពុជា​ដែល​កំពុង​មាន​សព្វថ្ងៃ​នេះ​ផង​ដែរ។

ប្រធាន​ក្រុមប្រឹក្សាភិបាល​នៃ​ចលនា​ពលរដ្ឋ​ដើម្បី​លទ្ធិប្រជាធិបតេយ្យ លោក ម៉ែន ណាត បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៣១ មករា នេះ​ថា ការ​ផ្តល់​ពានរង្វាន់​នេះ គឺ​គ្រាន់តែ​បង្ហាញ​នូវ​សមានចិត្ត​សប្បុរសធម៌​របស់​គណៈកម្មាធិការ​មូលនិធិ​ពានរង្វាន់​សន្តិភាព​ស៊ុនហាក់​ប៉ុណ្ណោះ ព្រោះ​ការ​ផ្តល់​នេះ​គ្រាន់តែ​ជា​ការ​ជួយ​លើក​ទឹកចិត្ត​លោក ហ៊ុន សែន ដែល​កំពុង​រង​នូវ​ភាព​អាម៉ាស់ ដែល​បរាជ័យ​ពី​អំនួត​នយោបាយ​ការទូត​របស់​លោក​ក្នុង​ដំណើរ​ទស្សនកិច្ច​ទៅកាន់​ប្រទេស​ភូមា កាលពី​ពេល​ថ្មីៗ​នេះ។

លោក ម៉ែន ណាត បញ្ជាក់​ថា ការ​ចេញ​លិខិត​អបអរ​សាទរ​របស់​មន្ត្រី​រដ្ឋាភិបាល​កម្ពុជា​ចំពោះ​ពានរង្វាន់​នេះ មិនមែន​ជា​ការ​អបអរ​សាទរ​ដោយ​ស្មោះត្រង់​នោះ​ទេ ប៉ុន្តែ​ពួកគេ​ធ្វើ​ដើម្បី​តែ​យកចិត្ត​លោក ហ៊ុន សែន ក្នុង​ការ​រក្សា​តំណែង​របស់​ខ្លួន​ប៉ុណ្ណោះ ត្បិត​លោក ហ៊ុន សែន ពេលនេះ​កំពុង​បាក់​មុខ​លើ​ឆាក​អន្តរជាតិ​យ៉ាង​ធ្ងន់ធ្ងរ ជាពិសេស​សហរដ្ឋ​អាមេរិក​គ្រោង​នឹង​លុប​កិច្ចប្រជុំ​អាស៊ាន-អាមេរិក នៅ​ខែ​កុម្ភៈ ខាងមុខ​នេះ​ផង​ដែរ​នោះ។

ក្រុម​អ្នក​សង្កេតការណ៍​រិះគន់​ថា ក្រោម​ការ​ដឹកនាំ​កម្ពុជា​ជាង ៤០​ឆ្នាំ​មកនេះ លោក ហ៊ុន សែន មិន​ទាន់​អាច​រក​សន្តិភាព​ជូន​ពលរដ្ឋ​ខ្មែរ​បាន​នៅឡើយ​ទេ ខណៈ​សន្តិភាព​ដែល​បក្ស​កាន់​អំណាច​តែង​ប្រកាស​កន្លងមក គឺជា​សន្តិភាព​ក្រោម​ចុង​កាំភ្លើង​របស់​ពួកគេ​តែប៉ុណ្ណោះ។

ប្រភព​ដដែល​បញ្ជាក់​ថា មេដឹកនាំ​កម្ពុជា​ដែល​កំពុង​ដឹកនាំ​រដ្ឋាភិបាល​ឯក​បក្ស​សព្វថ្ងៃ​នេះ ជា​មេដឹកនាំ​ដែល​រំលោភ​រដ្ឋធម្មនុញ្ញ រំលោភ​កិច្ចព្រមព្រៀង​អន្តរជាតិ​ឆ្នាំ​១៩៩១ ជាន់ឈ្លី​លទ្ធិប្រជាធិបតេយ្យ រំលោភ​សិទ្ធិមនុស្ស​យ៉ាង​ធ្ងន់ធ្ងរ និង​គំរាម​កាន់កាប់​អំណាច​ផ្ដាច់មុខ​ត​ត្រកូល​ថែមទៀត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស