34 C
Phnom Penh

អ្នក​ឃ្លាំមើល៖ មេដឹកនាំ​បក្ស​កាន់​អំណាច​ចង​ដៃ​ចង​ជើង​លោក កឹម សុខា ប៉ុន្តែ​បើក​ផ្លូវ​ឱ្យ​បក្ស​ភ្លើង​ទៀន​របស់​លោក សម រង្ស៊ី

ដោយ ឌឹ ខេមបូឌា ដេលី

បទវិភាគ

អតីត​អគ្គ​ទីប្រឹក្សា​ស្ថានទូត​ខ្មែរ​មួយ​រូប រិះគន់​មេដឹកនាំ​បក្ស​កាន់​អំណាច លោក ហ៊ុន សែន ថា​បក្ស​កាន់​អំណាច​ព្យាយាម​បិទ​សិទ្ធិ​សេរីភាព​នយោបាយ​របស់​ប្រធាន​គណបក្ស​សង្គ្រោះ​ជាតិ លោក កឹម សុខា មិន​ឱ្យ​ធ្វើ​សកម្មភាព​នយោបាយ ប៉ុន្តែ​ពួកគេ​បើក​ផ្លូវ​ឱ្យ​ក្រុម​មន្ត្រី​បក្ស​ប្រឆាំង​ភាគី​លោក សម រង្ស៊ី អាច​ធ្វើ​សកម្មភាព​នយោបាយ​ទៅវិញ។

អតីត​អគ្គ​ទីប្រឹក្សា​ស្ថានទូត​ខ្មែរ​ប្រចាំ​ប្រទេស​ឥណ្ឌូនេស៊ី បណ្ឌិត សូ ណារ៉ូ បាន​សរសេរ​លើ​គណនី Facebook របស់​លោក​នៅ​ថ្ងៃ​ទី​៤ កុម្ភៈ នេះ​ថា មេដឹកនាំ​បក្ស​កាន់​អំណាច លោក ហ៊ុន សែន នៅ​ពេលនេះ​បាន​បើក​ដៃ​ពេញ​ទំហឹង​ឲ្យ​គណបក្ស​ភ្លើង​ទៀន ដែល​មាន​អតីត​មេដឹកនាំ​បក្ស​ប្រឆាំង លោក សម រង្ស៊ី បញ្ជា​នៅ​ពីក្រោយ​នៃ​សកម្មភាព​នយោបាយ​គណបក្ស​ភ្លើង​ទៀន នៅ​ពេលនេះ។

បណ្ឌិត សូ ណារ៉ូ អះអាង​ថា នៅ​ពេល​ដែល​លោក ហ៊ុន សែន បើក​ដៃ​ឱ្យ​គណបក្ស​ភ្លើង​ទៀន ដែល​មាន​លោក សម រង្ស៊ី នៅ​ពីក្រោយ​ចាំ​បញ្ជា​សកម្មភាព​បែប​នេះ គឺជា​ចេតនា​ដែល​មេដឹកនាំ​បក្ស​កាន់​អំណាច​ព្យាយាម​បំបែក​កម្លាំង​ប្រជាធិបតេយ្យ​យ៉ាង​ពិតប្រាកដ។ ក្នុង​ន័យ​នេះ បណ្ឌិត សូ ណារ៉ូ លើក​ជា​សំណួរ​ថា តើ​នរណា​បម្រើ​នយោបាយ​ឈ្នះ​ឈ្នះ​របស់​លោក ហ៊ុន សែន ឲ្យ​ពិតប្រាកដ​សព្វថ្ងៃ​នេះ? តើ​ជា​លោក សម រង្ស៊ី ឬ​ក៏​ជា​លោក កឹម សុខា?

ការ​អះអាង​បែប​នេះ ធ្វើឡើង​ស្រប​ពេល​ដែល​មេដឹកនាំ​បក្ស​ប្រឆាំង លោក កឹម សុខា កំពុង​ត្រូវ​រឹតត្បិត​សេរីភាព​គ្រប់​បែប​យ៉ាង ប៉ុន្តែ​គណបក្ស​ភ្លើង​ទៀន ដែល​មាន​លោក សម រង្ស៊ី បញ្ជា​ពីក្រោយ​ខ្នង បែរជា​អាច​ធ្វើ​សកម្មភាព​នយោបាយ​ដោយ​រលូន​ទៅវិញ។

កាលពី​ចុង​ខែ​វិច្ឆិកា ឆ្នាំ​២០២១ គណបក្ស​ភ្លើង​ទៀន បាន​បើក​ពិធី​សមាជ​របស់​ខ្លួន​ដើម្បី​ប្រកាស​តែងតាំង​ថ្នាក់​ដឹកនាំ និង​កែសម្រួល​លក្ខន្តិកៈ​គណបក្ស​ក្នុង​ការ​ចូលរួម​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​ឆ្នាំ​២០២២។

ដោយឡែក​មេដឹកនាំ​បក្ស​ប្រឆាំង លោក កឹម សុខា ត្រូវ​បាន​តុលាការ​អូស​បន្លាយ​សវនាការ​របស់​លោក​ជាបន្តបន្ទាប់ រហូត​មក​ដល់​សវនាការ​ទី​២៩ ហើយ​នៅ​ពេលនេះ ដែល​ត្រូវ​គេ​មើល​ឃើញ​ថា ការ​ចោទប្រកាន់​របស់​តុលាការ គឺជា​រឿង​នយោបាយ ជាជាង​រឿង​ការពារ​យុត្តិធម៌​សង្គម​សម្រាប់​ប្រជាពលរដ្ឋ​ខ្មែរ។

មន្ត្រី​ជាន់ខ្ពស់​គណបក្ស​ប្រឆាំង លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៤ កុម្ភៈ នេះ​ថា សហគមន៍​អន្តរជាតិ​នៅតែ​មាន​ការ​ជឿជាក់​ថា ការ​រក​ដំណោះស្រាយ​នៃ​វិបត្តិ​នយោបាយ​នៅ​កម្ពុជា ដើម្បី​រក​យុត្តិធម៌ និង​តម្លាភាព​លើ​សំណុំរឿង​របស់​លោក កឹម សុខា គឺជា​កត្តា​ជំរុញ​ឱ្យ​មាន​ការ​ផ្សះផ្សា​នយោបាយ​របស់​កម្ពុជា​យ៉ាង​ឆាប់​រហ័ស។

លោក មាជ សុវណ្ណារ៉ា អះអាង​ថា លោក កឹម សុខា ជា​មនុស្ស​ស្អាតស្អំ​មិន​បង្ក​គ្រោះថ្នាក់​ដល់​អ្នក​ដទៃ ឬ​បង្ក​អស្ថិរភាព​ដែល​នាំ​គ្រោះថ្នាក់​ដល់​ជាតិ​ឡើយ ដូច្នេះ​ការ​ចោទប្រកាន់​មេដឹកនាំ​បក្ស​ប្រឆាំង លោក កឹម សុខា ថា​ជា​ជន​ក្បត់​ជាតិ ឃុបឃិត​នឹង​រដ្ឋ​បរទេស​ដើម្បី​ធ្វើ​បដិវត្ត​ពណ៌​ផ្តួល​រលំ​រដ្ឋាភិបាល គ្រាន់តែ​ជម្លោះ​នយោបាយ​ដែល​ត្រូវ​ដោះស្រាយ​រវាង​អ្នក​នយោបាយ និង​អ្នក​នយោបាយ​ប៉ុណ្ណោះ។

ក្រុម​អ្នក​ឃ្លាំមើល​សង្គម​លើកឡើង​ថា លោក កឹម សុខា បាន​ពុះពារ​គ្រប់​ឧបសគ្គ​ជាច្រើន​ដើម្បី​លុបបំបាត់​គំនុំ​ព្យាបាទ​សងសឹក​រវាង​ខ្មែរ​និង​ខ្មែរ រវាង​បុគ្គល​និង​បុគ្គល ដោយ​ការ​ចាប់ផ្តើម​ពី​ខ្លួន​លោក​ផ្ទាល់​ធ្វើជា​គំរូ ដើម្បី​សម្របសម្រួល​នយោបាយ​ជាតិ​ឆ្ពោះ​ទៅ​រក​ការ​ផ្សះផ្សា និង​បង្រួបបង្រួម​ជាតិ​ខ្មែរ​ទាំងមូល​ទៅ​ថ្ងៃ​មុខ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស