28 C
Phnom Penh

ក្រុម​អ្នក​ឃ្លាំមើល​បារម្ភ​អំពី​ការ​បាត់បង់​ធនធាន​មនុស្ស​ដោយសារ​ការ​ចំណាកស្រុក​រក​ការងារ​ធ្វើ​នៅ​ក្រៅ​ប្រទេស

ដោយ ឌឹ ខេមបូឌា ដេលី

បទវិភាគ

អ្នក​ឃ្លាំមើល​សង្គម​ម្នាក់​សម្ដែង​ក្តី​បារម្ភ​អំពី​ការ​បាត់បង់​ធនធាន​មនុស្ស​របស់​កម្ពុជា ដោយសារ​ការ​ធ្វើ​ចំណាកស្រុក​ទៅ​រក​ការងារ​ធ្វើ​នៅ​ប្រទេស​ជិតខាង ដូចជា​ប្រទេស​ថៃ ជាដើម ស្រប​ពេល​ដែល​រដ្ឋាភិបាល​កម្ពុជា​មិន​មាន​លទ្ធភាព​អាច​បង្កើត​ការងារ​ក្នុង​ស្រុក​ឱ្យ​បាន​គ្រប់គ្រាន់​សម្រាប់​ពលរដ្ឋ​របស់​ខ្លួន។

អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត សេង សារី បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia daily កាលពី​រាត្រី​ថ្ងៃ​ទី​៣ ខែ​កុម្ភៈ ឆ្នាំ​២០២២ នេះ​ថា ពលករ​ចំណាកស្រុក​ដែល​ជា​ធនធាន​មនុស្ស​ដ៏​សំខាន់​របស់​កម្ពុជា បាន​ក្លាយ​ជា​ធនធាន​ដ៏​សំខាន់​មួយ​សម្រាប់​ជួយ​ទាញ​ចំណូល​ជាតិ​របស់​ប្រទេស​ថៃ ជាពិសេស​ពលករ​ចំណាកស្រុក​ដែល​កំពុង​ធ្វើការ​នៅ​ប្រទេស​ថៃ ដោយ​ខុសច្បាប់​សព្វថ្ងៃ​នេះ។

បណ្ឌិត សេង សារី កត់សម្គាល់​ឃើញ​ថា ដើម្បី​ប្រើ​ធនធាន​ពលករ​ខ្មែរ​ខុសច្បាប់​ដែល​កំពុង​ធ្វើការ​នៅ​ប្រទេស​ថៃ ឲ្យ​ជួយ​ដល់​សេដ្ឋកិច្ច​ជាតិ​របស់​គេ រដ្ឋាភិបាល​ថៃ​បាន​កំណត់​តម្លៃ​បំពេញ​ឯកសារ​ពី​ពលករ​ខុសច្បាប់​ទៅជា​ពលករ​ស្រប​ច្បាប់​ក្នុង​តម្លៃ​ខ្ពស់ ដែល​ពលករ​ខ្មែរ​ខុសច្បាប់​ទាំងនោះ​មិន​អាច​មាន​លទ្ធភាព​ធ្វើ​បាន។

អ្នក​ស្រាវជ្រាវ​អំពី​ការ​អភិវឌ្ឍ​សង្គម​រូប​នេះ​បញ្ជាក់​ថា ការ​កំណត់​តម្លៃ​ខ្ពស់​បែប​នេះ ដោយសារតែ​រដ្ឋាភិបាល​ថៃ​មាន​ចេតនា​ចង់​ឲ្យ​ពលករ​ខ្មែរ​ខុសច្បាប់​ទាំងនោះ​បន្ត​នៅ​ជា​ពលករ​ខុសច្បាប់​បន្ត​ទៀត ដែល​អាច​ជួយ​ឲ្យ​ថៅកែ​ក្រុមហ៊ុន​ចំណាយ​ប្រាក់ឈ្នួល​ទាប និង​មិន​តម្រូវ​ឲ្យ​ក្រុមហ៊ុន​ចំណាយ​ប្រាក់​លើ​អត្ថប្រយោជន៍​សង្គម ស្រប​តាម​ច្បាប់​ការងារ​លើ​ពលករ​ខុសច្បាប់​ទាំងនោះ​ផង​ដែរ។

ការ​អះអាង​របស់​បណ្ឌិត សេង សារី ស្រប​ពេល​ដែល​ពលរដ្ឋ​ខ្មែរ​បាន​នាំគ្នា​ធ្វើ​ចំណាកស្រុក​ទៅ​រក​ការងារ​ធ្វើ​នៅ​តាម​បណ្តា​ប្រទេស​ជិតខាង​ជាច្រើន​លាន​នាក់ ដោយសារ​បញ្ហា​អត់​មាន​ការងារ​ធ្វើ​នៅ​ក្នុង​ប្រទេស​របស់​ខ្លួន។

នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស លោក មឿន តុលា បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៤ កុម្ភៈ នេះ​ថា បញ្ហា​ពលរដ្ឋ​ចំណាកស្រុក​នៅតែ​ជា​បញ្ហា​រ៉ាំរ៉ៃ ដែល​រដ្ឋាភិបាល​កម្ពុជា​មិនទាន់​អាច​ដោះស្រាយ​បាន​នៅឡើយ ហើយ​ការ​ធ្វើ​ចំណាកស្រុក​របស់​ពលរដ្ឋ​ចេះតែ​កើន​ឡើង​ពី​មួយ​ឆ្នាំ​ទៅ​មួយ​ឆ្នាំ។

លោក មឿន តុលា លើកឡើង​ថា ការ​ព្យាយាម​អួតអាង​របស់​រដ្ឋាភិបាល​អំពី​ការ​ចរចា​ជាមួយ​ប្រទេស​ជិតខាង ដើម្បី​បញ្ជូន​ពលរដ្ឋ​របស់​ខ្លួន​ទៅ​ធ្វើការ​ជា​រឿង​ល្អ​ហើយ ប៉ុន្តែ​ប្រសិន​ការ​ហូរ​ចេញ​របស់​ពលរដ្ឋ​ខ្លួន​ច្រើន​ពេក ក៏​បង្ហាញ​ឱ្យ​ឃើញ​ដែរ​ថា កម្ពុជា​មិនទាន់​អាច​បង្កើត​ការងារ​ក្នុង​ស្រុក​សម្រាប់​ពលរដ្ឋ​របស់​ខ្លួន​បាន​នៅឡើយ​ដែរ។

កាលពី​ចុង​ឆ្នាំ​២០១៩ ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​អះអាង​ថា ចំនួន​ពលរដ្ឋ​ដែល​មាន​ការងារ​ធ្វើ​នៅ​កម្ពុជា បាន​កើន​ឡើង​ដល់​ទៅ​ជាង ៩៩,៣% ដែល​តួលេខ​នេះ​បង្ហាញ​បញ្ជាក់​ឲ្យ​ឃើញ​ថា អត្រា​ចំនួន​អ្នក​អត់​ការងារ​ធ្វើ​នៅ​កម្ពុជា គឺ​ស្ថិតនៅ​ក្រោម ១% ប៉ុណ្ណោះ។

ទោះ​ជា​បែប​នេះ​ក្តី ទិន្នន័យ​សង្គម​ស៊ីវិល​បាន​ចេញ​ផ្សាយ​កាលពី​ចុង​ឆ្នាំ​២០២១ កន្លងទៅ​ថា ពលករ​ខ្មែរ​ដែល​កំពុង​ធ្វើការ​នៅ​ប្រទេស​ថៃ ទាំង​មាន​ឯកសារ និង​មិន​មាន​ឯកសារ​ស្រប​ច្បាប់ មាន​ចំនួន​ចន្លោះ​ពី ១​លាន ៨​សែន​នាក់​ទៅ ២​លាន​នាក់ ហើយ​ពលករ​ខ្មែរ​ទាំងនោះ​កំពុង​បម្រើ​ការងារ​នៅ​ក្នុង​វិស័យ​ផ្សេងៗ មាន​ជាអាទិ៍ វិស័យ​សំណង់ ឧស្សាហកម្ម ម្ហូបអាហារ គ្រឿង​អេឡិចត្រូនិក ឧស្សាហកម្ម​នេសាទ កសិកម្ម សេវាកម្ម និង​អ្នក​ធ្វើការ​តាម​ផ្ទះ ជាដើម។

ដោយឡែក​ពលករ​ខ្មែរ​ចំណាកស្រុក​ទៅ​ប្រទេស​ផ្សេងៗ ដូចជា​ប្រទេស​កូរ៉េ​ខាងត្បូង មាន​ប្រមាណ​ជា ៥​ម៉ឺន​នាក់ ប្រទេស​ជប៉ុន​ប្រមាណ​ជាង ៩​ពាន់​នាក់ ម៉ាឡេស៊ី ជាង ៣​ម៉ឺន​នាក់ និង​ប្រទេស​សិង្ហបុរី មាន​ជាង ៨០០​នាក់​ផង​ដែរ។

ប្រភព​ដដែល​បញ្ជាក់​ថា បច្ចុប្បន្ន​នេះ ពលរដ្ឋ​ខ្មែរ​ជាង ២​លាន ៤​សែន​គ្រួសារ​កំពុង​ជំពាក់​បំណុល​មីក្រូហិរញ្ញវត្ថុ​ស្ទើរ​វ័ណ្ឌក ខណៈ​រដ្ឋាភិបាល​ខ្លួនឯង​គិត​ត្រឹម​ដំណាច់​ឆ្នាំ​២០២០ កន្លងទៅ ក៏​បាន​ជំពាក់​បំណុល​បរទេស​សរុប​ប្រមាណ​ជាង ៩៦០០​លាន​ដុល្លារ​អាមេរិក​ផង​ដែរ ក្នុង​នោះ​បំណុល​ប្រមាណ ៤៦,៦៧% ជា​បំណុល​ដែល​កម្ពុជា​ជំពាក់​រដ្ឋាភិបាល​ក្រុង​ប៉េកាំង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស