នាយករដ្ឋមន្ត្រីកម្ពុជា លោក ហ៊ុន ម៉ាណែត បញ្ជាឱ្យគណៈកម្មការជាតិគ្រប់គ្រងគ្រោះមហន្តរាយ សហការជាមួយក្រសួងស្ថាប័នពាក់ព័ន្ធ រដ្ឋបាលខេត្តពាក់ព័ន្ធ រៀបចំទីទួលសុវត្ថិភាព និងដោះស្រាយការស្នាក់នៅ ហូបចុកដល់ប្រជាពលរដ្ឋជាជនភៀសសឹកដែលត្រូវជម្លៀសចេញពីតំបន់ប្រយុទ្ធ។
នាយករដ្ឋមន្ត្រីខ្មែរ លោក ហ៊ុន ម៉ាណែត សរសេរលើទំព័រហ្វេសប៊ុករបស់ខ្លួនថា ក្រសួងសេដ្ឋកិច្ច ហិរញ្ញវត្ថុ ក្រសួងសុខាភិបាល ត្រូវសហការដោះស្រាយតាមដំណើរការជាក់ស្ដែង ធ្វើយ៉ាងណាយកចិត្តទុកដាក់លើជីវភាពរស់នៅ និងសុខមាលភាពរបស់ប្រជាពលរដ្ឋក្នុងដំណាក់កាលលំបាកនេះ។
លោក ហ៊ុន ម៉ាណែត បញ្ជាក់ថា ក្រសួង-ស្ថាប័នពាក់ព័ន្ធ កងកម្លាំងប្រដាប់អាវុធគ្រប់ប្រភេទ និងរដ្ឋបាលខេត្តជាប់ព្រំដែនថៃ ទាំង៧ ក៏ត្រូវសម្របសម្រួលការឆ្លងកាត់ព្រំដែន និងការសំចតបណ្ដោះអាសន្នរបស់ប្រជាពលរដ្ឋខ្មែរនៅតំបន់ព្រំដែនកម្ពុជា-ថៃ តាមការចាំបាច់ផងដែរ។
ចំណែកក្រសួងការពារជាតិ កងទ័ពជើងគោក សាលារាជធានីភ្នំពេញ ត្រូវតែសហការជាមួយបណ្ដាខេត្តពាក់ព័ន្ធ រៀបរថយន្តដឹកជញ្ជូនប្រជាពលរដ្ឋខ្មែរពីព្រំដែនកម្ពុជា-ថៃ ត្រឡប់ទៅស្រុកកំណើតវិញ។
នាយករដ្ឋមន្ត្រីខ្មែររូបនេះបញ្ជាក់ថា លោកមានការសោកស្តាយ និងចូលរួមរំលែកទុក្ខវីរកងទ័ពកម្ពុជាដែលបានពលី និងប្រជាជនស៊ីវិលដែលបានស្លាប់ដោយសារការប្រយុទ្ធគ្នានេះ ខណៈរាជរដ្ឋាភិបាល ក្រសួងការពារជាតិ បណ្ដាអង្គភាពកងទ័ព ត្រូវតែសហការគ្នារៀបចំពិធីបុណ្យសពយុទ្ធជនពលី និងដោះស្រាយគោលនយោបាយឱ្យបានសមរម្យជាវីរជនរបស់ជាតិខ្មែរ។
ចាប់ពីថ្ងៃទី២៤ ខែកក្កដា រហូតដល់ថ្ងៃទី២៨ ខែកក្កដា ឆ្នាំ២០២៥ នេះ ថៃ ព្យាយាមវាយប្រហារលើកងទ័ពកម្ពុជាឥតឈប់ ដែលធ្វើឱ្យជនស៊ីវិល និងកងទ័ពខ្មែរដែលទប់ទល់នឹងការវាយប្រហារនេះ រងរបួស និងស្លាប់បាត់បង់ជីវិតជាបន្តបន្ទាប់ ខណៈជនស៊ីវិលជាច្រើនម៉ឺននាក់ ក៏ត្រូវបានជម្លៀសចេញពីតំបន់ប្រយុទ្ធទាំងនោះផងដែរ។
ប្រជាពលរដ្ឋក្នុងខេត្តឧត្ដរមានជ័យ ឃុំគោកមន ស្រុកបន្ទាយអំពិល ដែលមាន ២៦ភូមិ មានប្រជាពលរដ្ឋសរុបជាង ៣ម៉ឺននាក់ (៣២៥៥៥នាក់) ត្រូវជម្លៀសចេញទៅកាន់ទីតាំងសុវត្ថិភាព ខណៈប្រជាពលរដ្ឋក្នុងឃុំអំពិល ស្រុកដដែលនេះ មាន ២៩ភូមិ ដែលមានប្រជាពលរដ្ឋជាង ១ម៉ឺននាក់ (១៩៦៥៨នាក់) ក៏ត្រូវជម្លៀសចេញទៅកាន់ទីតាំងសុវត្ថិភាពដែរ។
ចំណែកប្រជាពលរដ្ឋនៅតំបន់ប្រយុទ្ធផ្សេងទៀតតាមបណ្តាខេត្តជាប់ព្រំដែនថៃ ក៏ត្រូវបានជម្លៀសចេញទៅកាន់ទីតាំងសុវត្ថិភាពដូចគ្នាជាបន្តបន្ទាប់ដែរ។
ជុំវិញការប្រយុទ្ធគ្នារវាងខ្មែរ-ថៃ នេះ ប្រជាពលរដ្ឋខ្មែរដែលវិលត្រឡប់ពីប្រទេសថៃ នៅថ្ងៃទី២៧ កក្កដា មានចំនួនប្រមាណ ១០ម៉ឺននាក់ តាមច្រកព្រំដែនអន្តរជាតិដូង (បានឡែម) ស្រុកកំរៀង ខេត្តបាត់ដំបង ខណៈថ្ងៃទី២៦ កក្កដា មានប្រជាពលរដ្ឋប្រមាណជាង ៦ម៉ឺន ៥ពាន់នាក់។
ដោយឡែកនៅតាមច្រកព្រំដែនអន្តរជាតិផ្សេងទៀត ដូចជា ច្រកព្រំដែនខេត្តប៉ៃលិន ច្រកព្រំដែនអន្តរជាតិចាំយាម ខេត្តកោះកុង ក៏មានពលរដ្ឋខ្មែរឆ្លងពីប្រទេសថៃ ចូលមកប្រទេសកំណើតវិញដែរ ខណៈចំនួនជាក់លាក់មិនទាន់ត្រូវបានរដ្ឋបាលខេត្តបញ្ជាក់នៅឡើយទេ៕
© 2025, ឌឹ ខេមបូឌា ដេលី. All rights reserved.