រដ្ឋាភិបាលប្រទេសកម្ពុជា នឹងឧបត្ថម្ភសាច់ប្រាក់ ព្រមទាំងផ្តល់កម្មវិធីបណ្តុះបណ្តាលជំនាញវិជ្ជាជីវៈដោយឥតគិតថ្លៃចំពោះពលករខ្មែរដែលវិលត្រឡប់ពីប្រទេសថៃ ដែលមានបណ្ណសមធម៌ និងបណ្ណគ្រួសារងាយរងហានិភ័យ។
អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម លោក ចន ណារិទ្ធ ថ្លែងនៅថ្ងៃទី៥ សីហា នេះថា ពលករដែលសម្រុកមកពីថៃ នាពេលថ្មីៗនេះ អាចទៅចុះឈ្មោះសិក្សាជំនាញវិជ្ជាជីវៈក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស បើពួកគេមានបណ្ណសមធម៌ និងបណ្ណគ្រួសារងាយរងហានិភ័យ។
លោកបានថ្លែងថា រដ្ឋាភិបាលមិនឱ្យពលករខ្មែរបារម្ភពីភាពគ្មានការងារធ្វើឡើយ ហើយបច្ចុប្បន្ន ប្រទេសកម្ពុជា កំពុងមានតម្រូវការកម្លាំងពលកម្មយ៉ាងច្រើន ជាពិសេសកម្លាំងពលកម្មដែលមានជំនាញ។
លោកថា តាមរយៈសហរដ្ឋអាម៉េរិក បានសម្រេចទម្លាក់អត្រាពន្ធបដិការលើកម្ពុជា មកត្រឹម ១៩ភាគរយ ប្រទេសកម្ពុជា នឹងអាចស្រូបយកវិនិយោគិនច្រើនបន្ថែមទៀតនាពេលអនាគត ដែលនឹងអាចបង្កើតឱកាសការងារកាន់តែច្រើន។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា បានលើកឡើងថា លោកសាទរចំពោះវិធានការរបស់រដ្ឋាភិបាលដែលបានផ្តល់ការបណ្តុះបណ្តាលជំនាញវិជ្ជាជីវៈ និងបច្ចេកទេសដល់ពលករខ្មែរដែលត្រឡប់មកពីប្រទេសថៃ វិញ ប៉ុន្តែលោកថាអ្វីដែលជាឧបសគ្គសម្រាប់ពួកគាត់ គឺទាក់ទងនឹងបណ្ណក្រីក្រ ពីព្រោះពលករភាគច្រើនបានចាកចេញពីស្រុកកំណើតច្រើនឆ្នាំ ពួកគាត់អាចនឹងមិនមានបណ្ណក្រីក្រ។
លោក ស៊ឹង សែនករុណា បានលើកឡើងថា រដ្ឋាភិបាលគួររកវិធីសាស្ត្រណាអាចឱ្យអ្នកដែលគ្មានបណ្ណក្រីក្រ អាចចូលរៀនដើម្បីយកជំនាញចិញ្ចឹមគ្រួសាររបស់ពួកគេបាន ប្រសើរជាជាងឲ្យពួកគេធ្វើចំណាកស្រុកម្តងទៀតនៅពេលដែលប្រទេសមានសុខសន្តិភាពពេញលេញ។
កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ (TVET) ត្រូវបានដាក់ឱ្យអនុវត្តកាលពីថ្ងៃទី១៤ ខែវិច្ឆិកា ឆ្នាំ២០២៣។ ពលរដ្ឋអាចចូលសិក្សាជំនាញទាំងនោះដោយមិនបង់ថ្លៃ រួមទាំងបានប្រាក់ឧបត្ថម្ភ ២៨ម៉ឺនរៀលក្នុង ១ខែទៀតផង។
សេចក្តីរាយការណ៍ពីក្រសួងការងារ និងបណ្ដុះបណ្ដាលវិជ្ជាជីវៈ បានប៉ាន់ស្មានក្នុងរយៈពេល ៥ថ្ងៃ ដោយគិតចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ពលករខ្មែរបានសម្រុកពីថៃ ចូលក្នុងប្រទេសវិញប្រមាណជិត ៤០ម៉ឺននាក់។ ប្រភពខ្លះថាប្រមាណ ៥សែននាក់។ ក្រសួងការងារ បានបង្ហាញថា ពលករខ្មែរដែលកំពុងធ្វើការងារនៅប្រទេសថៃ មានចំនួនប្រមាណជា ១លាន ២សែននាក់។ ពួកគេនៅទីនោះភាគច្រើន កំពុងធ្វើការងារនៅក្នុងវិស័យកសិកម្ម សំណង់ នេសាទ និងជាកម្មកររោងចក្រ ជាដើម។
កាលពីថ្ងៃសៅរ៍ សប្តាហ៍មុន យោងតាមកាសែតបាងកកប៉ុស្តិ៍ អាជ្ញាធរថៃ បានចាប់ឃាត់ខ្លួនជនជាតិខ្មែរចំនួន ១៦នាក់ ដែលបានព្យាយាមវិលចូលទៅក្នុងទឹកដីប្រទេសថៃ វិញ តាមច្រកភូមិបានដងងូ ស្រុកអារញ្ញ ខេត្តស្រះកែវ ដោយឲ្យប្រាក់ភ្នាក់ងារយាមល្បាត ៦ពាន់បាត បន្ទាប់ពីរកការងារធ្វើមិនបាន ហើយថាមានកូនរៀននៅសាលារៀនថៃ ត្រូវប្រឡងឡើងថ្នាក់។ ក្រុមទាំង ១៦នាក់ធ្លាប់ធ្វើការងារក្នុងប្រទេសថៃឡង់ដ៍ ប៉ុន្តែវិលចូលមាតុភូមិកម្ពុជា នៅថ្ងៃទី២៤ ខែកក្កដា៕
© 2025, ឌឹ ខេមបូឌា ដេលី. All rights reserved.