លោក ហ៊ុន សែន អះអាងថាក្នុងរយៈពេលជាង ៦ខែមកនេះ កម្ពុជាផលិតមាសបានចំនួន ១៧៥១គីឡូក្រាមនៅខេត្តមណ្ឌលគិរី។
នៅក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ៧ ក្នុងខេត្តក្រចេះ នៅព្រឹកថ្ងៃទី០៧ ខែកុម្ភៈ ឆ្នាំ២០២២ នេះ លោក ហ៊ុន សែន ថ្លែងថា ជាទូទៅក្នុងមួយសប្ដាហ៍ កម្ពុជាផលិតមាសបានចន្លោះពី ៨០ ទៅ ១០០គីឡូក្រាម និងកាន់តែច្រើនទៅៗ។ ករណីនេះ លោកនឹងដាក់ខេត្តនៅទិសឦសានមួយនេះជាគោលដៅប៉ូលសេដ្ឋកិច្ច គឺកសិឧស្សាហកម្ម និងធនធានរ៉ែរបស់កម្ពុជា។
ប៉ុន្តែយ៉ាងណា លោក ហ៊ុន សែន ថាកម្ពុជានៅមិនទាន់ស្រាវជ្រាវបានធនធានអស់នៅឡើយ ដោយនៅមានប្រភេទរ៉ែធ្យូងថ្ម និងកន្លែងផលិតមាសដទៃទៀត ដោយសារតែកម្ពុជាទើបនឹងចាប់ផ្ដើមស្រាវជ្រាវបានជាងកន្លះឆ្នាំប៉ុណ្ណោះ ខណៈមាសចំនួន ១៧៥១គីឡូក្រាមផលិតបាននោះ លោកថានៅមិនទាន់កែច្នៃទៅជាមាសទឹក ១០ នៅឡើយ។
បុរសខ្លាំងរូបនេះថា បច្ចុប្បន្នកម្ពុជាផលិតបានមាស តែជាមាសដុំដែលមានទម្ងន់ចន្លោះពី ២០គីឡូក្រាមដល់ ៣០គីឡូក្រាម និងជាង ១០គីឡូក្រាមនៅលើទឹកដីខេត្តមណ្ឌលគិរី រួចហើយបានបន្តដឹកទៅចម្រាញ់ទៅជាមាសទឹក១០ នៅប្រទេសអូស្ត្រាលី។
កាលពីថ្ងៃទី២១ ខែមិថុនា ឆ្នាំ២០២១ រោងចក្រចម្រាញ់រ៉ែមាសជាលក្ខណៈឧស្សាហកម្មឈ្មោះ Renaissance Minerals (Cambodia) Limited ដែលបានបើកដំណើរការដើម្បីរុករកមាសនៅតំបន់អូរខ្វាវ ស្រុកកែវសីមា ខេត្តមណ្ឌលគិរី ក្រោយពីក្រុមហ៊ុននេះបានស្រាវជ្រាវ និងរុករកមាសនៅតំបន់នៃខេត្តមណ្ឌលគិរី អស់រយៈពេល ១៤ឆ្នាំមកហើយនោះ។
យ៉ាងណាក៏ដោយ ខេត្តមណ្ឌលគិរី ដែលបច្ចុប្បន្នកំពុងមានជម្លោះវិវាទដីធ្លីខ្លាំង ដោយមិនអាចដោះស្រាយបានឡើយ បន្ទាប់ពីអ្នកមានអំណាច និងឧកញ៉ាមួយចំនួនបាននាំគ្នាទៅសម្រុកចាប់ដីនៅទីនោះ។ កន្លងមក ជនជាតិដើមភាគតិចធ្លាប់អះអាងថា ភ្នំ និងដីព្រៃក្នុងដែនជម្រកមួយចំនួន ត្រូវបានអ្នកមានអំណាចធំៗរំលោភយកជាកម្មសិទ្ធិ ក្នុងនោះភាគច្រើនជាសាច់ញាតិ និងគ្រួសារលោក ហ៊ុន សែន ហើយនិងកូនៗលោក ជា សុផារ៉ា រដ្ឋមន្ត្រីក្រសួងដែនដី ជាដើម៕