បុរសខ្លាំងកម្ពុជា លោក ហ៊ុន សែន ប្ដេជ្ញាមិនឱ្យមានអំពើហិង្សា ឬមានអ្នករបួស និងស្លាប់ដោយសារការបោះឆ្នោតនៅឆ្នាំ២០២២ និងឆ្នាំ២០២៣ ខាងមុខនេះឡើយ ហើយបានអំពាវនាវឲ្យអាជ្ញាធរមូលដ្ឋាន បង្កលក្ខណៈឲ្យគណបក្សទាំងអស់មានសិទ្ធិជួបជុំសមាជិកសមាជិកា និងលើកស្លាកដូចគណបក្សកាន់អំណាច។
ថ្លែងក្នុងពិធីសម្ពោធស្ពាន ៧កន្លែងនៅខេត្តក្រចេះ និងខេត្តព្រៃវែង នៅថ្ងៃទី១៦ កុម្ភៈ បុរសខ្លាំងកម្ពុជាបានអំពាវនាវឲ្យអាជ្ញាធរមូលដ្ឋានបង្កលក្ខណៈឲ្យគណបក្សទាំងអស់ដែលប្រជែងសម្រាប់ការបោះឆ្នោតឃុំ-សង្កាត់ នាខែមិថុនា ខាងមុខ មានសិទ្ធិជួបជុំសមាជិកសមាជិកា និងលើកស្លាកដូចគណបក្សកាន់អំណាច ទោះបីជាយុទ្ធការបោះឆ្នោតមិនទាន់មកដល់ក៏ពិតមែន។
បុរសខ្លាំងបានលើកឡើងថា ដើម្បីឱ្យបក្សនយោបាយទទួលបានឱកាសសម្រាប់ការជួបជុំជាមួយសមាជិក ក៏ដូចជាពលរដ្ឋ និងលើកស្លាកគណបក្សដោយគ្មានការរំខាន រួមទាំងគ្មានការគំរាមកំហែងណាមួយពីអាជ្ញាធរមូលដ្ឋាន ដោយធានាថាការបោះឆ្នោតខាងមុខនេះមិនមានអំពើហិង្សា ឬជម្លោះណាមួយកើតឡើង។
បុរសខ្លាំងកម្ពុជាបន្តថា អាជ្ញាធរត្រូវខិតខំជួយការពារសុវត្ថិភាពនៃបណ្ដាបក្សនយោបាយឱ្យបាន កុំឱ្យមានការបោះឆ្នោតមួយញាំញីដោយអំពើហិង្សាជម្លោះរហូតទៅដល់មានមនុស្សគ្រោះថ្នាក់។ ការបោះឆ្នោតចុងក្រោយនេះ គ្មានមនុស្សស្លាប់ ឬរបួសដោយសារការបោះឆ្នោតទេ។ លោកថានៅក្នុងជំនាន់អ៊ុនតាក់ (UNTAC) និងក្រោយមកនៅតែមានអំពើហិង្សា ប៉ុន្តែរយៈពេលតាំងពីឆ្នាំ២០០៣ រហូតមក មិនមានអ្នកស្លាប់ ឬរបួសដោយសារការបោះឆ្នោតទេ។
បុរសខ្លាំងកម្ពុជាបានបញ្ជាក់ថា ការអំពាវនាវរបស់លោក គឺប្រៀបដូចជាបទបញ្ជាយ៉ាងដូច្នោះដែរ ដោយសារតែនៅពេលមានបញ្ហា មហាជនតែងតែជេរនាយករដ្ឋមន្ត្រី។
ជាមួយគ្នានេះ បុរសខ្លាំងកម្ពុជាក៏បានដឹងដែរថា បណ្តាគណបក្សជាច្រើនកំពុងត្រៀមខ្លួនសម្រាប់ការប្រជែងយកកៅអីឃុំ-សង្កាត់នាពេលខាងមុខ ហើយគណបក្សខ្លះកំពុងត្រៀមរៀបចំបង្កើនសម្ពន្ធភាព ដែលនេះជាលំហប្រជាធិបតេយ្យនៅក្នុងប្រទេសកម្ពុជា។
ទោះយ៉ាងណា ក្រោយការបោះឆ្នោតខែកក្កដា ឆ្នាំ២០១៣ កន្លងទៅ អតីតគណបក្សសង្គ្រោះជាតិបានបដិសេធទទួលយកលទ្ធផលបោះឆ្នោត ហើយបានធ្វើបាតុកម្មប្រឆាំង ក្រោមហេតុផលថា មានការលួចបន្លំសន្លឹកឆ្នោត។ បាតុកម្មក្រោយការបោះឆ្នោតនេះ បានបណ្តាលឲ្យមនុស្សយ៉ាងតិច ៦នាក់បានស្លាប់ក្នុងព្រឹត្តិការណ៍ហិង្សានៅស្ពានអាកាសក្បាលថ្នល់ បណ្តាលឲ្យយុវជនម្នាក់បានស្លាប់ដោយត្រូវគ្រាប់កាំភ្លើង និងការបាញ់កម្មករនៅផ្លូវវ៉េងស្រេង ដែលបណ្តាលឲ្យមនុស្ស ៥នាក់ស្លាប់។
គិតត្រឹមដំណាច់ខែមករា ឆ្នាំ២០២២ នេះ កម្ពុជាមានគណបក្សនយោបាយចំនួន ៤៥ហើយដែលបានចុះបញ្ជីគណបក្សនយោបាយជាផ្លូវការនៅក្រសួងមហាផ្ទៃ។ កម្ពុជាគ្រោងនឹងរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២ នេះ និងត្រូវរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៧ នៅឆ្នាំ២០២៣ ផងដែរ៕