បញ្ញវន្តខ្មែរនៅក្រៅស្រុក បានសម្ដែងការព្រួយបារម្ភថា សារនយោបាយរបស់អតីតមេដឹកនាំប្រឆាំងលោក សម រង្ស៊ី និងការដាក់ពាក្យបណ្តឹងលើក្រុមមន្ត្រីគ្រាក់ៗរបស់រដ្ឋាភិបាលលោក ហ៊ុន សែន ទៅតុលាការបារាំង អាចគ្រាន់តែជាល្បែងតថ្លៃនយោបាយរបស់គាត់ប៉ុណ្ណោះ មិនមែនដើម្បីយុត្តិធម៌សង្គមនោះទេ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី២៣ កុម្ភៈ នេះថា សារឆ្លើយឆ្លងរវាងមេដឹកនាំបក្សកាន់អំណាចលោក ហ៊ុន សែន និងអតីតមេដឹកនាំបក្សប្រឆាំងលោក សម រង្ស៊ី បានបង្ហាញពីនយោបាយមិនច្បាស់លាស់របស់គាត់ដែលធ្លាប់ជំរុញឲ្យមានការផ្ដួលរំលំលោក ហ៊ុន សែន តែម្ដងនេះប្ដូរថាត្រូវតែចរចាទៅវិញ។
អ្នកវិភាគរូបនេះអះអាងថា លោកធ្លាប់បានជូនយោបល់ឲ្យលោក សម រង្ស៊ី ស្វែងរកការចរចាជាមួយលោក ហ៊ុន សែន ដោយឈរលើបុព្វហេតុជាតិតាំងពីអំឡុងខែកក្កដា ឆ្នាំ២០១៩ មកម្ល៉េះ ក្នុងនោះក៏ត្រូវបង្កើតកម្លាំងសម្ព័ន្ធចលករប្រជាធិបតេយ្យ ដើម្បីដាក់សម្ពាធលើលោក ហ៊ុន សែន ផងដែរ ប៉ុន្តែក្រុមអ្នកនិយមលោក សម រង្ស៊ី បែរជានាំគ្នាជេរប្រមាថលោកទៅវិញ។ លោកបញ្ជាក់ថា សារឆ្លើយឆ្លងនេះក៏ទំនងជាការបង្កើតបរិយាកាសនយោបាយមួយឲ្យប្រជាពលរដ្ឋខ្មែរយល់ថា ទីលាននយោបាយនៅកម្ពុជាមានតែលោក ហ៊ុន សែន និងលោក សម រង្ស៊ី តែប៉ុណ្ណោះ ក្នុងគោលដៅដើម្បីបិទបាំងសំណុំរឿងលោក កឹម សុខា ដែលលោក ហ៊ុន សែន រកគន្លឹះដោះស្រាយមិនចេញនៅពេលនេះ។
ការលើកឡើងរបស់លោក គឹម សុខ ស្របពេលដែលអតីតមេដឹកនាំបក្សប្រឆាំងលោក សម រង្ស៊ី ហាក់បានផ្លាស់ប្ដូរជំហរនយោបាយរបស់ខ្លួនដែលតែងតែប្រកាសផ្ដួលរំលំរដ្ឋាភិបាលកម្ពុជា មកជាការចរចានយោបាយវិញកាលពីថ្ងៃអង្គារ ដើមសប្តាហ៍នេះ។
កាលពីថ្ងៃទី២២ ខែកុម្ភៈ អតីតមេដឹកនាំបក្សប្រឆាំងលោក សម រង្ស៊ី បានសរសេរលើគណនី Facebook របស់ខ្លួនថា មេដឹកនាំបក្សកាន់អំណាច លោក ហ៊ុន សែន តែងលើកពីរឿងគ្រួសាររបស់គាត់ធ្វើជាលេសដើម្បីបដិសេធការចរចាជាមួយថ្នាក់ដឹកនាំគណបក្សសង្គ្រោះជាតិ ក្នុងគោលបំណងរកដំណោះស្រាយវិបត្តិនយោបាយនៅកម្ពុជា។
អតីតមេដឹកនាំបក្សប្រឆាំងរូបនេះអះអាងថា លោកមិនដែលបានចាប់អារម្មណ៍ទាល់តែសោះពីរឿងផ្ទាល់ខ្លួនរបស់លោក ហ៊ុន សែន និងក្រុមគ្រួសារគាត់។
យ៉ាងណាក៏ដោយ កាលពីថ្ងៃទី២២ ខែកុម្ភៈ ឆ្នាំ២០២២ មេដឹកនាំបក្សកាន់អំណាចលោក ហ៊ុន សែន ព្រមានថា លោកនឹងមិនចរចាជាមួយក្រុមដែលធ្លាប់ប្រមាថប្រពន្ធ និងកូនរបស់លោកនោះទេ។ លោក ហ៊ុន សែន ថ្លែងបញ្ជាក់ថា បើលោកនិយាយជាមួយក្រុមប្រភេទនេះ លោកអន់ជាងសត្វតិរច្ឆានទៅទៀត។
អតីតអគ្គទីប្រឹក្សាស្ថានទូតខ្មែរប្រចាំប្រទេសឥណ្ឌូនេស៊ី បណ្ឌិត សូ ណារ៉ូ បានប្រាប់សារព័ត៌មាន The Cambodia Daily ថា ការលើកឡើងរបស់លោក សម រង្ស៊ី បែបនេះ គឺបង្ហាញយ៉ាងច្បាស់នូវចេតនារបស់គាត់ក្នុងការសុំចរចានយោបាយជាមួយមេដឹកនាំបក្សកាន់អំណាចលោក ហ៊ុន សែន ដូចដែលគាត់ធ្លាប់បានធ្វើនាពេលកន្លងមក ហើយក៏ជាការបញ្ជាក់ពីភាពទាល់ច្រកនយោបាយរបស់គាត់នៅពេលនេះផងដែរ។
បណ្ឌិត សូ ណារ៉ូ លើកឡើងថា អត្តចរិតនយោបាយរបស់លោក សម រង្ស៊ី មិនមែនជាអ្នកនយោបាយប្រឆាំងដែលមានគោលការណ៍ច្បាស់លាស់ដើម្បីលទ្ធិប្រជាធិបតេយ្យនោះទេ ប៉ុន្តែបទពិសោធន៍ដែលគាត់បានធ្វើកន្លងមក គាត់តែងតែសុំការអនុគ្រោះពីលោក ហ៊ុន សែន ជានិច្ចនៅពេលដែលជីវិតនយោបាយរបស់គាត់ដើរដល់ផ្លូវទ័ល។
ទាក់ទិននឹងបញ្ហានេះ ក្រុមអ្នកឃ្លាំមើលសង្គម លើកឡើងថា ពេលខ្លះលោក សម រង្ស៊ី ជាសត្រូវស៊ីសាច់ហុតឈាមជាមួយលោក ហ៊ុន សែន និងពេលខ្លះទៀត ពួកគាត់ជាមិត្តដ៏ផ្អែមល្ហែមចាក់ទឹកមិនលិចនឹងគ្នាផងដែរ។ ជាក់ស្តែង កាលពីអំឡុងឆ្នាំ២០០៦ និងឆ្នាំ២០១៥ ក្រោយការវាយប្រហារឌឺដងឱ្យគ្នាទៅវិញទៅមកយ៉ាងឆ្អែតឆ្អន់ លោក សម រង្ស៊ី បានសរសេរលិខិតសុំទោសលោក ហ៊ុន សែន ដើម្បីបានចូលស្រុកវិញ បើទោះបីជាលោក ហ៊ុន សែន ធ្លាប់ស្បថកាត់ដៃគ្រវាត់ចោលក៏ដោយ ក៏គាត់នៅតែបើកផ្លូវឱ្យលោក សម រង្ស៊ី ចូលស្រុកវិញដែរ ហើយម្តងនេះក៏ទំនងជាមិនខុសពីលើកមុនៗដែរ។
ជុំវិញការលើកឡើងនេះ សារព័ត៌មាន The Cambodia Daily នៅមិនទាន់អាចទាក់ទងមន្ត្រីបក្សប្រឆាំងភាគីលោក សម រង្ស៊ី បកស្រាយលម្អិតបន្ថែមទាក់ទិននឹងសាររបស់អតីតមេដឹកនាំប្រឆាំងបាននៅឡើយទេរហូតដល់ម៉ោងផ្សាយនេះ៕