31 C
Phnom Penh

សង្គម​ស៊ីវិល​រិះគន់​អាជ្ញាធរ​ដែល​ប្រើ​ហិង្សា​និង​បៀតបៀន​ផ្លូវ​ភេទ​លើ​ស្ត្រី​ជា​កូដករ​ណាហ្គា​វើលដ៍

ដោយ ឌឹ ខេមបូឌា ដេលី

បទវិភាគ

អង្គការ​សង្គម​ស៊ីវិល​ជាង ៥០​ស្ថាប័ន​បាន​សម្ដែង​ការ​សោកស្ដាយ​ចំពោះ​អាជ្ញាធរ​ដែល​ប្រើប្រាស់​អំពើ​ហិង្សា និង​បៀតបៀន​ផ្លូវ​ភេទ​លើ​ស្ត្រី​ជា​កូដករ​នៅ​ក្រុមហ៊ុន​ណាហ្គា​វើលដ៍ (NAGA World) អំឡុង​ពេល​សមត្ថកិច្ច​ចាប់​ពួកគេ​ទាំង​បង្ខំ​ចូល​រថយន្តក្រុង ដោយសារ​ពួកគេ​ជួបជុំ​ធ្វើ​កូដកម្ម​ដោយ​សន្តិវិធី។

អង្គការ​សង្គម​ស៊ីវិល សហគមន៍​មូលដ្ឋាន និង​សហជីព​ចំនួន ៥១​ស្ថាប័ន បាន​ចេញ​សេចក្តី​ថ្លែងការណ៍​រួម​គ្នា​មួយ​កាលពី​ថ្ងៃ​ទី​២៤ ខែ​កុម្ភៈ ឆ្នាំ​២០២២ ទាមទារ​ឱ្យ​អាជ្ញាធរ​ត្រូវ​បញ្ឈប់​ការ​ធ្វើ​ទុក្ខបុកម្នេញ​ទៅលើ​សមាជិក​សហជីព​ណាហ្គា​វើលដ៍​ជា​ស្ត្រី​ដែល​កំពុង​ធ្វើ​កូដកម្ម​ដោយ​សន្តិវិធី។

ក្រុម​អង្គការ​សង្គម​ស៊ីវិល បាន​លើកឡើង​ថា កាលពី​ថ្ងៃ​ទី​២២ ខែ​កុម្ភៈ ឆ្នាំ​២០២២ អាជ្ញាធរ​បាន​ចាប់​រុញ ទាញ និង​សែង​កូដករ​ដែល​កំពុង​ធ្វើ​កូដកម្ម​អហិង្សា​ដោយ​បង្ខំ ហើយ​រុញ និង​ធាក់​ឱ្យ​ចូល​ក្នុង​រថយន្តក្រុង។ អំឡុង​ពេល​នោះ សមត្ថកិច្ច​ជា​បុរស​បាន​បៀតបៀន​ផ្លូវ​ភេទ​ស្ត្រី​ម្នាក់​ជា​កូដករ ទោះបីជា​នាង​បាន​ស្រែក​ខណៈ​ដែល​នាង​ត្រូវ​បាន​បង្ខំ​ឱ្យ​ចូល​ក្នុង​រថយន្តក្រុង យក​ទៅ​មណ្ឌល​ធ្វើ​ចត្តាឡីស័ក​ជំងឺ Covid-19 នៅ​ខណ្ឌ​ព្រែកព្នៅ រាជធានី​ភ្នំពេញ​ក៏ដោយ។

ស្រដៀង​គ្នា​នេះ​ដែរ នៅ​ថ្ងៃ​ទី​២៩ ខែ​ធ្នូ ឆ្នាំ​២០២១ អាជ្ញាធរ​រដ្ឋ​បាន​ប្រើ​ភាសា​អាសអាភាស​បំពារបំពាន​ផ្លូវ​ភេទ​មិន​សមរម្យ​ទៅលើ​កូដករ។ ករណី​នេះ ក្រុម​សង្គម​ស៊ីវិល​បាន​កត់សម្គាល់​ថា​ជា​ទង្វើ​នៃ​ការ​បៀតបៀន​ផ្លូវ​ភេទ​ស្រដៀង​គ្នា​នេះ ក៏​ធ្លាប់​កើតមាន​ចំពោះ​ស្ត្រី​វ័យក្មេង​ដែល​ជា​សកម្មជន​បរិស្ថាន​កន្លងមក​ដែរ។

មួយ​វិញ​ទៀត សមាជិក​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍​ដែល​ភាគច្រើន​ជា​ស្ត្រី បាន​ទទួល​រង​នូវ​អំពើ​ហិង្សា ការ​ចាប់​ដាក់​ពន្ធនាគារ និង​ការ​អនុវត្ត​វិធានការ Covid-19 ដោយ​មិន​ត្រឹមត្រូវ​ក្នុង​ការ​ឆ្លើយតប​ទៅ​នឹង​ការ​ធ្វើ​កូដកម្ម​ដោយ​សន្តិវិធី​ចាប់តាំង​ពី​ខែ​ធ្នូ ឆ្នាំ​២០២១ មក។

សេចក្តី​ថ្លែងការណ៍​បន្ត​ថា កូដករ​ជា​ស្ត្រី​ជាច្រើន​ត្រូវ​បាន​អាជ្ញាធរ​ដាក់​គោលដៅ​មិន​សមស្រប​ក្នុង​ការ​បំបែក​ការ​តវ៉ា ចំពោះ​ការ​ធ្វើ​កូដកម្ម​ដោយ​សន្តិវិធី ដោយ​បាន​រារាំង​ពួកគេ​ត្រឡប់​ទៅ​ផ្ទះ​វិញ បន្ទាប់ពី​ចាប់​ទាំង​បង្ខំ​យក​ទៅ​ធ្វើ​តេស្ដ Covid-19 នៅ​មណ្ឌល​ចត្តាឡីស័ក​មួយ​ក្នុង​រាជធានី​ភ្នំពេញ។

បន្ទាប់ពី​រក​ឃើញ​មាន Covid-19 នោះ កូដករ​ទាំងអស់​បាន​អនុវត្ត​តាម​បទបញ្ជា និង​ការណែនាំ​នានា​របស់​ក្រសួង​ក្នុង​ការ​ធ្វើ​តេស្ដ​ជំងឺ Covid-19 ជាច្រើន​ដង និង​បាន​បំពេញ​តាម​លក្ខខណ្ឌ​នៃ​ការ​ធ្វើ​ចត្តាឡីស័ក ប៉ុន្តែ​អាជ្ញាធរ​នៅតែ​ហាមឃាត់ និង​បំបែក​ការ​តវ៉ា​របស់​ពួកគេ ក្រោយ​ពេល​ពួកគេ​បាន​អនុវត្ត​វិធាន​សុខាភិបាល​រួច​ទៅ​ហើយ​នោះ។

ជាក់ស្ដែង​នៅ​ថ្ងៃ​ទី​២១ ខែ​កុម្ភៈ កូដករ​ចំនួន ៦៤​នាក់​ក្នុង​នោះ​ស្ត្រី ៥៦​នាក់​ត្រូវ​បាន​នាំ​ខ្លួន​ដោយ​បង្ខំ​ទៅកាន់​ទីតាំង​ធ្វើ​ចត្តាឡីស័ក​មួយ​កន្លែង បន្ទាប់​ពួកគេ​ព្យាយាម​ធ្វើ​កូដកម្ម​បន្ត​ទៀត ខណៈ​ថ្ងៃ​ទី​២២ កូដករ​ចំនួន ៣៩​នាក់​ត្រូវ​បាន​នាំ​ខ្លួន​ដោយ​បង្ខំ​ទៅ​មណ្ឌល​ចត្តាឡីស័ក​ទៀត។

ក្រុម​សន្តិសុខ​ខណ្ឌ​ដូនពេញ ចាប់​អូស និង​សែង​កូដករ​ក្រុមហ៊ុន​ណាហ្គា​វើលដ៍ (NAGA World) ដាក់​រថយន្តក្រុង​របស់​សាលា​រាជធានី​ភ្នំពេញ ថ្ងៃ​ទី​២២ ខែ​កុម្ភៈ ឆ្នាំ​២០២២។ (រូបថត៖ VOD)

ចំណែក​ថ្ងៃ​ទី​២៣ ខែ​កុម្ភៈ ក្រុម​សន្តិសុខ​ក៏​បាន​ចាប់​កូដករ​ទាំង​បង្ខំ​ចំនួន ៥១​នាក់​បន្ថែម​ទៀត​ដឹក​ទៅ​មណ្ឌល​ចត្តាឡីស័ក។ ក្នុង​ចំណោម​កូដករ​ទាំងនោះ មិន​មាន​កូដករ​ណា​ម្នាក់​ត្រូវ​បាន​ដោះលែង​ឱ្យ​ត្រឡប់​ទៅ​ផ្ទះ​វិញ​ទេ គិត​ចាប់តាំង​ពី​ថ្ងៃ​ទី​២២ ដល់​ថ្ងៃ​ទី​២៥ ខែ​កុម្ភៈ។ មិន​តែប៉ុណ្ណោះ កូដករ​ដែល​កំពុង​ជាប់​នៅ​មណ្ឌល​ចត្តាឡីស័ក​ទាំងនោះ នឹង​ត្រូវ​អាជ្ញាធរ​បង្ខំ​ឱ្យ​បង់​ប្រាក់​ពិន័យ​ចំនួន​រហូត​ដល់ ២​លាន​រៀល (៥០០​ដុល្លារ) ក្នុង​ម្នាក់​ផង​ដែរ។

សេចក្តី​ថ្លែងការណ៍​ដដែល​ថា អំឡុង​ខែ​មករា កូដករ​ដែល​ភាគច្រើន​ជា​ស្ត្រី ក្នុង​នោះ​ក៏​មាន​ស្ត្រី​មាន​ផ្ទៃពោះ​មួយ​ចំនួន ត្រូវ​បាន​គេ​ហាមឃាត់​ក្នុង​ការ​ប្រើប្រាស់​បន្ទប់ទឹក​នៅ​ជិត​កន្លែង​ធ្វើ​កូដកម្ម​ដោយ​មិន​សម​ហេតុផល ស្រប​ពេល​ដែល​បន្ទប់ទឹក​នោះ​ត្រូវ​បាន​បើក​ឱ្យ​ប្រើប្រាស់​ឡើងវិញ​ជា​រៀង​រាល់ថ្ងៃ​ក្រោយ​ពេល​ដែល​កូដករ​ទាំងអស់​វិល​ត្រឡប់​ទៅផ្ទះ​វិញ។

ក្រុម​សង្គម​ស៊ីវិល​ចាត់ទុក​ទង្វើ​ហិង្សា​របស់​សមត្ថកិច្ច ថា​ជា​ការ​ប្រឆាំង​ទៅលើ​ស្ត្រី​ដែល​បង្ក​ដោយ​តួអង្គ​រដ្ឋ ការ​អនុវត្ត​វិធានការ Covid-19 ដោយ​មិន​ត្រឹមត្រូវ និង​ការ​ប្រើប្រាស់​ស្ថាប័ន​តុលាការ​ដើម្បី​បំបិទ​សេរីភាព​ក្នុង​ការ​ធ្វើ​កូដកម្ម​អហិង្សា គឺ​មិន​សម​ហេតុផល និង​ខុស​ច្បាប់ ក្រោម​ច្បាប់​ជាតិ និង​អន្តរជាតិ។

មួយ​វិញ​ទៀត ទង្វើ​ទាំងនេះ​បាន​រំលោភបំពាន​ទៅលើ​សិទ្ធិ​ដែល​មាន​ចែង​ក្នុង​រដ្ឋធម្មនុញ្ញ​ស្ដីពី​ការ​ជួបជុំ និង​ប្រមូលផ្ដុំ​ដោយ​សន្តិវិធី និង​សិទ្ធិ​នានា​នៃ​អនុសញ្ញា​របស់​អង្គការ​សហប្រជាជាតិ ស្ដីពី​ការ​លុប​បំបាត់​រាល់​ទម្រង់​នៃ​ការ​រើសអើង​លើ​ស្ត្រី​ភេទ។

ក្រុម​អង្គការ​សង្គម​ស៊ីវិល​អំពាវនាវ​ទៅ​អាជ្ញាធរ​ឱ្យ​បញ្ឈប់​ការ​រឹតត្បិត​សេរីភាព​របស់​ស្ត្រី ដើម្បី​ឱ្យ​ពួកគេ​បន្ត​ធ្វើ​កូដកម្ម​ដោយ​សន្តិវិធី និង​ប្រើប្រាស់​សិទ្ធិ​ជា​មូលដ្ឋាន​របស់​ពួកគេ​ដោយ​គ្មាន​ការ​រើសអើង និង​អំពាវនាវ​ឱ្យ​មាន​ការ​ដោះលែង​ជាបន្ទាន់ និង​ដោយ​ឥត​លក្ខខណ្ឌ​ចំពោះ​សមាជិក និង​ថ្នាក់​ដឹកនាំ​សហជីព​ទាំងអស់​ដែល​ត្រូវ​បាន​ចាប់​ដាក់​ពន្ធនាគារ ព្រមទាំង​ទម្លាក់​ចោល​បទ​ចោទ​ទាំងអស់​ប្រឆាំង​នឹង​ពួកគេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស