បុរសខ្លាំងកម្ពុជា លោក ហ៊ុន សែន ប្រកាសជាសាធារណៈថា បើអ្នកណាពូកែទៅយកកម្ពុជាក្រោមដោយខ្លួនឯង លោកនឹងជួយធ្វើក្ដារមឈូស និងកប់សពឱ្យ ព្រោះកម្ពុជាក្រោមមិនមែនបាត់បង់នៅក្នុងជំនាន់លោកធ្វើជានាយករដ្ឋមន្ត្រីនោះទេ។
ថ្លែងនៅក្នុងពិធីបើកសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៣ នាព្រឹកថ្ងៃទី០២ ខែមីនា ឆ្នាំ២០២២ បុរសខ្លាំងកម្ពុជា លោក ហ៊ុន សែន អះអាងដោយចោទជាសំណួរថា ហេតុអ្វីបានជាចង់ឱ្យលោកទៅយកកម្ពុជាក្រោមវិញនោះ? ព្រោះអីទឹកដីកម្ពុជាក្រោមបានបាត់បង់តាំងពីលោកមិនទាន់កើតម្ល៉េះ។
លោកបន្តថា បើអ្នកណាពូកែចង់បានកម្ពុជាក្រោមមកវិញនោះ លោកសូមឱ្យពួកគេទៅយកខ្លួនឯងទៅ រូបលោកនឹងជួយធ្វើក្ដារមឈូស និងកប់សពឱ្យផងដែរ ដោយថារឿងកម្ពុជាក្រោមនេះ លោកបាននិយាយតាំងពីឆ្នាំ១៩៩៥ និងឆ្នាំ១៩៩៦។
ការប្រកាសរបស់លោកនាយករដ្ឋមន្ត្រី ហ៊ុន សែន នៅថ្ងៃពុធ ទី២ មីនា នេះ ធ្វើឡើងបន្ទាប់ពីមានអ្នកចូល Comment លើហ្វេសប៊ុករបស់លោក ដោយស្នើឱ្យលោកលើកទ័ពទៅយកទឹកដីកម្ពុជាក្រាមមកវិញ។
លោក ហ៊ុន សែន ដែលជាមេដឹកនាំលើកបន្តុបដោយវៀតណាម បានលើកឡើងទៀតថា រឿងទឹកដីកម្ពុជាក្រោមជារឿងអតីតកាលដែលបានកន្លងទៅផុតយូរណាស់មកហើយ សូម្បីតែពិភពលោកក៏បានគូសផែនទីរួចទៅហើយដែរ ពាក់ព័ន្ធនឹងការហោះហើរយន្តហោះនៅលើអាកាសក៏បានកំណត់ត្រឹមត្រូវ ហើយថាព្រំដែនកម្ពុជាមានតែនៅប៉ុណ្ណឹងទេ។
អ្នកវិភាគនយោបាយ សង្គម និងអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ (PMD) លោក គឹម សុខ លើកឡើងថា តាមពិត មេដឹកនាំរដ្ឋាភិបាលគួរណាស់យល់អំពីនយោបាយប្រតិបត្តិ ដែលត្រូវទទួលខុសត្រូវចំពោះជាតិ ចំពោះពលរដ្ឋ និងចំពោះប្រវត្តិសាស្ត្រជាតិ ប៉ុន្តែបែរជាបាចសាចសារអសីលធម៌ ធ្វើក្ដារមឈូសផ្ដល់ឱ្យពលរដ្ឋជាតិឯង គំរាមបំបាក់ស្មារតីពលរដ្ឋដូច្នេះទេ។
លោកចាត់ទុកភាសានយោបាយនេះ ក៏មិនខុសអ្វីពីលោក ហ៊ុន សែន បង្ហាញអំពីទឹកចិត្តរបស់គាត់ធ្វើក្ដារមឈូសចិត្តសាស្ត្រនយោបាយកប់វាសនាជាតិខ្មែរនោះដែរ។ លោកថា ទស្សនៈរបស់ពលរដ្ឋប្រាប់ឱ្យលោក ហ៊ុន សែន ធ្វើសង្គ្រាមយកកម្ពុជាក្រោមមកវិញនោះ គឺជាបង្ហាញទឹកចិត្តស្រឡាញ់ទឹកដី និងស្រឡាញ់ជាតិរបស់ពលរដ្ឋខ្មែរ ដែលនៅតែស្ដាយស្រណោះទឹកដីជាតិខ្មែរ។
ទោះបីជាការប្រើពាក្យ «ធ្វើសង្គ្រាម» របស់ពលរដ្ឋ ដូចជាខុសកាលៈទេសៈត្រូវនិយាយ តែគ្មានការសង្ស័យទេ គឺពលរដ្ឋខ្មែរមានស្មារតីរឹងមាំណាស់ក្នុងការការពារទឹកដីជាតិ។
ទឹកដីកម្ពុជាក្រោមដែលបារាំងហៅថាដែនដីកូសាំងស៊ីន (Cochinchine) មានចំនួន ២១ខេត្ត-ក្រុង ត្រូវបានបារាំងកាត់ទៅឱ្យវៀតណាម កាលពីថ្ងៃទី៤ ខែមិថុនា ឆ្នាំ១៩៤៩ នៅក្នុងអំឡុងពេលដែលបារាំងដាក់អាណានិគមលើកម្ពុជា ដែលចុះហត្ថលេខាដោយប្រធានាធិបតីបារាំង លោក វាំងសង់ អូរីយូល (Vincent Auriol)។
ទោះបីជាទឹកដីខ្មែរកម្ពុជាក្រោមស្ថិតក្រោមអាណានិគមវៀតណាមគ្រប់គ្រងក៏ដោយ ប៉ុន្តែពលរដ្ឋខ្មែរក្រោមនៅតែចាត់ទុកខ្លួនឯងជាខ្មែរដដែល ហើយពួកគេតែងតែនាំគ្នាប្រារព្ធខួបបាត់បង់ទឹកដីខ្មែរក្រោមផងដែរ៕