35 C
Phnom Penh

លោក កឹម សុខា ត្រៀម​ខ្លួន​ចរចា​ជាមួយ​លោក ហ៊ុន សែន ដើម្បី​ស្ដារ​លទ្ធិប្រជាធិបតេយ្យ​ឡើងវិញ

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​ប្រឆាំង​ដែល​កំពុង​រង​ការ​រឹតត្បិត​សេរីភាព លោក កឹម សុខា អះអាង​ថា លោក​បាន​ត្រៀម​ខ្លួន​រួចរាល់​ហើយ​ក្នុង​ការចរចា​ជាមួយ​លោក ហ៊ុន សែន ដើម្បី​ស្ដារ​ឡើងវិញ​នូវ​លទ្ធិប្រជាធិបតេយ្យ និង​ធានា​នូវ​ការបោះឆ្នោត​នា​ពេល​ខាងមុខ​ប្រកប​ដោយ​សេរី ត្រឹមត្រូវ និង​យុត្តិធម៌។

លោក កឹម សុខា បាន​ប្រាប់​ទូរទស្សន៍ AlJazeera កាលពី​ថ្ងៃ​ទី​២ ខែ​មីនា ឆ្នាំ​២០២២ នៅ​មុន​ពេល​ចូលរួម​សវនាការ​លើក​ទី​៣២ របស់​លោក​ថា មេដឹកនាំ​បក្ស​កាន់​អំណាច​លោក ហ៊ុន សែន តែង​លើក​ពី​បញ្ហា​នៅ​ប្រទេស​ភូមា និង​វិបត្តិ​នៅ​ប្រទេស​អាហ្វហ្គានីស្ថាន តែងតែ​ជំរុញ​ឱ្យ​មាន​ការចរចា​ដោយ​សន្តិវិធី។ ដូច្នេះ វិបត្តិ​នៅ​កម្ពុជា​ក៏​ត្រូវតែ​មាន​ការ​ចរចា​ដោយ​សន្តិវិធី​ដែរ ជាពិសេស​ការ​ចោទប្រកាន់​លើ​រូបលោក​ដោយ​គ្មាន​ភស្តុតាង​អស់​រយៈពេល​ជាង ៤​ឆ្នាំ​មកនេះ។

លោក កឹម សុខ ព្រមាន​ថា សូម​កុំ​និយាយ​ថា​កម្ពុជា​គ្មាន​បញ្ហា ត្បិត​បញ្ហា​របស់​កម្ពុជា​ត្រូវ​បាន​អន្តរជាតិ​ដឹង​ឮ​គ្រប់​គ្នា​អស់​ហើយ ដូច្នេះ​ដើម្បី​ប្រយោជន៍​ជាតិ និង​ប្រជាជន កម្ពុជា​ក៏​ត្រូវ​ចរចា​ដោយ​សន្តិវិធី ក្នុង​នោះ​ត្រូវ​ដោះស្រាយ​នូវ​សេរីភាព​របស់​លោក ការ​រៀបចំ​ឱ្យ​មាន​បរិយាកាស​នយោបាយ​ល្អ​ប្រសើរ​សម្រាប់​ការចូលរួម​បោះឆ្នោត និង​រៀបចំ​អ្នក​បន្ត​វេន​ដើម្បី​រក​ភាព​រីកចម្រើន​ឱ្យ​កម្ពុជា​ទៅ​ថ្ងៃ​អនាគត។

មេដឹកនាំ​បក្ស​ប្រឆាំង​រូប​នេះ​បញ្ជាក់​ថា ការ​ចរចា​ត្រូវតែ​មាន​ការ​យោគយល់​គ្នា​ទៅវិញ​ទៅមក​ដើម្បី​ស្រាយ​វិបត្តិ​ដែល​ជាប់​គាំង​ទាំងអស់​នៅ​កម្ពុជា ដោយ​យក​ប្រយោជន៍​ជាតិ​ជាធំ។ លោក​ថា ការ​មិន​ចាកចេញ​ពី​កម្ពុជា​របស់​លោក​រហូត​ដល់​ពេលនេះ គឺ​ដើម្បី​ទន្ទឹង​រង់ចាំ​ការចរចា​ជាមួយ​មេដឹកនាំ​បក្ស​កាន់​អំណាច ដើម្បី​ផ្សះផ្សា​នយោបាយ​រវាង​ខ្មែរ​និង​ខ្មែរ​ឱ្យ​មាន​សាមគ្គីភាព​ឡើងវិញ។

លោក កឹម សុខា ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន​កាលពី​ថ្ងៃ​ទី​៣ ខែ​កញ្ញា ឆ្នាំ​២០១៧ ពី​បទ ឃុបឃិត​ជាមួយ​រដ្ឋ​បរទេស​តាម​ប្រសាសន៍​លោក​នាយករដ្ឋមន្ត្រី ហ៊ុន សែន។

ទោះជាយ៉ាងណា​ក៏ដោយ រហូត​មក​ទល់នឹង​ពេលនេះ​មាន​រយៈពេល​ជិត ៥​ឆ្នាំ​ហើយ ប្រធាន​បក្ស​ប្រឆាំង​រូប​នេះ​នៅតែ​មាន​ភាព​ស្អាតស្អំ ព្រោះ​លោក​មិនទាន់​ត្រូវ​បាន​តុលាការ​កាត់ទោស​ពី​បទល្មើស​ណា​មួយ​នៅឡើយ​ទេ ខណៈ​តុលាការ​ចេះ​តែ​បន្ត​សវនាការ​របស់​លោក​ដោយ​ពុំ​មាន​ការ​កំណត់​ពេលវេលា​ជាក់លាក់។

ជុំវិញ​បញ្ហា​នេះ អ្នក​វិភាគ​នយោបាយ និង​សង្គម បណ្ឌិត ឡៅ ម៉ុងហៃ ធ្លាប់​លើកឡើង​ថា ប្រសិនបើ​សំណុំរឿង​លោក កឹម សុខា ជា​សំណុំរឿង​ស្ថិត​ក្នុង​ការ​ចាត់ចែង​របស់​តុលាការ នោះ​ករណី​នេះ​នឹង​ត្រូវ​បាន​ជំនុំជម្រះ​កាត់​សេចក្តី​រួចស្រេច​ទៅ​ហើយ ប៉ុន្តែ​ករណី​របស់​លោក កឹម សុខា បាន​អូស​បន្លាយ​ពេល​ជំនុំជម្រះ​ក្តី​ជាបន្តបន្ទាប់ ដូច្នេះ​បញ្ហា​នេះ​ត្រូវ​គេ​ដឹង​យ៉ាង​ច្បាស់​ថា គឺជា​រឿង​នយោបាយ។

កាលពី​ចុង​ឆ្នាំ​២០២០ នៅ​ក្នុង​កិច្ចប្រជុំ​គណៈរដ្ឋមន្ត្រី​នៅ​វិមាន​សន្តិភាព លោក ហ៊ុន សែន ធ្លាប់​បាន​អះអាង​ថា ករណី​លោក កឹម សុខា អាច​នឹង​ត្រូវ​ពន្យារ​ពេល ៤​ឆ្នាំ​ទៀត គឺ​ត្រូវ​ពន្យារ​រហូត​ដល់​ក្រោយ​ការ​បោះឆ្នោត​ឃុំ-សង្កាត់​ឆ្នាំ​២០២២ និង​ក្រោយ​ការ​បោះឆ្នោត​ជាតិ​ក្នុង​ឆ្នាំ​២០២៣ ឯណោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស