29 C
Phnom Penh

លោក ស ខេង៖ យុត្តិធម៌​នៅ​ថ្នាក់​មូលដ្ឋាន​សំខាន់​ជាង​អំណោយ​ដែល​ចែក​ជូន​ពលរដ្ឋ

ដោយ ឌឹ ខេមបូឌា ដេលី

បទវិភាគ

អនុប្រធាន​គណបក្ស​ប្រជាជន​កម្ពុជា និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេង អះអាង​ថា បើសិនជា​បញ្ហា​ក្នុង​មូលដ្ឋាន​មិន​ត្រូវ​បាន​ដោះស្រាយ និង​គ្មាន​យុត្តិធម៌ ហើយ​មាន​ការ​ប្រកាន់​និន្នាការ​នយោបាយ​ទៀត​នោះ ទោះបីជា​យក​អំណោយ​ទៅ​ចែក​ជូន​ពលរដ្ឋ ក៏​ពួកគាត់​មិន​ជឿ​មក​លើ​គណបក្ស​ប្រជាជន​កម្ពុជា និង​រដ្ឋាភិបាល​ដែរ។

ថ្លែង​នៅ​ក្នុង​ពិធី​បិទ​សន្និបាត​បូក​សរុប​លទ្ធផល​ការងារ​ប្រចាំ​ឆ្នាំ​២០២១ និង​លើក​ទិសដៅ​ការងារ​ឆ្នាំ​២០២២ នា​ថ្ងៃ​ទី​៣ ខែ​មីនា ឆ្នាំ​២០២២ រដ្ឋមន្ត្រី​ក្រសួង​មហាផ្ទៃ លោក ស ខេង បាន​អំពាវនាវ​ដល់​រដ្ឋបាល​រាជធានី-ខេត្ត ត្រូវ​យកចិត្ត​ទុកដាក់​ដោះស្រាយ​បញ្ហា​ប្រឈម​តាម​សំណើ​សំណូមពរ​នៅ​មូលដ្ឋាន​ឱ្យ​បាន​ល្អ។

លោក​បន្ត​ថា ការ​ផ្ដល់​ជំនួយ​មនុស្សធម៌​ជា​សម្ភារៈ ជា​ថវិកា ជាដើម គឺជា​ការចាំបាច់​ដើម្បី​ដណ្ដើម​ជំនឿ​ទុកចិត្ត​របស់​ពលរដ្ឋ ខណៈ​ការ​បោះឆ្នោត​ជិត​មកដល់​ហើយ​នោះ ប៉ុន្តែ​អ្វី​ដែល​ជា​ការចាំបាច់​ជាង​នោះ​ទៀត គឺ​ការ​កសាង​យុត្តិធម៌​នៅ​មូលដ្ឋាន។ លោក​ថា រឿង​នេះ​គឺជា​បញ្ហា​គន្លឹះ​សម្រាប់​ការ​ដោះស្រាយ​នៅ​មូលដ្ឋាន បើ​គ្មាន​យុត្តិធម៌​ទេ ទោះបី​គណបក្ស​ប្រជាជន​កម្ពុជា​យក​អំណោយ​ទៅ​ជូន​ពលរដ្ឋ​ប៉ុន្មាន ក៏​គាត់​គ្មាន​ជំនឿ​នោះ​ដែរ។

លោក ស ខេង ជំរុញ​ឱ្យ​អាជ្ញាធរ​នៅ​តាម​បណ្ដា​ខេត្ត​នានា ដោះស្រាយ​ទំនាស់ ឬ​បញ្ហា​នៅ​មូលដ្ឋាន​ប្រកប​ដោយ​យុត្តិធម៌​ពិត ទើប​ប្រជាពលរដ្ឋ​សប្បាយ​រីករាយ។ លើស​ពី​នេះ លោក​ស្នើ​ដល់​មន្ត្រី​រាជការ​ទាំងអស់ បន្ត​បម្រើ​ពលរដ្ឋ​មិន​ប្រកាន់​និន្នាការ​នយោបាយ ដើម្បី​ស្វែងរក​ការ​គាំទ្រ​ពី​ពលរដ្ឋ​មក​លើ​ការ​ដឹកនាំ​របស់​រដ្ឋាភិបាល​កម្ពុជា។

ការ​លើកឡើង​របស់​លោក ស ខេង ធ្វើឡើង​បន្ទាប់ពី​ពលរដ្ឋ​នៅ​តាម​បណ្ដា​ខេត្ត​នានា​ដែល​កំពុង​រងគ្រោះ​ដីធ្លី​ពី​សំណាក់​អ្នក​មាន​អំណាច និង​អ្នក​មាន​ប្រាក់ សម្រុក​មក​រក​កិច្ចអន្តរាគមន៍​ពី​ក្រសួង​មហាផ្ទៃ និង​ក្រសួង-ស្ថាប័ន​ផ្សេងៗ​ទៀត​ឱ្យ​ជួយ​ដោះស្រាយ ក្រោយ​ពី​អាជ្ញាធរ​ថ្នាក់​ក្រោម​មិន​បាន​ដោះស្រាយ​ឱ្យ​ពួកគេ។ ក្រៅពី​ដោះស្រាយ​មិន​ចេញ​ហើយ កន្លងមក ក្រុម​អាជ្ញាធរ​របស់​រដ្ឋាភិបាល​ក៏​បាន​គំរាមកំហែង បំភិតបំភ័យ បង្ក្រាប ដោយ​បាញ់​កាំភ្លើង​លើ​ពលរដ្ឋ​កំពុង​រងគ្រោះ​ហើយ ថែមទាំង​ចាប់​ពលរដ្ឋ​ដាក់​គុក​ផង​ដែរ។

របាយការណ៍​សមាគម​ការពារ​សិទ្ធិមនុស្ស​អាដហុក ដែល​ចេញផ្សាយ​កាលពី​ថ្ងៃ​ទី​៨ ខែ​កុម្ភៈ ដោយ​មាន​ចំណងជើង​ថា «ការ​បន្ត​ចោទប្រកាន់-ការ​ចាប់​ឃុំ​ខ្លួន​ពលរដ្ឋ​ក្នុង​រឿង​វិវាទ​ដីធ្លី» ឱ្យ​ដឹង​ថា ក្នុង​ឆ្នាំ​២០២១ ពលរដ្ឋ​ដែល​រងគ្រោះ​ដោយសារ​ជម្លោះ​ដីធ្លី​ចំនួន​ជាង ១​ម៉ឺន ៧​ពាន់​គ្រួសារ ក្នុង​នោះ​មាន​ជនជាតិ​ដើម​ភាគតិច​ចំនួន ១៣៤៧​គ្រួសារ។

អាដហុក​បន្ត​ថា វិវាទ​ដីធ្លី​ធំៗ​បាន​កើន​ឡើង​ខ្ពស់​មាន​លក្ខណៈ​ធ្ងន់ធ្ងរ ដោយ​មាន​ការ​ប្រើ​អំពើ​ហិង្សា វាយ​បង្ក្រាប ចាប់​ខ្លួន ឃុំ​ខ្លួន និង​បាញ់​ប្រហារ​ទៅលើ​ប្រជាពលរដ្ឋ ខណៈ​ពលរដ្ឋ​ដែល​ត្រូវ​បាន​ចាប់​ខ្លួន​បាន​ធ្លាក់​ខ្លួន​ឈឺ​ធ្ងន់​ក្នុង​ពន្ធនាគារ ដូចជា​ករណី​វិវាទ​នៅ​ស្រុក​កណ្ដាលស្ទឹង ខេត្ត​កណ្ដាល រវាង​ក្រុមហ៊ុន OCIC ដែល​អភិវឌ្ឍ​ធ្វើ​ព្រលាន​យន្តហោះ​ថ្មី ខណៈ​ករណី​វិវាទ​នៅ​ក្នុង​ស្រុក​ស្អាង ក៏​មាន​សកម្មជន​ម្នាក់​ស្លាប់​ក្រោយ​ពេល​បញ្ជូន​ពី​ពន្ធនាគារ​ដល់​មន្ទីរពេទ្យ​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស