ប្រទេសកម្ពុជា ជាប់ចំណាត់ថ្នាក់លេខ១ ជាប្រទេសដែលមាននីតិរដ្ឋទាបបំផុតក្នុងចំណោមប្រទេសជាសមាជិកអាស៊ានទាំង១១ ហើយស្ថិតលំដាប់លេខរៀងទី១៤១ ក្នុងចំណោមប្រទេស១៤៣ នៅលើពិភពលោកសម្រាប់ឆ្នាំ២០២៥។
ពិន្ទុស្ដីពីនីតិរដ្ឋនេះ បង្ហាញថា ប្រទេសកម្ពុជា ជាប្រទេសដែលជាប់ចំណាត់ថ្នាក់លេខ៣ លើពិភពលោក ល្អជាងប្រទេសអាហ្វហ្គានីស្ថាន ដែលឈរលំដាប់លេខរៀងទី១៤២ ខណៈប្រទេសវេណេហ្ស៊ុយអេឡា ជាប់ចំណាត់ថ្នាក់លេខ១ គឺស្ថិតនៅលេខរៀងទី១៤៣ នៅបាតតារាង។
អង្គការគម្រោងយុត្តិធម៌ពិភពលោក World Justice Project (WJP) បានចេញផ្សាយសេចក្តីរាយការណ៍ស្តីអំពីនីតិរដ្ឋក្នុងប្រទេស១៤៣ នៅលើពិភពលោកនៅថ្ងៃទី៣០ តុលា នេះថា រាជាណាចក្រកម្ពុជា ជាប់ចំណាត់ថ្នាក់លេខរៀងទី១៤១ ចំណែកប្រទេសភូមា ជាប់ចំណាត់ថ្នាក់លេខរៀងទី១៣៨ ខណៈប្រទេសហ្វីលីពីន ជាប់ចំណាត់ថ្នាក់លេខរៀងទី៩៧ និងប្រទេសវៀតណាម ជាប់ចំណាត់ថ្នាក់លេខរៀងទី៨៣។ ចំណែកប្រទេសថៃ ជាប់ចំណាត់ថ្នាក់លេខរៀងទី៧៧ ខណៈប្រទេសឥណ្ឌូនេស៊ី ជាប់ចំណាត់ថ្នាក់លេខរៀងទី៦៩ ចំណែកប្រទេសម៉ាឡេស៊ី ជាប់ចំណាត់ថ្នាក់លេខរៀងទី៥៦។
ដោយឡែកប្រទេសសិង្ហបុរី មាននីតិរដ្ឋល្អជាងគេ គឺជាប់ចំណាត់ថ្នាក់លេខរៀងទី១៦ រីឯប្រទេសឡាវ ប្រទេសទីម័រលេស និងប្រទេសប្រ៊ុយណេ ដារ៉ូសាឡឹម មិនត្រូវបានរាប់បញ្ចូលក្នុងសេចក្តីរាយការណ៍នេះទេ។
ការកំណត់នីតិរដ្ឋល្អ ឬអាក្រក់ពីអង្គការគម្រោងយុត្តិធម៌ពិភពលោក World Justice Project (WJP) គឺផ្អែកទៅលើវិសាលភាពនៃការប្រើអំណាចពីមេដឹកនាំនៃប្រទេសនីមួយៗ ជុំវិញការធានានូវរដ្ឋធម្មនុញ្ញ ការអនុវត្តច្បាប់ផ្សេងៗ រួមទាំងការធានានូវសេរីភាពសារព័ត៌មានផងដែរ។
លើសពីនេះទៀត ក៏មានការវាស់វែងលើការប្រព្រឹត្តអំពើពុករលួយ ការបើកចំហសេរីភាពពីរដ្ឋាភិបាល ការបើកចំហសិទ្ធិជាមូលដ្ឋានរបស់ពលរដ្ឋ ការធានាបាននូវសន្តិសុខសណ្ដាប់ធ្នាប់សាធារណៈ និងកត្តាមួយចំនួនទៀតផងដែរ។
ចាប់តាំងពីឆ្នាំ២០១៦ មក ប្រទេសកម្ពុជា តែងតែរក្សាតំណែងជាប្រទេសដែលមាននីតិរដ្ឋទន់ខ្សោយក្នុងចំណាត់ថ្នាក់លេខ២ ក្នុងពិភពលោករហូតមក គ្រាន់តែខុសលេខរៀងទៅតាមចំនួនប្រទេសដែលគម្រោងយុត្តិធម៌ពិភពលោកបានកំណត់ក្នុងការស្រាវជ្រាវទៅតាមឆ្នាំនីមួយៗប៉ុណ្ណោះ។
ឧទាហរណ៍ជាក់ស្តែង ឆ្នាំ២០១៦ ឆ្នាំ២០១៧ និងឆ្នាំ២០១៨ ប្រទេសកម្ពុជា ជាប់ចំណាត់ថ្នាក់លេខរៀងទី១១២ ចំនួន ៣ឆ្នាំជាប់ៗគ្នា ក្នុងចំណោមប្រទេសទាំង១១៣។ ឆ្នាំ២០១៩ ជាប់ចំណាត់ថ្នាក់លេខរៀងទី១២៥ ក្នុងចំណោមប្រទេស១២៦។ ឆ្នាំ២០២០ ជាប់ចំណាត់ថ្នាក់លេខរៀងទី១២៧ ក្នុងចំណោមប្រទេស១២៨។
បន្ថែមលើនេះទៀត ឆ្នាំ២០២១ ជាប់ចំណាត់ថ្នាក់លេខរៀងទី១៣៨ ក្នុងចំណោមប្រទេស១៣៩។ ឆ្នាំ២០២២ ជាប់ចំណាត់ថ្នាក់លេខរៀងទី១៣៩ ក្នុងចំណោមប្រទេស១៤០ ហើយឆ្នាំកន្លងទៅថ្មីៗនេះ គឺឆ្នាំ២០២៣ និងឆ្នាំ២០២៤ ជាប់ចំណាត់ថ្នាក់លេខរៀងទី១៤១ ចំនួន ២ឆ្នាំជាប់ៗគ្នា ក្នុងចំណោមប្រទេស១៤២។
សេចក្តីរាយការណ៍នេះធ្វើឡើងក្រោយគេរកឃើញថាការអនុវត្តច្បាប់នៅប្រទេសកម្ពុជា បានធ្លាក់ចុះយ៉ាងធ្ងន់ធ្ងរ ដែលមិនអាចធានានូវនីតិរដ្ឋក្នុងប្រទេសនេះបាន។ ជាមួយគ្នានេះ គេមើលឃើញថារាជរដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា សព្វថ្ងៃនេះ កំពុងអនុវត្តបញ្ច្រាសទិសពីខ្លឹមសាររដ្ឋធម្មនុញ្ញនៃប្រទេសខ្លួនទាំងស្រុង៕
© 2025, ឌឹ ខេមបូឌា ដេលី. All rights reserved.