29 C
Phnom Penh

លោក យ៉ែម បុញ្ញឬទ្ធិ រិះគន់​អាជ្ញាធរ​ថា​មិន​ចាត់​វិធានការ​ជនជាតិ​វៀតណាម​បំផ្លាញ​ត្រី​បឹង​ទន្លេសាប

ដោយ ឌឹ ខេមបូឌា ដេលី

បទវិភាគ

ប្រធាន​គណបក្ស​កម្ពុជា​និយម លើកឡើង​ថា អាជ្ញាធរ​កម្ពុជា​នៅតែ​មិនព្រម​ចាត់​វិធានការ​ទាក់ទង​ទៅ​នឹង​ការ​ប្រព្រឹត្ត​បទល្មើស​នេសាទ​ទ្រង់ទ្រាយ​ធំ​នៅ​បឹង​ទន្លេសាប​ពី​សំណាក់​ជនជាតិ​វៀតណាម បើ​ទោះបីជា​លោក សុខ ទូច បង្ហាញ​ថា​ពួកគេ​ទាំងនោះ​កំពុង​ប្រព្រឹត្ត​ខុសច្បាប់​ក៏ដោយ

ការ​លើកឡើង​របស់​ប្រធាន​គណបក្ស​កម្ពុជា​និយម លោក យ៉ែម បុញ្ញឬទ្ធិ លើ​ទំព័រ​ហ្វេសប៊ុក​កាលពី​ថ្ងៃ​ទី​២០ ខែ​មីនា ឆ្នាំ​២០២២ បន្ទាប់ពី​ប្រធាន​រាជបណ្ឌិត្យសភា​កម្ពុជា លោក សុខ ទូច កាលពី​ពេល​ថ្មីៗ​នេះ​បាន​បង្ហាញ​ពី​បទល្មើស​នេសាទ​ទ្រង់ទ្រាយ​ធំ​នៅ​បឹង​ទន្លេសាប ដែល​ប្រព្រឹត្ត​ខុសច្បាប់​ពី​សំណាក់​ជនជាតិ​វៀតណាម។ លោក យ៉ែម បុញ្ញឬទ្ធិ បាន​សរសេរ​ថា កន្លងមក ប្រធាន​រាជបណ្ឌិត្យសភា​កម្ពុជា​បាន​បង្ហាញ​ពី​ការ​រក​ឃើញ​បទល្មើស​ទន្ទ្រាន​ដី​ព្រៃលិចទឹក​នៅ​បឹង​ទន្លេសាប​រាប់​ម៉ឺន​ហិកតារ ខណៈ​ថ្មីៗ​នេះ លោក​ក៏​បង្ហាញ​ពី​ការ​រក​ឃើញ​បទល្មើស​នេសាទ​ទ្រង់ទ្រាយ​ធំ​នៅ​បឹង​ទន្លេសាប​ទៀត។

លោក​បន្ត​ថា បញ្ហា​ទន្ទ្រាន​ដី​ព្រៃលិចទឹក និង​បទល្មើស​នេសាទ​ទ្រង់ទ្រាយ​ធំ​នៅ​បឹង​ទន្លេសាប វា​មិនមែន​ទើប​តែ​កើតឡើង​ថ្មីៗ​នេះ​ទេ ហើយ​ក៏​មិនមែន​ជា​រឿង​មាន​ចំនួន​តិចតួច ឬ​មាន​ទំហំ​តូចតាច​ដែល​អាច​យក​អ្វី​មក​បិទបាំង​មិន​ឱ្យ​ដឹង និង​មើល​ឃើញ​បាន​ទេ។

លោក យ៉ែម បុញ្ញឬទ្ធិ បន្ត​ថា ត្បិត​បញ្ហា​ទាំង​ពីរ​នេះ​បាន​កើតឡើង​យូរ​ហើយ​ក៏​ពិតមែន ប៉ុន្តែ​រដ្ឋាភិបាល​មិន​បាន​ចាត់​វិធានការ​ទប់ស្កាត់​ឱ្យ​មាន​ប្រសិទ្ធភាព​ឡើយ។ លោក​បាន​ចោទ​សំណួរ​ថា តើ​ក្រសួង ឬ​ស្ថាប័ន​ពាក់ព័ន្ធ​នៅ​ទីណា? ធ្វើ​អ្វី? តើ​ប្រសិទ្ធភាព​ក្នុង​ការ​ការពារ​ធនធាន​ធម្មជាតិ​បឹង​ទន្លេសាប​ខ្មែរ​ដែល​ចិញ្ចឹម​ខ្មែរ​រាប់​លាន​នាក់ និង​ជាច្រើន​ជំនាន់​មក​នោះ ស្ថិត​ក្នុង​កម្រិត​ណា? តើ​វិធានការ​ដោះស្រាយ​មាន​កម្រិត​ណា? តើ​រដ្ឋាភិបាល​អាច​ធ្វើ​ឲ្យ​មាន​តម្លាភាព និង​អាច​ធានា​បាន​ទេ នឹង​មិន​មាន​រឿង​នេះ​កើតឡើង​ទៅ​ថ្ងៃ​អនាគត?

ទោះបី​កាលពី​ចុង​ឆ្នាំ​២០២១ ប្រធាន​រាជបណ្ឌិត្យសភា​កម្ពុជា លោក សុខ ទូច បាន​បង្ហាញ​របាយការណ៍​ពី​ការ​រក​ឃើញ​បទល្មើស​ទន្ទ្រាន​ដី​ព្រៃលិចទឹក​នៅ​បឹង​ទន្លេសាប​រាប់​ម៉ឺន​ហិកតារ​នៅ​ខេត្ត​កំពង់ធំ ក៏ដោយ ប៉ុន្តែ​មកដល់​ពេល​នេះ មិន​មាន​ក្រសួង​ស្ថាប័ន​របស់​រដ្ឋាភិបាល​ណា​មួយ​ចុះ​ស៊ើប​អង្កេត​ចំពោះ​ភាព​មិន​ប្រក្រតី​នេះ​ឡើយ។ ភាព​មិន​ប្រក្រតី​នោះ មន្ត្រី​ជំនាញ​របស់​រដ្ឋាភិបាល​ដែល​ចុះ​ស្រាវជ្រាវ និង​ស៊ើប​អង្កេត​បទល្មើស​ទន្ទ្រាន​ដី​ព្រៃឈើ​រក​ឃើញ​ដី​ព្រៃលិចទឹក​តែ​ជាង ៣​ពាន់​ហិកតារ ខណៈ​លោក សុខ ទូច បាន​រក​ឃើញ​ជាង ១០​ម៉ឺន​ហិកតារ។

លោក សុខ ទូច មិន​ត្រឹមតែ​បង្ហាញ​ពី​ភាព​ខុសគ្នា​រវាង​របាយការណ៍​របស់​មន្ត្រី​ដែល​ចុះ​ស្រាវជ្រាវ និង​របាយការណ៍​របស់​លោក​ពាក់ព័ន្ធ​នឹង​រឿង​ការ​ទន្ទ្រាន​ដី​ព្រៃលិចទឹក​នោះ​ទេ ប៉ុន្តែ​កាលពី​ដើម​ខែ​មីនា នេះ លោក សុខ ទូច ក៏​បាន​បង្ហោះ​សារ​នៅ​លើ​ទំព័រ​ហ្វេសប៊ុក ដោយ​រិះគន់​ទូក​នេសាទ​ជនជាតិ​វៀតណាម ថា​ពួកគេ​មិន​ត្រឹមតែ​មក​រស់នៅ​លើ​ទឹកដី​កម្ពុជា​ទេ ហើយ​ថែមទាំង​កម្ទេច​ត្រី​នៅ​ក្នុង​បឹង​ទន្លេសាប​របស់​កម្ពុជា​ថែម​ទៀត​ផង។

អំឡុង​ពេល​ចុះ​ឃើញ​ជនជាតិ​វៀតណាម​កំពុង​ប្រើ​ឧបករណ៍​ឆក់​ត្រជាក់​ដើម្បី​ឆក់​ត្រី​នោះ លោក សុខ ទូច បាន​ប្រើ​កាំភ្លើង​បាញ់​គំរាម​ជនជាតិ​វៀតណាម​រូប​នោះ​ផង​ដែរ។ លោក សុខ ទូច ចោទ​ថា​ជនជាតិ​វៀតណាម​ទាំងនោះ​បាន​ប្រើប្រាស់​ឧបករណ៍​ឆក់​ត្រី​ខុសច្បាប់ និង​ប្រើប្រាស់​ទូក​លឿន​ដើម្បី​អូស​យក​ត្រី ទាំង​ត្រីស្រកា ទាំង​ត្រី​អត់​ស្រកា រីឯ​ត្រី​តូចៗ ពួកគេ​ប្រើការ​មិន​កើត ពួកគេ​បាន​យក​ទៅ​ធ្វើជា​ជី​ថែម​ទៀត។

យ៉ាងណាក៏ដោយ ត្បិត​តែ​មាន​ការ​លើកឡើង​ជាបន្តបន្ទាប់​ពី​បញ្ហា​ខាងលើ​នេះ​ក្ដី ប៉ុន្តែ​មក​ដល់​ថ្ងៃ​នេះ រដ្ឋាភិបាល​មិន​ទាន់​មាន​ចំណាត់ការ​ចំពោះ​ភាព​មិន​ប្រក្រតី និង​វិធានការ​ទប់ស្កាត់​អំពី​ការ​នេសាទ​ដោយ​ប្រើ​ឧបករណ៍​ខុសច្បាប់​ពី​សំណាក់​ជនជាតិ​វៀតណាម​ដែល​កំពុង​រស់នៅ​លើ​ទឹកដី​កម្ពុជា​ឡើយ។

បើ​តាម​សហគមន៍​រស់នៅ​ឃុំ​ឆ្នុកទ្រូ ស្រុក​បរិបូណ៌ ខេត្ត​កំពង់ឆ្នាំង ប្រាប់​សារព័ត៌មាន ឌឹ ខេមបូឌា ដេលី ថា ជនជាតិ​វៀតណាម​តែងតែ​ប្រើប្រាស់​ឧបករណ៍​ទំនើបៗ​ខុសច្បាប់​ដើម្បី​ឆក់​ត្រី​ក្នុង​បឹង​ទន្លេសាប ទើប​ធ្វើ​ឱ្យ​ត្រី​នៅ​ទន្លេសាប​ហិនហោច​ស្ទើរ​គ្មាន​សល់។ ពួកគេ​និយាយ​ថា ប្រសិនបើ​ពួកគេ​ត្រូវ​បាន​សមត្ថកិច្ច ឬ​អាជ្ញាធរ​ចាប់​បាន នោះ​ពួកគេ​ជាប់​ឃុំ​មិន​ដល់ ៤៨​ម៉ោង​នោះ​ទេ ត្រូវ​ប្រធាន​សមាគម​វៀតណាម​ប្រចាំ​កម្ពុជា​មក​ធានា​ខ្លួន​ពួកគេ។ ករណី​នេះ​ហើយ​ទើប​បាន​ជា​ជនជាតិ​វៀតណាម មិន​ខ្លាច ហើយ​បន្ត​ប្រើ​ឧបករណ៍​នេសាទ​ខុសច្បាប់​កម្ទេច​ត្រី​នៅ​ក្នុង​បឹង​ទន្លេសាប​របស់​ខ្មែរ​បន្ត​ទៀត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស