ពលរដ្ឋមានជម្លោះដីធ្លីជាមួយឧកញ៉ា ហេង ហ៊ុយ ជាង ១០០នាក់ នៅខេត្តកោះកុង បាននាំគ្នាឡើងមកប្រមូលផ្ដុំនៅមុខក្រសួងមហាផ្ទៃ ដើម្បីស្វែងរកកិច្ចអន្តរាគមន៍ និងឆ្លើយបំភ្លឺករណីជម្លោះដីធ្លីជាមួយលោក ហេង ហ៊ុយ ដែលជាមន្ត្រីនគរបាលពាក់ផ្កាយពីរ និងជាអ្នកមានងារជាឧកញ៉ាផងដែរ។
ពលរដ្ឋដែលឡើងមកដាក់ញត្តិ និងមកបំភ្លឺនៅក្រសួងមហាផ្ទៃ នាថ្ងៃចន្ទ ទី២៨ មីនា មកពីសហគមន៍ចំនួន៣ នៃស្រុកបុទុមសាគរ និងស្រុកស្រែអំបិល។ សហគមន៍ទាំង៣ ដែលទៅប្រមូលផ្ដុំនៅមុខក្រសួងមហាផ្ទៃ ក្នុងនោះមានសហគមន៍១៩៧ សហគមន៍ព្រលាន និងសហគមន៍៧៦៦។
តំណាងសហគមន៍១៩៧ អ្នកស្រី ដេត ហួរ ប្រាប់សារព័ត៌មាន ឌឹ ខេមបូឌា ដេលី នៅថ្ងៃទី២៨ មីនា ថា ការឡើងមកភ្នំពេញរបស់ពួកគាត់នាថ្ងៃនេះដោយសារតំណាងរបស់ពួកគាត់ចំនួន ១៣នាក់ត្រូវឆ្លើយបំភ្លឺនៅក្រសួងមហាផ្ទៃ បន្ទាប់ពីពលរដ្ឋបានដាក់បណ្ដឹងកាលពីខែសីហា ឆ្នាំ២០២១ ដោយប្តឹងឧកញ៉ា ហេង ហ៊ុយ ពាក់ព័ន្ធជម្លោះដីធ្លីស្ថិតក្នុងភូមិតានី និងភូមិឈូក ឃុំជីខលើ ស្រុកស្រែអំបិល ខេត្តកោះកុង។
អ្នកស្រីបន្តថា លោក ហេង ហ៊ុយ អាងតួនាទីជាមន្ត្រីនគរបាលពាក់ផ្កាយពីរ បានគប់គិតគ្នារំលោភយកដីពួកគាត់ជាង ១២០០ហិកតារ ហើយថែមទាំងដើរគំរាមកំហែងពួកគាត់មិនឲ្យធ្វើការតវ៉ា រួមទាំងប្រើប្រាស់ប្រព័ន្ធតុលាការដើម្បីប្ដឹងពួកគាត់ថែមទៀត។
តំណាងសហគមន៍១៩៧ រូបនេះបង្ហាញក្ដីសង្ឃឹមថានឹងទទួលបានដំណោះស្រាយ បន្ទាប់ពីក្រសួងមហាផ្ទៃ បានហៅពួកគាត់មកបំភ្លឺក្រោយពីទទួលបានបណ្ដឹងពលរដ្ឋ ខណៈកន្លងមក ក្រសួងមិនដែលកោះហៅពួកគាត់មកសាកសួរបែបនេះឡើយ។
ក្រៅពីសហគមន៍១៩៧ នៅថ្ងៃដដែលនេះក៏មានសហគមន៍ព្រលានយន្តហោះបាននាំគ្នាប្រមូលផ្ដុំដាក់ញត្តិនៅក្រសួងមហាផ្ទៃដែរ ដើម្បីសុំអន្តរាគមន៍ពីក្រសួងមហាផ្ទៃឱ្យជួយដោះស្រាយវិវាទដីធ្លីដែលបានអូសបន្លាយរយៈពេលយូរឆ្នាំណាស់មកហើយ។
បើតាមតំណាងសហគមន៍ អះអាងថា ក្រុមហ៊ុន ហេង ហ៊ុយ បានរំលោភយកដីធ្លីរបស់ពួកគាត់តាំងពីឆ្នាំ២០០៧ មកម្ល៉េះ ដែលនាំឲ្យពួកគាត់នាំគ្នាធ្វើការតវ៉ាជាបន្តបន្ទាប់។
កាលពីពាក់កណ្តាលឆ្នាំ២០១៩ ពួកគាត់ដែលជាពលរដ្ឋរងគ្រោះ ១៩៧គ្រួសារ បានឡើងមកតវ៉ានៅរាជធានីភ្នំពេញ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លី ប៉ុន្តែការអះអាង និងចោទនេះ ត្រូវបានលោក ហេង ហ៊ុយ ច្រានចោល និងបានប្តឹងតំណាងពលរដ្ឋទៅតុលាការផងដែរ។
តំណាងសហគមន៍១៩៧ អ្នកស្រី ដេត ហួរ អះអាងថា លោក ហេង ហ៊ុយ បានរំលោភយកដីស្រែចម្ការពួកគាត់ហើយ បែរជាមកប្ដឹង និងគំរាមកំហែងពួកគាត់គ្រប់រូបភាពដើម្បីកុំឱ្យពួកគាត់តវ៉ាថែមទៀត។
គិតមកទល់ពេលនេះ មានតំណាងពលរដ្ឋ ១០នាក់ហើយដែលជាប់បណ្តឹងនៅតុលាការ ក្រោមការប្តឹងរបស់លោក ហេង ហ៊ុយ ដោយពលរដ្ឋទាំងនោះរងការចោទពីបទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»៕